You are here: HomeColumnsSuanlyan TungnungSiha Tangmi

Siha Tangmi

Written by  Suanlyan Tungnung Published inSuanlyan Tungnung Friday, 14 March 2014 01:50
Siha Tangmi

As told to Suanlyan Tungnung

(First published in Zogam Today Magazine)

 

Tam tangmi ahileh REAL LIFE STORY, mun tuamtuam apan a kilakhawm ahi. Min, unma leh akigenkhate phuatawm ngen ahi jiah in, koitobang tam story toh kituah a umkha ium leh kingaisiam vai. Koima suh minsiat nading leh suh hasiat nading tupna ahisih chi thei kawm in TANGMI KHAT MAIMAI AHI chiin ana sim un chiin kang ngen hi. Koima’n zong Dawi leh kau gingtaatjieh, tahsang leh Pasian muonlou jieh a ana ngailou a, nouma sie-le-pha theina a anakoi dingin ki ngen masa hi. ~ Author

Lucy = Dawi le kau mat nu, Michael = a kemtupa, High school= akaina skul

 

A HING KIPAT DAN:

Kum 2006 apat in teacher cum warden dan in High School ah kana semtou hi. 2008 laivel ding in nungah melhoi tah Lucy (kum 17) kichi Pawl 10 simding in ahing kai hi. A damtheilou jieh in jingmawng devotion chivel kailou in ahing um gige hi. Lucy khu kipehpeh mai, khosih hiden,kantha(blanket) 7/8 teng ka silsah vang un aphatuam sih tamoh hi. Khum bang a ahing umtah in, Lucy khu Medical Doctor kava ensahta hi. Hinanleh doctor in “tambang natna pen natna naran ahisih, tulai a KHOLAI achite uh hi va” chiin ahing dawng hi.

 

KAU ANA HI:

Chimaw beidong a kaumtah in, skul gei ua teeng tangval khat in “tam pen KAU bawl ahi, Japanlou valei unla thakhat in dawnsah vai” chin angen ta hi. Khum Japanlou tawikawm a Lucy gei a kadin bep un “dawn sih vang” chi’n Lucy ahing utta sih hi. Thakhat a man a kadawnsah uleh hing kipeeh pai hi. Alaw didan umtuamlou chi’n DISCHARGE ding in kangen a, hostel lam ah ka pui ta hi. Kenjong khum jan ka umpi leh naupang bang in ahing kapjel a, hulou kal in kun dedu in bangma genlou in a umhi. Naupang bang a um ahichiah chin kenzong “ Lucy” kachi leh “Hoi” chiin ang dawngta hi. Keizong kipan in “Bang jieh a Lucy sung a hinglut nahiai ?” chia kadoh leh “Sunlai in tui kanget leh ahing pesih a hi” chiin ahing dawngta hi. Kenzong tui du nahi leh dawn ou chin tui kapia hi. Khumzou in SEN DAMDAWI ka dawnsah kia hi. Khumbep in achi ahing thah a “hing sil un” chi’n ahing kiphinta hi. Adeiteng kabawljou in, thakhat a adeehkhuh apat kasawn ahing kipua a, ahing thawdoh phet in Lucy ahing hikia tahi. Khum jan in 4 vei vel ka buai uhi.

 

DAWI LUTNA :

Hing phata chia lungmuang tah a ka umleh a jan 5na in sil kidang mama khat ahing umkia hi. Lucy alawihoi mama khat toh KOLHOUPAH louding in ava pawt uhi. “ka dipna” chi toh thakhat in lamgei ah akiliata hi. Alawmnu’n ahing hatphet in kenzong kadelpai hi. Kaubawl lai a kabawl bang in ka bawlkit ua, ann kaneehsah jou un ‘ana pawtkia maita’n’ chi’n kasawl doh kiatheita uhi. Hinanleh Lucy in a umdante bangma atheisih hi.

 

Jan sotnung nai 12 dingvel a kalupsuh leh Lucy ahing peengkia kaja hi. Ka delpai leh  dailenbuh mai ah zau sengseng amai phualkawm in ana tou hi. Khumbep in alawinu’n “ Nidanglai a bawlpa’n amatkia hita ven” ahing chikhia hi. Kenlah a history bangma theilou kahi jiah in hoitah in kadongta hi. “ Ka lawinu Lucy khu nidanglai a dawi in amat jel. Apate’n maibee/maibaate kung a apui unchin, khut a kigaahte (jantra) abawl uleh hingpha in skul hingkai ahi” chi’n ahing genta hi. Keizong ka sangnupang khat toh kipan in Bible kasim utoh, thumna kanei utoh Dawi ka chouta uhi. Lucy khu ani ni in achau deudeuta hi. A umdan lah dihtheilou, window lampou en in (blank stare) ihoupi lejong hing dawnglou in a umta hi. Kenzong dawibol ahi ding gingta in “Lucy” chiin awlin ka houpita hi. Gintaatloupi in ahing hamdoh a “Hichia ka umkhu maw, kei tuigal langkhat ah kading in, a gal langkhat lam ah mi asang a sang khat leh naupang asan a san khat ading uhi’n ahing dai uhi. Alianpen amai ka ettou leh kamu theisih hin ‘You are mine, Darling. I am the ruler of the world’ chi’n English in ang houpi hin, suang in ang sep jel uhi” ahing chikheta hi. Kenzong ‘dawi khu Englishte ade aw chi ngaisutna kanei ta hi. “Koi nahiei, bang ding a tamnu sung a hinglut a kou nahing suhbuai e, pawt inla kipai tan. Kou Pasian tate kahi uhi” chin English in ka houpi hi. Khumbep in Lucy, English hamtheilounu khu Britishte ham bang in ahing hamdoh a “ Hithei sinteh, Lucy khu kei a ahi, ama ka it hi” chi’n ahing dawng hi. Kenzong “Namin bang hi a, koi mongmong na hiei ?” kachi leh “ Kei Josh Curson, London mi kahi in kum 37 mi kahi. 1917 in kapiang hi” chiin ahing dawng hi. “Bangjiah a Lucy sung a hinglut a pawtdoh utlou nahiei ?” kachi kia leh “ Lucy khu mi lungsim siang ahi. Ken aneulai apatsa kana etkol ahi in right kanei hi. Nidanglai inzong pasal 5 vel in aman uhin, ken ka hutkhieh jel ahi” chiin ahing dawng a, inntung thakhat in ahing ging hi. Kenzong” Tu a inntung gingkhu nangbawl ama ?” kachi leh “Hima ing, nang chou chou ua kabawl hi” achi hi.

 

Lucy lah lum dingdeng, amit zong hahlou, akhut vel liihtoujel in nuimai jel. Kei leh kalawite agei ah katou ua, ka houpi jel uhi. Khumni jingkal in anu-leh-pa ka hansah ta hi. A pate hingpai thei juallou ahi jieh un, koupawl pen adawi toh ka kihou jel uhi.

 

LUCY NEULAI:

Aneulai in Lucy in anu loukuanna ah ava jui hi. Khum laitah in Josh leh alawite gamfang a avah laitah uh ana hikha laijang hi. Josh in Lucy lungsim siangthou dan amu bep in asung a teeng ding in alutta hi. Inn atuntah un Lucy khotheilou in abuai ngal a, akhua ua tangval te’n ajanha pijel uhi. Akhosih asanseng chiang in apum net jel ua, hinanleh Lucy in bangmalou tah in a sonkhedoh hiaujou hi. Naupang ding in hat asa thei mama ua, dawibawl hiding chin apan MAIBAA khat a ensahta hi. Maibaa in khut a kigaah jantra kichite khat a bulsah leh kum 2 sung vel ahing hoi a, skul ahing kaikia thei hamham hi. Hinanleh a jantra power abei bep in ahing buaikiata hi.

 

Josh in a umpilai (aneulai) in Lucy a deisah mama jiehin nidanglai a COMPOUNDER ichite ana jilsah hi. Atangpi in singjung-singna apatsa damtheina toh kisai ana jilsah hi. Ipu-ipate geen SINGLIMTA kichi natna chinteng sudamthei, michite zong thawsah theina zong ana ensah a, ana pia hi. Aneulai a dawi in aha lai in khum singte khu ahawlpai a, gamlah ah mulengzong kathei ding hi chiin gamlah apotdoh asawm jel hi.

 

NEXT ISSUE AH - Josh shi dan, Josh in Lucy amukia dan, London zinna etc.

Read 755 times
Login to post comments