You are here: HomeColumnsSuanlyan TungnungIndependence Day Zat Dan Toh Kisai Thukup

Independence Day Zat Dan Toh Kisai Thukup

Written by  Suanlyan Tungnung Published inSuanlyan Tungnung Thursday, 20 August 2015 13:18
Independence Day Zat Dan Toh Kisai Thukup

By: Suanlyan Tungnung

 

The 69th Independence Day lopna, Lamka mawltual a om ah siamsin naupang tamtak leh organization tuamtuam kigawm contingent 50 val bang Independence Day parade ah pang uhi. Huai naupangte parade apaina ua siam pen leh siamloupente prize kibang in District Administration in a piak ziak in tulai in social network tuamtuam ah Independence Day lopna toh kisai a demna muh zeuhzeuh in a om hi.. Rehearsal neihlai a Rs. 500.00 kipia toh sim in parade a pang contingent teng in Vai dangka Rs. 1000.00 loh pha uhi. Sum keleu hilou in, tutung District vaihawm te’n parade a siampen 3na tan certificate hoihtak pia uhi. District Headquarter a hiai bang a sum taksapna lianpi a om lai in, sub-division piching a puan hinailou Mualnuam a Independence Day lopna a parade kidemna a 1st late Rs. 3000.00, 2nd late Rs. 2000.00 leh 3rd late Rs. 1000.00 piak in om uhi.

 

Parade a prize ding fixed a hikei a, prize deih ziak a pang le om di’n ka gingta kei. Himahleh a siampen leh a minpu a pangte prize money a hong kibat hial pen, mi kuapeuh etdan leh tehdan in thil kilawmlou a hong suak ta hi. District a sum tasamlua a beidong isak leh lasate (artiste) bang Rs. 1000.00 piak in om theijel hi. Naupang tampi in Churachandpur District Headquarter a the 69th Independence Day lopna district dangte sang mah a thupizaw leh hoihzaw ahih na di’n class natawm lalou, azu-asa thuak in parade zil uhi. Studentte sang a program adia poimoh pen hilou, special number dia chial a om artiste-te thupi bawlzaw ihi diam chih bang lungsim ah hong om thei hi. Huaibanah nitak lam in DC bungalow ah ‘kei kahi’ kichi deuh teng in ‘party’ nei in, niang-leh-tai in om uhi. Party adia sum bikhiahsa om ahi diam or mi khat in mahni kiphal ziak hiam, kuate hiam mai-et ziak a sum tamkuam tak thohkhia ahidiam chih lah kuamah theih but ahi kei. 

 

Thil paisa ngaihtuah a buailou in, maban a Republic Day hiam Independence Day hong tung dingte zat ding dan neuchik kheng lamdang thei le’ng bang achi dia ? A poimoh tuamtuam tam mahleh hiai a nuai a teng beek bawlkhiat/sepkhiat theih hileh :

  • Independence Day hiam Republic Day chiang in naupangte adia kidemna (literary competition) sai (conduct) hileh bang achi dia ? Etsakna in Class VIII to X simlaite adi’n essay writing competition bang, Class XI to Graduate simte adi’n academic article writing competition bang om leh naupangte maban a di’n hoih ding hi. Huchimah bang in a class niam lamte a di’n slogan, spot painting, recitation chih khawng kibawl leh.
  • Hiai nipoimohte zatna ah solkal, voluntary organization, etc. a nasem hoih tungtuang diakte pahtawina lai piak in om sek hi. Lam tuamtuam a a tungtuang diakkholte pahtawi ihih ngal leh ei district sung a school omte a kai, board/university exam a passedte lak a mark tam mu penpente bangle pahtawi sam leng bang achi dia ? Etsakna in Class X, XII leh Graduate zil/sin theihna school ei district ah om hi. Huai ah board 2 – CBSE leh State om hi. Sum kidaihlou lua bang ahihtak leleng stream tuamtuam (post matrict) enlou in, ei district pumpi a mark mu tampente pahtawi thei lehang.
  • Solkal a khuampi poimoh pente lak a 4na (the 4th estate) ana kichi hial media lamte bangle pahtawi thei jel sam in, ei district mi-leh-sa sports a tungtuang diakte bangle mangngilh kei thei lehang chih huai petmah hi.
  • Education department apat teacher hiam, office a semte’n pahtawina sang jel mahle uh private school/college a sem teacherte pahtawi in om ngei khollou uhi. Igam a literacy rate a hoihna ziak government schoolte ziak kia hilou a, private schoolte ziak zong ahi hi. Huaiziak in private school a sem teacherte nelhsiah gige theih hong hilou hi.

 

Hiai ni poimohte a contingent tampi parade bawl a kizuih sang in, a tung a kigen point 3te sepsuah hileh sum sen le a tawmzaw dia, mipi leh igam a di’n a phatuamzaw ding hi. Huchilou a contingent tamthei pen kizuih a, sum tawmchik muh leh ‘teeltuam’ a om mi khenkhat in ‘party’ abawl touhjel ua leh sum le a bei dia, bangmah khantouhna le a om tuankei ding hi. Huai thamlou in, tukum mah bang in District Administrator len penpen in ‘personal attack’ a tuak toujel zawmah dia, ki-itna sang in kisiatna a hong tung baihzaw ding hi.

 

|||18082015|||

Read 486 times
Login to post comments