You are here: HomeColumnsSuanlyan TungnungTution Fee Peding Maw? Pelou Ding?

Tution Fee Peding Maw? Pelou Ding?

Written by  Suanlyan Tungnung Published inSuanlyan Tungnung Saturday, 10 October 2015 22:43
Tution Fee Peding Maw? Pelou Ding?
~By: Suanlyan Tungnung
 
 
Manipur State Assembly in singtang mite’ khuallou hial a bill 3 ana passed ziak in hill districts, adiak in Churachandpur ah school khak in om a, kha khat sung bang naupangte school kailou uhi. Students Organization tuamtuam panlakna ziak in 5thOctober apat school kai kipan thak nawn hi. Nidang dan bang a kai hinaikei mahle uh, a bul a hong patthak himhim uh kipah huai kasa hi.
 
 
Naupangte school kai kipahpih huai sim bang mahleh khenkhatte a di’n lungkhamna tuntu  khat a suak hi. September kha sung sum loh theihna taktak lah omlou ahihna ah niteng kilohtawm a nek zongte a di’n a haksa mahmah hi. Buaina ahong kipatma in niteng a nektawm ding zon bangle baihlam deuh hi. Rickshaw tawlte a ding in puak ding om deuh a, mehzuakte a ding in zuak ding tam deuh hi. Mistry hiam ‘jugali’ na semte a ding inle kilohna baihlam deuh hi. Sum muhtheihna lampi om thei ahihziak in nektawm ding ban ah school fee ding tan zong muhsuah baihlamzaw deuh chih ding ahi. Himahleh bill 3 ziak in igam a hong buai a, total bandh ahong om nung in sum loh theihna ding a hong tawm a, nek-leh-tak haksatna thamlou in sum batlakna ding natawm mu joulou mi kitam mahmah hi.
 
 
Lamka khosung a ‘Private school teacher’ a sem atamzaw mi hausa ahikei uhi. Buai sung in teacher te’n le sum muhna tuam neilou ahih ziak un nek-leh-tak ah haksatna lianpi ana tuak sam uhi. School kihon chia khaloh muh ding kinepna toh bat in a poimoh teng ana la in ‘suan kisamlou’ in ana hing uhi. Neihlouh ziak a milak a ‘smart joulou’ deuh a ahong kilat chiang bang un khenkhat in theihsiamlou in, ‘below dignity’ dan in ana koih mawk uhi.  Veng chih a organization/association teng inlah ‘teacher’ khat hisam ve’n chi in fund drive hiam sum donna himhim ahihkei leh committee tuamtuam ah muantheih khat in ki pangsak lai hi. Sum muhna dang neilou, private teacher a gin om tak a semte ziak a igam a siamsinna hoih ahihlam mangngilh kha bang tam ahidiam chih sim in a om hi. Inn a annhuan ding omlou kawm a naupangte lungluttak a lai hilh ichih thil haksa mahmah khat ahi hi.
 
 
Ahihleh, nu-leh-pate haksatna ithei ua, teacherte haksatna bangle mangngilh tuanlou ihihna ah tutung buaina ziak a school kaitheilou a kha khat bang  aki om sung  school fee piak ding leh piaklouh ding thu ah bang ngaihdan na nei a ? Mi khenkhat a di’n kha khat tution fee piak ding haksa hetkei mahleh khenkhat adia haksa mahmah ahi chih thei kawm in, kha khat sung khaloh muhlouh pen teacher khenkhat a di’n poi kholkei mahleh khenkhat adia haksa petmah ahi chih le mangngilh tuan kei ni. A pejou te’n pia henla, a pejoulou te’n piak dah hen chi hita lehang  i society sung a class khenzakna (a hausa leh a zawng) chituh i suak jel dia, school kailouh sung fee kichi himhim pedah mai ni chijel talehang i teacher genthei mahmahte gelgawtna a hikha jel ding hi.
 
 
School kailouh sung in school management lamte a di’n expenditure tawm deuh ding hi. Alou theilou a expenditure omthei khat ahihleh staff salary ahi. “School nei atamzaw mi hausa ngen ahi ua, kha khat loh amau pocket apat apiak uh poiken teh” chih ngaihdan nei bangle a om ding. Naupangte maban ding geelna leh phattuam nadia school infrastructure development, teaching material leh teaching aid tuamtuamte ana buaipih sam uh ahihna ah school neite bangle sumbat hau bang ana om thei hi. A meetlua hileh Lamka a school khenkhat a beimang (closed) ding gintat a huai kei.
 
 
Huaiziak in, nu-leh-pate, teacherte, school neite leh studentte lungkim theihna ding lampi khat ahihleh tution fee 100 % lalou in, Churachandpur District Private School Association (CDPSA), parents organizations leh students organizationte kihou khawm in tutung fee bangzah hiam (say 50%) kiamsak hileh bang achi dia ? School nei lamte’n le “Kou ut thu a school khak kahi kei ua, mipi ziak ahi” chilou in, education ngai poimoh a mipi phattuam nading geel ahih ziak un neuchik ana theisiam le uh. Nu-leh-pa te’n le “School ki kailou, tution fee piak ngai kei. A seplouh man uh piak a ngai kei” chih ngaihdan neilou in, teacherte khualna toh tution fee piak ding pen ahithei tan in piakchiat sawm lehang ahoih ding hi. School neite leh teacherte bang hong thadah mawk le uh ei society adia supna lianpi hong hithei jel ahihna ah kitheisiam tuah chiat lehang maban khangsawnte a di’n a hoihzaw ding hi.  
 
 
Imphal a Joint Students’ Coordinating Committee (JSCC) in school a kailouh sung uh (July & August) tution fee 30% chiat lading in private school chih a ngetna bawl ua, khenkhat in 100% a lak teitei ziak un a school office uh kalhsak uhi.
 
 
|||10102015|||
Read 872 times
Login to post comments