You are here: HomeColumnsSuanlyan TungnungA Discourse on Different Leadership Skills

A Discourse on Different Leadership Skills

Written by  Suanlyan Tungnung Published inSuanlyan Tungnung Friday, 27 November 2015 01:07
A Discourse on Different Leadership Skills
     “#HOUTHOU ka chih teng le HOUVEKLOU ahi”
-        Muana Guite
 
Written by: Suanlyan Tungnung
 
Thupatna:
PADAN ARAM VISION kichi facebook group ah ki chiamnuih in, ut dandan in ki soisa mahle ung, ka Pu Muana Guite toh khat vei SERIOUS deuh in tulai 3 bills toh kisai a mi tamtak in PEOPLES’ MOVEMENT achih uh ka houlim kha uhi. Houlimna ah lamkaihna (leadership) toh kisai tampi ka genkhawm ua, kei chauh in ka phattuampih ding ka utlouh ziak in, hiai article ah ka hon gelh hi.
 
 
Houlimna:
MG = Muana Guite, SL= Suanlyan Tungnung, TML = Thangminlun
 
SL: Ahihleh Pu Muan, nang tutung buaina toh kisai a lamkaite (Innpite, JACte, JPOte, Mothers Association kichite) hon pi dan/ lamkaihdan  uh bangchi nasa ? A hon pii dan uh dik nasa hia ahihkeileh ‘hichizaw deuhleh chih na nei hia ?
MG: Lamkai hihna toh kisai gending tampi om inchin, lamkaihdan le chi tampi om ahi. I lamkaite uh mohsak pahlou in, lamkaihdan toh kisai kon gen zek di
Lamkai ichih khah mipi’n “Hiai pa/nu muanhuai hiveh o, pil hiveh o, siam hiveh o” chi a iteel ahi. Himahleh bang lampang a a muanhuaina uh, a siamna uh, a pilna uh chih theih masak poimoh kasa petmah. Etsakna di’n: Football pek siam mahmah, lasak siamlou khat LAPU/ La lamkai di’n zang mawk lehang bangchi’n I khangtou dia ? Pilna-Siamna ichih a zatna ding mun om inchin, huaimun toh kituak hetlou a mipil khat lamkai a ipansak mawk leh ma sawnlou ding ihi.
 
 
SL: Pu Muan, na gen dan ka theisiam het kei.
MG: Lamkaihna toh kisai in, COORDINATION siam deuh mi a om. Huaite khah a pilpen leh siampente hikhollou unchin, THUPUKNA kichiantak lathei, memberte apat thil/ ngaihdan hoih pipi kaikhawmtheite ahi uhi. A mau khah mi tangpi theih di’n “natural leader” ahi mai ve ua. Himahleh huaibang siamna neite natawm in amau deihdan hiam ahihkeileh mi ngaihdan diktak theichian masalou a, kin-le-buang a thupukna alak hehu chiang un, buaina a hong piangthei hi. Etsakna: Thupukna kilak khit nung a, ngaihdan hoihzaw leh zuihtheihzaw ding a hong om leh la ut non bikbeklou.
 
 
SL: Lamkai hihna huai mah hilou amaw ? A dang omlai hia ?
MG: Maban pai dingdan lampi hoihtak, kichiantak a atheih ziak a midang taina, muhdahna poisalou, mi ngaihdan ding toh buailou lamkai bangle om a, huaite khah SHAPERS akichi hi. Hiai dan hihna nei lamkaite’n mipite tha apethei ua, maban sawnna dia kalbi hoihzaw bangle a posuah thei uhi. PRESURE leh RISK in a nnasep ding a subuai kei. Himahleh a thuneihna uh ahong zatkhial ua, a member pihte thu lalou a, khenkhat bang a hong nuainet khak chiang un buaina a piang thei veve hi. Khat veivei bang lungtup a tangtun na dia a zuihding ‘process’ ngai poimohlou in,  mi khenkhat toh kituak hetlou eive ua. Goal thupi ngaih, hilele a process ngai poimohlou kitam hiveh o.
 
 
SL: Himah e, Pu Muan. Mi khenkhat bang lamkai thei le hilou, ut le utlou zawmah uh. Hilele mi nasep teng hong en unchin, ngaihdan bang hong gen zauzau lai uh. Huaite mahmah hilou di hia ‘internal crisis’ kipat sek na ?
MG: Sep ding dan, maban panlak ding dan, hunpaisa a panlakdan khawng gen thil poimoh petmah ahi. Hichi dan hong genthei khenkhat in diklouhna (a paisa or maban a hong tung thei) amuh ualeh analyze unchin, huai bawlhoihna dia proposal (ngaihdan) hong gen uh hizaw ahi. A mau khah MONITOR dia muanhuai penpente ahi uh. Thupukna diklou, kinlua, sepsuah theih chiahlouh chihkhawng a dalthei ua, thil himhim a hoihna leh a hoihlouhna buktuah pah unchin, ‘hichizaw deuh leh’ chih hon genthei uhi. Makaitu muanhuai hihna toh kisai a quality hoih petmah khat ahi. Eilak a zaw ‘overly critical’ kitam inchin, mi ngaihdan teng amau ngaihdan toh akituah kei leh ‘thulaklouh’ dan a koih pahpah mawk hang a ‘solution finding’ malak-salak a ‘judging or degrading even good ideas’ chih lam hizaw ve hang o. Huaichauh hilou, ngaihdan natawm le gen utlou, social media a lah hangsan petmah kitam.
 
 
Thangminlun hong nui lut heuhau…….
SL: Ngaihdan hoih pipi hau memot mawk in, gen zuauzuau thei lehang le, eilak a zaw a semtu ding mah kisam a thei hiveng o.
MG: Ngaihdan nei teng a semthei hiam a sem siam hilou uhi. Ngaihdan (ideas) tuamtuam ngaikhia in, panlak ding dan gel pah vengveng, lam tuamtuam a panla thei, a sepsuah lam siam chih bangle lamkai hihna dia chitna khat ahi. Thupi in, houchik hita lele hichi dan quality nei te’n sepsuah hau ut deuh uhi. Amau khah IMPLEMENTOR chini. Hilele khat veivei midang te’n ngaihdan tam a sun luat chiang uhiam, a soisel chiang uhiam, rules and regulation ichi hiam a ahong buai chiang un, bangmah sepsuah taktak a nei thei tuankei ve ua. Ei pau in genle “Mi gensiat /soiselna doujoulou” deuh pawl IMPLEMENTOR a apan chia leitung BUAI akhu.
 
 
SL: Na gen dan chuh IMPLEMENTOR dia hoihte bang COORDINATOR a koih, MONITOR dia hoihte bang SHAPER etc. a koih, lamkai hichiat, hilele ei mimal siamna line zuikhalou hilim ve hang o maw ?
TML: Mohpuakna kipiak chia “kei siamzawng hikei” chi ngamlou ihizaw diam ? Tulaitak bang en lehang TEAM WORKER deuh bangle poimoh ihi. Football bangle player khat-le-nih siamziak chauh a hat hilou inchin, alak ua mi kaikhawm/huaikhawm thei, siatna a omdek chia le bangchi dan hiam a ngaihdan kibang khollou tele pangkhawm sak thei lamkai le ki poimoh in ka thei.
 
 
SL: Himah e. Thil himhim a pat siam hang a, a topna a EK SUAK dimdem sak theih eimah ve.
MG: Huaiziak tak a THE COMPLETER/ FINISHER kichi lamkai bangle poimoh jel. Hichi dan quality nei lamkai te’n khah thil geel detdet unchin, nna khat peuhpeuh poimoh leh kin, poimoh hilele kin ngailou (time management) etc. chihdan a khen ua, nna apat uh a topna ding tan mukhol hileh kilawm top ahi uh. Lamkai dangte bang panpih pha mahmah eive ua. A ma un pawlpi paidan direction pethei lai uh hi ei. Mi atamzaw in thil ituah dandan a bawltou, semtou, phutou mawk hang a, atopna tung theilou ihi di uam ? Ahihkeileh ilamkaite lak a FINISHING bawl siam omlou ahizaw diam ?
TML: Himah tham. Eilam te’n THINK TANK ichih sek uh, RESOURCE INVESTIGATOR bangle poimoh lai ihi. Huaite’n pawlam apat ngaihdan hoih pipi bang, pai dingdan plan leh strategy tuamtuam bang hon pawlut unchin, pankhawm pih dia lawmhoih bawlna (liaison) a poimoh petmah lamkaite ahi uh.
SL: Kei muhdan in eilam a lamkai hiam lamkaihna (leadership quality) ichih chiang in mipite’n hiai a tung a point tuamtuam na gente uh mi khat in neivek dia koih mawk bang sa kahi. Huaizoh, lamkai khat in thil teng theih ding, sai vek ding chih hileh kilawm. Mohpuakna khenkhat lamkai dangte piak ahih chiang in ‘DELEGATION with conditions but without trust’ bang nasa uhia ?
 
 
Houlim nuam mahleh sutzop thak theih ahina chi in ka kikhen phot ua, kipah thu gen kawm in “Nang quality bang pen ahia chih hon theichian in” chih HOMEWORK toh ka kikhenta uhi.
 
 
Thukhitna:
Lamkai a pan thil baih ahikei chih ihaihkei hial uh. Lamkai te’n le quality teng neiveklou ahihna uah “Kuape’n in banglam a semsiam (semthei chauh hilou) mah de o ?” chih gel detdet masak a poimoh hi. Huaiban ah mipite’n le PANPIHTU dia hoih mahmah khat LAMKAI LIANPEN dia teellouh a hoih dia, “Sepsuah lah neilou, sep ding dan chauh gengen” chi a mi khenkhat ngaihdan hoih pipi bang THULAKLOUH suah hetlouh ding ahi. Architect khat in inn lam dingdan thei mahmah napi, lam siam hetlou ding hi. Huaiziak in,  mipite’n gam-leh-nam it a, khantouh ding deihna toh president dia hoih lamkai khat treasurer dia koihlouh ding, information secretary dia hoih khat connection neihziak hiam adu-ada ziak a president a pansak mawk louhding chih thei ni.  Lamkaite a dinmun ua kuate koih ahia ? A lamkai thei mahmahlou ding khat domsang teitei in na pang hia, a makai siam mahmah ding khat nengniam teitei tu in na pang ? A topna a thuaktu ding nang mah nahi.
 
 
|||26112015|||
Read 499 times
Login to post comments