You are here: HomeColumnsZokhualPuannak Tual Gial Bilbial

Puannak Tual Gial Bilbial

Written by  Khamkhokam Guite Published inZokhual Monday, 23 June 2014 17:11
Puannak Tual Gial Bilbial

Gelhtu : Khamkhokam Guite

 

Hun leh kum pai liam zungzungte'n na lungsim sung a na thiltuah leh theihsa - na kepbit khinkhiante khisiang uh a, hun niin bawm ah hon paihmang sak uhi. Himahleh, thil khenkhatte na lungsim sung a na  'Paak Huan' selguk bang in, mangngilh vuallouh in  'tuailou paak' bang a tuai ngeilou in paak den ua; na dinmun leh khosaknate nasatak a akikhek nung in leng chik hun chiang  hiam, koilai hiam ah hong veh in, hong kihil kiik thei zel uhi. Mihing lungsim in theih gige ding leh dinglouh bang chi khen khiak hiam chih i thei kei. Himahleh, huai na theih gige atam zawte na hun nuam, hun hoih leh thupi penpente leng hi khollou in - na pa damlai a na pa toh vuahpi gialpi na thuak khawm nawmnawm uh hiam, na nu loukuan’ kho-ul gim maimai khawng leng hi thei hi. Theih gige na ut tenten thil khenkhatte lah, hun leh tui lian in liampih in mang hiaihiai ua, theih gigelouh nunlui tang thei zel uhi.

 

Huchimah bang in, khovel a lasak siam minthang, Grammy Award bang leng na sang pha Dolly Parton in leng 'Paak Huan Selguk' khat alungsim sung-guuk ah na nei teisam hi ding in i gingta hi.

 

Genthei Inn Sung

Mun dan bangthou in, kum 1946 in Tennessee khopi ah mizawngte leh mihausate kikal za mahmah hi. Huai kum, kum tung lam January kha, ni 19 ni in Tenessee singtang gam Locust Ridge achihna mun ua teng za-nah(Tobacco) chingtu mi khat Robert Lee Parton ta sawm-le-nih te lak a khat hi ding in Dolly Rebecca Parton hong piang hi. Mite'n khovel a adeih leh lung-gulh teng uh aneihtheih lai un, amau inkuan in ahihleh nauneen kia mai hilou in, za-nah lei loungal vualzawlna tuntu ding neilou in, deihdeih neih gentaaklouh, damkhosuah tum in theihtawp suah in pang hamham uhi.

 

Huchi bang insung leh inkuan - maban mial leh lungzin huai tak bang in kilang mahle uh, mite muhpih theihlouh 'taanvaaktu' khat huai insung ah om hi. Huai tuh Dolly nu, Avie Lee Parton ahi hi. Avie in gentheihna i chih vualtung tuanna ahi kei chih thei a; ahihziak in, gentheihna mai a vuallelh bel tumlou himhim hi. Himahleh, mi tate'n puan hoihhoih, a lumlum a silh lai ua, mahni tate phalbi khovot puan ding takngial leng leisak zoulou inkuan hih bel theihsiam haksa sa mahmah hi.

 

Dolly nu-le-pate, nupa ki-it tak leh kingaina tak ahi ua. Phalbi khovot toh, zanpuan alum tham ding takngial leng nei zoulou nupa ahih uh toh, chilum kikawmtuah ding a zan chiang a kikawikawi lou theilou uhi. Huchi bang a nupa ki-ittakte a kikawikawi chiang un abaan pailou theilou uhi. Huai hunlai in, sang kizinlouhna damdawi leh vanzat (birth Control) chih lah omlou a; huaiziak in, ta sawm-le-nih sang a tam zaw aneihlouh uh thupi tak ahi uh, i chilou thei kei hi. Khat khia ading leng a haksat lai a, atate uh sawm-le-nihte silh-le-ten leh, neek-le-tak ding ngaihtuah bel thil olsam hilou himhim ding mah hi.

 

Huchi bang a khosak haksatak a hing khe nimnem himahle uh, ittu ding leh lainattu ding kitasam bel hi tuanlou uhi. Ni khat, mi khat in puan them koih khawmna bawm khat hong pe zenzen hi. Atanu uh Dolly in ahihleh apetu bang leng thei hetlou hi. Apetu in apiakna san takngial bang leng thei seselou hi. A nu'n "hon simmoh na mahmah uh e, deihsak a hon pia kichi ahih uleh, hichi maimai lou deuh kipiak ding hi a,” chi hetlou hi. 'Sa nei pek a, aguhbawk nei pe...' leng chi khollou hihtuak hi. Huai puan themte duattak leh deihthohtak in khat khat in lemkhawm in zut maan a, thil hoihtak a bawl khiak tum hi.

 

Huai puanthemte a et chiang in Dolly nu'n agentheih leh haksatnate uh phawk khe mailou in, atate mel musak zomah hi. Huai puanthemte a gial dan lah kibanglou ngen, a sah dan leh pan dan gentaaklouh, alet a neu dan bang leng kilamdang taktakte a tuamtuam in koih khawm tiltel hi. Huai puan themte tawi in, insung pindan mial leh kochiiktak sung a puankhuina khawl lui mahmah khat omna hon zuan hi. A lungsim a tup khat nei bel hih tuak hi.

 

A Tanu

A kiang ah a tanu, numei naupang sam buang thiuthiau, genthei tak a khanglian in anu puanteen mong na kaai hi. Khua a vot a, vot tou deuhdeuh lai ding hi. Puanlum silhlou in phalbi bang zahta athuakta a, bangzah atam thuaktou lai ding hiam chih huai numei naupang in theilou a, a ngaihtuah lam leng hi khalou hi. A nu’n ahihleh thei mahmah hi.

A nu’n huai puanthente kil li nei thei ding in sakolbaakteh zang in bawl lem hi.

“... Nu, huaite bang ding a?”

“Bawi, puannak zem hoihtak ding ei voi”.

 

Huai Puannak Zem Etlawm

Mite’n puanthaan lianpi akipan tep khia a puannak ding a khui lai un, Dolly nu’n ahihleh, puanthen thuap khawm in puannak ding khui tum hi. Atanu a kiang a kiveivei in lamdang asa mah ding!

 

Kintak a khui khit zok ut mahleh, kin leh buang a khui theih chi hilou himhim hi. Huai puanthemte zang a puannak khat khui ding in leng hun leh tha tampi sen ngai ding hi, chih Dolly nu’n haihlou hial hi. Dolly in a puannak thak ngaklah in kapkap leh zong, phatuam tuanlou ding hi. Puannak dang  lamet ding leng nei tuanlou hi.

 

Anu’n huai puanthemte pilvang tak in khuikhawm hiat hiat hi. A khuina khawl khau dawklouhna ding a khawlkhau rong chi tuamtuam zat seng hilou hi. Aziak ahihleh, puanthem rong kibanglou ngen ahih chiang in, khat a kilanglou khat ah na kilang zel ding hi. Huaiziak in, a khuina khawlkhau a kilat ngiitngiatna mun a tam leh leng, thil lamdang lua hilou ding hi. Huchi bang a anu a buailai in hiai numei naupang in anu na hihbuai in, “en dih, nu” achihmah na tamsak hi. A nu’n “ ka nasep lai hong hih buai kei dih. Pai khe dih” chilou hi. A khutte geel a puankhui ahih chiang in, akhut in Bible pek phen manlou hi. Huaiziak in, a lungsim sung a Bible thu kigelhsa peek phen in, puan a khui kawm in atanu Bible tangthu khat hilh hi.

 

Joseph Puannak Gial

“Nidanglai a maw, naupang a fel a fel khat Joseph kichi om a, a nu-le-pa’n amah a duat a duat ua; a Ute le duat ua, anau Benjamin bang le duat un chin. A fel a, thu khawng le a man ziak a apa’n puannak hoih a hoih khat khuisak a. Huai puannak khah, gial bilbel in chin. Huai bangbang tua ken na puannak tual gial ding hon khuisak dek kei voi”.

 

“Nu, a hoih chi lua, ka silh ut zawk e”, atanu naupang in chi hi. Anu’n gen zom zel a, “Hi e, k’on khui khin zokzok ding aw. Hiai puannak, nopsakna leh vangphatna hon tuntu hong hi ding hi....” Hiai naupang in a muhlouh kaal in anu’n a khitui dai deuh teng alehlam nga in nul khe zeuh hi.

 

Ni khat a khui zoh vual ding hilou hi. A nuta un a puan khui zoh nailouh uh zan chiang in mangpha khaak in lupsan ua, zingkhua hong vak chiang in sunzom zel uhi. Anih un huai a puan khui kia mahmah uh gen khawm den uhi. A tawp a tawp in hon khui zou khongkhong ua. Huai numei naupang in huai a puannak thak en in, “hiai paak asan, hiai paak a-eng, hiai pen a lian e, chi aw, nu. A nalh e, ka  silh pah di aw” chi hi.

 

Itna A Phan Khawm

A nu’n huai a batsam na nemnum khawng, a mit kham a mial tuamtuam leh a kawng na khawng tengteng mang hilh hi. Tu zet in tuh alungsim kamtu “Zing chiang zing a huan ding i antang uh a kidaih mah de aw” chih lamlam phawkphalou hi. Huai puannak tawp tonton in a tanu kiang ah “Bawi, hiai puanthem kizom khawm tengteng a maw, ken, ka itna khui khawm vek kei voi. Hong kiteh mah daw le” chi in silh sakta hi.

 

Hiai numei naupang kiang ah gentheihna leh zawn-le-ngauna hilhchian ngailou hi. Aziak ahihleh, aman huaite pianpih in, hinpih hi. Huan ah, nu itna thuk dan leh letdan leng hilhhilh ngailou hi. Aman, puanse khuikhawm silh zenzenlou hi. Anu itna rong tuamtuam leh ze tuamtuam a hong kilat khiakna puannak silh hi zaw hi. Huaiziak in, kisaktheihpih a, khovel ah kuamah eng tuanlou a, amah sang a hausa zaw leh hampha zaw leng om thei ding in gingtalou hial hi.

 

A Lawmte Lak Ah

Huchi in, skul kai hun hong tung petmahta a, a khekol tom taw kithuap teeng in leh, a khedap – a khepi leh khemete a dawklouhna ding mun a dawk, nidang a abulh sek bulh in skul kai ding in hong kisata hi. Silh kaal a ngaklah mahmah, a manglam khawng a ana silh sek, anu’n a khuisak puannak thak kisaktheihpih tak in hon silh a, limlang ah ki-en a, nalh kisa mahmah hi.

 

A lawmte muh kaal ngaklah tak in skul lam manoh in, kipaktak kawm in atai in tai tung hi. A nu bang le ‘bye, bye’ manlou dek phial hi. Oi! A puannak thak akisaktheihpih pih mai zen toh.....

 

Kuaman huchi bang puannak gial belbual skul ah silh ngeilou uhi. Dolly in a puannak hoih a sakna laitak midangte’n lamdang asakna uh ahi a. Lamdang sakna in chiamnuihna piang sak a, “Na puannak silh le... hehehe!” chi in nuihsan uhi. “Nou puannak tuh bazar a na lei uh hi a, kei puannak bang tuh ka nu hon khuisak ei ngal ve!” achih chiang bang inle, theihsiam mai awmtak, theisiam tuan mahmahlou uhi. “Ka nu’n a itna zeptel vek ei ve!” a chih chiang bang ale theisiamlou in, a nuih uh za deuhdeuh in, anuih ging uh ngaih semsem zomah lai hi. Hiai numei naupang in a nuihzat huaina ding khat lel leng theilou in, mu boklou hi. Hiai puannak gial manphatna mupha a, adeih huaina chiampha ding in gentheih mahmah phot ngai na hi ding dan hi.

 

Sinlai Khat

Mi hausate ading a bawng guhtui leh an polh thil hou maimai ahihlai in, ankam tuimawl leh malta vui meh limsa ding in sepgim leh gentheih phot ngai hi. Kamsan tui kha vilvel lung-gulh ding in gim-le-tawl a lohkhiak ngai hi. Hiai khawngte ataktak a tuak-khaloute hilh thoh a, theihsiam sak vual hilou himhim hi! Maiteh, beteh leh anzou teh lohtawm loubuk a kihuan ngei mai lim dan zalzou pha ding in, lou nasepna ziak a na khut a saak bimbem phot ngai hi.

 

Huchimah bang in, Dolly puannak gial bilbel manphat dan a lawmte’n theipha lou in, ahihna tak man phabaanlou ding mah uhi. Aziak ahihleh, amau hausa uh hi ven. Aman ahihleh amanphatna thei mahmah hi. Huai ziak in, Dolly in puannak dang neih lung-gulh huai satuanlou a, eng tuanlou hi. Mite’n nuihsan in simmoh mahle uh, huai anu puannak khuisak suang ngam hi. Huai gentheihna in tupguhna pia a, huai gentheihna in ahinkhua a akhosak touh zelna ah takna leh kuhkalnate guan hi.

 

Puan Loupi Silh In

A khua ua mi neizoute tanute – a lim, a al ne a khang liante dawng thenthon ua, sang ngehnguah in, etlah huai thei mahmah uhi. Ahihziak in, amah, an lim mupha baanlou, za-nah lei bawl a kivak maimai tanu ahihleh feet 5 kia in sang a; et mai in ahihleh, a talent in chei keileh, ‘om siipseep khat’ kichi ding hi. Ahihziak in, huaite ziak in lungke dek suailou hi. Mite’n sum-le-pai leh minthanna lung-gulhna ziak a music leh laa lam amitsuan lai un, aman ahihleh, lungsim sungnung pen akipan hong pawt khia a lasak teel zaw hi. Kum 12 mi ahih in Knoxville TV ah khovel muh in hong kilaak masa hi. Kum 13 ahih in a record bawl masapen mite’n chiam pan ua. Haksatna tampi kaal a laizil in, Sevier Country akipan in High School hon zou khia hi. Kum 1964 in America a country music bupi achih mai uh, Nashville khua ah diang lut a; kum 1968 akipan in kipahman leh pahtawinate kitatsatlou in dong tou den hi. Kum 1977 in Grammy Award masapen leng piak in na omta hi.

 

Huchi bang a ahong hauhsak chiang in, anaupan lai a agentheihna khua ngei ah mite ading a vualzawlna naak hih hon tumta hi. Dollar maktaduai 100 a abul pan in, Dolly Parton Enterprise kichi hon phut khia hi. Tennessee Smokey Mountain achihna mun uah Park nuam tak mai Dollywood kichi hon bawl hi. A sepgimna, a taimakna leh a tupguhnate gah lou in, hiai khovel om sung teng a manghilh nawnlouh ding lasiam minthang khat hong hita hi. Huchi bang in, huai anu puannak khuisak, huai puannak tual gial bilbel in nopsakna leh vangphatna atak in Dolly hinkhua ah tunta hi.

 

Epilogue : Huan, hichi ahong hi a, Dolly Parton te khua akipan khovel leh lampang a teeng - maiteh khuak nei, Lungchin naupang hatu lian diidei khat, schedule tribe diktak in leng atangthu na theikha teisam in, a lasakte na ngaikhia a; a tuailai duhthusam tampite ah Dolly Parton tanvou poimohtak tak na guan ngeita hi!

 

Lung dam!

 

"Coat Of Many Colors"

 

By: Dolly Parton

 

Back through the years
I go wonderin' once again
Back to the seasons of my youth
I recall a box of rags that someone gave us
And how my momma put the rags to use
There were rags of many colors
Every piece was small
And I didn't have a coat
And it was way down in the fog
Momma sewed the rags together
Sewin' every piece with love
She made my coat of many colors
That I was so proud of
As she sewed, she told a story
From the Bible, she had read
About a coat of many colors
Joseph wore and then she said
Perhaps this coat will bring you
Good luck and happiness
And I just couldn't wait to wear it
And momma blessed it with a kiss.

 

My coat of many colors
That my momma made for me
Made only from rags
But I wore it so proudly
Although we had no money
I was rich as I could be
In my coat of many colors
My momma made for me

 

So with patches on my britches
Holes in both my shoes
In my coat of many colors
I hurried off to school
Just to find the others laughing
And making fun of me
In my coat of many colors
My momma made for me.

 

And oh I couldn't understand it
For I felt I was rich
And I told them of the love
My momma sewed in every stitch
And I told 'em all the story
Momma told me while she sewed
And how my coat of many colors
Was worth more than all their clothes.

 

But they didn't understand it
And I tried to make them see
That one is only poor
Only if they choose to be
Now I know we had no money
But I was rich as I could be
In my coat of many colors
My momma made for me
Made just for me.

 

 

 

[Hiai tangthu kei behlap, kei deihkaih I chi zaw diam om thou mahleh, Pu Vanneihtluanga laigelh ‘Coat of many colors’ akipan kibulphuh deuh ahi a. Sim a enjoy dia kigelh ahi a, sinlai hoih zilkhia bang I om leh, kipah huai zaw sem ding hi]

Read 789 times Last modified on Monday, 23 June 2014 17:25

Login to post comments