You are here: HomeColumnsZokhualMualnuam, Imphal Leh Aizawl

Mualnuam, Imphal Leh Aizawl

Written by  Khamkhokam Guite Published inZokhual Sunday, 21 September 2014 12:42
Mualnuam, Imphal Leh Aizawl

Gelhtu : Khamkhokam Guite

 

A khualzin hatna lam in, thu kuanlam leh pailam atheihlouhna hun bang tan hiam hita hi. Nidang bangthou in Nipi Ni, zing kikhop kipat nung in Biakinn sung ah lut a; a tutna mun a thuumna neizou daaktou a, amazawn a et leh, Dorcas heutute tutna aa mikhual numei bangzah hiam toh tu  khawm gaal muh hi.

 

Huai kum ahihleh, pawl sagih a zil kum ahi, chita lehang kuaman theilou  ding ua. Ahihziak in, Pa Khup in BA Distinction a apassik kum ahi,  chile hang bel athei tam kuam om ding uhi. Huai kum in Mualnuam khua ah SSPP Conference om hi. October kha hiam, ahihkei leh, November  vel hiam hi ding a, phavang vuah chiin in vot mahmah hi. Hall nunglam a Burma komol silh a pawl sagih sinlai mikhual naupang tu kuaman theilou ding ua, theih leng kul boklou hi.   Huai siamsin  naupang ading in ahihleh, Eden Huan laizang a sia-le-pha theihna sing-gah ne a, amit ahong keuh khiak kum ahi, chi lehang kam-uang lua kihilou ding hi. Huai SSPP Conference akipan in, hiai siamsin naupang in ‘angel hong kia’ hileh kilawm a ‘angel dung suun’  khovel a om ahihlam thei khia hi!

 

Singtang akipan in pawl giat hon zou khia a; pawl kua zil ding in Phaitual lam hon zuan hi. Kha thum sung class room sung a heutute gen theilou a, hostel a a roommate te toh pau kitheilou uh ahihchiang in, khut-le-khe zang in kihou uh hi. Ahihziak in, ‘class topper’ ahih ding bel kikhiam tuanlou hi.  Mualnuam SSPP Conference gimsi ziak in GP Women College Hostel kong a pai kithalawp thei mahmah a ;  ahihziak in, pai ngam ngei tuan lou hi.

 

Khat vei SSPP member te’n cultural dance zil ding  chi uhi. Central Library(?) kiang a Pu T.C. Tiankham(L) IAS Quarter  kongtual ah khuangpi leh zaampi tum in, khut kileen in  laam dupdup uhi. Zangta’ laam lai in akikaal uah mi nga in hal’ uhi.

 

Akikaal ua ding mi ngate khat khat in hong pai khia ua, hong kinaih deuhdeuh uhi. Suun zalmang a ana mat gige atak in hong tung a;  hong kizom khong ua, khut hong kileen taktakta uhi.

 

Himahleh, ‘aman’ a puanza in  akhutpeek  tuam chitchiat hi!

 

Pawl sawm exam hun ding hong nai hiai hiai hi.  Pawl sawm exam zou a skul nose ding teng ‘farewell function’ skul pumpi in neihpih  uhi. Huai ah, Vice-Principal  Ojha Meiphulung lem geelna in pawlsawm exam ding teng in “kichiamna” neih a,  suaikaih chiat ding, chih ahi hi. Huai kichiamna ahihleh ‘IAS hiam, IPS hiam, Engineer hiam, ahihkeileh, Doctor hiam  hih ka tum ding’ chih ahi hi.

 

Huai ‘kichiamna’ hun ding in hostel ah puan-nak silhlou a, towel teeng in a lupna tung ah na thal-lup hi. Tha-khat thu in kongkhaak hong kihong a, Ojha Meiphulung kong khaak a ding in kongbiang lehlam, lehlam a khut veilam leh taklam aa leen in, lungkim chi hetlou in alupna tung a lumlai en hi. ‘Bang dia function a tellou?’ chi hi. Aziak im theih vual hitalou hi! ‘Sir, skul uniform silh ding chi chin a. Ka uniform khekol taw keek pha lua a, mipi mai a ka uniform khekol teeng a ding khe ngamlou ka hi’ chih kisuanglah tak in gen hi. ‘Huai bang mai mai, kisa inla hon zui le chin himai. Na mel ka muhlouh ziak a hong zong ka hi. Nang ziak a kichiamna ahun a kineihlouh phah a; function pai dan buai zou vek hi’, chi hi. Nial theih vual hilou ahi chih thei mai hi.

 

Hunte hong pai zel a, huai Mualnuam SSPP Conference nung nipi leh phalbi sawmli leh bang zah hiam hong paita a; a khanvualte lu ah keelsamte hong pou in, khenkhatte  bang houh, verandah ah a tute uh taw beeng keuhkeuh in kisiing letlet-ta uhi.  Amah leng, khovel in dawm hetlou a asawisak sakna a talkolh velvol in, a sam neihsun teng kaang theu-thuauta uhi. Huai kia khovel in deihkhoplou lai in, asuk-le-tou a khovel in avial kaih khaihna lam ah, akhuuk guhtuah teng leng kongkhaak kopza sia bang in kigawi ging nguat nguat-ta uhi. A mit kiang khawng ah, vok-kuang kiang a akpi khekhaap hileh kilawm ton ninnen in omta ua; atal vun leng sumkuang gawlvun bang in kikhep in, vuai nimnem hi. Kuamah phawklouh in, akawmkaal ah pa tal-lang khat suakta ahi, chih niteng a inteeknu  dressing table a liimlang in  hilh gige hi.

 

………Huchi in, biakna kikhop tawpta a,  Biakinn kong ah ki-chibai uhi.

 

Tu ni’n bel ‘aman’ puanza in akhutpeek tuam nawnlou hi!

Read 736 times

  • ppguite
    ppguite
    Sunday, 21 September 2014 23:40

    Kua pi, kua nu hi ta ding a hia lem , Tuivai Block Mualnuam SSPP Conference a ' muh chil van angel' Imphala lam kizilna a a khut a let khak leh tunai zek a Aizawl a chibai buk khak dorcas heutu ..

    A hinkhua hun paisate ah a kik sak thak nawn a, huai lai hunte a zangkik sak a... thil tam khop zaw ngaihtuah thak sak hi di ei ve

  • ppguite
    ppguite
    Sunday, 21 September 2014 23:40

    Kua pi, kua nu hi ta ding a hia lem , Tuivai Block Mualnuam SSPP Conference a ' muh chil van angel' Imphala lam kizilna a a khut a let khak leh tunai zek a Aizawl a chibai buk khak dorcas heutu ..

    A hinkhua hun paisate ah a kik sak thak nawn a, huai lai hunte a zangkik sak a... thil tam khop zaw ngaihtuah thak sak hi di ei ve

  • zokhual
    zokhual
    Monday, 22 September 2014 10:17

    'Disclaimer' acih sekte uh ngai adiam maw! Hehehe

Login to post comments