You are here: HomeColumnsZokhualGingtute A Di’a Laibu Simtam Poimohna

Gingtute A Di’a Laibu Simtam Poimohna

Written by  Khamkhokam Guite Published inZokhual Tuesday, 02 December 2014 16:49
Gingtute A Di’a Laibu Simtam Poimohna

Gelhtu : Khamkhokam Guite

 

“Na hong chiang in, Troas khua a Karpa’ kiang a puannaaktual ka nutsiat leh laibute, abiik in, savun laibuzial hon tawi in”. 2 Timothi 4 : 13.

 

Rome khopi ah Sawltak Paul suangkulh tang hi. A sih hun ding naita ahi chih thei hi. Huai hun in Pathian gam adia ana sepsate, a thuaknate leh aseppihte alungsim in ngaihtuah khe dundun hi ding hi. Khenkhatte, nidang a Pathian thu agen pih, Pathian gam adia a thuak pih, bangkim anuam leh haksatna mun a  akizuihpihte’n  khovel itna ziak in taisanta ua. Huai suangkulh vot dekduk sung ah amah kia in om hi. Amah mimal akingaihtuah chiang in sih mai a, A nna asepsak gige Khrist kiang a pai mai ut hi. Ahihziak in, Saptuamte - abiiktak in Philipi Saptuamte khawng a ngaihtuah chiang in, khovel a damlai zek a, hiai Saptuam thak, khalam leh salam a pi leh makaih ngai mahmahte om pih lai zek ut hi.

 

Huai a suangkulh tanna ah thawmhau leng ahi ding a, Timothi kiang ah amah hong veh ding in thukhaak a, Luka leng hon tonpih ding in vaikhaak hi. Vot bang leng sa’ ahi ding a, Troas khua a Karpa’ kiang a apuannaaktual nutsiat leh a laibu nawtsiatte hon tawi ding in thukhaak hi. Paul si dekkuan himahleh, a laibute kiphamoh in leh, ngaina mahmah hih tuak hi.

 

Sawltak Paul in Timothi kiang a laibu hon puak ding a anget thu, Charles Spurgeon  in hichi bang in comment na pia  hi: “Kha hatkhum mihing ahi a; ahihziak in, laibu kiphamoh lailai hi. Kum 30 Pathian thu a tangkoupih nung in leng, laibu kiphamoh lai hi. Toupa a muta a, laibu kiphamoh lai hi. Numei suan a theihna haupen ahi a, vaan thumna tanpha a pitouh in a om; mihing theih dia phallouh thil tanpha amu a, huchi kawmkawm in laibu kiphamoh hi. Thukhun Thak laibu akimkhat mahmah amah gelh ahi a; ahihziak in, laibu kiphamoh lailai hi”, na chi hi.

 

Sawltak Paul in bang ding a laibu hichi tel a ngaina ahi ding? Thukhun Lui laibu sung ah ‘sim’(laibu) chih 208 vei kigelh a, Thukhun Thak laibu sung ah ‘sim’ chih 45vei tuang hi. Huaiziak in, Bible pumpi a ‘sim’ chih kigelh tengteng 253 pha hi. Hiai akipan in bang ziak a Paula in laibu hichi tel a ngaina hiam chih I theithei mai ding uhi. Huan ah, Pathian in laibu sim ngaipoimoh a, eite leng laibu sim ding a hon deih mahmah ahi, chih leng kilang hi. Paula in “Hon enzuite hi un, kei leng Khrist enzuipa ka hih mah bang in”(I Korin. 11:1)  na chi hi. Huaiziak in, thil dang teng baan ah, laibu ngaihnat leh laibu sim in leng Paul enzui le hang, huai hih Pathian deih dan leng hi ding in I gingta hi.

 

Gingtute Hatna Laibu Sim Ahi: Kum zabi 18na vel a Theologian minthang mahmah, Evangelical Movement khat, Methodist kichi  phutkhetute lak khat hi bok, John Wesley in “Laibu sim taima  Khristian a ginna ah akhangtou zel a; laibu sim a tawp toh kiton in a khanna leng a tawp ngal hi” na chi hi. Piangthak chilte hi in, Hotdamna Camp aa pan hong pawtkhe thakte hita le uh, Bible leh khalam a amau chawmtheitu ding laibu sim ataimaaklouh ziak un tampite nungtolh sek uhi. Huaiziak in, Khristian hinkhua a kuapeuh i khantouh zelna ding in,  laibu hoih sim poimoh mahmah hi.

 

Pathian Thugentu Ading In Laibu Sim Hatna Thagui Ahi: Mi khenkhatte piandan in Pathian in thugen siamna apiak hi in kilang uhi. Himahleh, laibu a sim tawm luat ziak un a talent uh pungsak theilou phet hilou in, a talent neihsa uh leng mangsak zomah  uhi. Bang mah thil thak leh genbeh ding aneih ngeilouh luat ziak un, color TV om ma, Black & White TV I et lai ua agen ngei ngei uh tuni tan in gen lailai uhi. Huchi bangte pulpit a ahong din khiak chiang un, tuailaite bang in “huai Bible tang hon sim dia, huai hon chi dia, huai khitchiang in huai hon chi nawn dia”, chi a, a gen ding teng agen kholh theih bang uh om hi. Huchi bang thugentute’n ngaikhetute khim ihmu uh a; athugen lai ua ngaikhetute a lusuk chiang bang un amau lam kisui chianloupi in, ngeikhetute bang mohsa  zaw mah uhi. 

 

Laibu sim taimate’n  theih hau ua, huai in amau  khalam ah hih hat a, pilna guan a, a houlimna un tuipaai a, athugen uleh ngaihdante uh ngaihkhiak kithalawp huai hi. Huan ah, huchi bangte Saptuam a ding a vualzawlna leng ahong hi sek uhi. Huaiziak in, John Wesley mah ni, “Laibu sim ngeilou Saptuam nasemtu zaw, asepna akipan kitawp hen” chi hial hi.

 

Laibu Simtam Lohchinna Ahi: Tuni a solkar leh Company te’n khaloh tam pipi apiakte uh atha uh hat a, antang bag 5/6 khatvei thu a pozoute hilou in, laibu sim tamte ahi uhi. Huchi bang a khaloh tam pipi apiakte uh degree sang taktak neite leh competitive exam-na a lohchingte khawng ahi uhi. Huai ding in laibu tampi petmah sim ngai hi. Mi’n laibu a simtam chiang un theihna hon hau ua. Theihna in amau pilsak in, asepna uah siamna guan bok hi. A hong pil chiang un ngaih dan hoih taktak hon nei uhi. Loh tampi petute’n apiakna san uh ahihleh, a ngaihdan hoih uleh pil huai tak leh siamtak a nna asep  theih ziak uh ahi hi.

 

Mihing in pilna I tom khawm dan uh ahihleh, I thil tuahte, Sapte’n experience achih ua kipan ahi deuh pen hi. Ahihziak in, thil tampi sinkhe ding a, experience tampi nei ding in I damsung kum in daihlou hi. Huan ah thil khenkhat, khatvei hih khial le hang, a hih ding dan dik I theih chiang in kikhel in, ki-ding khezou nawnlou hiam, hun lem om nawnlou thei hi. Huai ziak in, mite’n kum tampi sung a athil tuahte ua pan experience leh pilna ana tom khawmte uh laibu sung ah hon gelh  ua; huai laibute mahni inn lum a sim in, olsam tak in leh, man tawm chik in pilna  I na nei thei hi. Hiai ahi, laibu sim hoihna.

 

Laibu Sim Bank-a Sum Koih Bang Ahi : E.M. Maguire in “Laibu sim ahihleh Saving Bank Account a sum koih bang deuh ahi a. I sum koih in pung a neihtouh zel bang in, laibu sim in pung tampi aneitou zel hi. Ahihziak in, laibu sim meetna/lawkna ahihleh, Saving Bank a sum koih toh kibanglou in, a sumpi leh a punna zang khe ziahziah le hang leng a om zah kiam ngei tuanlou hi”, na chi hi. Laisim tam ziak a I theihnate I zat khiak teng in pung semsem zaw mah uhi.

 

Laibu Sim Vualzawlna Ahi: Mosi asih ding kuan in Israel tate kiang ah “Ka thupiakte na zuih uleh, a lutang in na pang ding ua; a mei dawn lam na hi ngei kei ding uh…….. sum lei tawi saktu na hi ding ua, sum lei tawi ding zong nam na hi kei ding uh…..” (Deuteronomi 28 : 12,13 ) na chi hi. Hiai hih tuni in eite kiang a gen leng ahi hi. Huai thupiak a gente zui ding in theih ngai hi. Thei ding in sim ngai hi. Huaiziak in, gen dan dang khat in genta le hang “Laibu sim mi/laibu sim hat nam  na hih uleh, a lutang lam- a vaihawmtu/thuneitu lam in na pang ding ua; laibu sim thadah nam na hih uleh mite nungzui leh mite taalkaih nam na hi ding uh…… laibu sim ngeilou nam na hih uleh, leiba petu hilou in, leiba zong a vial tai doidoi nam na hi ding uh…..” chihna leng hi thei hi. Sum leitawi ding zon I chih thil nuam hetloupi khat a hi a; huai kia hilou in, mite’n leitawi  zon hat nam bang in hon ngaile uh, zumhuai lawtel ding ahi. Huai ziak in, a vaihawmtu lam hi ding in, leiba zong nam hilou a, apetu lam hi ding in Pathian thupiakte thei a, zui a, vualzawlna tang ding in, laibu sim –Bible leh laibu hoih sim taima mahmah nam hih tumta ni hang.

 

Laibu Lei Thasiallouh Ding : I lak ua mi tampite’n kholak ah tep-le-muan, leh, neektawm hiam, thil hou maimai leina in sum tam pipi khakhat in zang gai sek ua. Ahihziak in, laibu, magazine leh tanchinbu khawng lei ding ahih chiang in Rs 100 na tan leng seng ngamlou sek uhi. Austin Phelps in “Puannak lui lei inla, laibu thak lei in”, na chi hi. Huan ah, W.P. Whippe in “Laibu hoih ka lei chiang in, mi pil mahmah khat lei a kingai ka hi”, na chi hi. Laibu sim thadah luat ziak a Khristian masawnlou hiam, pil phalou a ngaihdan liangvai taktak genkhe nimnemte hiam I hihlouhna ding un - laibu,  magazine leh tanchinbute lei a, simtam lam  ah thasial kei ni hang.

 

Naupangte Laibu Hoih Kawkmuh Ding : Nu-le-pa tampite’n tate sim ding in laibu hoih kawkmuh ngeilou ua, a skul sinlai uh chihlouh ngal laibu dang lei sak ngeilou bok uhi. Naupangte sim ding in amau toh kituak  laibu leisak in, laibu hoih sim a nopdan chiamsak le hang, a phattuamna dang genlouh in leng naupang kholak mawk pawtpawt a utna uh khaam luat ngailou in, dam mai ding hi. Huan ah, laibu zuakna mun bang ale naupang hohpih zelzel ding ahi hi. Naupang in kaalkhat sung a dakkal 7/8 sang a tamzaw TV a et chiang un a ‘mental development’ uleh a ‘intelligence’ uh ke niam thei  ahi, chi uhi. Huaiziak in, naupang lungsim mawksak thei TV mai a atut tut louhna ding un, laibu sim anop dan chepsak hoih ding hi.

 

Thu Tawpna : Sawltak Paul mah in Philipi Saptuamte kiang a alaikhakna ah hichi bang in na gelh hi: “Hiai ka thumna ahi: theihna leh theihkakna toh kithuah a na itna uh a khan semsem; hichi a thil hoih phapente na deih ua, Kris ni-a siangthou leh dembei, Pathian thupina leh pahtawina ding a, Jesu Kris ziak a hong om dikna gahte a dim a na om theihna ding un” (1:9-11). Paul in thil khat kia theih a hoihlouh dan thei hi. Huai ziak in, Philipi Saptuamte’n a theih kia uh hilou in, theihkaakna aneih uh deih in thum hi. Thil khat kia, ngaihdan khat kia leh, etdan chi khat kia nei a, theih sunsun  ‘mitdel sial khau let’ tentun Sawltak Paul in hoihsa lou hi ding hi. Huchi bangte Saptuam a ding in leh, minam a ding aleng mi noksak ahihtheih na tan uh om hi. Ngaihdan tuamtuam thei a, etdan tuamtuam a en a, thei-kaak a, buk-kaak a, tehkaak a, thupukna hoih bawl ding in hon deih hi. Huchi bang hile hang, thil hoih penpente kideih dia, Saptuamte siangthou leh dembei a ki-om in, Kris ziak a hong om dikna gahte in minam  kidim thei ding hi. Huai ding in, theihna leh theih-kaakna neih ngai a, huai nei  ding in laibu simtam mahmah kiphamoh hi.

 

Huaiziak in, thei tam ding in laibu sim taimak ngai a; laibu simtaima ding in laibu lei ngai  hi. Tuni a laibu na simtam ziak a  tunung chiang a na hamphatna ding ahihleh - mi zahtak huai khat, pa dottaakpa khat hiai khovel a na hong hih ding baan ah: ginna ah hat in leh kip in, sihnung lam-etna neitu leng na hong hi ding  hi.

 

[Upa G. Khamkhokam in September 21, 2014, nipi ni  zan a EBCC-Aizawl Biakinn a athu gen ahi]

 

----X----

Read 989 times Last modified on Tuesday, 02 December 2014 16:51
Login to post comments