You are here: HomeColumnsZokhualSuangdoh Khua A Ka Skul Kai Lai

Suangdoh Khua A Ka Skul Kai Lai

Written by  Khamkhokam Guite Published inZokhual Monday, 08 December 2014 13:08
Suangdoh Khua A Ka Skul Kai Lai

Gelhtu : Khamkhokam Guite


Class of 1967 : Kum 1966 in Lungchin Primary School akipan Pawl-3 ka zou khia a, ka kho’ skul ua ka zil tawp ka tungta hi. A kum nawn 1967 in, ka skulpute uh lak a laisiam pen leh zilna sang neipen: pawl - 7 tan bang na sawk pha baan Pa Gou, Thangzagou (RIP) in private a Pawl-4 hon zil sak ding in kisa hi. Himahleh, kum bul lam, skul ka kai dek pat uleh , Basic Training ding a State Solkar in Pa Gou a teel khiak thu uh kiza a; kou bang a pawl sangte, pawl -4 tan bang zil theite hon sinsaktu ding ka khua uah om nawnlou a, skul kai ka tawpta uhi.

 

Huchi in, lou nna khawng sem in ka om a, ka lunglut hun in hon phaak chiang in pialkhang a khup lup kawm in ka skul sinlai bute mahni in ka kisim zel hi. Himahleh, skul kai ngeilou nana na bel, bangmah pi ka zil khe tuan kei hi. Kum tawp lam October kha hong hih in, ka khua ua kei sang a u zawte lak a khat, anungak helna a ka zuih sek khat, Suangdoh a pawl-6 zillai, puja suti a hong pai toh ka kimukha ua. “Nang leng Suangdoh ah lai hong zil ve” chi in hon zawn hi. Ka utlam na hi kha adiam, ka Pa kiang ah Suangdoh khua a laizil ka ngen hi. Ka Pa’n hon phal a, aman na houpih khin hi ding in ka gingta a, Suangdoh a ka pa Thawn, Thangkhothawn(RIP) te inn a om ding in ka Pa laithon keng in, ka lawmpa puja suti zangzou zui in, Suangdoh a laizil ding in ka kuan khia hi. Ka Pa Thawn ahihleh, Suangdoh skulpute lak a khat ahi a, tua Lamka a Thawn Saulim Press neitu Khamzalal Guite(Lalpu), atapa upa pen ahi hi. Lalpu ahihleh kei sang in nau zaw tham hi.

 

Skul Ah : Skul Admission bang chi bawl ka hia chih ka thei nawn kei a, ka omna-pa, ka Pa Thawn skulpu ahih ziak in aman hon hihsak vek ahi ding a; ahih kei leh, skul a minlamna bu a ka min hon gelh sak ua leh, student hi mai bang leng ka hi mai thei hi. Ka classmate-te ahih uleh numei ngen ahi ua, 4 hiam 5 hiam vel hi un ka thei hi. A kum khotawn a skul kai ngeilou, kum tawp dek kuan a kho dang a skul vakai ka hihziak leng ahi dia, class room ah ka maingal het kei hi. Maingal naaksaang in, Class Room ah ka zum thei mahmah a, kihum hiam, kun ngetngut den hiam in ka om sek hi.

 

Ka lungsim mitkha a tuni tan hong lang gige khat ahihleh, huai ka classmate numeite siangthou vilvel un leh, mel hoih thei mahmah uh ahi, chih ahi hi. Naupang pawl - 4 zillai e chilou in, khat veivei class room a zum lua a ka kuun kawmkawm in ka zi neih hun ding bang ka ngaihtuah kha sek a. Zi nei ding bang hita leng chih khawng ka ngaihtuah chiang in, hiai ka classmate-te ahih uleh, khat le kei phu phaak ding vual om un ka thei hetkei hi! Huai nung, tuni tan in ka classmate-te khat leng muh khaak ka nei nawn kei hi. Imphal a matric ka exam pih, lawm Thianthang, Lungthul hausa khat tapa zi ahihleh, Suangdoh a ka classmate-te lak a khat hihtuak hi. Ahihziak in, a mel mu kha bel ka hi tuan kei hi.

 

Huai hunlai a Suangdoh Skul a ka Headmaster uh ahihleh, Pa Lam, Ngaizalam ahi a. Ka Pa leng Primary skulpu khat ahih baan ah, a kum lam a Pa Lam’ senior-te ahihziak leng ahi ding a, ka Headmaster-pa un hon deihsak in, hon duat mahmah in ka thei hi. Kei, naupang in ka ngaihtuah vengveng chiang in, Pa Lam, Ngaizalam ahihleh, skulpu lungsim hoih leh siangthou mahmah, a lungsim siat penpen chiang aleng “A cat is on the table” chih kaan ngaihtuah ngeilou, achihte uh hi ding in ka gingta hi!

 

Suangdoh a skul kava kai tung a ka thil tuah khat, ka theih gige ahihleh, skul kailou a kum khat phial ka om sung in laigelh dan ka mang-ngilh dek sim a, aguuk in ka buai thei mahmah hi. Nitak chiang in phaitam kongkhaak sawnhong kiang a singlem tung a laibu koih in, khawnvaak de in, mei oina tutphahte khat a tu in lai ka sim zel hi. Lai ka sim chiang in ngaih pipi in ka sim sek hi. Nitak a lai ka sim chiang in, inkhang a lamlian ah ka Pu Suan te lawi nungaak hel kuan lam hiam, pai lam hiam thawm ging ka za sek hi. Khat vei Pu Suan in “A ging a laisim a, na huchi mawk by-heart louh ding ahi. A ginglou a laisim a, ngaihtuah vengveng a, theihsiam tum kawm a lai na sim ding ahi” chi in thuhilhna hoih ahon muam hi. Ahihziak in, hilh moh, tai moh kei chih mahtak in, deihsak tak a ka Pu Suan hon thu hilhna ka zui thei tuan mahmah kei hi.

 

Engineering College ka kai lai in Suangdoh local tanchinbu ah “Khovel a pawlsawm original marksheet hau penpen kua ahia?” chih dotna om a. A dawnna dik kipia ahihleh, ka Pu Suan min ahi hi. Pawlsawm a exam chiang in, subject khenkhat ah akiginna suak khalou a; huai ziak in supplement mu a, huai supplement a exam nawn chiang in adeih bang in hih hoih khalou deuh sek in, kum khat a pawlsawm nih vei exam ahihchiang in, original marksheet nih nei zel a. Kum bang zah hiam huchi bang a apaitouh chiang in, pawlsawm original marksheet ahun khop kol kha bel hihtuak hi. Ahihziak in, “khovel a pawlsawm original marksheet hau penpen va kichih zezen, amah sang a hau zaw a om leh omlouh khovel pumpi ah na kan chian ua hia?”, chi in ka omna mun ah, kei khom in ka Pu Suan kana vui pih thei mahmah sek hi!

 

Ka Omnate : Ka ngaihtuah kiik chiang in, ka omna-pa, ka Pa Thawn training hiam a om khia ahi ding a, ka lungsim ah amah a lang tam het kei hi. Ka omna-nu, ka nungaak Manzaching leh naute kia ka lungsim ah alang uhi. Ka Pa Thawn ahihleh, ka lungsim in nih vei kia ka mu thei a: mei kiang a tu a, Bournvita bawm thak nawn khollou khat sung a laizial ding laipuan, zial theih ngal mai dia kitepsa leh dum/za-nah omna bawm ahonlai leh, huai hunlai in Suangdoh naupangte leh Lungchin naupangte kitot ka ching ua; nitak khat ka Pa Thawn omlouh kaal in Suangdoh naupangte hong hoh in hong tawng ua( Suangdoh naupangte I va chih hang in, ka tanaute ngen khawng uh ahi), ka Pa Thawn in a theih tak in a thangpai law mahmah a, a zingchiang zing a thoh phet bang ale heh law lailai tel ahi chih; hiai tegel chauh in ka Pa Thawn ka thei hi.

 

Sun chiang in ka nungaak Manzaching lou a kuan zel a, ken naute na don in, nitaklam chiang in an kana huan zel hi. Huai lai in ka omnate nau nen mahmah lai uhi. Huai kum a alou uh ahihleh, paisuk a, Chiangpite kholam a pailou a, Mawngkente kholam paina lampi a paiphei a, I paipai leh kitung mai ahi hi. Nidang a ka theihluatte, tua amin uleh amel tanpha uh ka theih nawn khollouhte lou lai bang leng kitawn kha ahi, chih bang leng ka thei hi. Buh lak khit nung in, maipuang pua hiam in ka kuan kha a, buuk kong ah zozam apou, chih bang leng ka thei lai hi.

 

U Nengdoupau Leh Sekkhum : U Nengdoupau ka chih ahihleh tua Delhi a om, amin S.Nengdoupau chi in a gelh mai thei hi. Suangdoh khua a sekkhum huan nei lian pente ahi uhi. Chiangpi khua a ka Pu Thuamthiau tanu a upa lawinu ahihziak leng ahi dia, naupang ka hihlai ua pan in hon tanau bawl in, hon huai thei mahmah hi.

 

Khat vei skul ah U Nengdoupau in “Ka inn uah hong hoh ve. Nang, kou inn a hong hoh ngeilou” hon chi a. “Na sekkhum uh non neksak di leh ka hong hoh ding” ka chi khe guap mai hi. Aman, “Na hong hoh in tuh, ahina tham ke” chi in hon dawng hi. A inn uah kava hoh a, bang hih ka hi ding uam, a huansung khawng uah ka vial pai ua. A phaitam ua, huansung a buukta’ kilam khat sung a ka luut lam bang uh leng ka thei lai hi.

 

Huai lai a lamdang ka sak mahmah ahihleh, U Nengdoupau in huai huansung a sekkhumte neek theih ahihlam theilou hileh kilawm, chih ahih hi. Huai sekkhum gahte lou ding in akung a va-kah ngailou a, leilawn/kailawn dohtouh leng ngai hetlou hi. A ling in hon sun hetlou dia agah loh ding dan bang leng, kei bang in tuh ka thei law mahmah hi. Aziak ahihleh, naupang bang in leng leilak a ding kawm a loh bat ding, sawk phaak ding sekkhum gah kai tut tut tam lua uhi.

 

Ka ngaihtuah, ka ngaihtuah chiang a, tu teek nung vuai nung a ka ngaihtuah khiak ahihleh, U Nengdoupau te’n sekkhum huan amah pian ma akipan nei hi ding ua. Amah a ding in sekkhum min, khut a sawt bat a kai chitchit chih khawng in adiip phusak lit lit khollou in, a chiltui bang leng pawt sak zungzung khollou hi ding ahi, chih ahi hi. Kou khua, Lungchin ahihleh a zou luat ziak in thei himhim in ngeihlou a; a khosung pumpi ah ka Pu Nang te’n sahawk kung khat nei ua; ka inn khang ua ka pute huangsung ah thei-he kung khat pou hi. Huai teng loungal thei dang himhim omlou in ka thei hi. Sekkhum bang tuh vaan ah leh, Suangdoh khua loungal ah gahlou himhim hi! Huai ziak in, sekkhum kichi I neek chia lim a, gil bang leng vahsak pingpeng thei chih khenlam ah, sekkhum ngaihsang luatna, ngaihthupi luatna nei hi ding in ka kigingta hi.

 

Navaak Lam : Suangdoh kho nawl, sim lampang, Lungchin toh kikal lam ‘Navaak Lam’ achi ua. Suangdoh a ka omnate nuam lua leh siam lua uh hina pi in, naupang kho dang a om khe ngei nailou chihmahtak in, inlam leh kholam ka ngai thei mahmah hi. Ka lungsim om bengbung in, mumang mah bang in ka om den hi. Khat vei naupang hon in bang ding adiam singtuai sat in huai ‘Navaak Lam’ ah kava pai kha ua. Huai akipan in ka lungsim a thoveng huai in, ka om bang leng a nuam tuan mahmah mai hi. Khanglui lai akipan ana gen uleh, amin ding ana phuah khawng uh aziak hilhchian thei khol kei mahle hang, dik mahmah na tan nei ahi chih huai akipan in ka thei khia hi. Hausate inn omna veng tolam, mun nuamlai gamlak, naupang hon in bang ding a diam ka vaat ua, ka ngaihtuah khaak chiang in, ka thugen khawng uh ka lungsim ah hong lang dek chiaichiai thei zel hi.

 

Farewell & Result : December kha bul lam hong hih a, final exam ka zoh un, ka School un Ojha Khupzaneng inn ah farewell party ka nei uhi. Program ka zat lai khawng uh ka thei nawn het kei a, ka theih om sun ahihleh, singpi awmpawl in ka pang kha a; singpi sou ding ngaak kawm a chini kana guuk baak baak leh ka thalh kha a, ka naakvang akipan in chini hong leng khephung, chih khawng ahi hi. Ka dangtawng leh ka naakvang sung asip mahmah hi. Huai nung sang chini ka guuk baak ngei nawn kei chi ngam tuanlou ka hih chiang in, ahihziak a huchi bang a chini thalh a tuahse ngei nawnlou ka hih ziak in, chini guuk baak dan dik zil khia bel hi peuhmah ding in ka kigingta hi!

 

Ka exam result uh ahong suak petmahta a, subject tengteng ah pass mark chiahchiah ka mu vek hi. Ka damsung in tuni tan in exam bang zah vei hiam, Sunday school exam tel in kana tuakta a. Ahihziak in, huchi bang a atawm zaw lah omlou, a tam zaw le om tuanlou a subject tengteng a pass mark chiahchiah ka muh vek lam ka thei ngei kei hi. A sepna akipan in Pa Lam, Ngaizalam pension ta a, tu in Bungmual ah khosa ahi achi ua. Koi lai hiam, chikchiang hiam a ka muh khaakna a om ngeingei leh, “Pa Lam, Suangdoh a na skul a pawl -4 kong zillai a, final exam pass taktak mah ka maw?” chih dot ka tum tinten hi! Bang teng hileh, huai akipan in ka khua ua ka classmate hisekte class III pass ahih lai un, kei bel class IV pass ka hong hita hi.

 

Ka Nungaak, Manzaching(RIP) : Ka nungaak, Manzaching in ka naupan’ lai akipan zunkhum vei thei vual ka hong hih nung tanpha in leng “Kam” chih ngen in hon sam hi. Kum 2011, January kha a ka Pa damlouh lai in ka Pa hong veh a. Ka hou limna uah “Nungaak, kou, ka tangval lai ua U Thangchinkhup (Dr Thangchinkhup Guite) toh ‘Pa Thawn, Thangkhothawn te unau, ‘gulhik chilget thei ding’ unau lah bang khollou napi ua, zi hoih neih thei lua ua. Zi bang achi zon uh adiam aw?’, chih gen khawm kha sek kei ve ua” chih ka hilh leh, ka nungaak Manzaching in “Mihing in vangphatna lam nei chiat hang a, na pa Thawn te unau le huai lam a vangphatna uh hi ding hi ven” chih in hon dawng hi. Huai ka kihou tawpna uleh, ka kimuh tawpna uh suak maimah hi.

 

Mihing in I mi ngaihnatte bang I chih ding? I omna peuh ah, anuam leh haksate tuak in, huih nungdelh in Sap la phuaktu in “My elusive dreams” achih, a omlou leh neih ngeilouh ding ‘Damlai Pialgaal’ delh in vial taitai mahle hang zong, I lungsim a bei theilou, I vom tinten thil bel om hi. Ahihleh, I lungsim a om, I mi ngaihnat, I ngaihnatnate haankhuuk a tonpih a bei mai ding maw? Bang lohta ding?

 

A damlai in khat vei zawle blanket neu chik khat ka pe ngei mai a, ahihziak in ka thil piak suanhuai kasa het kei hi. A hon omlouh san in, a khonungpi in kana za a, a luang kiang ah ka tu kha kei hi. Huai kia hilou in, a inn ua vahoh in, akhe in asik khaakna nung vasiklou in, atapa Lalpu kiang ah, a office ah, a gaalna kava pia hi! Hiai maw kingaihnatna? I guh, I taang ngotsak thei ding khop a kisikna mihing in kinei thei hi!

 

Read 897 times
Login to post comments