You are here: HomeColumnsZokhualGamte, Thupinate Leh Minam

Gamte, Thupinate Leh Minam

Written by  Khamkhokam Guite Published inZokhual Tuesday, 30 December 2014 11:35
Gamte, Thupinate Leh Minam

Gelhtu : Khamkhokam Guite

 

Kum 2012, July kha vel in ka tanu laizil ding in Chennai ah kava kha hi. Khopi nawl deuh Palavaram achihna uah, a kaina ding University toh akinai baan ah, Airport kiang ahih ziak in, huai a Hotel Mars kichi ah ka tung uhi. Zing kal chiang in morning walk in a kim lak vel ah ka vaak-kual sek hi.

 

Kalpakkam leh Kundankulam Atomic Power Plant khawng a State sung a a-om ziak ahi ding a, Indian Atomic Energy te mun bang leng a om a; a huang pua a ka pai chiang in High School leh Pre-University Science ka zillai a Nuclear Physicist hih ka ut dan khawng ka phawk khia hi.

 

Ka walking kawm in thil tampi ka ngaihtuah khe sek a, Indo-Myanmar gamgi kiang lak a nam tawmchik hilou in, Tamil te bang a mihing maktaduai 77 vel omna  community sung a mi khat kihihleh, bang achi di, chih khawng maimai bang ka ngaihtuah khia hi. Tamilte nam tangthu theih ka hau het kei a, ahihziak in, tulai Tamilte suangtu Dravidian kichite nam upa mahmah leh khangthu saupi nei hi un ka thei hi. India Khang Tangthu a Chola Kumpite leh Pandyan Dynasty kichite, nidanglai Tamil kumpite ahi uhi. Siam thil (arts), thu leh laa, telsuina leh limchiinna lampang bang a leng sangpi tung un, nam thupi tak ahi uh chih tan bel ka thei hi. A political leader lui uh Thuluvallar, Sivaji Genesan, scientist minthang C.V.Raman, mathematician Srinivasan Ramanujan, India President lui Dr Abdul Kalam, music director A.R.Raman leh tulai a khovel a business leader minthang nu Indra Nooyi chihte Tamil mi minthang khenkhatte ahi uhi.

 

Huchi bang a ka vial pai kawmkawm in sau pipi ka ngaihtuah a, bang in minam bawl a; huan ah, khovel a minam tampi omte lak ah bang ziak a minam khenkhat thupi uh hiam, chih khawng ka ngaihtuah zel hi. Tu-a Chennai a kava hoh nawn leh, ka hoh masak a ka ngaihtuahna baan ka sun zom a, hichi bang in a gelh in ka hon koih khia hi.

 

Minam (Nation) I chih chiang in pau-le-ham, chiindan-tawndan aleng kinai mipawl khat bang leng hi thei a, etsakna ding in Japan leh German te’n chi-le-kuang minam hihna in ngai uhi. Ahihziak in, French te’n ahihleh French Revolution in a hiinkhiak ngaihdan akipan in minam kichi ngaihdan, tup-le-ngim kibangte minam hihna in ngai leuleu uhi. Ahihziak in, tulai a gam tampite I et chiang in, minam hihna ahihleh, chi-le-kuang thil kia hiam, pau-le-ham leh chiindan-tawmdan kinaihna kia leng hilou in, lungsim a minam khat bang a kikoihna hipen in kilang hi. North Korea leh South Korea te mi kibang himahle uh, minam khat bang a akingaihlouh ziak un, hilou mai uhi.

 

Political leh social contract lam telsui mi khenkhatte ngaih dan in, minam khat thupina ding in akul tampi om mahleh, atangpi in chi nih in khen uh a; khatna ah- gam hauhsakna(Gam leilung hauhsakna) leh, nihna ah – agam a teng mite mizia(quality of its citizens) in khen uhi.

 

Gam Leilung Hauhsakna:

 

Lei kawm a om mineral a hauhsakna - gam leilung hauhsakna I chi dia, neilou gam hiam; ahih kei leh, gam leitang hoih a buh-le-baal leh haichi hoihlouhna gam ah minam thupi tak piang theilou hi ding hi. Huaiziak in, Sahara, Gopi leh Thar gamkeu gam ah khovel om tung akipan tuni dong minam thupi tak piang khe nailou hi. Huaiziak in, minam thupi tak piankhiakna ding in gam hauhsakna poimoh ahi, I chi thei hi.

 

Ahihziak in, gam hauhsakna kia in minam thupi tak bawllou kia hilou in, minam hihse thei ahihdan leng I en ding hi. Democratic Republic of Congo(DRC) enta le hang: khovel pumpi a cobalt om tengteng lak a 49%  DRC a piang ahi a, industrial diamond ah khovel a om tengteng lak ah 30% hiai gam a laihkhiak ahi hi. Khovel a coltan om tengteng sehthum-suah-a-sehnih hiai gam a piang ahih baan ah, gemstone diamond pian tamna  gam (6%) leng ahi hi. Ahihziak in, khovel a gam khangtou lou penpen te lak a 8na dinmun kum 40 sung luah hi. Huchi mah bang in, Sierra Leone leh Liberia gamte leng gam hauhsakna tampi tak nei gam himahle uh, khovel a gam khantouhna tehna tuamtuam a ahihse penpente ahi uhi. Bolivia leh Argentina te din mun leng DRC leh Siere Leone te bang hial hi kei mahle uh, a gam ua oil leh gas a pian tam akipan neekguuk-taakguukna uang a, mizawng leh mihaute kikal za deuhdeuh in, gam khantouhna lam ah bahloh mahmah uhi. Ahihziak in, gam leilung hauhsakna neilou gam : S.Korea, Hongkong leh Singapore te tunai a khovel a gam masawn penpente ahi uhi.

 

Aleh lampang enta le hang, Norway gam, khovel a natural gas zuak khe tam penpen gam nihna ahi a, thautui lam ah a 5na ahi hi. Khovel a gam hausa penpente lak ah Norway tel hi. Huan ah, Botswana bang leng khovel a gemstone diamond om tengteng lak a 29% amau gam a piang ahi a, khovel a tu kum 40 paita sung a gam khangtou hat penpente lak ah tel hi. Huan ah, gam lei lung hauhsakna ahauh hang ua gam masawnna lam a hihse tuanlou gam khenkhatte - Australia, Chile leh Malaysia ahi ua; gam leilung hauhsakna ahauh ziak zaw ua gam khangtou ahi uhi.

 

Khenkhatte’n gam leilung hauhsakna ahihleh, vualzawlna hilou in ‘Gam leilung hamsia (Curse of Resources)’ ahi, chi hial uhi. Atung a I gen gamte, gam leilung hauhsakna nei chiatchiat hinapi a bangziak a hichi bang a kibatlouhna om thei hiam I chih leh, a baan a I gen ding - agam a teng mite hihna- quality of its citizens a kibatlouh ziak  ahi chihna ahi hi. Gam leilung hauhsakna neite lak ah mipi vaihawmna- democracy kitasam tangpi a, etsakna ding in Arab gamte leh Latin America gam ah; gam vaihawmtute’n amau kivulhletna ding in gam leilung hauhsakna zang ua, siamsinna leh mipite zalenna lam ngaipoimohlou ua, amau lal detna ding kia buaipih in nei uhi.

 

Ei Manipur Zomite lak bang enta le hang, gam leilung hauhsakna hiam, development project lian tham hiam om taleh, agam pumpi hausate min a om ahih chiang in, zangna dopna leh rehabilitation & resettlement fund te amutu ding leh akiphamoh diktakte kiang tung zoulou mai thei hi! Hiai hih oil & gas I gam ua laih khiak ahih ma leh, development work lian tham om ma ngei a bawl dik hoih ding hi.

 

A Gam Luahtute Mizia (Quality of Citizens):

 

Gam thupi leh minam thupi hi ding in, gam lei lung hauhsakna saang mah in, a gam luahtute mizia- a quality uah ki-nga lian zaw hi. Etsakna ding in, Palestina gam bang ziak a thupi ahi ding? Bangziak a ‘Gam Siangthou’ kichi ahi ding? A gam leitang siangthou hilou in, a gam luahtute lak a misiangthou a-om ziak uh hi zaw hi. Hiai gam ah Thukhun Lui hun in mi thupi taktak na piang ua. Thukhun Thak hun in a thupi zaw sem mihing hiai gam ah na khosa uhi. Hiai gam in leilung hauhsakna neilou a, semi-arid achih uh, gamkeu gam hi dek phial a; a gam letdan leng Manipur sang in neuchik in lian zaw deuh phet hi. Ahihziak in, Palestina gam, gam thupi tak ahi I chilou thei kei hi.

 

Gam luahtu mihingte chi nih in I khen thei ding a: khatna ah, ‘agam sung a teng ve maimaite’ leh, anihna ding in, ‘khua-le-tui diktak’ (Citizen) chih in.

 

Khatna ah, agam sung a teng ve maimaite’n mahni khosakna ding kia ngaihtuah ua, gam sung hoihna ding, minam khantouhna ding ngaihtuahlou in, agam hoihna ding amau mohpuakna ahih lam leng theiphalou ua, ganhing bang in khosa uhi. A inn huang umna uh, fencing hoihtak aneih naak uleh lungkim suk mai in, ahuang polam uh ngaihtuah baan nawnlou uhi. Democracy gam ah mipite’n gam vaihawmtu ding tel thei ua, ahihziak in, a gam luah ve maimaite’n a vote uh manphat dan theilou uhi. Huai ziak in, a vote uh sum in lei theih a, ahihkei leh, vau zek in, a vote uh laksak theih mai hi.  Gam vaihawmna toh kisai a ahoihlou amuhte uh leng bawl hoih tupna neilou ua, alak ua kipil sak deuhte bang in huai thil hoihloute hamphatpih tum zaw mah uhi. Mite gam a kiloh tawm maimai bang lungsim a put ziak un leh, tu hun leh tuni kia a ding a hing ahihziak un laizilna lam kisiat poisa lou ua, lampi hoihlou, tuineek ding omlou leh electric ginalou chihte amau ngaihkhawk ding ahihlam theilou uhi. “Theih ngeilouh dawisia saang in, theihsa dawisia ahoih zaw” chih thu-gin aa nei uh ahi ngei ding ua, angei ngei - heutu thulimlou leh palai ginalou khawng peuh kiteel teng in teelching uhi. Huchi bang a gam luah ve maimaite atam chiang un, gam-le-nam in masawn theilou a; a majority bang ahih zawk mah uleh, gam-le-nam a ding in hamsia suak uhi. Gam luah ve maimai tamna minam ding khelou ding a, mite nuihza buuk hi zaw ding ua; a manthat baih uleh a vaangpha hi ding uhi.

 

A nihna, khua-le-tui diktakte’n bel, tu hun leh tuni kia ngaihtuahlou ua, amau mimal phattuamna kia delh bok lou in, alian zaw leh a za zaw leh hun sawt zaw ding khualtel uhi.  Huan ah, gamsung kivaihawmna hoih leh hoihlouh leng amau mohpuakna dan in ngai uh a, ahoihlou leh thulimlouhnate pomzam maimai lou uhi. Khua-le-tui diktakte’n kiteel chiang in a vote uh manphat dan thei ua; alungkim uleh, lungkimlouh uh a vote un thugen uhi. A vote uh zuaklou ua, vau lauh zoh leng hilou uhi.

 

Minam thupi khenkhatte tanchin neu kha I gen ding hi :

 

Israelte I genta ua, I genlai ding : a mihing tam lam thu a teh ding hita leh, kuamah ik a nam tham ding ahi kei uh. Ahihziak in, minam khaa - spirit nei nam ahi uh. Nazi te’n Kidoupi-IIna lai in Judate maktaduai 6 a that uh, ahihziak in, Judate’n puksiat phahtuanlou uhi. Huai ma thamtham akipan in leng a lal masa, a lal nanung in Judate a ngawt uh, ahihziak in, a dam khosuak thou uhi. Damkhosuak maimai hilou in, siamthil ah, technology ah Israel gam pumpi Silicon Valley suak sak ua. Philosophy ah, banking ah, politics lam ah, science ah, thu leh laa ah, a tawm uh et in khovel sawiling thei minam ahi uhi.

 

Britishte lah? A thupi lam uh amau mahmah leng kithei uh ahi ngei ding ua, Great Britain chih min amau leh amau  kipia uhi. Gam lianpi, ‘gam-nitum-senglou’ a uk uleh, kidouna a avuallelh ngeilou lam uh gen kei ni. Huailou leng gen ding tampi om hi.

 

Britishte thupi uh ahi I chi ngam hi, aziak ahihleh, khovel lamdang sak zou uhi. Etsakna ding in, apau uh - English ziak in. Hiai pau ziak in, khovel mihingte kithuzak tuahna olsam in, kitheih siam tuahna piang hi. Hiai khovel a pau tualleng English ziak in science leh technology ah khovel in masawn phah hi. Hiai article gelhtupa, Burma gamgi zul vel a khang khia ‘tribal’  diktak na tan in leng English pau, Sappau chi in ngaina ahi ding a, ahun ah bang, ahunlou ah bang, hiai pau atheih sunsun zang nelnual sek tei sam hi!

 

Britishte akipan I laksawn uh, ‘Anglo-Saxon jurisprudence’ achih uh, ‘presumedinnocence, right to free and open trial, judicial independence’ achih khawng uh thupi I chilou thei kei hi. Huan ah, gamsung kivai hawmna a Executive,Legislature leh Judiciary khentuamna chihte amau bulpat hi chiah khol kei mahleh, hichi bang kivaihawmna a colony luite ua ahon notsiat uh leh, civil service system a bawl khiakte uh leng genlouh theihlouh khop a thupi ahi uhi.

 

United States of America (USA) I gen nawn ding. Americate na pakta vak kei ahi mai thei. Hi e, Americate ahoih bukim uh chi khang, huai baan ah, buaina leng hau  mahmah teisam ua -drug problem, hiam-gamna, gun culture, nupa kimakna, chi-le-kuang thil a kichi ziatna, nuai-et tak a gam dangte hih ding leh hihlouh ding hilh ga-ga gige,  mahni sum dinmun saang a saang zaw a khosakna chihte I gen seng kei ding.  Ahihziak in, I chi di, ‘ahihziak in’ chih Americate toh kisai in lianpi om hi.

 

Kum 50 paita in Americate Hotel leh Restaurant kong khawng ah ‘Dogs and Negros are not welcome’ chih kitaak hi. Ahihziak in, kum 2008 in akhat veina ding in Negro pa America President ding in tel ching uhi. ‘Land of opportunity’ achih dung zui un, a garage khawng ua abul pan in khovel a company thupi penpente hiai gam mite’n bawl khia uhi. Khovel Kidoupi-IIna  a Europe gambuppi asiat vek nung in Marshaal Plan chih bawl khia ua, huai dung zui in America te’n Europe ‘’leivui pan’ lam thak nawn uhi.

 

Bible in “Na melmate it in” achih thil hi-theilou ding in na ngai ahi mai thei. Ahihziak in, America te’n na zui kha vanglak uhi! Kidoupi-IIna hunlai in Japante ambassador pa’n  “Japante’n America dou a tum kei” chih Americate Secretary of State kiang a agenlai ngei in, Japante’n Pearl Harbour va bomb uh a, ni khat thu in Americate Pacific Fleet teng phiatmang in om uhi. Huchi bang a zekhemtute akipan gal ven nung in, khovel ngeina dan in ‘kidou zangna dawmna’, ‘war reparation’ achih uh lak ding hileh kilawm awm tak, ‘war reparation’ laak malak in, Japan gam bawlthakna ding in guhtui kang zen in Americate pang uhi. Huai kia hilou in, Japante lawm hoih pen  in bawl uh a, tuni tan in Japante security blanket in khuh khum zomah lai uhi.

 

America Solkar kia genlouh in, a mipite telphalna, telphal dan, mite panpih dia akipeih dan uh- mite adia akipiak zohna uh, hichi bang minam chikmah in khovel ah om ngei nailou hi. Khovel koimun peuh ah kial kia in, vangtahna tung taleh, sum-le-pai a apanpih baan un, haksatna tunna mun ah Americate atung masapen in pang gige uhi. Adang tampi genlouh in leng, kum 2004 a Indonesia a tsunami mulkimhuai tak atun in, America mipite’n (America solkar hilou in) panpihna sumtang’ athoh khawm uh dollar maktaduai 400.00 (Rs 2400.00 crore vel) val mahmah pha hi. Hiaite lah thildang tampite ziak in, khovel ah Americate minam thupi ahi, I chilou thei kei hi.

 

Bang ziak a minam khenkhatte hichi bang a thupi ua, khenkhatte thulimlou uh ahi ding? Hiai atung a I gen minam thupi thumte kiteelna gam ngen, democracy gam ngen ahi uhi. Hichi bang a athupi theihna uh ahihleh, a heutute uh ziak ahi ngei mai a. Ahihziak in, heutu ding teeltu mipi vantangte leng, mahni sia-le-pha theihna zang theite - ahoih leh hoihlou khentheite   ahihziak uh ahi, I chilou thei kei hi. Huan ah, sia-le-pha theihna zang thei ding mipi vantang bawl khe ding in, a siamsinna munte uh, a Biakinn pulpit uleh, a insung maitam uh zang phatuam minam ahih ziak uh leng ahi hi.

 

Quality of its Citizens:

 

Minam khat atulai dinmun na muh, vaan a aksi vaak na muh bang ahi a, tua na muh –tulai tak a adinmun hilou hi. Vaan a aksi vaak na muhte kum bangzah hiam avaakte uh hongpai nung a, tua mu pan na hi hi. Huaiziak in, tua na muhdan ahihleh, hun paisa a ahihna ahi hi. Huchi mah bang in, minamte tulai dinmun I chih leng, nidang a mi masate’n  human resources lam a investment ana bawl uh,  education lam a nidang a atuh-gah uh leh, nation building a asepsuah uh, tua hong lang ahi uhi. Khangkhat in a nu-le-pate uh tuh-gah a lou ua. Nang tuh-gah leng na tate’n lou ding uhi. Huai na thil tuh-gahte khenkhat aphazah teh theih a om ua, teh theihlouh zong om hi. Teh theihte tawm chik leh kikheek kheek ahi ua, a thupipen ahi kei uhi. Teh theihlouhte a tam zaw leh akilamdanna bawltu hong hi zaw ding uhi.

 

Bang ziak a tuni a minam khenkhat, nidang a bangmah vaklou a I ngaihte phazoulou I hi ding uh? Aziak ahihleh, na nu-le-pate’n huai I phakzohlouh minamte’ nu-le-pate saang a, amau tate uh tung a ‘investment’ abawl uh atawm zawk ziak ahi hi. Huchi mah bang in, nang leng khangthakte tung aa na investment tawm leh tam a zil in, na tu-le-tate’n namdangte khup thei in, phazoulou thei bok uhi.

 

Nidanglai a Greek Philosopher, Plato in Republic chih laibu ah “mi pawl khat (political community) a detdou leh a lohchinna ding un, a mimal malte mizia (moral character) uah ki-nga hi” na chi hi. Huai ziak in, gam khat hatna ding in, minam thupi ahihna ding in gam leilung hauhsaknate saang mah in, a mihing: khua-le-tuite mizia hoih, a caliber uah ki-nga lian zaw tham hi. Robert Bellah in “Minam thupite lohchinna a stock exchange uah hiam, a GNP(National Gross Product) hiam ua ki-nga hilou in, a khua-le-tuite mi bang chi bang  ahi uh hiam chih leh, tanu leh tapa bang chi bang anei khia ua, chih ah ki-nga lian zaw hi”, na chi hi.

 

Zomite Kiang a Thukhah leh Ngaihtuah Zom Dia I Deihte:

(1)   ‘Gam luahtu maimaite’ hilou in, ‘khua-le-tui dik takte’ hih tumta ni. Minam khat leh gam khat hoihna ding in leh, minam thupi khat ahihna ding in ‘heutute’ hiam, nam sung a mi thupi tawmkhate khut kia ah ki-nga lou in, mi vantangte khut ah leng ki-nga lian mahmah ahi.

(2)  Thilhoihloute, mi hon theih leh mi hon muh a I hih ziak a hoihlou hilou in, mi hon muhlouh leh mi hon theih ngeilouh ding dinmun a I om chia le hihlouh ding ahi. Hoihlou tuh hoihlou ahi, chi tinten ngam minam hih kizil ni.

(3)  Sum-le-pai leh dinmun a khem lungdam, lei zoh nam hihlouh ding ahi. Dinmun leh sum-le-pai khiak lahna ziak a I principle taisanlou ngam minam hih kizil ni. Hiai hih Zomite mi zia hoihlou penpente lak a khat, politics a I lohsapna naak uh ahi hi. Principle nei nam, huai a dingtang ngam minam I hihna ding un, a nam pumpi in panla in, Pathian kiang ah leng ngen ni.

(4)  Negu thei dinmun hiam, dan bohsiat theihna dinmun I let khaak chiang in, Pathian in huchi bang hih dia hon deih ziak a chance hon pia dan a ‘rationalize’ louh ding ahi. Joseph in, Pathian in Potipher zi toh golden chance pia dan in kisiamtan taleh bang achi di? Kumpi David in “Pathian in Uriahip zi toh aang kikawm tuah ding in hon deih kei leh, a kisil lai khelkhel hon musak lou ding ahi”, chi taleh, Pathian in a pom thei diam? Persia kumpi pa’n  Daniel siah/revenue toh kisai in Persia lalgam a alian penpen thumte lak a khat in koih hi. Daniel in, “Pathian in Jerusalem kulh bang kisia lam na ding leh Jerusalem temple kisia tunding nawnna ding fund deih a, ‘sum tamna’ a hon koih hi ding ahi” chi in, 10% hiam na ‘koih tuam’ in, Judate a ding in thohlawm tam pipi na thoh taleh, Pathian akipak diam?

(5)  Telphalna leh mi panpih utna lam ah Zomite’n zil ding nei ding in I um  hi. I tribal society in I panpih ding achih polam ah daak khia ni. A kua nam, a kua beh, ahong kipatna uleh, a pau kawidan un thu po saklou in, panpih ngaite panpih kizil ni. Ei lak ah mi panpih chiindan a I neihlouh luat ziak un, panpih ngaite panpih I om khaak zenzen chiang un, “Amau zaw a nei ua ahi” chih kampau kiza sek hi. Neihzoh ziak a mi panpih hilou in, phal ziak a, neih bangbang tasam zawte kikoppih dia kiphal ziak a mi panpih ahi hi. A biiktak in, Zomi numeite’n hiai tungtang ah taksap nei un I mu hi. ‘Amau aa lamte’, a tate uh, a pasalte uh a ding a akipiak zohna uh I phat. Ahihziak in, Zomi numeite’n  ‘amau aa lam’ hilou a atheihte uh, atate uh hilou, a pasalte uh leng hi samlou, kholak a mi panpih ngaite, mi tate hiam, ‘namdangte’ hiam, panpih haksa salaw deuh sek ua muh in om hi. Huaiziak in, Zomi pasalte’n mi panpih I kizil kawmkawm un, I numeite uh ‘slavery of selfishness’, mahni angma sialnasuak-le-sal akipan suahtaaksak tumta ni. Khovel en vengveng le chin, lamdang tak in, ‘charity habit’ nei minam, ‘charity’ hau namte’n, sum-le-pai leng hau thei zaw ua; a minam un leng vualzawlna dong zotham hi. [Chennai Musings-I, dated Chennai, 23/12/2014]

 

……..X……...

Read 593 times

  • ppguite
    ppguite
    Tuesday, 13 January 2015 20:20

    Thukhun Lui apanin Judate Pathian hing nei nam, Pathian toh kithuah nam ahih ban uah, mahni kivak theihna dia nasep ding (trade) khat nei a mahni kitoudelh dia kichil ahihna un a nam uh a khang sak a, mi phaklouh ahi uh chileng i gen khial law kei ding.

Login to post comments