You are here: HomeColumnsZokhualPasalte MAHMAH!

Pasalte MAHMAH!

Written by  Zokhual Published inZokhual Tuesday, 24 February 2015 21:45
Pasalte MAHMAH!

Lettu : Khamkhokam Guite

 

 

Ka thugen ding ahihleh, Pathian’ Thu Sawm Piak bohsiatna ah hong kipan hi. Thusawm Piak in ‘Angkawm ken’ chi a; invengte thil neih deihgoh leh azi uhiam, a pasal uhiam suhsak maimai bang leng phallou hi. Huchi bang thil ataktak a atun ziak in, a  genkhiak thil nuam hetlou himahleh, huai a abul I pat uh hong ngai ahi hi.

 

Kum bangzah hiam paita in, office secretary nungak melhoih tak mai khat in ka pa na ngaizawng thepthup hi. Ka pa ahihleh amah khom in melhoih a, khosak haksa lua ka hi kei ua, nalh bang leng nalh thei mahmah a, akhosak dan himhim bang leng zei in, mite mit-tung mahmah a; kou, atate bang in leng milak ah ka suang thei mahmah uhi. Ahihziak in, kou suan dan toh kibang hetlou, ‘suan dan’ chituam tak in ka pa saang a kum 17 a naupang zaw office secretary nungak khat - Julia kichi in ka pa na ‘suang’ hi.

 

Alehlam ah, ka pa ahihleh papi sa, sangse-pa achihte uh ahi a. Zi-le-tate nei in, atate kum 15, kum 7 leh kum 4 mi ka hi uhi. Kei ka hihleh, a nautum pen, huai hunlai in, numei naupang kum 4 mi ka hi hi.

 

Gibang Khenna Kawlni Hongsuak

Huchi bang a nungak melhoihtak leh tan-gai nalhtak mai in ka pa chihtak zet a azawl a, a ‘try’ chiang in, zawlzou hiaihiai hi. Inkuan hinkhua nuamlou tak mai ka hong suakta uhi. Atawp tawp in ka pa’n deihzawk tel fel in, ka nu toh kikhen in, Julia zi in neita hi. Vaihawmtute’n ka inkuan uh vai hon hawmsak ua; kei, anautum pen leh ka U numei, ka nu kiang a om ding hon chi ua; ka U pasal Bill ahihleh, ka pa leh azi thak kiang a om ding in thukhenna bawl uhi.

 

Hiai Thu Sawm Piak bohsiatna ziak a thil hong om in, mi 5 hinkhua haksatak in a bawl hi. Amasa pen in, hinkhua nuamlou tak a zangtu ahihleh, mi dang hilou in ka pa ahi hi. Inkuan kim leh nuamtak a ka khosak khawm liailiai lai ua kipak a anuih mai muh ding huai akipan in om nawn talou hi.

 

Selung Mawl Zuapa

Paching ahi a, hichi bang thil a hong tung ding chih mukhol dia kilawm himahleh, a mit hih del a om hi ngei ding hi.  Ka nu leh ka pa akikhen ua kipan ka Unu’n a skul kaina mun ah a omdan kheng guih hi. Skulpute thu mang ut hetlou a, thunun theih mawng mawnglouh in khosa hi. A skul ua Principal in ka Pa sam a, “Inkuan keksia pomsiamlou naupangte hichi bang a om sek uh ei ve…” chih theihsiamna toh ana hilh akipan ka pa’n athil hih khelh mulkimhuai dan ahon thei khia a, himahleh, zekai lawta hi. Huai ni akipan thilpoi law mahmah na hih kha ahihlam akitheih khiak dan ka pichin nung in hon hilh hi. “Huai hunlai in genthei tak a na khosa hile hang, zite khen a - zi dang nei ngam hetlou ding hi ing a. Ahihziak a, hausa ing a, inkuan nih enkol khawm thei dia kigingta ing a. Huaiziak maimai a, zi mak na ngapthoh ringot hi ing a, sum-le-pai a chawmzoh ziak a zite khen ding na hi hetlou hi. Huai sang a poi zaw na tam law mahmah hi,” chi in hon hilh hi.

 

Akisik a, himahleh, pasal ahi a. Pasal in ahihsa uh khek nawn utlou uhi. Nipi kaal tawp chiang in hong ‘pai’ zel hi. Atheihtawp suah in ka ‘Pa’ uh hih hong tum sek hi. Ahihziak in, ka Pa uh himahleh, ka nu - azi hi nawnlou ahih chiang in, Seppatni ahong tun chiang in azi thak Julia kiang ah hon kiksan zel hi.

 

Ka Pa Zi Thak Julia Kua Hi Peuhmah Hiam?

Huchi bang a ka naupan hunlai uh tam zaw ka zat khit nung un ka hong upa deuhdeuh ua, thil om dan k’on theisiam hiaihiai uhi. Ka pa zi nawn Julia ahihleh, ka nu gensek bang hial a dawise numei, Jezebel ana hisamlou ahi, chih bang leng k’on thei khia uhi.

 

Nungak fel vantang tak ahi a. Numei beven leng na hi khollou hi. Heltu ding tangval tasam leng ahi kei hi. Ahihziak in, ka Pa khat vei amuh akipan in ngaih chihtak in  ngaizawng ngal a, pasal dang himhim pasal muh a mu thei nawn hetlou ana hi hi. Kou, ka na ngaihtuah dan un ahihleh, ka pa zawl petmah a azawl ziak ahi ka chih lai un, aman ahihleh, “nakpi tak a kidek kawm a, neukha chik ‘kihong’ maimai” dan in kigen hi.

 

Ka Pa neih-le-lam deihgoh leng hi zenzenlou hi. Mi inkuan holhphel hih bang leng haksa sa mahmah sam hi. Huai kia hilou a, ka Pa’ inkuanpihte lam leh, ka pa lawmte’n a vauna uh leh a kousiatna khawng tengteng uh leng phun hetlou a dai dide a thuak tuansuak ana hi sam hi. Ka U Bill in a nu dia apom utlouh atheih masak  bang aleng, alungsim na mahmah ahih lam khawng hon hilh hi.

 

Ihmulou Phawn Hak

Ka U, Bill, tangvalnou kum 17 mi in pom siam thei mahmahlou hi. Ka pa zi nawn Julia in nek ding apia a, ka U in hotel a an neek bang in ne mai hi. A puansilhte a sawpsak a, a poimoh tengteng hihsak vek a, ahihziak in ka U Bill in nu dia pom tuan mahmahlou hi. Houpih le houpih ngeilou himhim hi.

 

Ka pa leh Julia in ta hon nei ua.Tanu melhoih tak ahi hi. Himahleh, Bill in pom in, don ut ngeilou hi. A hong bokvak thei a, khat vei houh, Bill pheitung a kahtouh a tup leh, Bill in na sawnthal top mai hi. “Naungek in pau hon ziltou a, ‘nang kua?’ chih kia siam a, miteng ‘nang kua?’ chih a dotdot lai in, midang teng in ahihleh, kei huai chih ka kigen chiat ua, Bill in ahihleh kua ahia chih gen nuam bikbek lou hi” chih, anung in Julia in hon hilh hi. Huchi in, kum 21 ahong chin in Bill in inn nosia a, huai nung ka kimu vang mahmah uhi.

 

Pasalte MAHMAH….!

Apasal pomlai midang in a suhsak top mai ka nu’n pomsiam haksa sa mahmah hi. Hun leh kum avei tam chiang in thuak haksa sa deuhdeuh hi. Ka naupan lai un mi gentheite panpihna lam ah ka nu kizang mahmah hi. Genthei panpihtu pawl bang ah leng tel hi. Ka unau ua ding ip khat chiat hon khuisak a, sum neen ka neih chiang un huai ip ah ka thun zel uhi. Ka nu’n huaite khonkhawm in mi gentheite kiang ah pe zel hi.

 

Himahleh, huaite tengteng ka Pa toh akikhen ua kipan tawpsan hi. Ka naupan lai un tulai bang in mite lungsim lianlou a, genthei panpihtu pawl khenkhat bang in meithaite a pawl ua tel ding bang in leng deihlou uhi. Ka nu leng meithai ahong hihtak ziak in, a tawpsak ua, mi zawngte panpih thei ding dinmun ah leng ding nawnlou hi.

 

Ka pa ahihleh a gense ngei het kei a, ahihziak in Julia ahihleh numei thulimlou, numei gilou leh sual tak in angai a, kou bang leng huchi bang a ngaihtuah ding a hon sinsak hi pen in ka thei hi. A hinkhua thawmhau a, khawisa vutvut sek hi. A lungsim anat taktak chiang in, “Pasalte MAH MAH…!” chikhe vungvung zel hi.

 

Itna Taang In Dipkuatna

Hiai paukam tomchik “Pasalte MAHMAH..!” chih in ka nu hinkhua sawiling zou mahmah hi. Pasal tengteng tung a agintakna bei sipsip hi in ka thei hi. A tanute leng hiai ka nu ngaihdan in hon zou mahmah a; tuailai ka hong hih touh ua, ngaihzawng khawng bang leng nei thei ding dinmun ka hong hih nung un leng, ka nu paukam “Pasalte MAHMAH…!” achih sek in hon thunun gige tamai hi.

 

Ka hong upa deuh ua, hostel khawng ah om in, midang toh khosak khawm akul hun bang ahong om hi. Kum 17 ka chin ma in pasal peuhpeuh, pasal naupang tanpha, ka houpih ngei kei phial hi. Ka sang-gamnu toh ka zahkai thei mahmah ua, hon ngaizawng bang deuh a pasal in hon et maimai chiang un le, lauhna in ka pum dim uhi. Kingaizawngte’n ‘itna’ achih sek uh thumal ahihleh, kou unau a ding in  ‘dipkuatna’ hon tuntu ahi zaw sek hi.

 

Ka sang-gamnu ahihleh, ka nu paukam in azou kholdiak hi. A hong pichin a, tangval heltu bang zah hiam aneih nung in leng a lungsim khek thei tuanlou a, pasal neilou in a hunte a zangta hi.

 

Semdam Huihkhi

Vangphat huai tak in ken ka hihleh, hon theisiam tak leh hon dawmtak kawm a hinkhua lampi hon kawkmuhtu ding Carl ka tuak kha a, “Na nu-le-pa’n, nupa hinkhua aa lohsapna ana tuah ziak ua, nang tanpha in na damsung teng haksatna na tuah touh zel thil dik hi ding in na thei ahia?” hon chih akipan in ka ngaihdan leh hinkhua ahong lamdangta hi.

 

Bang teng hileh, ka nu leh pa te kikhenna in ka hinkhua nasatak in hon khoih thouthou hi. Carl toh ka kikhaamlai uleh, ka kiten nungtan un Carl in Company neuchik khat ah khaloh tawm chik loh in a sem hi. “Hichi gige lou ding hang a, khaloh tam zaw lohna ding nna bang leng hon musam ding kei ve” chi in hon hehnem sek hi. Ahihziak in, ka pa’n khaloh tam a loh ziak a, inkuan nih vaak thei dia a kigintak ziak maimai a pa neilou aa khang khia ka hih lam ka thei gige a. Gen khe  ngam chiah silou in, Carl in khaloh tampi hon loh kha ding chih, a guk in ka lau thei mahmah mai hi.

 

Ahihziak in, a taktak ahong tun chiang in ahihleh, a gaal apan I na lauh bang hial zaw hong hi khollou a. Ka ta masa pen uh, tanu ka neih ma deuh un Carl hong kaisang in, a sepna Company ah Assistant Manager in hong tu hi. Kum nih nung a tapa ka neih uh toh kituak in ahong kaisang nawn hi. Sum ahihleh, ka lung-gulh pen uh hi kei mahleh, akiphatmoh hun a sum zat ding ka neih zel ziak un ka kipak thei mahmah uhi.

 

Tuak Kei Lawle Uh

Huaite tengteng sang in, ka naupan lai a enhuai ka sak penpen – inkuan nopsa leh inkuan bubit tak - ka tate’n nei uh henla, ka thil tuah leh thuak bang tuak in thuak kei mahmah le uh, chih ka ut pen ahi gige hi. Inkuan nuamsa leh lungkim ka hihna ding un Pathian kiang ah leng ka ngen sek hi. Ka naupan lai a thuak haksa ka sak penpen khat ahihleh, aziak gen ding pen leng om khollou a, thawmhau leh lungleng vungvung a ka om sek ahi pen hi. Ka graduate tan in mun tuamtuam ah ka pemkual sek ua, State tuamtuam 5 ah skul ka kai hi. Huchi bang himhim a lawm mulmal leng neilou leh pasal mawngmawng lau ringot a ka khan khiak bang in, ka tate om kei le uh chih ka deih pen hi. Ken ka tum bok a, ka tate apianna inn uah a khang khia ua, veng nuam zaw mundang om thou mahleh, inveng hoihtak lak a akhankhiak ziak maimai un leng ka kipak mahmah hi.

 

Khemna Ahi Thei Diam Aw?

Hon theisiam tak pasal ka neih ziak in Pathian kiang ah kipahthu ka gen sek hi. Inkuan kipaktak hi in, thil khawng ka hih khawm dialdial zel uhi. Bang peuh hong tun chiang in, Thu Sawm Piak I bohsia uhia? chi in ka ki-enchian zel ua. Thu Sawm Piak bohsiatna ding a khemna ahi thei diam? chih ka kidong zel uhi.

 

Khat vei le, ka tapa uh kum kua ahih kum in, private skul khat in “Na tapa uh kou skul ah hong kai leh, scholarship ka pe thei ding uh”, chih hon hilh ua. Neukha a lailam ahih theih deuh ziak a, huai bang a hun lemtang mu kahih ziak un ka kipak mahmah ua. Ahihziak in, huai skul ahihleh, laisiamna lam leh hauhsakna lam a mi vantang tung a deuhte leh, inkuan thupi taktak akipan naupangte ngen kaina skul ahi hi. Huchibangte lak ah skul vakai taleh, huchi bang inkuante thil neih bang nei zoulou in, ka tapa un, mite thil neih enna khelhna ah a lut loh diam aw, chih ka lau mahmah uhi.

 

Sawtpi mahmah Pathian dong kawm a inkuan a ka gen khawm nung un, amah akai di pen – David tuh hoih tak mahmah a thuhilh in, huai skul ah ka kai sakta uhi. Huchi in, mite neih bang nei zoulou kawmkawm a lungkim veve in ka koih thei uhi.

 

Khat vei tuh a skul ua alawmte khat, Jimmy kichi in kaltawp chiang a zan nih a inn ua giak ding in a chial hi. A va giak ngei hi. Jimmy pa ahihleh sumsin mihausa tak mai ahi a, a nu ahihleh, film star minthang khat ahi hi.

 

Hausa Thawmhau

A hong tun kik in, ka tapa un Jimmy te inkuan tanchin a gen chimthei kei hi. “I maw, a inn uh pindan atam dan maw, ka sim seng kei! A ompihnu bang uh le, English pau siamlou a, French pau a houpih ngai zomah! A Swimming Pool khawng ua tui liau ung a…. Ahihziak a, Jimmy nu omlou a… film bawl a zin khe gige a, tua le Jimmy in anu amuhlouhna kha nih bang phata a, Jimmy in anu ngai thei law mahmah…” chih khawng agen zuahzuah hi.

 

Ka tapa uh thugen ka ngaihkhiak kawm un, ka nupa ua ki-en in ka nui ringot uhi. Ka tapa uh, David in le Jimmy te inkuan a eng hetkei hi. Huchi bang inn lianpi sung a ompihte toh kia thawmhau leh tangkhat tak a khosak ut huai sa hetlou hi.

 

Ka hinkhua bang a haksa hinkhua atuah khak ding uh lau in ka tate ka kithuahpih in, inkuan ka opkhum gige hi. Huai kawm in, mite neih-le-lam enna khelhna a lut a, inkuan saang a khovel thilte angaih poimoh zawk khak ding uh bang leng ka lau hi. Ka thil tuah bang atuah ding uh deihlou ka hi pen mai hi. Ahihziak in, vangphat huaitak a huchi bang haksatna tuaklou a, mite inkuan bang inkuan ka neihtheih ziak un kipah chihtak in ka kipak hi.

 

Mi tampite’n inkuan kiphel leh keksia akipan khanlet mulkimhuai dan athei kei ding ua. Huaiziak in, inkuan hoihtak a khankhiak ahi ding dan mah in angai mai thei ua, kipah luat ding ahihlam leng a thei khol kei uhi. Ken ka hihleh, inkuan keksia akipan khanlet amulkimhuai dan atak in kana tuakta a; inkuan bubit leh hoih a khanlet kichi, a manphat dan leng ka thei chian mahmah hi. Huaiziak in, Inkuan bubit leh hoih a khankhiak I chih, Pathian kiang a kipahthu gen gige na tham ahih lam I theihna ding un, hiai thu ka hon gelh khia hi.

 

Gelhtu : Dina Donohue

 

[Hiai thu, ataktak a thil tung ahi a. Ahihziak in, a gelhtunu Dina Donohue in, aminte uh a phuahtawm ahi hi. Hiai thugelh a a ‘tangtute’ asihkhit nung ua le amin diktak uh va zat ki-oi tuanlou in, ataktak a thil tung ngen himahleh, hichi bang in min lem gen in paisuak den kha hi.]

Read 807 times
Login to post comments