You are here: HomeColumnsZokhualThe Matrix Trilogy

The Matrix Trilogy

Written by  Khamkhokam Guite Published inZokhual Saturday, 23 May 2015 17:00
The Matrix Trilogy

 

Limsiam Khovel, Atak Gam Leh  Ngaihtuahna

~ By : Khamkhokam Guite

 

‘Ataktak’(reality) kichi bang ahi ding? Mihingte ngaihtuahna in ataktak leh limsiam athei khen thei diam? Na kim-le-kiang a na muh leh, thei hi a na kingaihte, na ngaihtuahna a na limsiam maimai ahi thei ding uam? Na kim-le-kiang a thil omte gentaklouh, nang mahmah leng – atak a omloupi, limsiam maimai na hi thei diam?  Mihing ngaihtuahna kichi bang ahi ding? Na khuak a ‘kawlphetha te’ (electrical impulse) ‘ngaihtuahna’ kichi suk mai ahi thei diam?

 

Hiai thu a buaina na neih leh nang kia hilou in, Plato, Rene Descartes, Jean Baudrillard leh philosopher dang tampite’n leng hiai thu na buaipih ngeita uhi. Huanah, Matrix film thumte hiai buaina akipan kibulphuh ahi, I chi thei hi. Hiai article theihsiamna ding in Matrix film thumte – The Matrix, Matrix Reload leh Matrix Revolution  et hoih ding hi.

 

Plato leh Ataktak :

Nidang lai a Greek philosopher, Plato laibu gelh minthang mahmah Republic kichi ah, Plato in a taktak leh limsiam khovel tungtang gentehna hichi bang in na bawl hi [Book VII, pp161-72] : suangbuuk(cave) sung ah mi bang zah hiam apian ua kipan in khum chibilh in om uhi. Huai suangbuuk sung a  mitaangte ahih uleh, nunglam hiam, taklam leh veilam hiam en theilou a, malam kia mahmah en thei ding a khau a ngak in om uhi. Huai mitangte ma a baang (wall) ah mihing, singkung leh ganhing liimte (shadow) muh theih milmial in om uhi. Huai a mai ua thil liimte kia mu a khang khia ahihziak un, hiai mitaangte’n(prisoners) huai  liimte ataktak hi in pom uhi.

 

Ni khat huai suangbuuk sung a tangte lak a khat ataanna akipan suakta  thei zenzen hi. Hoihtak a a etchet leh huai athil muhte uh – a taktak hi a angaih sekte uh, liim maimai na hi ahi chih hon mukhia hi. Huaiziak in, a liimte pen ataktak hilou in, a liim bawltu – mihing hiam, singkung leh ganhingte ataktak na hi zaw ahi, chih hon thei khia hi. Huai kia hilou in, huai ataanna  buuk sung akipan hong suahtak chiang in, khovel za zaw hon muta a, ataktak leh limsiam hon thei khen theita hi. Huchi mah bang in, mi khenkhatte ataktak hilou, limsiam hinkhua akipan philosophy tungtawn in zalen thei zenzen ua; huchi bang a suahtakna ngahte’n phuahtawm leh limsiam khovel a khosa atamzawte aphawnhalh ding uh, amohpuakna uh ahi, chi in Pluto in na gen hi.

 

Rene Descartes Ngaihdan:

Rene Descartes ahihleh, Cartesian Co-ordinates mu khetu French Mathematician leh Philosopher minthang tak, “I think, therefore I am” chi tupa ahi hi.  “I think, therefore I am” chih omzia ahihleh, “Thil ngaihtuah vengveng thei sam  ka hih ngal buang chiang in, kei pa atak a om taktak mah hi ngal nalou ding ka hi hia” chihna ahi I chi ding hi. Kum 1641 a a laibu gelh ‘Meditation on First Philosophy’ ah, Descartes in, “Hiai khovel a ka thil tuah leh ka hinkhua himhim, atak a omloupi, limsiam maimai – dawisia khat in ka tung a thil tung dan a hon theihsak maimai ahihleh hihlouh bang chi in ka theithei dia?” chi in a ginlelh thu na genta hi. A theihtheihna te’n khovel a om taktak leh taktaklouh theihchetna pe theilou ua, zalmang khovel chauh a na khosa gige ahih maitheih thu na gen hi. Huaiziak in, a theihtheihnate kingakna taklou ua, amah leh khovel pumpi dawisia in a thunun himai thei hi, chi in thupukna na bawlta hi.

 

Jean Baudrillard leh Atak Sik-le-Tang a Alem:

Jean Baudrillard in a laibu gelh ‘Simulacra and Simulation(1981)’ ah, kum zabi 20na tawplam in ahihleh mihingte’n ataktak sang in, ataktak toh kibang - alem ngaina zaw uhi, na chi hi. Etsakna ding in: mihingte’n hai/theihai gah atak a nek a, atak tui dawn sang in, bazar a kizuak ‘ataktak toh kibang – thildang polhlouh’ chi a azuak uh lei tam zaw in, dawn tam zaw uhi. Huanah, Huanhai – annah(vegetables) mahni Huan akipan lak a, meh sang in ‘healthy food’ chi in, khawl a bawl tawm, annah akipan bawltawm – a lem hon zuak ua, huchi bang kine tam mahmah hi, na chi hi. Aziak ahihleh, advertisement/phatna abawl tam ziak un huai in mihingte lungsim kaikawi in, mihingte ‘consumer culture’ ah pilut in, ataktak neek sang a, ataktak kibatpih lung-gulh zawkna hon pia hi, na chi hi.

 

Jean Baudrillard ngaihdan ahihleh, Karl Marx & Friedrich Engels ngaihdan akipan kibulphuh hi in kilang hi. Karl Marx ngaihdan in ahihleh, vaihawmtute’n mipi vantangte uinou kaihtak in kai uhi, na chi hi. Bangziak a huchi bang a hih thei uh ahi ding. “A ziak ahihleh”, Karl Marx in “Mipi vantangte’n ahihna tak uh theilou ua, huchi bang a uinou kaih a kaih a om ahih lam uh akitheihlouh ziak uh ahi”, na chi hi. Bang ziak a mipi vantangte’n a dinmun diktak uh theilou ua, mulou uh ahi ding uh? Aziak ahihleh, vaihawmtute’n  skul, college leh sahkhua a kisinsaknate zang a mipite akhem hai ziak uh ahi, na chi hi. Huanah, ‘nam-le-gam itna’ chih khawng zang in vaihawmtute’n mipite khemhai in, zalmang khovel ah pilut in, asisan uh tawp kang uhi, na chi hi. 

 

Matrix Film:

Khenkhatte a ding in Matrix film te ahihleh, kungfu film hiam, special effect hoihtak omna film ahi mai thei uhi. Hi e, a kungfu uleh a special effect te uh hoih in, huaite kia leng et tham ching uhi. Huai  I chih kawmkawm in, a thukente un leng ngaihtuahna saupi paisak thei in, hinkhua toh kisai a philosophy question a piankhiak sakte leng sui tham ching mahmah uhi. Huanah, Matrix film te ahihleh: theihna (knowledge), limsiam khovel (illusion), ataktak gam (reality), kho-phawkna  (consciousness), zalenna (freedom), vaang (fate), theihkholhna (foreknowledge), belsehsa (preordained), ginna (faith), hoihna (good), hoihlouhna (evil), khanlohna (enlightenment) leh hinkhua hilhchetna ahi uh leng I chi  thei hi. Kimlou tak in hiai Matrix film thumte –The Matrix (1999), The Matrix Reload(2003) leh The Matrix Revolution(2003) te na ngaihtuah sutzop ding in, anuai a bang in a potham in i en ding hi:

 

Zalmang Khovel - Matrix

Matrix ahihleh computer bawltawm zalmang khovel ahi hi. A taktak in mihing maktaduai a simte tuinaang bawmsung (slime-filled cocoon) ah ihmut tuitak in ihmu sak ua, a khuak uah limsiam khovel, atak a omlou computer in kaplut uhi. Hiai mihingte a ding in huai limsiam khovel a taktak mah bang kia hilou in, ataktak a thil tung dan in ngai uhi. Huai limsiam khovel sung a ‘khosa’ in,  nasem ding in office kai uh a, TV en in, bazar kai uhi. Hiaite ataktak a thiltung dan in ngai uh a; ahihziak in, hiaite amau lungsim a, amau khuak a computer in a thun maimai ahi hi.

 

Kum 2199 vel ahi a, hiai khovel   ‘khawl khuakneite’n’ (artificial intelligence/ sentient machines) vaihawm khum uhi. Hiai zalmang khovel - Matrix kichi bawltu leh enkoltu ahihleh, hiai ‘khawl khuakneite’ ahi uhi. Hiai zalmang khovel (Matrix) ahihleh computer hattak bawlkhiak(output) ahi hi. Computer dang bang thou in, hiai Matrix khovel  hardware leh software pangkhawm a bawl khiak ahi hi. A film ah kilang kei mahleh, kawilai hiam ah computer mainframe lianpi petmah om in, huai in hiai zalmang khovel a bawl ahi hi.

 

Kum zabi 21na kipat tunglam ahi a, ‘khawlkhuaknei’/ sia-le-pha theihna nei khawlte’n ‘fundamental right of machine’ ngen in hong kiphin uhi. Hiai ‘khawlkhuakneite’ deih ahihleh, ‘kou sia-le-pha theihna nei khawlte khua-le-tui diktak bang in hon pom unla, mihingte right bangbang hon pe sam un’ chih himai hi. Ahihziak in, mihingte solkar in khawl aa theihsa, khuaknei tale zong, mihingte dinmun toh kikim a domsang touh lemsa theilou uhi. Hong kidou uh a, atung in ahihleh khawlte vuallel ua, hawl khiak in hong om uhi.

 

Hiai khawlte’n hawlkhiak a a-omna mun uah khopi khat hon bawl khia ua. Huai khawlte khopi min ahihleh, amau ‘ngaihtuahna’/’sia-le-pha theihna (awareness) petu, binary code min suang in 01 chi uhi. Eden Huan akipan huai hun tan in mihingte ngaihtuahna ahihleh, huphulhnate, hazatna, ngiimkiitnate makaih ahi gige a; ahon gen khawm chiang un, “tu in khawlte zou le hang le, chikchiang hiam a mihingte adia dongkholh thou thou ding ahi uh”, chihthu in, mihingte’n huai khawlte khopi 01 tung ah gal hon puangta uhi. Huai khawlte hinna/thalakna  ahihleh nizung (solar power) ahihziak in, khawlte a gamtat theihlouhna ding un, ni a satlouhna ding in, mihingte’n tunglam vaandum tanpha hon nuhvom/vomsak(nuclear winter) uhi.  Hiai ziak ahi, Matrix film a khoniim dan a a om gige na san.

 

Tunglam vaandum nuhvom huntawklou hi. ‘Khawlkhuakneite’n’ a damkhosuah na’ng un ahun leh amun dungzui in kikhek lamdang theihna nei  ua(adaptive/evolve). Hiai kidouna ah atawp in, mihingte hong vuallel uhi. Hiai kidouna a suakta mihing khenkhatte’n a bitna ding un leinuai ah khopi khat Zion kichi bawl in, teng uhi. Mihing atamzawte hingmat in om ua, hiai mihingte –taksa lam(physiological) leh lungsim lam(psychological)  a etsinna(experiment) ding a vanzat in hong om ua. Huai akipan in Matrix chih hong piang khia hi.

 

Matrix chih hong kipatna tak ahihleh, khawlte’n mihingte etkol haksa leh buaihuai salaw mahmah uh ahih chiang un, mihingte ‘koih-hoihna’ (final solution) dia ahon lem-gel khiak uh ahi hi. Hiai Matrix in  khawlte tung a  buaina leh lauhhuai bawl theilou in mihingte koih a, ihmut limtak in ihmu sak hit hit a, huai kawm in a khuak ua ‘kawlphetha’ (bioelectricity) in khawlte khopi 01 electric kiningching tak in chawm hi. Mihing maktaduai tamtakte khuak zawpkhawm (plugged in) power house liantak himai a, huai in khawlte khopi electric pia hi.

 

Bang ziak a mihingte khemna ding a khawlte’n hichi bang, Matrix kichi thupitak leh, haksa tak computer programme  bawl khia uh ahi ding? Naungek (Mihing) ahong pian khiak phet chiang un, a pichin chiang ua khawlte adia lauhhuai a bawl theihlouhna ding un, huai naungekte poilong in koih ngal zel le uh ave le, na chi ahi mai thei hi. Hiai tungtang I theihchet theihna ding a I theih ngai ahihleh, hiai ‘khawlkhuakneite’n’ mihingte dinmun amuh chiang un, hehpihna tan nei uh ahi chih I theih hoih ding hi. Khawlte’n amau utna tellou a mihingte  suak-le-sal a amat uh himahleh, nuamtak a ahinkhua uh azat deih uhi. Huai ding in, Matrix zang in khawlte’n hiai mihing maktaduai a simte khuak ah limsiam khovel, mihingte hindan ngeina, chin dan leh tawn  dan toh kituak programme kaplut ua; huai kawm in a taksa uh bel ihmut limtak in ihmusak hit hit uhi. Hiai tungtang Matrix film masa a Agent te’n Morpheus a mat ua, thu dotna (interrogation) a bawllai ua Agent Smith thugen akipan in chiang mahmah hi. ‘Khawlkhuakneite’ sahuan enkoltu (zookeepers) ahi ua,  mihingte ahihleh, sahuan a  gamsate bang ahi uh, chihna ahi hi.

 

Neo - Limsiam Khovel Akipan Ataktak Gam Ah :

Matrix film masa ah: inn loihsa sung a pindan lui nepnuap sung ah Neo leh Morpheus hong kimu khongkhong uhi. Morpheus in Neo kiang ah suak-le-sal maimai hi gige ahih dan hilh a, Matrix dinmun diktak lah leh, etsak tum hi. Huai ding in, Morpheus in Neo kiang ah damdawi tang nih, a san leh a dum  pia hi. Neo in atang dum pen a neek  leh, a inn ah ihmu khanglou ding a, tua akihouna uh khat leng theih neilou in, manghilh vek ding hi. Damdawi tang san pen Neo in a nek leh, Morpheus in Neo kiang ah ‘thutak’ lak in, ensak ding hi. Neo in damdawi tang san hon ne a, huchi in, a kiang a limlang hong tuisuak in, hong zul hi. Neo in ava khoih chiang in, mercury bang a tuinaang hongsuak in, huai in amah tuum-mang ding in hong kisa hi. A khovel hong zulmang ding in hong kisa  a, hong patau hi. Neo tuzem(vat) sung a tuinaang(jelly) lak akipan in  lumai pengpung in hong khanglou a, huai bellianpi toh agui in kizom hi. Huchi bang tuizem maktaduai a simte sung a mihing omna, a kimvel teng ah dim hi. Thoukang bang melpu leh lengthei robot te’n a dek vut vang ua. Huai khit in, Neo omna tuizem akipan huai tuinaangte khaihkhiak in om ua, pipe sung a tolh in tuizem a tui adim a omna ah ke suk hi. Siktaiteh/ metal claw khat spaceship akipan paisuk in, amah huai siktaiteh in tep in, khovak ah hon domkang tou hi.

 

Plato’ suangbuuk  gentehna - atunglam a I sim bang in, Neo leng a taanna suangbuuk sung, huai tuh - Matrix akipan hong halh khia a, limsiam khovel akipan in ataktak gam ah hong lutta hi. Ama a ataktak hi a angaih teng khempeuh suangbuuk sung a liimte bang maimai a  limsiam ahi, chih hon thei khia hi. Plato in limsiam khovel akipan a atak gam a lut theite mohpuakna ahihleh, huchi bang a limsiam khovel a khosa laite hilh pil ahi, na chi hi. Hiai Matrix film ah leng Neo in atak gam hon thei khiak chiang in, limsiam khovel a teeng leh bawltawm khovel - ataktak nasa gige mihingte suahtak sak hon tumta hi.

 

Descartes in dawisia ana chihleh hiai Matrix kibang mahmah a, ‘khawlkhuakneite’n’ mihingte amau deihtelna tellou in bawltawm khovel ah teeng sak uhi. A theihtheihna uh – muh theihna, khoih a theihna, bil a zaakna leh gim theihna tanphate’n mihingte khem ua, hiai limsiam leh ‘khawlkhuakneite’n’ a bawltawmte uh a taktak mahsa uh a, ginlelh ding ahihlam thei deksuailou uhi. Huchi mah bang in, Neo in leng Matrix akipan akitut khiak (unplugged) ma in, a hinkhua limsiam maimai ahihlam theilou hi. Descartes gen bang in, Matrix akipan hong zalen tak in ahihleh, thil teng akilat dan bang ua pomzam mailou in, ataktak hi ngeingei a kilang a tutphah/chair tanpha a om ngei ahi, a taktak ahi ngei ahi, chih tanpha ginglel hi.

 

Matrix Film a Mi Poimohte:

 

Neo (a.k.a the One, a.k.a. Thomas A. Anderson)

 

I gensa bang in, Neo in a hinkhua aa hi-a atheihte computer phuahtawm khovel, ataktak hilou, zalmang maimai ahi chih Morpheus piak  damdawi tangsan aneek akipan hon mu khia hi. Huai ma in ahihleh, aneekzonna computer hacker hina pi in, ahihna tak theikhe zoulou hi. Khovel mihingte, computer phuahtawm khovel nuai a khosa ahih dan uh sinsak a; huai akipan hunkhe ding in amohpuakna, a damsan, ahinsan semkhe ding in theih tawp honsuah panta hi.  Morpheus, Oracle leh midangte’n  Neo a gen chiang un, ‘the One’, ‘hongpai ding pa’ chih ngen in gen uhi. Neo ataktak khovel hong tun ma in, ‘khawlkhuakneite’ akipan leh limsiam khovel a kipan mihingte hunkhetu ding hong pai ding ahi, chih genkholhna na om ngeita hi ding hi. Huan ah, Matrix khovel a Neo min ahihleh (Agent Smith sap sekna mah bang in) Thomas A. Anderson ahi hi. Anderson chih ahihleh, Sapte khanglui pau ahi a, ‘mihing tapa’ chihna hi thepthup hi.

 

Morpheus :

Morpheus ahihleh ataktak khovel a tengte heutu muanhuai, hangsan leh haksatna leh lauhhuai chiteng kal a leng taise ngeilou, heutu hoih ahi hi. Huan ah, Morpheus taksa himhim leng lian in, hat a; huai kia in leng a damlai mihing tamloute khamuan zou mahmah hi. Morpheus in Neo zong khia in, thutak kawkmuh hi. Neo buchinlouhnate leh amah leh amah akigintak zohlouhnate mu mahleh, ‘the One’, mihingte zalmang khovel a kipan hunkhetu ding ahihlam ginglel ngeilou hi. Neo in a damsan, khovel a ahinsan asepkhiak theihna ding ahihnakleh, Neo taang a sih leng poisalou hi. Neo, Trinity leh a damlai mihingte a ding in Morpheus in ‘Pa pen’ dingmun luah a, pilna leh makaihna hoih in amaute pi hi.  Morpheus chih ahihleh, nidanglai Greekte ‘zalmang pathian’ min ahi a; mite zalmang khovel akipan phawnhalh theihna power leng tawi ahi, chi uhi. Hiai film ah Neo,Trinity leh mi tuamtuamte zalmang khovel(Matrix) akipan in Morpheus in phawng halh in, kaithou hi.

 

Trinity :

Trinity ahihleh, nidang in computer hacker ana hi a, limsiam khovel akipan Morpheus in a hutkhiak, Zion khopi a tengte lak a khat ahi hi. A tha hat  a, leather jacket a kithuam in, kungfu siam mahmah a, thaukap  siam lam ah leng duaisanlou hial  hi. Super-woman ahi pen mai hi. A itna thil hihthei tak in, Neo sisa bang leng kaithou thei tang hilhial hi.

 

Agent Smith:

Smith ahihleh, computer programme ahi a, Matrix sung a nasem ding a bawl ahi hi. Matrix sung ah ahihleh, programme te’n asep ding bang uh asep zoh chiang un ‘delete’ in om uhi: etsakna ding in Keymaker. Agent Smith akipan akilat dan in, mihing leh khawl kikal kigamla lou a; ahihziak in, a tawp in mihing mah vualtungtuang ahi, chih kilang chian hi.

 

The Oracle :

Morpheus mah bang in Oracle leng Neo pilna toh a makaihtu khat ahi hi. Ahihziak in, Oracle thil hihtheihna bang tan hi hiam chih chianglou hi. Khat veileh, hun hongtung ding thunun thei hileh kilawm a; khat veivei lah, hun tung nailou thei khol bang a, khen khat chiang in lah, ‘huchi mai thei’ chihtan kan gen thei lou bang hi. Hiai Oracle ahihleh, Greek tangthu a Oracle of Delphi akipan kila hi in kilang hi. Greek khangluite’n Delphi khopi ahihleh, khovel laizang tak ahi chih gingta ua. Delphi khopi ah Apollo Temple kichi om a, huai ah mipil mahmah Oracle kichi numei khat teeng hi. Socrates in Oracle ava veh leh, Oracle in Socrate kiang ah “Khovel a mi pil pen na hi” na chi hi. Aziak ahihleh, Socrates in “Bang mah theih ka nei kei” achih ziak ahi hi. Huai omzia ahihleh, mi tampite’n a theih sang ua tam zaw thei dan a akilim bawllai un, Socraes in ahihleh a theihlouh lam kithei khe ding khop in pil hi. Huai ziak a, Oracle in Socrates khovel a pil sa pen hi. Oracle omna Apollo Temple  baang ah, “Know thyself” chih kigelh a; Matrix film a Oracle kongkhak tung ah leng, “Know thyself” chih kitaak  hi.  Huai in a gen bel, pilna taktak ahihleh mahni kitheihchetna ah ki-nga hi, chi nuam hi ding in I gingta hi.

 

Matrix Film a Limsiam leh Ataktak Theihkak Theihna:

Mi tampite’n Matrix film a et chiang un theihsiam haksa sa ua. Aziak ahihleh, koimun pentak hi hiam(where the action is) chih theih khen haksa sa sek uhi. Matrix film sung ah khovel chi thum(3) om ua, amaute : Matrix - Limsiam khovel, khovel taktak leh Rail Station te ahi uhi.

 

Hichi bang ahih chiang in Matrix sung ahi hi:

  • Ø Mite suit leh leather jacket khawng a kichei a, mobile phone khawng a akihou chiang un.
  • Ø Car, motocycle, helicopter leh truck khawng a om chiang in.
  • Ø Agent Smith leh a phiikpih (clones) Agent Smith te na muh chiang in.
  • Ø Insawng sang taktak na muh chian. Etsakna ding in, Metacortex Corporation.
  • Ø Vaan a dum kiikiai a, kho omdan a sian kilkel chiang in.
  • Ø Khopi in min a neihlouh chiang in.
  • Ø A kum 1999 hileh kilawm a akilat chiang in.

 

Khovel taktak ahih chiang in:

  • Ø Mihingte puansilh leh kicheinate kise niipneep hi.
  • Ø Hovercraft, sentinel chih khawng na muh chiang in.
  • Ø Khawlte khopi(Machine City) na muh chiang in.
  • Ø Vaan a vom dedu chiang in.
  • Ø A khopi min Zion ahih a, leinuai a a om chiang in.
  • Ø A kum 2199 vel ahih chiang in.

 

Atung a kigen khovel nihte ban ah, Matrix Revolution ah khovel dang khat omlai a, huai ahihleh, Rail Station ahi hi. Hiai Rail Station ahihleh, Matrix khovel leh ataktak khovel kikal a om hihtuak hi. Neo leng hiai ‘awngkal’ a honglut (smuggled) hileh kilawm hi. Huai Train Station omdan khenkhatte:

  • Ø Rail lampi a tawpna mun ah kipan a, a kipatna mun ah tawp hi(a film na et chiang in na thei siam ding).
  • Ø Rail hektupa’n a kumsak kei leh, kuamah Rail a kipan kum theilou uhi (Down here he’s God).
  • Ø Neo in a thil hihtheihna (superhuman power), hiai Rail Station a a om chiang in zang theilou hi.

 

>>>>>>X>>>>>>>

Read 491 times

  • tribalsuperman
    tribalsuperman
    Monday, 25 May 2015 17:00

    Khonung sim lele eipau a The Matrix review and athutun ngenteltak a simtheih dia hong om hoih lawtel.

  • tribalsuperman
    tribalsuperman
    Monday, 25 May 2015 17:11

    The Matix kha gospel film ahi chi pawl bang le om hial uh hiven

Login to post comments