You are here: HomeColumnsZokhualUmpawng Pak Zekai!

Umpawng Pak Zekai!

Written by  Khamkhokam Guite Published inZokhual Saturday, 02 January 2016 01:21
Umpawng Pak Zekai!

By : Khamkhokam Guite

 

Ni Umpawng! Ka Ni Umpawng, pak zekai!

 

Tuukpi beita a, phavang awllen lai tanpha in leenmual khumta hi. Phalbi tungta a, zingsang chiang in, singteh akipan meizun tak keuhkeuh ua. Phalbi nupi in leng, tha-it tak in naupang geep deuhte liah tum in kholai ah delh delh panta hi. Pawltaak hita a, mite’n lou lawita uhi. Loulai ah buhpawl leh khaupe loungal muh ding om nawnta’ lou uhi.

 

Na thei lai hia, Ni Umpawng? Hichi gige lou a maw, hiai louzau ah mite thawm ging leh kikou ging zak theih hunlai om a, huai hunlai in loubuukte ah mei tuah ua, khu vingving geuh uhi. Tun zaw, huchi bang hunlaite, nunlui tangta ua, sap kiik theih hita lou uhi.

 

Ahihziak a maw, ka Ni Umpawng, thil khat k’on dong himhim ding. Bang ziak a tu khonung a, pawltaak nung leh mite’n lou a loih khit nung ua, tha-it tak a loubuuk tung a pak lehlah na hia? Haichi dangte toh akituak a tuh a om chin a maw. Haichi dangte pou hun a pou sam hi chin a. Bekungkah leh, beguul gui bangthou a na zaamna ding piak a om chin a; buuk tung aa kitang zial a, guulpi kual aa kual ngeingai hi chin a. Na khasiat na’ng omlou a, na paulam ding leng vaang mahmah hi! Aziak ahihleh, buuk sung a houlimna teng za pha a; thu kuan lam leh, thu pailam thei ding a buuktung tak a zaam na hih chiang a!

 

Mite louhaam khohlai a bang hih na hia? Mite’n a thual nawn a khohlai ua nang bang ngaihtuah? Lou phuai lai a koi a om na hia? Paangleen maimai a, na hun hoih teng zang gai maw? Buuk sak a na pou tung a “En dih, I Umpawng chi tuh uh a pouta” chi a kipaktak a kihilh tuah a, nang aa kipan lametna liantak leh sangtak neite, nang zuau san ding maw? Amaute deidong tongkhong a koih mai, thil kilawm ahi dia hia, Ni Umpawng aw?

 

Tangmai gui na phaklouh na’ng om tuanlou a, dawnpawl gui sang a na gui lian in, sau zaw hi. Dawnpawl teh/nah sang in na teh lian in, etsuak zaw tham uhi. Tangmai leh dawnpawl pakte sang a maw, na pak lian in etlawm zaw hi. Na pak in a kimpih zaw maw, tangmai leh dawnpawl pak maimaite hilou in, maiteh pak ngat ei ve! Ken zaw maw, na kikimpihte phazoulou ding a hon gingta phal mahmah lou kei ve, ngaihnat tak, ka Ni Umpawng aw!

 

Ahihziak a maw, Ni Umpawng, haichi dangte toh tuh/pawi hun kibang, pou hun leng kilamdanglou himahle chin: amaute, nang sang a pak masa zaw ua; nang sang a gah masa zaw uhi. Huaiziak a maw, mite’n haichi an-niam leh thulimlou chikchik : tangmai, dawnpawl, mazel leh vaimim chih khawng maimai thupi ngaih ua. Kuaman nang hon phawk phalou ua, na pak kilawmna pakta’ tu ding omlouh kia hileh pha ve, na phattuamna takngial leng gen ngeilou uhi.

 

A poitel mai! Zekai luat ziak in, na ‘rank’ kikimpihte gentaklouh, na ‘rank’ sang a nuai zaw deuh zek a na ngaihte tanpha in luigaal lehlam ah va-uk in hon ham santa uhi. Na phu dingte phuzou nawnlou in, na nahte lian in hing ngiingei geuh mahle uh, na pakte lian in bang chituk in etlawm in, bangchi tuk in tha-it leh phatuam ngai in pak mahle chin, hun paisate sapkiik theih hilou ua. Hiai na pouna lou leng, na kiziat ziat sung in loutul suakta a; na damsung in lou thak suak ngei nawnlou ding hi. Na zaamna loubuuk takngial leng, loutul buuk hi denta ding hi.

 

Ka Ni Umpawng aw, nang hon paakta’ a, hon kipahpihtu ding om sun zaw, loutul veh nupi honte kia loungal om nawnlouta hi. Lengkul kisa a na gah gam gipgiapte, a sengto uh adenna ding ua, huai hi mai hi. ‘Hope’ phak ding dang na nei nawnta kei hi. Nidang a lou kuan a, thawm ging vingvengte hong kik nawnlou ding ua; louzau thak lam ah, zawl dang leh leeng dang hon sai san in, singdang siang ah saanmun muangta ding uhi.

 

Ahihziak a maw, chi lailai le, loutul veh nupi maimaite hon pahtaak a nang lungkim gige ding maw? Amau zaw maw, genta maimai le hang, na vun teng hon hawk khiak sak in leh, na sungkua teng khuahsiang in, na guh vuak a om chiang a, a bel tokheng khawng uh nawt siang na’ng a hon zang ding uh ei ve!

………………
The time has gone,
The song is over,
Though I have something more to say.
(TIME by: Pink Flyod)

Read 444 times
Login to post comments