You are here: HomeColumnsZokhualNurse Khat Tangthu : Ka Damsung a Ka Thil Hih Hoih penpen, Cancer a Damlou Khat Tapa Kum 9 Mi Ka Etkol Ahi

Nurse Khat Tangthu : Ka Damsung a Ka Thil Hih Hoih penpen, Cancer a Damlou Khat Tapa Kum 9 Mi Ka Etkol Ahi

Written by  Khamkhokam Guite Published inZokhual Saturday, 02 July 2016 13:36

(Karen Mott in Melody Warnick kiang a agen bang in)

 

Lettu : Khamkhokam Guite

 

Cancer Damdawi Inn ah kum 7 sung Nurse in ka sem hi. Damloute’n nuam asakdeuh na’ng uh ahihpeuh leh, amau a ding a hihsak peihlouh ka nei kei hi. Rizai silhsak, theitui dawnsak leh akhut uh leen kawm a thumna neihpih chihte akulnak leh kin-gang taktak in ka hihsak sek hi. Ahihziak in, 2011 kum in huai Cancer Damdawi Inn – MetroWest Cancer Center, Framingham, Massachusetts a numei damlou khat Patricia McNulty kichi in ahihleh, ka panpihna deihhetlou in, panpih theih mawng mawnglouh in khosa hi.

 

Hiai ka damlou uh ahihleh, kum 44 a upa, numei neu chiuchiau khat, pasal toh kikoplou a(single parent), amah kia a tapa khat enkol ahi hi. Alu leh ngawng ah cancer hat mahmah te nei in, chemotherapy dose sangtak in ki-enkol hi. Ka damlou dangte uh banglou tak in, amah kia in om a; vehtu ding bang leng nei seselou hi. Ahihziak in, houlimpih theih hetlouh hi. Ka houlimpih dekpat chiang in, houlim a utlouh man in laibu sim hiam in, ahihkeileh, rizai in kilu-khuh suk ngeih in, lum bimbem thei zel hi.

 

A tawptawp in, a nuih mai ka muh theih na ding ziak khat ka mu khia a: huai ahihleh, a tapa kum 9 mi, Stephen kichi tungtang genpih ahi hi. A tapa Stephen in skul a ahih hoih dan khawng leh, a lavui gelh mipi mai a simkhe ding a chial a a-om thu khawng hon hilh hi. A tapa skul kai bus a hong tung, va dawn gige a utman in, chemotherapy ni khat a zoh mai ding, ni nih khai ding, chi tinten hi. A diktak in, hichi bang a chemotherapy dose sang lua alakna ziak ahih leh Stephen ziak ahi hi. A tapa enkol thei ding a dam vilvel ut mahmah hi.

 

Hiai damlounu, Patty hinkhua ahihleh, kidouna phual bang deuh gige hi. A gentheih luat ziak un, khotang vaak in om ua; mi zawngte inn dia alamte uah teng uhi. Tunai zek in, a ngaihzongpa, Stephen pa leng hibok, car in a phutkhak ziak in a khuaklam buai a, poilong in om hi. Ahihziak in, Patty in ka huchi, ka khachi e, chi in a lungkham mangbat thu gen ngei mahmahlou hi. A gentheih, vangsiat leh tuahsiatnate tengteng chillum toh valh in, sialpi vuah thuak bang in dai dide in thuak mai hi. A damsung teng huchi den hi ding in ka muangmoh hi.

 

Huchi bang a kum khat-leh- akim sung chemotherapy alak nung in, kum 2012 in a cancer in a taksa kawm teng ah zungkai ahi, chih hilh in om a; sawt a dam nawn kei ding chih ka theisiam mai hi. Huai ka theihphet a ka lungsim a hong lang masa pen ahihleh, “A tapa Stephen bang chi ding ahi de aw” chih ahi ngal mai hi.

 

Patty in sang-gam u pasal nih nei a, huaite’n Stephen la utlou uhi. Huchi bang mah in, a sang-gam dang 5 te le a enkol peih omlou uhi. Patty in a tapa, enkoltu ding neilou naupangte - mite’ inn a aban omsakte uh bang a mite’ inn a a-om ding angaingam kei chih ka thei hi. Ahihziak in, si dia kisak-kholh I chih thu-na mai ahi kei a; huaiziak in, Stephen tungtang thu genkha ngei nailou himhim hi. A gen zoulou lampang leng ahi hi.

 

A cancer atawp tungta ahihchiang in, ka damdawi inn ua damlou, damzou nawnlou dingte etkolna lampang(Hospice programme) ah Patty atel angaita hi. Ka pasal Michael ahihleh, huchi bang damlou sih ding ngakte Pastor ahi a; huaiziak in, Patty leh a tapa Stephen tanchin bang chichi hiam in na zakha hi. Kikhopna aneih chiang un damloute tungtang thu nursete’n gen khawm sek ua: a tapa pil dan leh naupang vantang tung a mi ahih dan khawng leh, a nu’n asihsan chiang a amah bang chi om ding ahi de aw, chih kuaman a theihlouh thu khawng uh kikum khawm sek uh hi ding hi.

 

Patty theichian hetkei mah leng, amau nuta’ tungtang thu in ka lungsim hon kam gige hi. Ka lungsim sung a aw khat in, ka nupa ua hiai naupang laak a, etkol ding thu hon huau siausiau gige khat om in ka thei hi.

 

Ahihziak in, ngaihdan haihuai tak mai hilou di hia? Nidang a midang ta enkol kha ngeileng hilou ung a; huai chia le, ka tate uh enkol pichingta a, nupa kia a khosa bang ka hita uhi. Ka tanu nihte uh – Lelsey kum 21 leh Morgan kum 19 te college kaisak ung a, tua sepna neita ua. Ka tapa uh Casey lah kum 15 mi, kum thum nung a college kai a innlum nose ding ahita hi.

 

Ka pasal Michael lah kum 63 a upa hita a; kei sang in kum 10 in upa zaw hi. Ka inn uh lupna pindan 4 nei, bawl hoih a; zuak khiak a; kum sawtlou nung chiang a upalamte teenna lam a kisuan khiak ding ka pasal in ngaihtuah panta hi. Huchihlai a, ken primary skul naupang khat ka inn ua lalut ding maw? Bang chi zawngteng in tehle le, innkuan hausa ka himahmah kei uhi. Ahihleh, huai naupang enkol bang hita le ung, a laizilna, a college kai na’ng sum-le-pai bang chi suktuah ding?

 

September kha in, zan khat ka pasal in thakhat thu in “Huai naupang I laak ngai ding hive aw maw” hon chi khe guih mawk hi.

 

Ka kiguih a, ka gingta thei kei phial hi. “Kenle huai ngaih tuahtuah kha kei ve”, chih in ka dawng hi.

 

Nui kawm in “Theihsakna hi ding ei ve maw” chi hi. Kou nupa ka hih uleh, sahkho’ mi tak ka hi ua. A diak in, ka pasal Michael bang in Pathian hon sapna leh hon deihna chih thei in, ngaipoimoh thei mahmah hi. Kum 7 pai liamta in Pathian’ sapna za a kithei in, a sumdawnna lohching tak zuak khia in, Bible college ah valut hi. Tua leng huai toh thil kibang ahi pen mai hi.

 

Ka tate un hon lemsak pih uh toh kiton in, ni tamlou nung in ka nupa un, Patty inn ah Patty toh ka tu khawm uhi. Sun nilouh a ka genkhawm nung un : aman hon omlouhsan chiang in, Stephen kou kiang a hong om ding in ka kithukim theita uhi.

 

Hiai naupang neu maimai a ding in hiai ka kithukimna uh ahihleh, damdawi kha’ tak neek bang ahi ding, chih leng ka thei uhi. Amah a ding in kou innkuan ka hih uleh, theihngeilouh mikhual bang ka hi ua; amah leng kou innkuan a ding in huchi bang thou ahi hi. Ka kitheihchet ua, ka kinel na ding un Stephen leh a nu, nipi kaltawp chiang a hong hoh ding in ka chial uhi. Patty in tunung zek chiang a, a tapa inn thak hong hi ding velchetna nei a, inn sung teng a avialpai lai in, Stephen in ka kiang uah America President tengteng a lal kum uh akizomdan diktak in second 20 sung in genkhe zatzat hi. “Mahmah mai! Naupang vantang maimai zaw hilou deuh ei ve” ka lungsim in ka chi hi.

 

Huai kia mai hilou in, Stephen in pichingte gen bang in politics gen thei ahi, chih bang leng ka mukhia hi. Huan ah, laigelh leh sim bang leng siam in, kiva mahmah hi. Huchisa le hanglah, pawl 4 sinlai naupang - hatok bimbem, hai milmel khat ahihna hong kilang thei zel hi.

 

A thuak hat chitdan khawng ka ngaihtuah tuah kha sek hi. A nu damlouh toh, accident ziak a apa poilong toh, a innkuan uh gentheihna toh in hiai naupang piching sak hulhul ahi chih leng ka mu hi. Ahihziak in, naupang neu maimai khat bel ahi thouthou hi. Ka nupa kaal ua tu in hon kawi tiktek a, kou innkuan lak a khat bang ahih ngal mai theih dan in ka lungsim hon lawng kha’ mahmah hi.

 

Patty ahong kiakniam hiai hiai toh kiton in, ka pasal toh amah ka enkol tou zel ua; nek-le-dawn ding khawng a fridge uah ka koih sak zel uhi. Huan ah, damdawi inn lupna khat ngaihtuah sak in, a inn uah ka koihsak uhi.

 

October kha ahong hi a, Stephen skul kai akuan khit in, Patty in dai dide in khovel noseta hi. Ka pasal toh Stephen skul kai tawp kava pi ua, inn kiang nai a park ah hohpih in, dil kiang a tutphah zawnsau khat ah ka tutpih uhi. A tawptawp in, “Stephen, tu zing in na nu’n hon bei santa” chih ka genkhe thei khongkhong hi. A kam a kipan aw hawngpawt khia bangbang, ka damsung in khat vei le ka za kha ngei nai kei hi. Ka kikal ua tu in, hiai naupang gawng giugeu lungkham a kap in, mau tuaituai mai hi. Ka damsung ua ka thil tuahte uh lak a thuak-haksa ka sak penpen uh ahi hi. Amah khovel kise dimdem bang ahita hi. A tawp in, ka inn uah ka tonpih uhi.

 

Amah kia a tangkhat kisatak a a omlouh na ding chi in, ka tapa uh Casey toh pindan khat ah, kha bang zah hiam ka giak khawm sak ua. Lungkham mangbangte hehnem a, enkol siamte kiang khawng ah leng ka hohpih uhi. Huan ah, a kiang nai a anu om bang a atheih na ding in, a nu van tuamtuam toh pindan khat a thumna aneih hun ding bang leng ka bawl sak uhi. Ama lupna pindan tuam aluah nung in, zanchiang a akhanloh teng in kapkap mai hi.

 

Ka hihtheih uh omsun ahihleh, it tak kawm a ka innkuan uh niteng khosakna ziak a buai vengvung sung a amah leng zeptel ahipen mai hi. Ka seppihte lak a khat, Beth kichi tate toh ka kithuahsak ua; Stephen a heutupen hisak in, lasa kawm a lam(skits) ka zil sak uhi. Nipi kaal tawp chiang in, car a neihlouh ziak ua a muhkhak ngei nailouh, mun tuamtuam khawng ah ka hohpih zel uhi.

 

Krismas hong nai a, Stephen in Santa Claus a houpih kha ngei nai kei chih ka theih ziak in, ka veng nai ua Mall a Santa Claus duty pa ka houpih a, ka innkuan tanchin khawng uh ka hilh hi. Ka tanute toh Stephen in Santa Claus a houhpih theihna ding in huai Mall ah kava taiphei lunglung uhi. Santa Claus in Stephen kawi thinthen kawm in, lungsim sungnung pen akipan, a nu tanchin anih ua a kikup khawm tiptip uh ka muh in, ka sung-gil ah hon zen ngeingei khat om in ka thei hi. Stephen maitang aa tuipolhlouh kipahna hong taang khia ka muh chiang un, ka innkuan un ka kap kha uhi.

 

Tunai in, Stephen kaina skul a amau class te tengteng in agelh ding uh lavui khat a skulpupa un pia hi. Huai lavui ahih leh “ Ka inn nuam uah…. “ chih a abul pat ding chih ahi hi. Stephen in a lawmte lavui gelh “Ka inn nuam uah ka nu’n ….” chih ngen aa kipan amuh chiang in, khase thei mahmah mai hi. A tawp in, aman leng hichi bang in gelh thei khawngkhawng hi:

 

Ka inn nuam uah Karen in khamuanna la hoih ngaikhia a,
Ka inn nuam uah Mike in ‘mac ‘n’ cheese’ limtak bawl a,
Ka inn nuam uah it, etkol leh humbit in ka om hi.

_________________

Read 1733 times
Login to post comments