You are here: HomeColumnsZokhualGingtute Adi’a Laigelh Poimohna

Gingtute Adi’a Laigelh Poimohna

Written by  Khamkhokam Guite Published inZokhual Monday, 11 July 2016 13:33
Gingtute Adi’a Laigelh Poimohna

Gelhtu : Khamkhokam Guite

 

Bible sung ah ‘Gelh’ chih kammal 348 vei om a; ‘Gelh in’ chih ahihleh, Thukhun Lui leh Thukhun Thak ah 14 vei tuaktuak tuang in, anih a gawmkhawm in Bible ah ‘Gelh in’ chih 28 vei kigen chihna ahi hi. Hiaite aa kipan in Pathian in laigelh ngaipoimoh mahmah ahi chih kilang hi. Pathian in Mosi kiang a Thusawm Piak apiak lai in “ Hiai Thute Gelh Khia In…” chi in, Mosi in alungsim a achiamteh hunsa mailou a; agelh a koih a; kem hoih ding a adeihthu gen hi. Huchi in, Mosi in “…huai suangpekte tung ah agelh hi…”, chih leng Bible ah I mu hi (Ekso. 34 : 27, 28).

 

Bangziak a Gelh Ding?
Mihingte thil mang-ngilh hattak I hi ua; a gelh a a-omlouh chiang in, kimang-ngilh hiam ahihkeileh, theih dan kibanglou thei hi. Mi thugen hoihtak bang leng a ngaikhia mipite, a nung a I kikup khawm nawn chiang in, atamzawte’n manghilh khin ua; a theilai kichi omsunte’n leng I zakdan leh theih dan kibanglou ngal sek hi. A ziak ahihleh, kam kia a kigen – agelh a omlou ahih chiang in, atuung a agentu gen dan ki-enkik thei nawnlou hi. A ngaikhetute’n mahni ngaihdan leh mizia toh na gawmkhawm in, theihdan kibanglou sek hi. Huaikia hilou in, a gentu mahmah inleng, gen nawn dek taleh, ama a agendan chiahchiah in gen thei nawnlou ding hi. Committee-na mun a Thupukna poimoh mahmahte bang leng, etkik theih dia Meeting Minute Bu a akigelhlouh chiang in, kimang-ngilh hiam, ahihkei leh, theidan kibanglou ngal zel hi. Huaiziak mah in, I khanglui tangthute uh, agelh a omlou, kam a kigensawnte, khoteng leh innkuan teng phial ah kilamdanna zekzek om deuh vek hi.

 

Thu hoih mahmah leng kam a kigen kia ahih chiang in, a kiangnai ate kia in zapha ua. Huaileng, azatute’n amau ngaihdan toh na tokpolh belbual geuh uhi. Huaiziak in, kam a thu kigen in a uap-phakna leh sawkphakna tan tom in, tawm hi. Agelh a a-om chiang in ahihleh, ki-en kik, kisim kik kik thei kia hilou in, laibu, magazine leh thil tuamtuam, internet tanpha ah hong tuang a; abatphakna tan sau in, sepkhiak leng hauzaw hi. Huan ah, thu agelh a omte ahihleh, mahni om mun ah, mahni lemtan bang in kisim keuhkeuh thei a; kuamah hih buai hetlou in, mahni deihkhop tan ki-ngah thei hi.

 

Kam a thugen ding ahih chiang in, thu hoihpi khat gen ding bang hitale hang leng, a ngaikhetu ding a om uh ngai hi. Huai ding in a hun, a mun bang leng poimoh a; I ut hunhun in hunlem kipiak mai theihlouh hi. Ahihziak in, gelh thoh ahih chiang in ahihleh, mahni omna mun ah, mite theih ding a I deihte, I ut hunhun in kigelh in, I ut hunhun in, mite sim ding in kiphoulang thei hi. Huaiziak in, kam a thugen hoihthou mahleh, agelh pibawl ding ahih dan kilang hi.

 

Laigelh Poimohnate :
Mihingte si in, mang thei ua. Ahihziak in laigelh ahihleh si theilou hi. Khovel a laigelhtu, adamlai ua mite ngaihsang lawmlawm louhte bang leng asih nung chiang un, a laigelh nawtsiatte ua kipan mite ngaihsang tampi om uhi. Huaiziak in, laigelh ahihchiang in, a upat zoh photleh, manpha semsem bang hi. Ahihleh, Bible agelh in na omkei taleh bang achi ding? Bible agelh a omlou hileh, Khristian sahkhua tuni in khovel a sahkho’ lianpen hilou himhim ding hi. Huan ah, Toupa Jesu tanchin bang leng Tanchin Hoih Lite a ana kigelh ziak in, singtang khoneupen a kigen leh, khopi lian penpen a tengte gendan kibang hi. Huaiban ah, Bible a gelh thoh a omlou bang hita leh, tuni a Bible agelh thoh a a-om nung aleng Saptuam hichi tuk a tam ahih chiang in, Bible kam vuak a kigen sawn hitaleh, nasa peuh mah ding in I um hi.

 

Huan ah, pau si leh nam mangthang I chihte leng a pau uh agelh a omlou leh, a gelh tamloute pau ahi tangpi hi. A gelh a a-om chiang in, etsakna ding in: Hebru pau bang, tawlkhat laiteng pau mangthang bang a ngaih phial ahi hi. Ahihziak in, apau uh a gelh a Bible, tangthu leh laibu tuamtuam tampi a neih ziak un, Israel solkar leh Judate’n angaihpoimoh chiang un, hon kaithou thak in, tuni chiangchiang in, pau hing leh, masawn tak hong suak theita hi. Huaiziak in, laigelh poimohna gen uang lua chih om theilou hi.

 

Laigelhtute’ Vualtung Tuanna
Marka, Luka leh Paula : Bangziak a tuni tan a Jesu damlai a a nungzui leng hiphalou - Marka leh Luka te min Biakinn sung leh pua a gen gen kha-nak I hi ding uh? Aziak ahihleh, Jesu tanchin chiangtak leh theihsiam olsam tak a ana gelh ziak uh ahi hi. Huchi mah bang in, ‘a hunlou a piang’ Paula in Bible sung a Laikhakte hichi zah zouzai ana gelh ziak in, amin mang moh a; Khristian sahkhua khovel a sahkho lianpen a bawltu, Pathian vanzat poimoh penpen khat suak hi.

 

Siampu Samuel leh Kumpi Saula : Doctrine lam toh kisai hilou in, laigelhtu’ vualtung tuanna I gen-ot nopna in, Bible a siampu Samuel leh kumpi Saula tanchin etdan leh gendan chituam deuh in I en in, I gen ding hi.

 

Pathian’ Gamchiam Kanan aluah nung uh kum 180 vel kumpi neilou in Israelte om uhi. Huai hunlai in, ‘Vaihawmte’ chi ua; nam bang zah hiam, ahih kei leh gam-uk tuam biik nei in Vaihawmte nuai ah om tiltel uhi. Huchih hunlai in, a kim-le-kiang ua namdangte’n ahihleh, kumpi neita ua; kidou chiang in a kumpite un makhaih zel uhi. Israel te’n kidou chiang a makhaih a, vaihawmsaktu ding kumpi deih in Samuel kiang ah nget chihtak in ngen uhi. Pathian in Samuel kiang ah Israelte kumpi ding zonsak ding in thuhilh hi. Samuel in ahihleh, Israel te’n kumpi aneih uh a deihsak hetkei, chih Bible ah chiantak in kigelh hi.

 

A tawptawp in Samuel in leng, Saula, bawng mang zonglai mukha a, a melhoih dan leh a let henhon dan khawng amuh chiang in, kumpi ding a hoihsa ahi ngei ding a; Israelte kumpi ding in thaunilhta hi. Israelte lak ah Saula liangkou tan sang a sangzaw omlou leng kichi hial hi(I Sam 9:2). Kumpi a neihlouh ziak mah un Israelte’n khopi - solkar tutphah tuam neilou ua; Saula bangleng kumpi dia thaunilh ahih nung in, a khua uh Gibea ah kiknawn mai hi. Sepaih kip leh dinglai(standing army) tanpha leng neilou uhi. Saula kumpi ahong hihnung sawtlou in, Israelte’n amah makaihna nuai ah Amon gal hon dou ua; hong vualzou ngal uhi.

 

Israelte’n kumpi aneih ma un, Samuel in thuneihna tengteng lenvek a : Vaihawmtu(kumpi) hihna, Zawlnei hihna leh Siampu hihna teng uun vek hi. Thunei mahmah vetvet ding in I gingta hi. Saula kumpi ahong hihtak chiang in, Samuel thuneihnate lak a mihing tak a I ngaihtuah chiang a khiaklah huai mahmah khat - vaihawmtu, kumpi hihna pen Saula apiak khiak hong ngaita hi. Huaiziak in, Samuel lungkim thei mahmahlou in, ‘chiangkot leh mankhawng hong kituah’ hun ngak giugiau hi.

 

Sawt ngakluat ngailou in, hun lemtang khat hong ompah hi. Huai ahihleh, Israelte’n Philistine galdou’ ding hon masuan nawn ua. Kumpi Saula hi in, a mipite hitaleh, huphulh mahmah uh hihtuak hi. Saula in galdou dia a kuankhiak ma in Pathian kiang a kithoihna lat ut hi. Huai ding in, siampu Samuel in Gilgal ah ni 7 na ngak ding in vaikhak hi. Kumpi Saula in Gilgal ah a sepaihte toh Samuel na ngak uhi. Ahihziak in, a hunchiam sung in siampu Samuel hongtung thei mahmahlou a; huchi bang a amawk om chiang un, sepaihte discipline kisia in, morale leng keniam hihtuak hi. Huaiziak in, sepaihte a innlam uah aguk in paipai uh a, sawtdeuh huchi bang in omle uh, a sepaih teng in taizak san ding ahi uh chih Saula in thei hi. Kumpi Saula lungkham in buai mahmah mai hi. A tawptawp in, ahunlai a namdangte hihdan bang in, Saula in amahmah in, siampu Samuel tellou in Pathian kiang ah kithoihna na bawlta hi.

 

Ni 7 beinung in siampu Samuel hongtung leeklawk taget hi. Kumpi Saula in kithoihna ana nei khin chih atheih chiang in siampu Samuel heh mahmah a, “Vai na hawm zom theita kei ding” chi in Saula hamsiat khumta hi. Saula in Samuel zahtak in, tung-et mahmah ding in I gingta hi. Saula sang in Samuel a kum thu ah leng upa zaw a, kumpi hihna sawttak na lenta kia mai hilou in, Pathian zawlnei ahih chiang in, Pathian leh Israelte kikal a palai omsun hi a; huan ah, siampu hi lai zawmah hi. Saula sang in Samuel in meltheih hau zaw in, Israel minam sung ah chethei in, thupai zaw tham lai ding hi.

 

Saula in kumpi ahihna in akentel mohpuakna lian pipi nei ding a; huan ah, galdou dek ahih chiang in, sepaihte siamtak a etkol leng nnapi mahmah suak ding hi. Hiai mun bang ah a sepaihte taizak ding in kisa laizomah uhi. Huchih naklai in, ami zahtak leh ngaihsang mahmah leh amah kupi dia thaunilhtu - Samuel atung ah lungkimlouh chihtak in lungkimlou in, hamsiat zomahlai hi. Kumpi ahihna a amohpuakna toh, Samuel hamsiatna khawng tengteng apuak chiang in, Saula in ‘mental depression’ nasatak neih phah in ‘nervous breakdown’ bang leng nei hi ngei ding hi. Bible in “Toupa sawl, kha gilou in amah asoisa” achi hi. Kumpi Saula a lungnop deuh na ding in, Bethlehem tangval David bang leng tum-ging kilawmte tum a, kumpipa hehnem ding in Saula inn ah hun bangtan hiam khosa hihtuak hi.

 

Saula i chih a taksa lian in, a thahat leng hat a, hangsan bok hi. Melmate lak a namsau toh akivai chiang in - nahtang kung lak a Ngalngam namsau toh ‘pupa khan zil a’ akivai chiang a nahtangkung a kipuk duamduam bang in - melmate puk zuazua uh hi ding hi. Ahihziak in, thuneihna kituh a, mi lian leh mi lalte kikal a aguuk a kikheuh neuhneuh, lungsim a ki-uibawlna, doha a kibeih leh kisukminsiat chihte sai siamlou in, a mizia inleng chin boklou hi ding hi. Huaiban in, kumpi masa ahihchiang in, khawmbawl upa hoih leh experience tak David in Nathan leh mi tuamtuam aneih bang in Saula in neilou hi. A bouruak om ding dan I theih siamna ding in : Samuel in Israelte’n kumpi a neih uh atuung akipan deihlou ngal a; huan ah, Israelte’n kumpi aneihlouh uh amah mimal a ding in hoihna om ahi, chih I theih uh hoih ding hi.

 

Hiai a I gennop pentak ahihleh, kumpi Saula in laigelh noselou a; Saula kumpi aa apan ziak a thikthuse mahmah - siampu Samuel in Bible a Samuel Laibu I & II kichi nosia hi. Huai ziak in, kumpi Saula tanchin I theihna omsun ahihleh, Samuel gelh hiam, Samuel lampangte gelh akipan kia ahi hi. Huaiziak in, Samuel Laibu a I muhdan in, Saula kichi kumpi gilou leh huham mahmah dan in I thei uhi. Kumpi Saula in lai na gelh in hiam, ahihkeileh, amah lam a pangte gelh hiam omta leh, kumpi Saula melhoihdan, gal douna a ahangsan dan, galsim a siam dan khawng hon suitou ding ua, Samuel leh amah lampangte gelhdan na hi kimveklou leh, dik-kim vek khollou khathei hi. Huan ah, Kumpi Saula in lai na gelh taleh, kumpi ahihna bang a athilhih khenkhatte – a hun leh a mun in a puakkhiak(circumstances) a ahih, agitlouh ziak leng hikhollou ei ve, I chih bang om in, theihsiampihna bangtan hiam bek kinei zawdeuh ding in gintak huai hi. Ahihziak in, kumpi Saula in laigelhlou a, thilteng kikhelzou vekta hi!

 

Hiai atung a I gente akipan in, laigelhtute vualtungtuang uh ahi, chih I muthei hi. Khovel khangthu bang leng, khangthu suitute hon gelh dan peuh, adang ding omtuanlou ahihziak in, ahidan hi mai hi. Huaiziak in, ahun sawt a ding in laigelh mite leh laigelh namte vualtungtuang sek ua; vualtungtuang touzel ding uhi. Alehlam ah, laigelh chindan a neilou namte mangthang ding uhi.

 

Laigelh Thil Hihtheihna:
Bible ziak in khovel ah Khristian maktaduai 2310 vel om phah a; Koran laibu ziak in Muslim maktaduai 1500 vel om hi. Huan ah, Gita ziak in, Hindu maktaduai 1000 phial om uhi. Hiai sahkho’ laibute om kei le uh, hichi bang a sahkho’ lian, mihing maktaduai a saang - a - sim zuitu nei omlou ding uhi. Huaiziak in, laigelh leh laibu in thil ahihtheih dan, gentam ngailou in theihtheih mai hi.

 

British opkhumna nuai a kipan suahtakna sual ding a Americate hasuantu leh bulpantu Thomas Paine laibu gelh ‘Common Sense’ kichi pek 96 kia a sah ahi hi. Pek leng kipek khe ngei ua, I theih chiat bang un, khovel a solkar hat leh nam thupi penpen piangkhia hi.

 

America gam a suak-le-sal neih hoihlouh dan kigelhna laibu ‘Uncle Tom’s Cabin’ chih laibu nu Harried Beecher Stowe gelh bulpat in, America ah suak-le-sal te suahtak na’ng in nasatak a malak ahi a; America Tual Gal tanpha pianloh a; September 22, 1862 in salte suahtakna dakging hi.

 

Kum zabi 20-na a Europe leh Asia gambuppi solkar kimkhen hilhel ding khop a ngaihdan thak hongpianna ahihleh, laibu mantawm chik ‘The Communist Manifesto” leh ‘Mizawngte Bible’ achih mai uh ‘Das Capital’ kichi Karl Marx leh Friedrich Engels laibu gelh ahi hi.

 

Charles Darwin laibu bawl ‘The Origin of Species’ ziak in, khovel a hinna neite hong piandan / hong omkhiak dan tungtang ah ngaihdan nasatak in hong kikhek a, sahkhua bang leng sawiling zou hial hi.

 

Thugentu minthang takmai, Whitefield kum 21 mi ahih in alawmpa Wesley in Henry Scougal laibu gelh ‘The Life of God in the Soul of Man’ chih deihsak tak in simsak hi. “Ka hon sim pan a, sawtlou sung in bawlthak ngailaw mahmah mihing ka hihdan ka kiphawk ngal a….” Whitefield in chi hi. Huchi in, Whitefield – Pathian a ding a nasemtu muanhuai leh, khamangthangte Pathian kiang a pikik nawntu lohching tak hongsuak hi.

 

Thutawpna : Oswald J.Smith in “ Thilsiam tengteng kiang a Tanchin Hoih hilhna ding omsun tuh thugelh ahi” na chi hi. Missionary-te damlou thei ua, khaloh kiphamoh ua, tenna ding inn leh a dangdang kiphamoh uhi. Ahihziak in, thugelh in huchi bang neuhneuh te kiphamohlou a; si theilou a; martyr leng lau zenzenlou hi. Huaiziak tak in, gingtute’n laigelh I ot ding uh Pathian hon deihna ziak leng huai hi ding in I gingta hi. Siamthil-a-laigelh (Creative writing) lampang ahihleh, a siam tuam leh kiva deuh leng om maithei hi. Ahihziak in, thudik leh research a ki-nga laigelhte ahihleh, ataima leh apeih peuh in gelh theih hi. Nam masawn leh damkhosuak dingte lak ah a khotang uleh, a nam suang ua mi tallang leh theihna hau deuhte’n – solkar toh kisai, khotang thil, thu hoih himhim leh kivaipuakna lamthilte awlmohna toh gelhgelh mai uhi. Huan ah, sahkho’ lam heutute’n leng laigelh ching mahmah uhi.

 

Pau si leh mangthang I chihte: a pau zangtute mah in itna taktak toh, awlmoh a, aphungvuhlouh chiang un, pau si in mangthang zel hi. Pau a sih chiang in, a pau in a kentel -culture, tradition leh ngaihdan hoih tampi toh si khawm hi. Huchi bang a Pathian in deihtak a ana bawlsa pau leh culture-te a manthatlouhna ding in, laigelh thei liai in laigelh chiindan in neile hang chih, Pathian deihdan leng hi ding in I gingta hi. Huan ah, I gensa bang in, Pathian thilsiamsa tengteng kiang a Tanchin Hoih gen a, hilh a, theihsak ahihtheihna ding in laigelh mah poimoh hi. Huan ah, a minam sung a omte’n I minan tanchin I gelh keileh, kuate hiam a thei chian taktakloupite’n gelh ding ua, huai hih, ahidan aa ngaih hong hi ding hi.

 

--------------------------

Read 938 times
Login to post comments