You are here: HomeColumnsZokhualBangziak a Aknou in Lampi Kaan Hiam?

Bangziak a Aknou in Lampi Kaan Hiam?

Written by  Khamkhokam Guite Published inZokhual Wednesday, 14 September 2016 01:17
Bangziak a Aknou in Lampi Kaan Hiam?

Gelhtu : Khamkhokam Guite



August kha tawplam hi a, phavang kipan tung hita hi. Huai ni in, ka innsak ua Suanno te aknou khat in U Vumzalian te innkong zawn ah lampi kaantan in pai hi!

 

Bangziak a huai ni leh huai hun khelkhel a hiai aknou lampi kaantan a pai hiam? Etsak leh genthupi tak nei ahi diam? Hiai aknou, nidang a dawilok tak leh deldeep tak in bang hang a hichi bang thupukna thupi tak tuni khelkhel a bawl ngam ahi ding? Amah a ding a galleh lam a va-uk a aham hun ding a Siamtu lem-gel hun tung samta ahi diam? Huai ni akipan in, hiai aknou’ khovel kilumlet in, nidang hun dang bang thei nawnta lou hi.

 

Mi’ khenkhat, ngaihtuahna zangloute leh kelpa’ tei a om melmelte lawi in ahihleh, “Huai aknou koisan hiam a hoh nuam hi ding hi” chihtan lel in lungkim uhi. Huai I chih hang in, kelpa’ tei telawi kia mai hilou in, khovel a Scientist minthang taktakte lak ah leng hiai thu ah ngaihdan kibatlouhna nasatak na om ngeita hihtuak hi!

 

Harvard University, Department of Physics web site ah “ Bangziak a aknou in lampi kan hiam?” chih dotna Scientist minthang taktakte (chiamnuihna in) anuai a bang in dawng sak uhi:

 

  • Albert Einstein : Hiai Scientist minthangtak in a Juda khuak maktak mai a asut vengveng nung in, “Aknou in lampi kaanlou a, aknou khenuai ah lampi paisuak hi zaw hi” chih in dawng hamtang uhi. Bangteng hitaleh, ‘pindan baang nuhvom leh mial bekbuk sung a, zohngeu vom, huai leng a omlou hizawmah lai’ muthei Einstein te khawng nial teitei bel I tum himhim kei hi. 
  • Isaac Newton : Hiai London tangval ( zi neilou a kum 85 ahih a si ahih chiang in tangval hilou theilou hi), lei hipna mukhia a suutkhetu leh Calculus mukhetu in ahihleh “ Aknou pailou a munkhat a khawlte khol densek ua. Aknoute apaipai chiang un lampi kaantan khanak mah uhi”, na chisak uhi. 
  • Galileo Galilei : Hiai Scientist, amah hunlai a Saptuam thugin toh kituaklou a, ‘Khovel pumpi kimvel a Ni leh Khate pai hilou in, Ni kimvel a khovel pai hizaw ahi,’ chih mukhia a, agenkhiak lai zomah ziak a suangkulh baang vot dekduk zuut pa’n ahihleh, “ Aknou in a khe khat suan a, alang khat a suan nawn zel a, lampi letdan toh kikim hiam, lampi letdan sang a sauzaw hiam apai chiang in, aknou in lampi kaantan himai hi” na chisak uhi. 

 

Bangteng, bangteng hitaleh, hiai atung a Scientist te gen I chihte ahihleh, I nuih chemcham na dia, chiamnuih maimai, amau – a Scientist te mizia hiam, athil muh-khiak uleh, a thugen dan khawng utoh kituak a alimsiam maimai uh ahi hi. Huaiziak in, Kaitak(Hakai taktak) bang a luh tuntun ding zong hilou hi!

 

Bangteng, bangteng hitaleh mah chilailai lehang: sia-le-pha theihna sing-gah a nek-khit tak un, Adam in Evi kiang ah “Evi na khuk dawk” chi ahi, (L) Pastor Liankhoshyam in na chisak hi. Eden Huan sung zapi petmah a, suk-le-tou, a dung-le-vai, a tung-a-nuai, sak-le-khang, kim-le-pam leh gawkawm-singkawm teng a anupa’ ua akizuihna lam uah, Adam in Evi khuk mukha ngeitham ding in I gingta hi. Ahihziak in, sia-le-pha theihna sing-gah a nek khit ua amuhdan leh, nidang a, huai theihgah anek ma ua Evi khuk amuh dan kibanglou deuh hingei ding hi. Evi khuk in Adam lungsim leh taksapum a khoih khak dan, a lawnkhak dan zong kilamdang mahmah himai thei hi!

 

Huchimah bang in, hiai Suanno te aknou in, nidang in lampi lehlam galmuh tham ding hi. Ahihziak in, amah omna ngei a om a, azun ninglak thai touhtouh ngeimah thai det amah dinmun ding in kikoih in, lampi kaantan a, alehlam a vapai amah a ding in kipe kha ngeilou himhim hi ding hi. Aknou hi in, mihingte hitale zong, mahni lungsim a ahi ding chiang(limit) kikoih in, mahni hihna dingtan (potential) Siamtu lemgel leh hihtheihna honpiak tan tungzoulou in om khak theih mah hi.

 

Bangziak a aknou in lampi kaan hiam, chih kia mai hilou a, bangziak a aknou in lampi kaan lohching hiam chih i theihna ding in, tanglai Rome mite tangthu akipan, anuai a bang in I sui ding hi:

 

Rome Lalgam vanglai in Rome lalgam diktak (Roman Republic/Italy) leh mal-suah lam a om Rome kumpi uk Gaul gam(tulai French gam, Rome te colony ahipen di chu) kichi Rubicon lui(Rubicon river) ah kigamgi uhi. Huchih hunlai in Gaul gam ah Julius Kaisar(Caesar) Governor in pang hi. Governor te’n amau uk sung ah sepaih tuam neithei ua, ahihziak in, a sepaihte toh Rome lalgam diktak (Roman Republic) sung ah lut theilou uhi. Huchi bang a lut a om leh, huai Governor tuh Rome Kumpi tung a hel leh, Governor ahihna akipan kitawp ngal bang a ngaih ahi ding a; amah leh athumang sepaih tengteng leng thah vek ding ahi, chih Dan dinglai ahi hi. Huai om zia ahihleh, Julius Kaisar a sepaihte toh Rubicon lui tan a paithei ding ua; ahihziak in, Rubicon lui kaantan in Rome lalgam diktak sung ah a lut thei kei ding uh, chihna ahi hi. Julius Kaisar in Rome lalgam a phak utleh, a sepaihte Rubicon luigal a nosia a, amah kia a avapai ding, chihna ahi hi.

 

Kum 49 BC, January kha ani 10 ni vel hi ding a gintak ah, Julius Kaisar in amah nuai a om Rome sepaihte makaih in Rubicon lui kaantan in Rome lalgam sung diktak ah pilut hi. Huchi bang a Rome kumpi Dan dinglai bohsia ahih ziak in, a maban ahihleh, tualgal hi mai hi. Ahihziak in, Rome kumpi Pompey in huai thu a zak chiang in, amah nuai a akaihzatam Senator tamzawte toh lau in taizak uh a, anung a tualgal, Caesar’s Civil War kichi a Julius Kaiser a vualzoh ziak in Dan dinglai a bohsiat ziak in Julius Kaisar gawt in omlou hi.

 

Huai Rubicon lui ahihleh lui lian tak leng ahi zenzen kei a; huan ah Gaul gam Ukpipa Julius Kaisar in huai lui a kaan ma in, mihing maktaduai a simte’n na kaanta ding uhi. Ahihziak in, Julius Kaisar in Rubicon lui kaan a Rome Kumpi gam alut ahihleh, khovel khangthu suitute’n ngaihpoimoh mahmah ua; hiai in Rome Kumpi gam leh khovel khangthu nasatak mai in khoih lamdang hi, chi uhi. Huai lui a kaantan tak in, mit a mutu Suetonius, Rome lalgam tangthu gelhtu minthang tak in, Julius Kaisar in Rome pau in “ ālea iacta est” ("the die has been cast”) chi ahi chi hi. Huai ahihleh, “kiik nawn theih vual ahita kei”, a Sappau in ‘Point of no return’ chihna ahi hi. Huai akipan in tuni a Sappau a, pau tualleng mahmah ‘crossing the Rubicon’, chih hong piang in : huai ahihleh, bang hiam thil lauh-huai, lohsap hiam, ka utnawn kei chihtheih vuallouh, abulpan khin, lohchin ma tawp nawn theih hilou chih genna in kizang denta hi.

 

Hiai ah, Rome lalgam a Julius kasar a lut in sepaih hon khat Legio XIII toh kia ahi hi. Ahihziak in, a tup-le-ngim theichian a, kiknawn thei hilou ahihlam kithei a, vualzoh ngeingei ahilou theilou ahihlam a theihchian ziak in, theihtawp a, sihngam a amahleh a sepaihte apan ziak un, Rome lalgam thupi takmai tung a zualzou in, Juliua Kaisar leng Rome kumpi in pangta hi.

 

Hiai aknou in a kaan ngeilouh lampi kaan ding a thupukna alakna ding in, “a kawlphesak, a vaan gingsaktu” om tham ding in I gingta hi. Huai I theihsiamna ding in I pute uh ‘Tuitaw Galkap’ a ahohna gam uh – French gam a Revolution hong kipat dan I en ding uhi:

 

Tangthu phuahsiam minthang tak khat in French Revolution(1779-1789 AD) hong kipat dan phuahtawm in hichi bang in na gen hi: Zingkal khat French kumpi tanau nai – mi’ nasa takmai leh, vaan chilphih a khosa numei khat Paris khopi kholai ah a sakol kangtalai in pai hi, chi hi. Hiai numei nu’n a sang(bread) nekbang lamnawl a khutdohte nek ding in kangtalai tolet akipan paikhia a; lampi nawl a mi zawng leh genthei, gilkial taktakte’n huai sangthem kituh in kilaizak uh a; huchi in, French Revolution kipan hi, na chi hi.

 

Hiai laigelhtu gendan ahihleh mawl lawdeuh leng ahi kha thei a; I theih chiat mahbang un, French Revolution hong kipatna ziak ahihleh, ziak tampi nei ahi hi. Kumpipa leh azi khosak dan hoihlou, huaiziak mah a gamsung sum-le-pai dinmun kisia; politics thil a dukdaklouhna; kivaihawmna vantang a Ulian leh kumpi mi-le-sate thangtatna; Solkar in a ngaihsaklouh luat ziak a louneitute leh khutnasemtute zawn-le-ngauna; Saptuam leh gam vaihawmtute kithubup a, mipite guhtui tawpkang khop a neksiatna, chihte leh thil tampi ziak ahi hi.

 

Huihpawt na’ng omlou septic tank a puahzak hun om sek hi. Gamsung vaihawmtu leh thuneitute kigul luk tuuktuuk a, amau leh amau kal nuamsa law maimah: daikil kal a mi gentheite khitui nulsaktu ding omlou in gamsung om thei hi. Huan ah ‘vok an ne leh nelou kal’, mizawngte leh mihaute kikal, a chethei leh chetheilou kal kigamla lua, chih bang leng khotang buaina kipatna bul hi sek hi. Huchi bang a mipite haksatna, kah leh maunate ngaihsaklouh a a om sawtluat a, aki-um um chiang in, a puahzak hun om in; aziak khatpeuh ziak in, mipite thangpai zaak in, buaina thupitak in ninam leh gamsung pumtuam thei hi.

 

Hiai Suanno te aknou lampi kaan dia kisa in, lampi lai ah ding teutuau in, “A ban ka pai de aw, ka kik nawn mai de aw” chitaleh, a makpa pa uh gang Zakap, khokhung lam akipan hong paisuk buanbuan bang in sik-kham phok mai ding hi! Na tup thupi in hoih mahleh, na lungkiak baihluat a, na taisiat baihluat hiam, ‘huchi kha leh’ chih na buaipih pih na lam in, kuate hiam in lamnawl ah hon sawnkhia hiam, siklup hiam in nang leng na om ding hi. “Saipi pailai uital nak/bauh khawng maimai in khawllou hi” chi uhi. Huan ah, pilvan na ding khat ahihleh, thil khatpeuh I hih chiang in, thuak ding teng thuak khin, abuaihuai huaizahzou zai pal galkai nung in leh siluang hiaizahta akikham nung in, nungkaih veite, mi dawilok leh lungke baih te ziak in, lohchin dek mahmah chiang in tawpkik hiam, lohsam khunung hiam in om theih hi. Huan ah, I lung-gulhna mun I galmuh chiichiai chiang in, makaitute lak ah a ‘credit’ kituh a, kibak-laihna bang leng tungthei hi.

 

Israelte tangthu a, heutupa Kaleb tanchin akipan sin ding I nei ding un I um hi(Kisimna/Numbers 13).

 

Israel te Pathian’ Gamchiam lam zuan a apailai un, Paran gamdai-gamkeu Kadesh kichihna mun hong tung uhi. Pathian theihsak bang in Mosi in Israel nam 12 akipan in heutu khat zel tel khia in, Pathian’ Gamchiam, Kanaan gam enkhe ding in sol hi. Huai mi 12 te avakuan uhi. Hong kiknawn tak un, hichi bang in thutut hon bawl uhi:

 

“Non sawlna gam ah ka valut uh a, nawitui leh khuaizu in aluang taktak hi! Hiai ah a gam gah a om. Ahihhang in tua a teng mite a hat uh a, khopite kulhbaang nei lianpipi ahi……”

 

“Tua laitak in, Kaleb in Mosi mai ah mipite a kham dai a: Kuantou in a gam I valuah ding uh ahi. Hih zou mahmah ding I hi, a chi hi”.

 

“Ahihhang in, amah toh kuantou khawmte’n: Tua mite dou zou talou zen ni e! Eite sang a hat zaw hi uh, achi uhi. Tua bang in a vavel uh tua gam thu Israelte lak ah a selam in a thangsak uhi……”

 

“Ka vavel uh tua gam zaw asung a tengte’ nawmvalh gam ahi. Ka vamuh uh mite zong mi lian pipi ahi uh….. Koumau mitmuh in khaukhup bang lel in ka kimu uh a, amaute mitmuh in zong tua bang mah ka hi uhi, achi uhi”.

 

Hiai Gamchiam vavel chian dia Mosi in a mi sawlte tamzaw thutut hoihlou ziak in “Tua zan in mipite khempeuh ngaihtak in a kap uhi” Bible in chi hi. Hiai ‘nam heutute’, mite lak ah, mahni leh mahni kimusit in, ‘khaukhup’ bang lel in vakimu mawk uhi! Huai kia hilou in, Pathian’ mite ahihlam uh kitheilou in, “Mi bang inle, khaukhup bang lel a hon mu uh ei ve” chi in, amau gintak thu gen khualkhual geuh zomah lai uhi!

 

Hiai ah, mi dawilok leh Pathian muang ngamloute ziak in mipite lunglel in patau zak uhi. Hiai in gah hoihlou bang hon tun hiam I chihleh, hichi bang a mi dawilokte khang(generation) beima Pathian in Israelte Gamchiam lut phallou a, gamdai-gamkeu ah hiai hunlai a kum 20 akipan atung lam teng asih gaih masiah uh(Kaleb chihlouh) vakvai sak hi. A ziak ahihleh, Pathian in a pi-le-pute ua kipan ana Chiam Gam luah ding a, a zalzou ding in phulou in, chin boklou uhi.

 

Huchi mah bang in, tuni in eite lak ah leng, “eilawi I na hichi hahpan zenzen di hi kei vaw” chi a, kihepkhiak, kidangkoih leh taisiat ding kia buaipihte thu tut I ngeingaih leh, I minam un a phutawk Gamchiam kimu in, kilut ngeilou ding hi. Huchi bang mihing I hauh luat ziak ua tuni a , hiai tan phet tung leng I hi uhi. Tuni a I kiphatmoh uh ahihleh, Kaleb bang a “Kuantou in a gam I valuah ding uh ahi. Hihzou mahmah ding I hi….Tangtawng Toupa’ mit-tunna a hih peuhleh, ama’n tua gam…..hon tun ding a, eite kiang a hon pe ding hi” chithei heutu ahi hi. Hiai ah ‘nam heutu’ kichi zenmah 12 te lak ah Kaleb leh Joshua kia zuihtak ua, adang 10 (80%) te heutu thulimlou leh zuihtaklou ahi uhi.

 

Aknou in lampi kan ding a akisak-khiak a, huai lampi tung a adin nung in kiknawn thei hitalou hi. March kha bullam 1966 kum in MNF te’n Independent puang ek mawk uhi. A ngaihtuah kik chiang un, amau mahmah inleng ‘ek mawk’ salua uhi. Julius Kaiser bang in Rubicon lui hon kaantan ua, nungkik thei nawn vuallouh dinmun ah hong ding uhi. Rubicon luigal lehlam: lampi suk-le-tou, kensia leh suangphom lak a, azu-a-ham nuai a apai chiang un, kihanthawnna ding in “I lungtup I tangtun chiang in, Helicopter a zawngtah lou ding I hi” chi in kikhamuan zel uhi. Tuni in zawngtah kung nei ua, a deihna bang ua azat ding uh Helicopter leng nei uhi. Helicopter a zawngtah a lohnop uleh, loh noplouh uh amau thu hita hi!

 

……….. huaiziak in, aknou in lampi kaan hi!

Read 851 times
Login to post comments