You are here: HomeColumnsZokhualKipahna Thuguk

Kipahna Thuguk

Written by  Khamkhokam Guite Published inZokhual Monday, 10 October 2016 12:15
Kipahna Thuguk

Gelhtu :- Khamkhokam Guite

 

Huai ni in, office kai ka kuan in, traffic jam ka pelh nop man in, nidang a ka tot ngeilouhna lam ka tawn hi. Lehlam akipan SUV khat hong tai in, a front seat a tu numei khat in nui seisai kawm in a khut hon vaan hi. Nuikawm a khut kivaan tuah in ka kitai pel uhi. Huai ka muhleh, ka lungsim suangtuahna in hun paisate ah hon leen mangpih in, ka manghilhsa nunlui hon phawk khe thaksak nawn hi.

 

Solkar nna ka sep tung in, ka sepna gam, State thak chihmahtak, Department te leng thak thei mahmah uhi. Semtute leng nungak leh tangval, nna muthak ngen in ka sem khawm uhi. Nitak lam office kai tawp chiang in, nungak leh tangval hon loukuan pailam bang mai in kholak ah ka kizuikhe duanduan zel uhi.

 

Huchih hunlai in, metric pass thak liklek naupang chikchikte, a kiplou in, ‘receipt & issue’ khoih ding in, office ah kila zel hi. Huchi bangte ‘Receptionist’ kichi uhi. Huchi bang a ka sepna office un a lakthakte uh lak ah nungak nou khat, mai siang sitset, kizen mahmah khat om hi. Hiai nu ahihleh, maitai in, nuih mai gige a, taima bok hi. A kampau kia mai hilou in, a khohei leh mitmeng inleng kuamah khentuam neilou ahi, chih kichiang mahmah hi. Mi khenkhat khotual pau bang siam taktaklou (siam hetlou, chih a sim ding) leh, a theih sunsun uh leng Galili aw-phawi a pau a mikhual deuhte a ding in, huchi bangte ngaihnat huai tungtuan mahmah uhi. Hiai receptionist nu kiang ah ahihleh, Asia Gambuppi sung a tangval nungak sai siamlou penpen leh nungak kiang a zahkai penpente leng – kilimsiam ngailou in, mahni hihna bangbang toh, tawldam tak in om thei uhi, mi’n chi uhi!

 

Huai kia mai hilou in, nungak sai siamlouh ban a, mihing mihinna aleng mi kipak theilou, mahni dinmun leh mahni tantawk a lungkim theilou; tang-le-mual a muhteng leh, a lungsim a alimsiam tanpha a kaltouh a, a leek a din tum himhim mi khen khatte a ding in, mi kipaktheite’n tawldamna pia in, a lungsim sung ua pingpei semdam thei uhi. Huan ah, mi kipak theite’n akipahna ding uh, bang hamphatna leh vualzawlna tang biik uh hiam, chih bang leng ngaihtuah khasek uhi.

 

Huai hunlai in ka lung aleng thei mahmah mai hi. Ni khat houh, office kailouh ni in, nidang teng sang in lungleng zaw in ka kithei hi. Hohna ding lah theilou ka hih chiang in, ka kingaihtuahtuah leh, nidang a Shillong a ka laizil lai a ka meltheih khat ka phawk khia a; a inn ua hoh ding in ka kisa khia hi. A omna veng uh ka gaal et zel a, ahihziak in, lamlian a pai ding in, lampi sau lua hi. Etmai in ahihleh, gamnuai ah paita leng, khang a guam ka kaan khit chia, alehlam a paitou nawn ding ing a, tung mai ding bang in kilang hi. Huchi in, lamlian tawnlou in, gamnuai ah ka pai ekmawk hi. A gaal a ngaihtuah na’ banglou in, loupa’ taamlak leh linglak ah, pai na’ olsam hetlou hi. A inn uh ka vatun in, ka leather jacket thak liklek, ka khaloh laak masak pen a ka lei, ling in kui gial gawp hi. Mi, innkuan a omte’n, a innkuan khosakna uh buaipih uh a, mahni lungleen hon thoih dam taktak zoulou uhi. A damdawi diktak na hikha khollou uh leng hi maithei hi! Ka kiklam in, neukha in ka kuanlam sang in ka lung a leng zodeuh in ka thei hi. Huchi bang himhim in, ka hun leh nite ka zangtou hi.

 

Ni khat hiai ka receptionist nu uh kiang ah “chik chiang hiam in na inn uah ka hong hoh ding aw” ka chi hi. Second 2/3 khawng anuailam en in kunsuk a, a nuih mai hong mual zek hi in ka thei hi. Ahihziak in, hong daktou nawn in, maitai tak kawm in “Tham tham, ka inn uah hong hoh in aw. Tu, Nipi ni sande skul kai tawp chiang in, sunnung kikhopna ah ka tel kei dia, inn ah kana om di aw” chi hi.

 

Nipi ni in dawr teng kikhak vek hi. Ahihziak in, hanmual sak a lampi kiang ah Gurkhali piteek khat in kanpuak, bora, allu chop leh nektheih bangbang hiam zuak hi. Kikhawm tawp, nupi naunen hon in atate uh a ding in neektheih bangbang hiam lei in na om liiliai uhi. Huaite kiang ah ka hoh nopna inn omna ka kan hi. “Hiai hanmual tung a lampi zui phei inla, hanmual tawpna ah, hanmual nawl a step ah na pai suk dia, huai lakvel ah mi kiang ah kanle chin, hon hilh thei un teh” chi uhi.

 

Kho-nawl leh kilkawm deuh a inn hoih a om nawnlouh chiang in, lampi hoih gentaklouh, step bang leng om nawnlou a; singtang lou lampi bang deuh ah, lampi suktak mai ah ka pai suk hi. Hiai receptionist nu, niteng a hiai lampi leh step tou a office kai ding hong kuan gige hi ding chih ka ngaihtuah chiang in: gintaksang mah a mihingte khantou leh detdou zaw I hi uh chih ka thei khia hi. Pasal khat hong pai tou a, a kuva hai lai tha-it tawk mahleh, ka hoh deknate inn omna ka dong hi. “Pai suksuk inla, gamla na sakluat chiang inle, lungkelou in paisuk lailai inla; na veilam pang a, a innkong ua vokkul neite inn himai” chi hi.

 

A innkong uh ka tun in, hiai receptionist nu, niteng a amaitaina ding, anuihmai na ding ziak, kei leh office a ka seppihte sang a a hamphat biikna, Siamtu in a deihsak tuamna ding ka mu thei mai kei hi. A vokkul un a khanglam pang ah baang neilou a; ahihziak in, akhanglam a kenluat ziak in, a vok un tawmkhiak suk tumlou himhim hi ding in ka gingta hi. A vokkul sung uah, voktal lianlou khat in bang ngaihtuah a diam, gaallehlam na en vangvang hi. A kelkong uh leh, a innka’ tau khawng uh ka et chiang in, a innkuan uah pasal omlou hi ding in ka gingta ngal hi.

 

A pi toh kia khosa ana hi petmah uhi.

 

A pa hihleh, anung a 1986 kum a ‘Kilemna’ ziak a Arakan akipan hong kikte’n misi guh hon puakte uh lak ah tel kha a; anu ahihleh, Vankal khua ah pasal dang nei in om hi. A ngekchik akipan api etkoltouh ahi hi.

 

Gurkhali piteek kiang a nektheih ka lei, chana leh bora tamlou ka ne khawm ua; khovel a singpi san khumlou ka dawn khak laklak a lim ka sak penpen ka dawn bok uhi. A pi in ka hong kipatna lam leh, ka innkuan tanchin khawng uh hon dong a; unau 8 ka hih ban uah, nu-le-pa’n hon dampih lai chih a theih chiang in hampha hon sa mahmah hi.

 

Lungsim a thil theitawm nana na in gen ding leng kithei tawm in, gen di kitasam baih mahmah hi. Huan ah, nungak melhoihte kiang a om chiang in, tangval zumthei takte khuak in nna semlou ahi, chi uhi. Ka dai vungvung zel a, ahihziak in, aman hun awng hukdim asiam ban ah, naupang chik himahleh, siam tak in ka lungsim sungnung pen a ka veite, kei deihtelna in hon gensak thei a; koimah a ka gen ngeilouh thilte tanpha lungkimtak in hon pholh khe sak thei hi.

 

A tawp in, amah toh kisai a ka lungsim hon kam’ gige khat, a kiang ah “Na kipak thei in, na maitai thei lua a, bang ahia na maitaina leh na kipahna thuguk?” chih ka dong khongkhong hi. Aman “I maw…” chi in hon gen pan hi. “Zing a ninou hong suak a, hiai innkhang a zawngtah tehkawm a kipan nizung ka innsung ua honglut a, ka pipi lupna hon salh khak chia: ni thak, hun thak ka muh ngeinailouh ka muh lam thei khia ing a, ka kipah tha hong suak lua ei voi” chi mai hi.

 

Ahi ngeitak a, tang-le-mual te tung a vualzou a, a tungvuum a na din ziak a kipah ding leng na hikhollou a, eimah lungsim put dan ah ki-nga lian zaw ahi, chih hon phawk khe sakthak nawn hi. Ni teng a vualzawlna I muhte uah kipahna dan theile hang, mi kipakthei kihi mai ding ei ve, hon chisak hi. Na lungsim put dan in a ‘sak’ keileh, mualvuum khat a na din chiang in, a pam deuh ah, mualvuum dang khat na om nawn zel in, kipahna leh lungkimna ding nungdelh khop in, a taktak na tangkha ngei kei ding hi.

 

Hunte hong pai zel in, Pisa pipen a kum 1 valzek ka om nung in mun dang ah suan khiak in ka om hi. Pathian leh heutute deihsakna in sepna a kaisang hun bang hong tung zel in, mohpuakna bang leng hong tamtou hiaihiai hi. Hun bangtan hiam pai nung in, hiai receptionist nu’n nna kip mu in, mun dang ah akisuan khia, chih hon hilh uhi. Khat veivei, “A pipi a damlai mah diam aw? Koi ah a omta mah ding uh?” chihk khawng ka ngaihtuah vengveng zel hi. Anung kum bangzah hiam in, pasal aneita, chih thu leng ka za hi. A pasal kua ahia chih ka theih in, Siamtu kiang ah kipah thu ka gen siausiau hi.

 

Huai lampi a ka kituah ua SUV a atuanna, a pasal official car ahi, chih ka thei hi. A designation plate kikhuh mahleh, a kikhuh khum sung ah Department lun mahmah khat a ‘Director’ chih kigelh ahi, chih leng ka thei hi!

Read 622 times
Login to post comments