You are here: HomeColumnsZokhualLamkawi Ah

Lamkawi Ah

Written by  Khamkhokam Guite Published inZokhual Wednesday, 19 October 2016 01:26
Lamkawi Ah

Gelhtu :- Khamkhokam Guite

 

Ka dam sung in sikha khatvei kia ka mukha hi. Huai ahihleh : Lamka akipan Singngat zuan in, zing bus in ka paitou uhi. Ka khua uh tungsuak ut ka hih chiang un, Jerikou khua bang in sun tanglai in Singngat khopi ka paisuak san uhi. Lamtom lam a pai in, Mualzin khua tawn in, Mualzin gam akipan, Tuivel lui ah ka tuak-khe suk uhi. Tuivel ka kaan khit un, ka khua uh mualtung a om ahih ziak in lampi tou deuhdeuh a; tui dawn ding leng vang hiaihiai hi. Lamtou, kiheek kawi ngiingei ah, gil bang leng kialta ahih chiang in, thum hit-hit kawm in ka paitou uhi. Bang hiam lauhhuai om a, tai ding bang hita lehleng, kuamah a taizou ding ka om nawn kei uhi.

 

Khua leng hong mialta hi. Huchih hun laitak in, lamkiang, lampi kawina laitak ah ana om petmah hi! A mit hak lelaw in, kamka’ heuhou kawm in, nui lelua hi. Lau a taisezou lah om nawnlou ka hih chiang un, beidot huai mahmah hi. Huchih hunlai tak in, ka nung chiah a paipen- kho khat pa lian, thahat leh hangsan a kigen in, a chihmoh man in “Bang na mahmah a?” chi in a khe in vapek ek mai hi. Huai phet in, ka mit uh hong vaak-kuau hileh kilawm hi. Huai ‘thil om’ kha, sikha hilou in loutul sing bul, khaugui in a tuam ana hi hi. A mit hak lelawte leh a ha, ga-tang chiachia a lian toh nui lelua a kilangte ahihleh, huai khaugui’ paakte ana hi uhi. Hiai ahihleh, ka damsung a ka sikha muh masakna pen ahi a, a nanungpen leng hileh chih huai lawtel hi! Nak lauhhuai law petmah hi! Hiai thiltung ahihleh, tangvalnou ka hihlai vel ahi hi.

 

Kum tam pai nailou, tunai zek chih ding in, Guite Road dung ah gari neu in ka pai hi. Huai ni’n ahihleh, sun tanglai ahi a, sikha laan hunlai achihsek uh, zanmial leng hilou hial hi. Ka ihmu kei a, huaiziak in, manglam khovel leng hi theilou himhim hi. Huai hunlai tak in, Singngat tuntouh dek kuan, lamlian zatna laitak, lamkawi a ding, driver tutna lampang lolet akipan ka gaalmuh hi.

 

A din dan, a khohei zia leh a melpuak dan in leng amah hi ngeingei in ka thei a, a dang hi theilou himhim hi. Ahihziak in, tuni bangziak a kum hiaizahta a pailiam nung a, hiai a na ding zenzen ahi ding? Kei, ka pai ding ziak ahi diam? Ka lungsim a ka chiamteh theihnate sawk a, hon lawng a, ka guhngek khoih ding a hiailai a na ding ahi diam? Huai hitaleh, kua sawl a, kua lemgel hita ding? Bang tum a, bang ngiim himhim ahi ding?

 

Tuni leh tuhun in, hun leh nite nungkik hi. Kum sawm-a-sim kia mai hilou in, kum 50 ching dektak a thiltung, ka bil a ka zaksate kia gentaklouh, ka mit mahmah a kana muhsate hongtung kik in, ka mu chiang lua hi. Nial vuallouh a, ginlelh chi zong hilou hi. Amah hi ngeingei in ka thei hi. Ka gensa bang in, ka ihmu zenzen kei a, huaiziak in, manglam khovel hi theilou himhim hi.

 

Khovel a theih haksa ka sak penpente lak a khat ahihleh, hun ahi hi. Hun kichi bang hi a, chik a kipan a, bang chik hun chiang a tawp ding hiam? Huai kia mai hilou in, hun in mihingte, ganhing, sing-le-loupate kia genlouh in, hinna neilou tang-le-mual leh luiguamte tung a nna aseptheih dan leh a hih lamdang thei dan khawng ka ngaihtuah chiang in leh, hun toh kisai a laibu khawng ka sim tam zohpeuh leh, ka buai deuhdeuh hi. Tulai khovel a ding a Theoretical Physics a khovel in a ngaihsang mahmah Stephen Hawkins in ahihleh “ Hun kichi ‘Big Bang’ a hong kipan (hi ding) ahi” na chi hi. Bible a Daniel laibu (12:9) in hun tawpna hichi bang in na gen hi : “..hiai thute hun tawp atun matan a kep khiinkhian diing ahih ziak un…”. Chikchiang hiam a, hun tawp chih om ding bel hihtuak hi.

 

Alehlam ah, hun in “kei tawpta” hon chi bilbel mawk leh bel, kipah di hia, khouh zek lai ding hiam chih ngentel tak a ngaihtuah ngai ding hi! Mimal aa ding in hiai khovel a I hun zatpen ahihleh tawp thei mah a; ahihziak a, hun himhim pumtawp chih penbel, ngaihtuah haksapi mahmah ahi hi. Ahihziak in, kei mipa buaina tamzaw ahihleh, hun hong kipat-tung leh hun tawpna lamlam leng hipah khollou in, hiai tegeel kikal ahi zaw mahmah sek hi!

 

Chi zenzen le hang, khatvei Lamka kholai ah, nupi khat - tangval lai a ka lenglatna sekte uh khat, atate kai dialdial kawm a hong pai toh ka kituak kha uhi. Kum tam kuamtak kimulou chih mahtak, innkuan thu khawng ka kidong tuah uhi. Huai khit in, tua nupi in “Ka inn uh nava phata hia? Na man liai leh vapha ve. Ka nu-le-pa’n hon mu nuam ding uh ei ve” hon chi hi. “Nou inn khawng le nou khawng nungak lai a nuam hi a; vahoh lele nou khawnglah na om nawnlou ding uh chin ua…..…” ka chih nemnum leh “Huai chih in, nang le na tangval nawn mahmah sam aa” chi in hon dawng hi. Ihmulou ka khanglou guih hi! Hiai naupang liiliaite en in, hun pai zel ahi chih ka phawk khia hi.

 

Ka meltheih mahmah khenkhatte, atung uah hun in dawm hetlou in nasem ahi ngei dia, a taltang khawng uh nipi leh phalbi tamkuam tak a thuakthuakna uh a luzang tantan uh kolhtou in, electric vaak nuai bang ah, ataltang khawng uh te-kelkel in “His forehead is brighter than his future” chih ding mah bang uhi. A sam uh gentaklouh, a mul uh, I muh theih teng bang leng kaang gawp in; mit a I muhtheihlouh, a mul tuamtuamte uh om ding dan bang leng lungsim mitkha ah langlou theilou hi! Huai I chih hang in, kuamah na kizephawk a, na kipe biik om ding chihna bel hilou in!

 

Hun leh nite a nungkik thei mah diam aw? Sapte’n ‘time travel’ chi ua. Hun paisa chiklai hiam, ‘Aksi kiak kum’ hiam, ‘Dahpa ton lai’ hiam ah va zinkik theita le, huai hih, ‘time travel’ a chih uh ahi hi. Tunitan in kuamah hun paisa a vahoh kiik thei om naikei mahleh, scientist te’n ahihleh, ahih theihlouh na’ng ‘scientific law’ bangmah omlou ahi chi uhi. Bangteng hileh, hun in bel mihing, ganhing leh khovel leh asung a om tengteng tung ah – a hoih lam hiam, aselam hiam ah, nasatak mai in nasem thei kia mai hilou in, khentuam leh maitang zahtak tuam leng neilou hihtuak hi.

 

‘Time travel’ genlai zek le hang. Scientist te ‘time travel’ himhim ah buailou ua. A mau buaina ahihleh, hun paisa ah vazin theita’ lehang: etsakna ding in, Lianpu kha, hun paisa ah vazin thei in, apu – apa’ pa bang va that khata mawk leh bang achi ding? Apu (apa’ pa) omlou in, Lianpu pa omlou dia, amah Lianpu leng omlou ding hi. Ahihziak a, Lianpu leh apa om khinta sii ua. Tu khonung in, Lianpu pu in Lianpu pa aneih ma in si khonung taleh, amau ‘line’ bang chi bawl lem nawn ding ahih ding?’ chih khawng ah buai uhi. Neng nawng a! ‘Neng nawn’ I chihsak hang in, logic dan in bel buaihuai ding mah zaw hi.

 

A lamdang mahmah khat ahihleh, huai Singngat khokhang a lamkawi a ding a ka muh aa ding in, hun khawl hileh kilawm in, amah tung ah hun in nna semlou hileh kilawm in, ka muh tuunglai mah bang lailai hi. Nou ngiingei in, a sa dim mitmet in, duangching in, etsuak mahmah lai hi. A mel ka muh leh, ka lungsim ah hunpaisate kipholh khe thak in, ka lungsim mitkha a hun in apailiampih thil khenkhatte ka ngaih tuah khekik hi. ‘A man’ ka piak khit ua ‘sum zu’ chi a, singpi khum hon dawnpih lai bang uh ka phawk khia hi. Huai hunlai in tuktui luan kipan pan in, sing leh loupa chi tuamtuamte’n nahthak suang ua, etna lampeuh hing dipdep uh ahi, chih bangleng ka phawk khia hi. Lampi lai ah hawktui masa luanna, leivui lak ah muh theih ua. Lamkhou ah maimomte’n leng a leente uh vuahtui akipan humbit zoulai uh hi in kilang hi. Mualmet vuum bangleng, nidang a mai velvul gige, huai ni’n ahihleh, loupa’ hing ngiingei in khuh hi.

 

Kum tampi paita ah, khatvei ka SDO khat toh singtang kawm lam ah ka zin uhi. Lampi hoihlou in neu leng neu mahmah a, jeep ta’ hamham hi. Mun khat ah, lamsuk kipat dekna, lamkawi a ka pai laitak un, ka kiguih a; patauhna in ka pum dim hi. Driver pa kiang ah gari kintak a kholsak ding in ka chi a; a khol phet in gari a kipan ka kum khia a, ka nung a SDO pa gari honzui ka en hi. SDO pa gari a ‘tie-rod’ kilhna hong kidoh khiak laitak ka mu hi. A gari (Mahindra Jeep) uh kholsak ding in khut in kana hilh hi. Driver pa hong tawmkhia in, “Ka gari uh bang chi hiam khat a hong om guih mawk” patauh mel tak in a chi hi. Sik-khau leh gari tube lui khawng a gak in, awl-awl in a baan ka paithei hamham uhi.

 

Tuni in, huai hunlai a ka SDO pa’n, a sepna lam ah biching phutou dek ngeingoita a; khopi lunlai ah inn hoihtak nei in, a zi -le-tate toh khosa uhi. A zi bang in huai ka khualzin lai un - a pasal tangval lai hi bok in - a huntak in gari khawlsak keile ung, tuni tan a “amah kibawlkhiakna nakguh neitupa” muzoulou a, zonglai lai mai thei hi! Ahihziak in, huchi ahihlam bangleng thei seselou in, parda changkang leh changkanglou khawng maimai buaipih in, gen zauzau zomahlai hi! Huchi dan ahi; mihingte hinkhua I chih!

 

Bang teng hitaleh, huai Singngat khokhang a, lamkawi a ding ka muh ka chih ahihleh : a din dan, a melpuak dan leh a gial dan bang leng, ka neulai a ka pu Zanang in Burma a, Tualkhiang khua a bawngla a lei, ka lawmte toh kava kaih uh toh kibang law petmah hi!

 

Time

tick tock tick tock
Time ticks
Time goes
Time's quick
Time knows
tick tock tick tock
Seconds pass
Minutes unnoticed
These could be your last
And you might not even know it,
tick tock tick tock
-BOOM-

Read 959 times
Login to post comments