You are here: HomeColumnsZokhualSialzawi Tanglam

Sialzawi Tanglam

Written by  Khamkhokam Guite Published inZokhual Monday, 15 May 2017 14:05
Sialzawi Tanglam

Gelhtu : Khamkhokam Guite

 

Huai kum in ‘Sialzawi Tang’ lam lou in kinei hi. Ahihziak in, mitam zawte’n ‘Khaipu Sazuk Mat Gige Kum’ chih in thei uhi. Huai kum in Pa Khaipu in sazuk man gige hilou in, a damsung adi’a akhat veina leh a tawpna leng hi ding in sabetna khat ah sazuk khat, Pa Khai in kaplum kha zenzen hi. Mi kiang a gen mun lua leh, a sazuk kapna lam kimuh theih liaina teng ah agal apan akhut a kawk in, a sazuk mat dan tanchin gen deuh gige ahih chiang in, huai kum ‘Khaipu Sazuk Mat Gige Kum’ hiam, ‘Khaipu Sazuk Mat Gigena Lam’ hisak uhi!

 

Huai kum in, ‘Zawngsih’ kiang a nonglak lou in ka nei uhi. Ka lou gaal uah kenselak leh gampi-singlianpipi pouna mun om a; huailak ah Zawngsih om in, huai ‘Sih’ tui dawn nuam a hong naih Zawng tam thei mahmah uhi. Khangluite’n Zawngsih zek a nei uh ahihchiang un(‘zek a nei’ I chih chiang in, khaam/phallou, huai thil phallouh hih teiteite’n vangsiatna tuak, chihna ahi), kuaman lou di’n nei ngamlou ua; huai ziak in kou lou mun bangleng, a Zawngsih omna tak hikei mahleh, kuamah vaat ngeilouh, nonglak -singbul leh gobul lian thei  mahmah uhi. Huanah, Zawngsih kiang ahih ban ah, amun bang leng lemhetlou ahihziak in, kuaman lou ding et in en ngeilou uh hihtuak hi.

 

‘Sih’ kichi ahihleh : Mun khenkhat ah leikawm akipan in, a kum khotawn in tuinak hong pawtkhia in, a mun dawplak – buannawi lak suak gige a; huchi bang mun - ‘Sih’/’Sihmun’ kichi hi. Huai ‘Sih’ a tui hongpawtte amun a zil in a limdan, a aldan leh a gim (gimsi/smell) chi tuamtuam om ahi ding a; ‘Sih’ khenkhat a tui hongpawtte Zawng in duh tuam deuh ua. Huaitui dawn ding in gamla pipi akipan hong naih uhi. Huchi bang Sih,  ‘Zawngsih’ kichi hi. Huan ah, Sih khenkhat a tui hongpawt khia, Sial in a duh tuamdeuh na mun, ‘Sialsih’ kichi hi. Huchi bang in, Sazuksih, Sakhisih kichi om ua;  vasa khenkhat, etsakna ding in,  Vahui in a duh tuam sese na mun ‘Vahuisih’ kichi hi.

 

Tulai a ‘Forest Conservation’ leh ‘Wild Life Conservation/Protection’ a chihte uh Solkarte theihma in ei khangluite’n na thei in, na chiing khin ua; ganhing leh vasate a ding in ‘Sihmun’ poimoh lua ahi chih na thei uhi. Huaiziak in, huchibang munte humbit ahihtheihna ding in,  ahunlai a khangluite lungsim putdan toh kituak ding in ‘Forest Conservation/Wild Life Conservation/Protection’ na pan khintham uhi. Etsakna ding in : ‘Vahui sih I taan leh hoihlou/Vahuisih a thaangkam hoihlou’ chih bang nei ua(Taang/taan : Sih  tuidawn dia hong naih vahuite thau/thal or gophel toh na taang). Vahuisih mun a thaang/pialkam bang zek in nei uhi. Huaiziak in, Vahuisih mun ah thaang/pialkam ngamlou uhi. Adiktak a athu omdan ahihleh, Vahuisih mun ah pialkam in, vahui tam pipi manta’ lehang; vahui chi/nam mangthang zouhial ding hi. Huai ding khangluite’n deihlou uh ahihziak in, kuaman Vahuisih a thaang/pial a kam ngamlouhna ding un “Vahuisih a thaangkam hoihlou” na chi uhi. Huai omdan ahihleh, Vahuisih ah thaang hiam, pial hiam vakam teitei lehang, vangse ding, dawite’n hon dawmlou ding uh, chihna ahi hi. Huchimah bang in, Sazuksih, Sakhisih leh Zawngsih tanpha humbit ahih theihna ding in, huchi bang munte lou a neih a vatsiat zek in na gen uhi.

 

Huchi mahbang in, gam khenkhat/ (lou) zau khenkhat lou a neih a, suksiat phallouhna mun nei ua; ‘Pa-ngen zau’ bang chi uhi. Huchi bang mun – ‘Pa-ngen Zau’/’Pa-ngen Gam’ lou a vanei a om chiang un, huai louzau in a insung papen uh na ngen in, na laksak (insung papen si/khuai) chihna ahi hi. Huchi bang munte ahih leh, tulai a mangkangpau a ‘ecologically fragile’ na mun hiam, ‘biodiversity’ mun hiam na hi deuh zel hi. Huchi bang mun suksiat ahihchiang in, gamsung  lum-le-vot, vuahtui luandan, tuinak leh thil tuamtuam hih buai thei hi. Khangluite I chih chiang in, gamlak, gam-maang leh tuinakte amau nekzonna ahihziak in, gamlak soudom theihna dan khat nei uhi. Huai hunlai in tulai bang in ‘Forest Guard’ chih omlou ua, mipite lauhna/superstition zang in gamsung sing-le-lou, azu-ava, gamsa leh boruak lum-le-vot humbit uhi.

 

Tuni chiangchiang in, gam-mang kepbitna ding a I khangluite uh gindante lah taisanta hang a; ahihziak in, khangluite nekzonna bang mah in, singtang louneih in atamzaw in nek I zonglai uhi. Huaiziak in, khangluite’n ‘Forest Conservation” leh “Wild Life Conservation/Protection” te angaihpoimoh bang un, huaite kisinthak nawn in, ngaihpoimoh dan a milip kizil thak lehang, huai ah ahunsawt a ding in I minam uh damkhosuahna om hi. Huaiziak in, gamhal, gu(poison) a ngabet, gamsa leh azu-ava mok thahtah chihte leh ngaphultaan chihte tanpha tawpsanta lehang maw.

 

Huai kum – Sialzawi Tang lam lou neih kum in, ka lou uh kaanglou lua ahih chiang in, mangtom hun in, sing leh gua kaangloute heipi leh tempawng toh phelkhia a, hemsiang in mang ka tom pan ua.  Singteh, go-nah leh loulai a akaanglou singkang, gokangte kongtual phiat bang in ka phiatsiang uhi. A kaatlouh luat ziak in, vuah hong zukpat leh, singbul, gobul teng leh loupa bul teng hong selkhia uhi. Huan ah, loupa’ tang/gah kaang selou leh kangtumlou ahi ding ua, loukhoh hun in loupa’ sihak  leh genhak a kigen teng ka loulai uah poukim deuhvek in ka thei hial uhi. Huaiziak in, loulai a loupate khohkhiak in huntawklou a; huai loupa’ khohkhiaksate singbul leh gobul tung hiam, ahihkeileh, singluang tung  a koih khiak a, azung toh nisa a phoukeu louh in silou himhim uhi. Loupa’ khenkhatte ahihleh, huchi bang a I soisak nung inle, noksak lawmlawm nawnkei mahle uh, a kikoihna mun ah na hing in, na zaam in,  na sel teitei uhi.

 

Lou nasep a ka theihtawp uh suah ka hihchiang un, ahihtheih liai leh, lou ah ka giak ua; huailou kal a lou a ka giah theihlouh chiang un, skul kai tawp chiang in loulam ka kidelh huan zel uhi. Lou  a ka giak chiang un, lou nasep tha-it lua ka hi ding ua, khovak sungteng, akimuh theih liailiai sungteng lou nna ka sem uhi. Ka lou uh - kuamah vaat ngeilouh, kuaman lou dia ana bawl ngei nailouh uh  - gampi ahihziak leh, a leitang’ himhim leng hoih ahi ding a, buh-le-baal leh haichi  khatpeuh in ngeih mahmah hi. Huaiziak in, sep thaman bel om mahmah hi. Huai kum akipan in kawngna leh nungna ka nei pan a; loubuk a an ka neek chiang un, tu zoulou ka hihchiang in, lupsa peuh in an ka ne sek hi.

 

Alehlam ah, a kum nawn  akipan in, kou inkuan’ khovel neuchik sung ah ‘kilamdanna’ thak khat hong tung in: gintak leh lam-et phak hetlouh in, kou inkuan an ngen a kholak vak nawnlou in, kou sangkil ah an ngen leh puktaw  hong daak muh ding om uhi.

 

Ka loutaw uah lui khat luang a, huai luigal lehlampang inkuan khat in lou in nei uhi. Huai ka lougalpa uh, Pa Thang in, kou loutaw leh amau lou toh kikal ah – ka kikal ua lui kantan in mankhawng thaangkam hi. Loukuan chiang in tuitawi kei nna deuh ahi hi. Ka hihsek bang in -lou ka giah lai un - zingkal khat, zing khovaak philhphelh in louto lui ah tui kava tawi hi. Ka tuitawina lam ah, ka louvengpa uh mankhawng a Zulei  awk ka vamu hi. Zulei kichi salim ahi kei a; asa leng duai mahmah hi. Zulei sa ka duh e, ka bang e chileng hiloupi in, huai Zulei ka deih mahmah a, thaang-awk phelkhia in ka la-ek mawk hi. A kamsiamlou deuhte’n ‘mi thaang a Zulei awk gu’ honchi ding uh chu! Ahihziak in, loubuk a huai Zulei   tawi ngamlou ka hihchiang in, mangbop lak a loupa’ kawm ah ka selgu hi.

 

Midang, sadang ngoh ding dang om mahmahlou ahih chiang in,  muanmoh ka kailou thei kei hi. Huai kia hilou in, tuukpi lai ahihziak in, khekhap selzoh vual ding hilou himhim hi! Huaiziak in,  louveng pa, Pa Thang in ka Pa kiang ah na gen a, ka pa’n “Louveng pa’ mankhawng a sa-awk la na maw?” chih hon dong a; ken bel, ka laklouh thu in ka dawng hi.

 

Mite’n ‘kisikna’ in I thil hihkhelhte bawldik nawnna  kengtel ahi chi ua. Bawldik nawn I chih hang in, Bible a Zomi min nei omsun, ahihziak a, nekguk-takgukna toh amin mekmat a om Pu Zakai in “En dih Toupa!....kuapeuh apan dikloutak a lak na nei hita leng zong, a lehli-in ka din ding” achih zawle, athil hihkhelh akisik luat toh; Jesu a maitang zahtakna toh; tulai abat leh, akiang ua akihouna uh na zaphaban mipite ‘impress’ nopna toh; Zakai in ahihtheihlouh ding tanpha na chiamkha settawk in, ‘alehli in ka din ding’ bang chikha kawi zezen hi maithei hi!

 

Huai I chih hang in, kum 10 paita a mite dangka Teng 1000/- a nekguk leh, sum-kum pailiamta – nikum a, mi khat sum Teng 1000/- anekguk  - Teng 1000/- tuaktuak in din mawk taleh bel diktheilou ding hi. Aziak ahihleh, dangka tung ah hun in nna sem a; hun apai toh kiton in dangka manphatna keniam zel hi. Huai amanphatna keniam hukdimna ding in, dangka in pung nei a, mangkang pau in ‘interest’ kichi hi.  Huaiziak mah ahi a, kum 10 pailiamta a Teng 1000/- a nekguk leh sum-kum pailiamta a Teng 1000/- a nekguk dit   zah kibang theilou  ding ahi, I chihna ziak.

 

“A lehli a dit” chih zawle tam lawdeuh I saktak lehleng, a sum bank khawng ah kemsak khilkhial bang hitaleh leng, a pung na om zek sam diing ahih chiang in, atuung a a nekguk zah sang a tamzaw deuh in Pu Zakai in dinzou maithei ding hi. Mi khenkhatte’n hiai ah, a diak in pu Kai mizia theichian kichi tute’n, ataktak a ‘aleh li’ a ditnawn tum taktak hikei lehleng, mite sum-le-pai ana nekguk sakte ditkik nawn ding chih, a kam a agenkhiak himhim leng thupi lua ahi, chi uhi. Pu Kai in ‘alehli in ka din ding’ achih in, a nekguk tengteng huamsak vek khollou in, kum tamkhop paita - nekguk apat tunglam ate gen hideuh  ding in I gingta hi!

 

Bangteng hileh, Pu Zakai leh Jesu kimaituahna tungtang a thil chiamteh tak mahmah khat ahihleh : tulai a mi khenkhatte’n ‘Pianthakna’ in zu leh tep-le-muam teng leng douzou a; ahihziak in ‘Nekguk’ tak hial zaw dou zoulou ahi, ana chihsek uh diklouh dan hilhchian mahmah in I thei hi. Pu Zakai bang a nekguk ngolvei a, zawngkuh to-kheng bang a, nekguk lam a kheeng’ a kheeng’ gawptate leng, lungsim tengteng a Jesu azintun chiang un, nekguk tawpsan ding in ‘diktatna a kilam thak’ theilaw tham uh ahi chih kilang chian mahmah hi.

 

Pu Zakai tungtang huchi bang hitaleh, thaangkam ngeilou inkuan khat omta henla, tua inkuante’n thaangkam ngeilou ahihchiang un, azu-ava, Zulei tel in aman ngeikei ding uh chih leng theihsa ahi hi. Huchi bang inkuante’n mankhawng a Zulei awk, ‘alehli a dit’ ding bang hitaleh, amau a ding in thil haksapi suak ding in I gingta hi. Zulei I chih, office cashier khenkhat in solkar sum apung a ana guk hawm bang ua, apung a hawm theih hiam, ahihkeileh, bank a koih a, koih pung theih leng hilou hi!

 

Huaiziak in, huai Zulei, angeimah, a awkna mankhawng mah a awk kiknawn ahihleh, thil lamdang lua  hilou in, gentam – saktam ngailou in, ‘ahi ding dan mah ahi’ I chihtheih chiat uh I gingta hi!

Read 245 times Last modified on Tuesday, 16 May 2017 12:38

  • zokhual
    zokhual
    Monday, 15 May 2017 14:48

    'Khaipu Zasuk Mat Gige Kum’ : Zazuk hilou a, Sazuk cih di ei ve.

Login to post comments