You are here: HomeArticlesCareer GuidanceSiamsinna leh Khristian Hinkhua

Siamsinna leh Khristian Hinkhua

Written by  Published inCareer Guidance Tuesday, 30 July 2013 10:53
Siamsinna leh Khristian Hinkhua

Evangelical Baptist Convention: Lamka South Division
Baptist Children Department
(L) Tunvum Bial

SEMINAR

Thupi: “SIAMSINNA LEH KHRISTIAN HINKHUA”

~By: Rev. V. Ginsianthang 

I.THUMAPI


“Post-Modern Era” a om I hih dungjuiin khovel ah thil kikhek leh thil thak atama, hoihlama masawnna a om bangin thil hoih lou zong ana khang hat mah mah hi. Huaijiakin siamsinte adingin thil jil ding tam deuh deuh, skul subject-te haksa hiai hiai banah sepna muhna dia kidemnate (competitive exams) zong hong haksa sem sem dingin alang hi. Tua ahihmanin tulaia siamsinte, tunung saptuam, nu leh pa, nam leh gam lamet leh kingakna I hihman in, kuhkal tak, pilvang tak leh Pathian phawk kawma siam I sin ua, “avaak teng suangmantam hikim lou” chih banga, pilna/theihna taphot hoih kim lou/phatuam kim lou, khantouhna leh hauhsakna taphotin nopsakna honpe kim lou banah thuneihna zat dan dik leh dik lou, kivaipuakna deihhuai leh deihhhuai lou, minthanna zong a hoih leh hoih lou om ahi chih theihchian apoimawh hi (Jak. 3: 13 – 17).

Huan, hinkhua lohchin or lohsap I chih mimal panlakna a kingakna chiang a om hangin, bangkim tawpna Pathian khuta om ahi chih theihchian apoimawh nawn hi. Tua omdan bel: mihing hatna, pilna leh hihtheihna in phaktawp nei ahihmana, mihingte’n bang teng geelin, neiin panla mah lehang Pathian lemsakna loua lohchinna leh nopsakna tak tak om tuan lou chihna ahi (Ps. 75: 6, 7; 127: 1, 2; 128: 1, 2). Tuaban ah, sabiak zil bang, tenna leh khankhiatna zil bangin khovel ah thil et dan, teh dan, zat dan, lunglutna, pai dan leh nasep dan kibang lou tak tak a om a, tuate kibatna leh kibatlouhna pilvangtaka velchet a, bangkim tehna dia Pathian dan/thu zat gige a, I pilna leh siamnate Pathian thupina ding ngimna ahih apoimawh hi (I Cor. 10: 31; I Sam. 15: 22, 23).

Huaijiakin, tutung I seminar thupi: “Siamsinna leh Khristian Hinkhua” chih thu poimawh petmah, siamsinna leh Khristian hinkhua kisaikhak dan, Khristiante’n bang lungput toh (attitude), bang muanna toh (confidence), bang tupna toh (purpose) bangchi siamsin ding (method) chih banah, pilna, siamna leh hauhsaknate bangchi zat ding (utilization and ethics) chihte ahuam vek hi. I gensa bangin siamsinna toh kisai lungput dik leh diklou om, siamna sin/zon dan dik leh diklou zong om, neih le lamte muh dan leh zat dan dik leh dik lou zong om ahi chih mangngilh het louh apoimawh hi (cf. Marxist principle: The end justifies the means).

Tua ahihmanin, tuailai siamsinte’n “tup leh ngim dik leh kichiantak” neia, honsiamtu Pathian in bang deihna hanga honna piangsak ahia (primary purpose of life) chih theichian kawma pilna leh siamna zon ding; pilna, siamna, hatna, hihtheihna, thuneihna, neih leh lam-te zong Pathian adia pomtak leh thupina dia zat ding bana, eimah adia hoih leh midangte adia phatuam ahih ding chih hiai I seminar thiltup lianpen ahi. Tulaia thilpoi mah mah, Laisiangthou in zong hoihlou asak pente laka khat tuh pilna/hauhsaknate, amutu/neitu’n amah siatna dia (leh midangte siatna) azat ahi (Ekl. 5: 13). Hiai bang hilou dia siamsinte pilvan ding chih I deih leh kingetna ahi.

 

 

II.THUPI HILHCHETNA

I thupi: “Siamsinna leh Khristian Hinkhua” chih pomdan leh hilhchet dan tuam tuam a om thei tham ding. Himahleh, I seminar tup leh ngim toh kituak ding lungsima neiin hiai anuai ah saulouin hilhchian masa ni:

A.“Siamsin” chih, thumal nih: “siam” (skilful or expert) leh “sin” (to learn or to study) kigawm ahi a, nna khat or thil khat siam or zei dia sin or sim or sinsaka om (trained to become skilful or expert) chihna ahi a, “siamsinna” I chih chiangin, tuabanga nna khat or thil khat siam dia kisinna toh kisai thil khempeuh (huam) genna ahi. Siamsinna in polam apan thil laklut kia gen louiin, mihinga omsa khuakpilna (intelligence), lungput (attitude), mihinzia (temperament), hihna (personality) leh nungchang (character) banah pumpi (body) mah zong ahoihlama khansakna ahuam vek hi. Huan, “siamna” leh “pilna” banah “theihna” I chihte’n chiiktaka suut hileng tuamna zek zek nei ding himahle uh, hiai ah gen kibangin I zang khawm hi. Huan, siamna diktak neihna dingin, ei apan omsate paihkhiak (unlearn) pawl zong neih apoimawh chih mangngilh louh ding ahi.

Huan, leitung ah siamna sin ding tampitak a om bangin siamsinna mun tuam tuam tampitak a om. School/college/university-te ah siamna tangpite a sin theih a, professional institute-te ah (football academy, Taekwondo academy, swimming school, medical college, management institutes, training schools, music school, animation school, engineering colleges, Bible college/seminary etc) siamna tuam tuam a sin theih hi. Huan, I tup leh tun sawmna (purpose and goal) jilin sin ding or hih ding tuam tuam a om hi.

Tua ahihmanin, siamsinna I pomdan leh kua(te) ahia siamsin chihin kizopna liantak anei hi. Adiktakin bel, khovela mi tengin siamsin ding neivek, thil khata siam mah mahte’n zong atheih louh/siam louh uh sin ding nei veve ding ua, teek kuna damte’n zong amau toh kituak siamna sin ding nei lai veve ding uhi.

Huai omdan bel, School/college/university khawnga sinna sangtak tak neita, sepna lian tak tak zong neita leh experience hau mah mahte’n zong, amau toh kituak sin ding nei veve uh ahihmanin mi tengin pian apan sih donga siamsin ding nei chihna ahi (life-long process). Ajiak tuh, siamna I chih ahuap za lua, atunga I gensate banah hun zat siamna, sum leh pai zeek leh zat dan siamna, ahun huna thupukna bawl dan saimna, dan omsate zuih.sepsuah dan siamna, haksatnate puak dan or suk vaiveng dan siamna, ann nek tuidawn sai dan siamna chihte zong ahuam vek hi (all-round development of human life).

Himahleh, tutung I seminar ah tuailai siamsinte, abiiktakin School/college/university khawnga siamsinna tuam tuam sinte awn deuhin kikum lehang I chi hi. Ahizongin siamsinte’n shool/college/university-te a I va sin uh siamsinnate bana damsunga siamna sin ding bei ngei lou ding ahi mangngilh louh a poimawh hi (life-long process ahih dan). Huaijiakin, school/college/university khawnga degree ngah chia lungkim suk mai loua, midang toh kizopna toh kisai, nupa hinkhua, biakna toh kisai, tate kepna toh kisai, hun nuam leh haksa zat dan or puak dan siamna toh kisai etc sin ding ahun leh mun zila om gige ahi chih phawk gige apoimawh hi.

B.“Khristian hinkhua”- hiai thumal nihte’n agen diktak theihsiam apoimawh hi. “Khristiante” chih akizat chilin “Khrist neuzawte” (little Christs) chihna, Antioch a gingloumite’n Khrist’ nungjuite a engkouna uh, Jesu nungjui, a thusinsakte poma, hinpiha, puangzaktute genna ahi (Nas. 11; 26; 26: 28; IPet. 4: 16). Tuchiangin ahih leh, “Khristiante” I chihin Khrist’ ate, Khrist nungjuite, gingtute, ahih kei leh Khrist banga nungtate chihna’n apom theih vek hi. Huan, “Hinkhua” I chih mikhat damsung tom leh sawt genna mai hilouin, I lungput, nasep silbawl leh hun zat dan teng huam genna ahi. Huaijiakin “Khristian Hinkhua” chihin agennop tuh: Khrist hinkhua enton leh hon sinsak banga hinkhua zang chihna ahi. Hiai omdan bel, amina Khristian chih mawk hun lou, Jesu lungput thei a, a mah hinkhozatdan entona, a mah thu sinsakte theia juia hinkhiatpih chihna ahi. Tua ahihmanin, Khristian minpu mah lehang, Jesu Khrist lungput thei lou, a mah hinkhozatdan enton lou leh a mah sinsakte jui lou a, ei ut dan dan hiam, khovel dan juia I gamtat mawk leh “Khristian” diktak kihi thei lou ding chihna ahi.

Huaijiakin, I Thupi-a “Khristian Hinkhua” chihin a gennop tuh: Jesu Khrist lungput thei, a hinkhozatdan enton, a thugente gingta a hin pih, a lungput leh thil etdan/tehdan koppiha hinkhua zang chihna ahi. Tua omdan bel, kipiakna kichiantak neia Khrist hindan enton leh hon sinsak banga khosa, Pathian deih leh a dan toh kituaka pilna/siamna sin, pilna/siamnate zong amah pahtawina dia zang, neih leh lam leh thuneihnate khempeuh Pathian thuneihna nuaia koih thei hinkhua genna ahi (Rom. 12: 1, 2; I Pet. 2: 9 – 12).

Huaijiakin, Khrist in athunun hinkhua leh Khrist tellou hinkhua kibatlouhna theihchian mah mah apoimawh hi. Khristian hinkhua diktak tuh Khrist adia hing, amah batna a khang sem sem, Khrist in athunun hinkhua ahi. Hiai khovel dan banga omlou hinkhua genna ahi.

III.SIAMSINNA THILTUP (SSPP Motto: Sin in, Sem in, Jun in…)

I gentak bangin mihing hinkhua ah “Siamna sin ding” atam petmah hi. Mi khatin a hinkhua toh kisai kha thil teng ah siamna sin ding anei chihna ahi. Schoolnaupangte’n amau sin (course/program) toh kituak thu leh late theia azat siam ding uh ahi. A thu kia theia azat theih kei uleh “siam lou” chihna ahipah hi. Tuamah bangin dawrkaitu in van lak leh juak dan, vante kep leh etkai dan, vanleitute houpih dan, sum saidan asiam ding ahi. Tuabang mahin pastor in leng Pathian thugen asiam ding, saptuam etkol asiam ding ahi. “Siam” I chih chiangin thil khat or nna khat or thu khat dan omsa toh kituak hiam, tua sanga hoih zaw, phatuam zaw, kilawm zaw, gahsuah zaw, baihlam zaw leh felzaw dia gen/sem thei chihna ahi. Tua ahihmanin siamsinna in atup tuh pilna/theihna neiha tua tungtawna mihing hinkhua toh kisai khempeuh amawkna hiam, suphuaipi hiam, haihuaipi hiama gen or sem loua; kilawm, manpha leh feltaka gen or sep or sai ding chih ahi. Gen dan dangin gen lehang, siamsinna thiltup tuh mawlna, haina, jawnna sukbei a, mimal leh gam/pawl kong bangkima dopkang ding chih ahi. Siamsinna thiltup in thil tampi: mimal hinkhua ah (personal level), innkuan ah (family level), khotang ah (social level), gam sung ah (national level), kawlmong ah (international level) banah sahkhua toh kisai (religious or spiritual level) ahuam kha vek hi.

Huan, khovelmite leh Khristiante’n siamsinna toh kisai ah, abiiktakin tup leh ngim thu ah kibatlouhna liantak anei hi. Atangpi’n siamsinna toh kisai khovelmite’ thiltup lianpen khat tuh mimal leh khotang/minam hinkhua, khosakna leh dinmun kep bit, bawlhoih leh dopsang ding, tua dia mihinga hihtheihna (potentiality) om pholhsuaha khanlet sak ding, khovela thil om leh tungte theihsiama zat siam ding chih ahi. Himahleh, siamsinna toh kisai Khristiante tup leh ngim ah tuate telkha thou mah leh, apoimawh leh lianpen tuh Pathian pahtawina leh thupina ahih ding chih ahi. Hiai bang tup leh ngim I neih kei mawk leh, khovelmite toh kilamdang lou I suak ding hi. Tua omdan bel, polam latdanin Khristian leh Khristian loute’n siamna sin khawmin, degree kibang ngah mah lehang, sunglama tup leh ngim kibang lou a om poimawh chihna ahi.

Huan tulaia I gam pumpi, abiiktakin Manipur khawngin I buapihte uh: kineksiatna, nekgukna, hiamgamna leh thangtatna tuamtuamte koia hong kipan hi a, bangchi sukbei ding hiam chih tuailai simsiante’n nakpitaka ngaihsut tham ching ahi. Tulai dan hiven chih mai suka, ei zong tuabang chiindan hoih lou toh kibulhlem sawm het louha, hiai bang siatna apan kihemkhia a, midangte zong tuabang siatna apan hunkhia a lampi dika pii leh makaih dia I kisakkhawl apoimawh hi. Tuabang dingin khovel dan leh Pathian dan kibatlouhna theihchian mai hilou a, khovelmite toh kilamdang dia hin ngam apoimawh a, tua dingin Pathian muanhuaina/itna lam leh a lauhuaina lam kibukimtaka theihchian apoimawh hi.

Tuchiangin siamsinna toh kisai A AW B CH theiha, laisim theih, gelh theih ding, laisiam chia (pawl sawm/BA/MA zoh chia) solkal or mission or company khata sepna neih ding chih mai hunnawn lou, khovel mun tuam tuama mite khosak dan, mite buaipih leh sep leh bawlte theia, khovela thil kikhek jelte theisiam leh ahun leh mun or thil toh kituaka khosak siam apoimawh petmah hi. Tulai dan, mi hihdan teng hih ding chihna hipah lou in, ahun leh mun or thil kikhek zelte, Pathian dan bukim leh kikhek ngeilou pansana velcheta, bangkim amah thupina dinga zat siam ding chihna ahi. Tuabanga zang theite mi “pil” or “siam” chihna ahi a, bangkim Pathian dan toh kituaka en leh zang thei loute mi “hai” chihna ahimai hi. Huaijiakin Bible ah kiteltakin pilna or theihna or siamna poimawh dan leh, pilna or siamna taksap poi dan I mu hi (Pau. 16: 16; 20: 15; 22: 29; Ezk. 7: 12; cf. Hos. 4: 6).

Bible a I muh bangin pilna lawmpi nihin a khen theih: tunglam apan piak pilna leh khovel pilna ahi (Jacob 3: 13 – 17). Khristiante’n hiai pilna chi nihte neih kop theih ahi a, himahleh tunglam apan pilna apoimawh zaw hi. Khovel pilna/theihna tuh lohkhiat thoh ahi tangpi a, tunglam apan pilna bel a ngentute kianga Pathian’ thawnpiak ahi (I Kum. 3: 10 – 12; Jacob 1: 5 – 8). Tulaia poi mah mah bel, Khristian kichi samnapi’n tamtakte’n khovel pilna kia neiin, pilna thuk zaw leh poimawh zaw tunglam apan pilna a nei kei uhi. Hiai in gingtute taksap lian mah mah thumna ahih dan hon phawksak hi.

Anuai ah Bible (Paunakte) pansanin “mipil” omdan tak, eimah kivelna ding leh tup leh ngima I neih ding deihna’n i taklang ding hi:

1.Nungchang toh kisai:

a.Hilhtheih, thuhilhna sangsiam, pilna a khang (Pau. 1: 5; 9: 9; 10: 14; 18: 15; 19: 20).

b.Diktat, Pathian lau, diklou hua, thutak gen (Pau. 1: 7; 2: 20; 13: 5; 22: 21).

c.Kingainiam, kisathei lou (Pau. 15: 33).

d.Mahni kithunun, heh hak, ngaihtuah det deta gamtang (Pau. 12: 23; 13: 16; 29: 2, 11).

e.Ngaihdam ut, lemna deih (Pau. 10: 12; 14: 9: 19: 11; 20: 22).

2.Kizopna toh kisai:

a.Pathian toh kal ah – Pathian lau, muangngam, lampi leh dante limsak, thununna theisiam, khelhna pulak, Pathian maivil pena nei (Pau. 14: 16; 16: 3, 20; 17: 24; 28: 13).

b.Innkuante toh kal ah – nu leh pa zahtat; azi muang ngam, pahtawi, zi adia ginom (Pau. 31: 28, 11; 5: 15 – 20); tate it, khual, sinsak, thunnun, salam leh khalam poimawhte uh phawka panla (Pau. 3: 12; 1: 8 – 9: 18; 22: 6; 13: 1; 21: 20; 14: 26).

c.Lawmte leh innvengte toh kal ah – ngaisanga manphatna phawkpih, thukuppih, amohpuakna subuching, lemna delh, khem lou (Pau. 27: 9, 10, 17; 3: 27 – 30; 16: 29).

3.Kampau toh kisai:

a.Kampau thilhihtheihna theia pilvang (Pau. 12: 6; 13: 14; 11: 9, 11; 14: 23).

b.Thudik gen, pautam jeljul lou, kiphasak lou, selhat lou, kinak ut lou, phunchiak lou, thuguk kep siam, kidam thei (Pau. 12: 22; 1: 19; 27: 2; 17: 14; 11: 13; 20: 19; 15: 28).

Hiai atunga I gente pansana kivela, hiaite mah ei mimal hinkhua a suk tangtun sawma panlak gige apoimawh hi. Tulaiin laisiam, sum hau, sepna sangtak nei, thuneihna liantak tawi napi a, nungchang hoih lou, mi dang toh kizopna hoih lou, kampau leh gamtata gilou atam a, hiai atunga I taklat mipil tak takte omdan toh akigamla mah mah hi. Huaijiakin, siamsinte’n leitung pilna bana tunglam apan pilna I lunggulh ua, I zon ding uh, hiai tunglam apan pilna I neih ma, ataka mipil leh siam kihi thei lou chihna ahi.

 

IV.SIAMSINNA LEH SABIAK KISAI KHAK DAN (E.g. Daniel leh a lawmte)

Mi khenkhatte’n siamsin laia biakna limsak luat, biakna toh kisai hun tam zat luat hoih lou ahi, sinlaite nana in I jillaite maha lungsim piakkhit ding, tua loua lohchinna tak tak haksa achi uhi. Pathian biak, lauh, nasep dan, thum dan etc zong kisin ngai tham phet louin, I sinlaite sang maha poimawh zaw ahih dan phawk apoimawh hi. Pathianin hon siamna san – amah bia, amah toh kithuah leh a nna sem dia hon siam I hi. Huaijiakin, mihingin bang teng tum in kuhkal takin pang mah lehang, Pathian lemsakna loua lohchinna leh nopsakna tak tak om lou ding ahi (Ps. 127 & 128). Hun teng leh mun tenga Pathian phawkte mah mi pila/hat leh thilhihthei ahi uh (Solomon, Jesu, Danial leh Joseph te hinkhua).

A.Mihing siamna a Pathian thiltup – Pathian in mihing hon siamna san tuh amah toh kithuah ding, amah bia a pahtawi ding, huai tuh amah thupina dia hin ding ahi. Hiai bang Pathian thiltupte theichiana siamsinte’n pilna leh siamna bana hauhsakna leh thuneihna bangteng I nei zonga, hon siamtu Pathian deihna banga zat ding I mohpuak ahi (Gen. 12: 2; Rom. 14: 7, 8; I Cor. 6: 19, 20; 10: 31).

B.Mihing kisiamdan – Mihing pumlum tuh taksa, lungsim leh kha kigawm ahi (khen khatin lungsim leh kha khentuam lou uh). Hiai tengin kizopna nei vek: khalam thilin lungsim leh taksa sukha, lungsimin zong taksa leh kha sukha banah taksa in zong lungsim leh kha sukha (psychosomatic unity of human being) ahih dan theihsiam a poimawh mah mah hi (Mat. 12: 33 – 37; 15: 17 – 20). Huaijiakin, I omdan gamtat ahoihna dingin I thil-etdan Bible a kibulphuh ahiha, Bible mah thil hoih leh hoih lou tehna vanzat a I zat gige uh apoimawh hi (Ps. 19: 7 – 13; 119: 105cf. Pau. 16: 25). Huaijiakin, I “value system” kingakna Laisaingthou ahih ding, I value system jila pilna siamna bana nasep silbawl ding kizong leh kisem ahi (Mat. 5: 3 – 12; I Cor. 1: 18 – 30).

C.Mihing deihtelna leh Pathian vaihawm kizopna – Mihing hinkhua leh maban ding bangtan hiam mimal deihtelna a kinga pawl oma, Pathian seh leh vaihawm bang banga kinga pawl a oma, hiaite gel theihkhen apoimawh hi. Thil teng eia kinga vek lah hilou, thilteng Pathian khuta ngak suk ziau di lah hilou, Pathian nasep leh mihing mohpuakna tan theihsiam apoimawh hi (Pau. 16: 1 – 4).

D.Lohchin leh lohsap pomdan – Mihing in lohsapna tawpkhawka I ngaihte Pathian et dan toh na kituak kim lou thei ahihmanin, Examna a lohsap hun, sep leh bawl leh tup leh ngimte a lohsam kisak hun chia Pathian thil-etdan theihsiam apoimawh hi (Mat. 5: 3 – 10; Mat. 16: 24 – 26; 19: 29 – 30). Thupil a, “Lohsapna tuh lohchinna’ dia kalbi” ahih theih dan theia pawng lungkiak pah pah louh ding ahi (Abraham Lilcoln: sumdawnna a nihvei lohsam (1831, 1833); Kitelna a giat vei val lohsam mah leh 1860 kuma US President dia teelching hikhong). Haksatna leh tup khata lohsapnate apan pilna leh jillai la a, mabana lohchinna sang sem ngah theih ahi (Ps. 119: 67, 71).

 

V.SIAM SIN DING LEH SEP DING TEELNA

Siamna tuam tuam tam, hoihna leh hoih louhna zong omchiat ahihmanin ei toh kituak, I sepsiam jawng (talent) hiam lunglutna tuambiik leh pai dan ding kichian theiha neih apoimawh hi (Pau. 22: 6; I Cor. 12: 1 – 11). Siamna sin ding or sepna teel or zon hunin anuaia thute ngaihsut apoimawh hi:

1.Pathian honpiak hihtheihna zah zah toh bangkim hihtheih ahi (understanding the source of power and success).

2.Pathian honpiak hihtheihna zah zah toh bangkim hihtheih himahleh, mi khatin thil teng teng sin kim or sem vek thei lou ahihmana siamna sin ding or sep ding tumta teel or seh khiat ding ahi (understanding human limitation).

3.Siamna I sin nopte or nna I sep sawmte toh kisai bangchi sepsuah ding chih geellawkna neih apoimawh hi (planning).

4.I lunglutna or thiltup gahsuah dia lamet bang ahia? Ei toh kisai, society toh kisai, Pathian toh kisai ah bang gahsuah om thei dia?

5.I lunglutna pen banah thildang bangin azoma? (Flexibility).

 

Khovel ah siamna sin ding leh nna sep ding atam pet mah hi. Huaite lak ah tamlou taklang lehang (Tuailai 2005 Workshop on MESA pansan in):

1.Actuarial Science 2. Advertising 3. Archeology 4. Architecture 5. Art Restoration 6. Banking Service 7. Beauty and Hair Care 8. Business Management 9. Chartered Account 10. Chartered Financial Analysts 11. Civil Aviation 12. Civil Services (gazetted posts) 13. Civil Services (Non-gazetted posts 14. Company secretary 15. Cost Accountancy 16. Counseling 17. Design 18. Detective Services 19. Fashion Design 20. Film Making 21. Fine Arts and Commercial Arts 22. Foreign Trades 23. Garment Manufacture & Merchandising 24. Hotel Management 25. Journalism & Mass Communication 26. Languages Study 27. Law 28. Librarianship 29. Management & Consultancy Services 30. Management: Personnel/Human Resources 31. Market Research 32. Marketing & Sales 33. Modeling 34. Performing Arts 35. Photography 36. Public Relation 37. Publishing 38. Printing 39. Radio & Television Broadcasting 40. Railways 41. Secretariat practices 42. Health Care 43. Defence & Armed Forces Services 44. Gospel services leh adang dang. Hiaite apan I lungltutna mai hiloua, I tempaina bang ahia chih kiveela, alampi om theih dan tanpha geel veng veng kawma thupukna lak apoimawh hi.

2.Tulai a “thautawite” toh kisai lungput dik neih poimawh lua e.g. SSPP Net a thu ka muh khat: Manipur ah brilliant student/Ist Class student-te doctor/engineer hong hi ua; second Class-te civil servants; third Class-te politician leh laijilna a lohsamte gamnuaimi hong hi ua; doctor leh engineerte civil servantte’n uk, civil servantte politiciante’n uk, avek ua gamnuaimite’n uk chih ahi a, dikna chiang om bangta. Kivelna ding – pilna/siamna diktak neite’ tup dik louh leh sep dik louh jiaka hiaibang thil kilumlet ahi diam? Pilna/siamna mulmal neiloute’n khovel hon uk taktak le uh bang haksatna om thei dia?

 

VI.SIAMSINTE MELMA

Setan tuh thilhoih chiteng langpa ahi. Aman vanzat tampi anei a, tuate laka poimawh diak, siamsinte subuai thei Setan vanzat bangzah hiam I taklang ding:

A.Eimah hinkhua a om melmate:

1.Sa utna thanghuai leh duhgawlna (immorality & gluttony)

2.Hazatna/muhsitna (jealasy and negtative attitude)

3.Huaihamna/angmasialna/mahnikideihkhopna (greed and selfishness/egoism)

4.Kideihkhopluatna (complacency) leh kisaktheihna (pride) (Pau. 15: 25;

5.Thadahna/Jawntatna (laziness and negligence) (Pau. 10: 4, 5; 13; 4; 19: 15; 22: 29).

B.Polam apan melmate:

1.Khamtheih/guihtheih thilte (intoxicants/drugs/alcohol etc) – Ju leh sa, damdoi leh khamtheih thil him him (kuva, khaini, talab, lehkhajial telin) hihlouh ding ahi. Hichibang thilchiinte’n taksa, lungsim leh khalam suse thei ahihmanun hihlouh bikbek ding ahi. Huan, exam hun chiang khawnga lungsim hatna ding chia damdawi nek-ek chihte chiinlouh ding ahi (Pau. 20: 1; 23: 29, 30; I Cor. 7: 19, 20; 10: 31; Dan. 1: 8ff).

2.Lawm hoihlou – Siamsinte adia pilvan huai mah mah nawn tuh lawmpolh ahi. Lawm hoih amanphatna zah zahin lawm hoih lou alauhuai hi (Pau. 13: 20; I Cor. 15; 33). Ngaihzawng neih la?

3.Chiindan diklou (Unfair-means) – exam na kia hilou a, kaam muhna ding leh sepna muna chiindan dikloute’n siamsinna thiltup (allround development of human life and society) suse dimdem ahi chih theih ding ahi (qualify loupi’n motor heek, laihilh, Mat. 15: 14).

4.Damlouhna – bang jiaka damlouhna siamsinte melma hithei? Nek leh dawn a pilvan louh jiak bang, exercise lak louh jiak bang, teenna leh giahna siangthou louh jiak bang, thangtatna jiak banga natna tamtak neih theih ahi a, hiai in siamsinna naktaka subuai phet louiin namanlouh asuah thei hi.

 

VII.THUKHITNA

Bible in “thilhoih hih chimtak kei ni, I lungkiat kei leh a huntak in I at ngei ding” achi (Gal. 6: 9). Huaijiakin, siamsinna ah tup kichian neia, kuhkaltaka panlak apoimawh hi. Huai dingin mahni kithunun zohna apoimawh pet maha, bangteng pilna/siamna I sina I nei zongin, mimalkithununzohna I neih kei leh bangmah thil thupi leh gentham I sem khe kei ding hi (Pau. 25: 28).

Laisiangthou sim ni: “Toupa kihtak tuh pilna bul ahi” (Pau. 9: 10; Ps. 111: 10). “Diktatna in nam a tawisang…” (Pau. 14: 34); “Sansakna tuh suahlam akipan ahi kei laia, tumlam akipan leng ahi kei…” (Ps. 75: 6); “A nasepa kizen mi na mu hia? (Pau. 22; 29).

Huaijiakin, Pathian in hon siamna san: amah toh kithuah ding, amah bia a pahtawi ding, amah nna sem ding, amah theihpihtu muanhuai hidingin Toupan hon Vualzawl chiat hen aw!

 

Read 1100 times
Login to post comments