You are here: HomeArticlesGeneralZouzen! Tulpaan Nakai Maw!??

Zouzen! Tulpaan Nakai Maw!??

Written by  ZM Tonsing Published inGeneral Friday, 06 January 2017 00:42
Zouzen! Tulpaan Nakai Maw!??

~ ZM Tonsing

 

December 20 zingsang baihtak in pianna vangkhua Kangkap zuan ding in ka kipan khia hi. Pick-up sandup khat ana om a huai ah dimlet zen in ka kihen tektuk ua. Siikzawl khuttawng chia a lian di khat tung ah Lamka a kipan Kangkap tan i hongtuan tung zaw to-bou muat leh kilawm. Ni 2 sung hoih mahmah bang tulem theilou a ki-om. High School kailai a to-bou chiingpum a sawmvei val kizepsa le athuak hakzaw.

 

Lamka toh Singngat kikal, Teddim Road bangchu gari in ek nasan le hon singpawt leh kilawm. Guite Road bel a kibawl lel ziak le ahi dia, a siat dandan in ahoih vanglak a, hilele ahoihlua a gen di zaw hituan kei. Leivui khu in ahoihna tengteng a liahkhuh. Himahleh, maban ah ahoihta chih hun ahongtung i lam-en a, ngak leng i ngaklah bok. Hiai ahehpihhuai Guite Road kha vote zonna kia mai hinawnlou in, thuchiamte a taktak a sepsuah hong hi mahmah ta leh chih ka thumna ahi. Mualnuam leh Songtal kal bel phualpi lam naihdeuh ziak ahi diam ah lamlian mah ana bang a. Gari tuang ka hihlam huai ah ka theikhe pan voi!

 

Lampi sia, khu nalai, tutna di le omlou, huchi nimnem a tuan di man a 300 kiseng mot. Tam ka sa sim. Ahimhim a, skul naupangte a di beek a 'student concession' chih dandeuh khawng om khollou ahi hia? Zodawn a naupang tamtak Lamka zaang a siamsin a om, skul khawl chiang a inlam pai ut chiat lah sum muhna neilou ngen ahihman un ah Student's Identity Card tawi peuhmah bahara kiamzek dan om theileh chihkhawng ka ngaihtuah a. Khat-le-khat kipanpih tuah, i haksatna uh leng kidawn zangkhai tuah kisuakpah dia, se-hetlou di eingal!

 

Haksatna chiteng leh gentheihna namkim thuak a dakkal 8 val vingveng ka taikhit un Kangkap ka tung khongsam uhi. Kilometer 80/90 lel dakkal 8 val kitai ngoihngoih mai dan kihi eive! Pampaih, nawlkhin leh nenniam a om khua nana-na chu anuamlua chihna di a om vakkei. Himahleh, ka khanletna va chih theih hial kholkei mahleh ka pianna, ka lam phumna leh ka Tuun Nunnem' sakluang zalna ahihman in bang chituk a tul in, mite'n simmoh mahleh mangngilh theihvual hilou hi.

 

Khosung ka lut ua ka gintak leh lam-et abang hetkei. Sangtak leh changkang tak a ana om di'n zaw ka lam-en kei himhim hilele, ka lam-et nuailam pek ah ana om zomah lai a! Ni dang a inn kimat a dim mitmet himahleh tua zaw kingaihnatna tawm hia chih di bangphial in, inn kivangtak in a om phimphiam a! Nidang a kangtalai taisekna mun - Khokhung, Home guard-te' lane, Field taw chihte khawng kisuanlahna om hetlou in dailing in a tuam mangngai ta! Huan, nidang a Dam Veng a ka inn mun ngial uh houh gammang sahtak a suakta! Ka zalmang hia chih di'n lah ka ihmu ngalkei a! Ahi, ka zalmang hi henla khanglou le'ng utna maizen ing e!

 

Khokim leh kiang te'n government a kipan development scheme/fund-te a hamphatpih lai un Kangkap ah zaw huchibang thil himhim muh di a om kei. Khat lel leng a om kei. Tua banah, Government skul mit a muh di a omlouh kia hilou in electric nasan leng lutsak ahi kei lai! Khosung ah Assam Rifle (AR) te om ziak in gari bel a tailut thei namnam sam hi. Zattheih hikei mahleh AR-te'n water tanky khat a bawl ua, khua a Saptuam' skul rong a nuhsak ban uah, amau panpihna ziak mah in khosung ah Solar Street Light mun bangzah hiam ah koih in a om a, nuamtuan mahmah hi.

 

Hausa banah bialtu MLA/MDC leh district thunei tute ngaihsaklouh khua himahleh khosung mipite bel amau khom in kikhual mahmah uhi. Inn bawlthak vek diing chih nial vuallouh thupiak khauhtak om hileh kilawm bangkhop in inn hoih pipi bang bawlkhe zengzung uhi. Solkar a kipan panpihna-te (development fund/scheme, PMGAY/IAY Housing Scheme leh thil tuamtuamte tel in) nekmang leh hei lamdang a omlou a, ahi bangtak leh amu dite kiang mah a piak hita maizen leh kua'n Zodawn nusia in khopi a kidelh huan lailai tel dia oi?? Zodawn a kipan khopi i kidelh huan noinoi pen uh 'pull factor' hizaw lou in 'push factor' hizaw hi.

 

Kangkap khua kia hilou in Zodawn a khua tamzaw-te neng chimit leh kaihniam in om ua, election kuan chiang a vote bank lel dia zat in om uhi. Tua ahihman in kua hauhsakna khua a teng a, bang district leh bang constituency a om ka hia chih na-ngawn theilou tamtak om diing chile'ng khial sautel di'n ka kikoih kei. Gam leh leitang neitu hiam ahihke'h makai dia i neihte mipi'n a theihlouh in chu bang chi makaih di amaizen ua. Huan, mipi te donlou leh phawklou, gam puahlou, zuunlou leh kemlou heutu'n bang chi'n gam-le-nam a it thei dia? Min gam-le-nam a it chia maw gamsung a om, hinna nei hi'n neilou hitaleh it dan kibang a it un chin, agam uh puah ua, zuun ua, kem uh eive. Eilawi in gam it i kichih chiang in neksiat theihna chiteng in i nesia ua hiven ah!

 

Government skul lah melmuh di omlou, saptuam skul omlou himaizen leh eilawi bangsuak di i maizen ua? Vision hoih pipi nei in maban pai didan limchi taktak bang i gen kheukhou ua, tua kia hilou in akhang-akhang a kivei diing government ah thilphut bang i neilai dep uhi. Ahi alah i sulnung hon zui dite' siamsinna i ngai poimoh hetkei zel ua! Siamsinna leh pilna-siamna lou a i thil ngette uh bang chi muh di i maizen d'uam maw! Houh, deih taktaklou, mahni gilpi khual ziaklel a ngen ihi zaw hia?? Gam-le-nam it a, 'ka gam' chi a kisaktheihpih diing bawl nuam taktak ihih leh a poimohpen zaw siamsinna ahi.

 

Tutung Kangkap ka pailai a ka kipahna mahmah khat tuh nidang banglou tak in Kangkap khua a Saptuam' nna semte (Missions worker) ana om kim khipkhep ziak un lungmuan huai ka sa a, Tuailai 1434Pro gahsuah khat hi'n leng ka koih hi. Amaute solkar' nna hiam ahihke'h mihing' nna sem hilou a, Pathian' nna sem ahihman un a posting na munmun ua gin-om leh kuhkal tak a sem a, intum-loutum suang a a om ziak un khamuan huai tuan mahmah hi. Hilele, a dahhuai mahmah khat om veve. Khosung kipolh limna le hikawm chi in Youth Club te'n One Day Tournament ahon sai uhi. Hiai hun ah maban election a intending candidate khat in vote zonna hia panpihna ka theituankei, chini ser bangzah hiam honkhak mahleh Kangkap khua tut in a om kei. Melmuh a omlou ahihman in lamkal a ki-hijack chu hipeuhmah inchin!

 

Hiai neng neuhneuh khawng a ki-haza a, kinekmang sak theite ihihlai man un khantouhna di chu gamla lai mahmah chi-ou?! Kangkap khua a dia thil pai peuhmah nekmang leh hei lamdang a om gige tel di ahihleh Kangkap khua a di kivaihawmna tuam (seperate administration) nget mai di hia? Ahihkeileh, khopam a Pangmual (Burma/Myanmar) ah ka belh mai di uam?? Hiai tungtang thunei tute'n a kin theilam a pan na hon lak kei ua leh atung a option nih kipe te ka utut uh ka tel ding uh. Tazou! Sala! Hehtha suakdekna vial e! Heuhou geuh!

 

Christmas leh Kumthak ka hon zang ua, nidang a Biakinn a kita zoulou zen a kikhop metmot lai khawng a ngaihhuai ngei mai. Lengkhawm di nasan leng om zoulou phial in daih in a dai diakduak a. Khatvei, Christmas lengkhawm zanhak, zingkal lam a sagoh di bawng kholai a ka thoh ua leh ka khahsuah maimah lai khawng uh mitkha ah hong kilang dundun maimah hi. Ahunlai in kisuanlah huai in kisik huai bang mahleh huailai khawng hunnuam ana hi maimah dan ahi. Tua lah, aknou a pi'n a sihsan toh kibang chet! Kemtu di neilou, zuunlouh, puahlouh leh ngaihsaklouh nana-na chu tulpaan a kailouh ngal lampi dang omlou.

 

Hilele hamphat huaitak in tutung Kangkap ah ka talent kiselgu khat ka va pholhsuah nuau a - football peksiam pi khat ka kei! Tournament a match nih ka kimawlna lak uah hunphet theilou in goal 5 ngut ka va khum zengzung tel a. Goal khat bang ka veilam a ka peklut zeih hilai. Top scorer hihna ka luah dop mai a, tua kia hilou in ka team-te champion hihna ka lakpih lai. Tuachi bangkhop ka hih man in ka pianna gam in zil himaizen leh khovel a football peksiam a minthangte lak a ka telkhak ka kilam-en tinten.

 

Huaiziak in, Lamka leh a sehvel a Club minthang deuhte'n le a kinlam in hon thuzak un, a sangzaw lam delh a kal ka suan ma in! Huan, kumtawp lamchiang a Delhi a Tamchon Tournament om nawn hun a leng SSPP-FC Fans kia mai hinawnlou a, a player-te lak a ka telkhak bat teitak lam-etna liantak ka nei! Huai hun chiang in zaw lungkham leh puaknatna khitui nul a sepaih lam maimah chih a om nawn kei dia, champion trophy domsang kawm in kipahna khitui in ahon tuam kimvel ta ding.

 

5 Jan., 2017

Read 416 times
Login to post comments