You are here: HomeArticlesGeneralDamtakin Na Hong Tung Umaw!

Damtakin Na Hong Tung Umaw!

Written by  VzSiam Published inGeneral Friday, 06 January 2017 00:44
Damtakin Na Hong Tung Umaw!

~ VzSiam

 

Na hong pai ding uh ei le a na kithalawplua hang a, na hong tun kaal bang uh ana ngaklahlua. Huchih laitak a hiai buaina in hon lap geet zaw ka lung naak noplouhlua in chin! Bangteng hileh lamzang kholkei le uchin le'ng damtak a na hong tun uleh kipahhuailua. Pai hun in na paithei zeel ding uam i chi a hive'n.

 

Na omlouh kaal ua innlamte bang ana chi ka hi uhiam ah ke'n leng ka theizoukei. Khat khit khat buaina in a hon pha a hon pha a, ngeina a hin chih taktak leng a om theikei. Tuma kum sawmnih sung i na ihmut nilouh ziak ua hiai bang teng tuak i hi uhia, ahihke'h i khophawk luat ziak ua tuak, ahihkaleh a hun in hon pha himhim hizaw hia, theih in a theihsiam huaikei. Hichi bang hun khawng chia zaw hamhaihlua ing a, bangziak ahia, bang chih a hoih ding ahia chih bang leng theizou mahmah tellou ing a. Ahi a, heutu khenkhat kizen mahmah, mi'n a hon hichih leh hichih ding, a hon khachih uleh khachih ding, chia panmun ding khosa diam a ana om pawl om ding in ka gingta tinten a, lungmuan khat in bel a muang veve hi. Ahihkaleh huchi leng om tuanlou a kei bang a hamhaih a daak heuhou ngen ihi uhiam lah theikhang.

 

Bangteng hileh a paisa tuh paisa ahi a, i na bawlpha in pawlphakei ta zong in,kikhel ahita hi. Himahleh nihvei-thumvei bawlkhelh zel tuh pawzou nawnlou ding ihi uh. Huai khawng ziak a damtak a na hong tun ua, hiai thu kahwng houlim tiptip ut ka hi. Nou khopi a laisim a omte'n awlmohna thak hon nei a, sepna muhna ding kia a laisim nawnlou a, laphuak siamte'n sawtpi a pan ana lunggulh leh vei uh, nam leh gam a ding a lai hon sim thaknawn a, hong hahkaat dia hon hasuan nuamlua ka hi.

 

Tuma kum sawmnih sung Lamka leh a sehveel ah innlam i kisiak mahmah ua, inn thupi taktak i tungkhia uhi. I louma uh hialhbawl a zohbawl hita ding i kisakleh, khaih, dai nangawn ana kaikha hetlou hilim lehang kilawm. Loulai a zawng luut loh didan theilou a en heuhou mah i bang uhi. Inn thupi taktak i lamte uh sung ah galmuangtak in Mas i zang keihial uh. A poimohlou zaw ana lamkhekha i hi ding ua aw chih in a om. Kum huaizah inn leh lou i lamna sum a mipil-misiam ana lam hile hang tua panmun khoh ding, agen ding, asa ding, a vaihawm ding, a nawk ding, a kuul bangbang kichingtak a nei ding hive hang! Mite'n ut-le-dah a hon bawl theilou mah ding uh hive'n! Inn hoih velvol sung a gallau kawmpi a sameh meh sang in aidaak buuk a galmuang tak a tangal meh meh a manphazaw hi.

 

Mipil khawng ut dandan a bawltheih leng ahi kholkei maithei. Mi zattheih ding seekkhiat thil baihlam ahi kholkei ding. Himahleh a lampi omlou leng ahi tuankei. Ngah leh khahsuah kaal a i dinna kum hiaitan hita a, tutan khutzep a a piang bangbang phun nulnul a pom sukzel a, ei lampang a kikhingpihte maituah ding a kisakkholhna himhim a omlouh tuh thil lamdang ahi. Huchidan ahihkelah thutuam.

 

Pilna leh siamna a manphatdan thei napi, delh ding a kihanthawnna i hichi chiilbawl uh tuh thil lamdang ahi. Cambridge, Oxford, MIT, Harvard chihte khawng a i kisawlkhiat kheukhou uh hun lawta hi. Inn thupi taktak lamzoute scholarship lou in leng i kisawlzou ding hi. Ei pawl a mitam a lah mi khingzou ngeilou dingte a mi om sunsun pil leh navaaktak a i om ua, khuak toh i pang a ak-ek chiim i batkei uleh pangzou ngeilou ding hi hang.

 

I siamsindan uleh skul kaidan uleng etthak hun mahmahta hi. A paidan (system) pen solkal bawl ahihman in i kheek theikei ding hi. Himahleh ei tualsung ah bawlphat theihna tampi om ding hi. Kholvel a siamsinna paidan hoihpen nei a kigen Finland-te khawng' paidan khawng sui a, ei tualsung a etton theih dandan a etton hileh manpha mahmah ding hi. Thil hoih a hihnaak leh thil thak pat bang leng hangsan deuh ding ahi. A hoih leh hoihlouh genlou a thil paidan i kipisak nolnol ding hilou a, en thil paidan i pii ding uh ahi.

 

Roll number one apan roll number one hundred tan first division a pass sak sawm paidan kheek hunta hi. First division a pass thei dingte distinction a pass sak, kimawl lunglutte, tumging lunglutte, leh lunglutna leh siamna tuamtuam neite khovel theih dia sawlkhiat, tua ding a pan i laak ua, i kitawsawn uh hunta hi. A dahhuai thil khat bel Lamka leh a sehvel a i skul hoihte uh mimal a hi a, amau a dia hoihpen tuh examna a mark sang pipi muhsak a, skul minhoih tan a, naupang a tamtheipen hiip ahi. Huai ziak in a laibu a om, mark sang taktak mu theihna dingte chihlouh thildang sinsak man phamanglou uh hileh kilawm hi. A diakkhol in ei pau mahmah leng i tawisan ua, laipau (literature) limsak ding leh awlmoh ding a naupangte i chiil ding uh ahi. Laipau a hausa tuh nam khang hi naaknaak hi.

 

'Jack and Jill went up the hill to fetch a pail of water,' chih khawng i kibyheart sak chiang ua Jack leh Jill-te' tangthu kihilh hilou hang a, lavui/poetry kihilh ihi chih tampi'n kihaih khanaak hi. A Jack leh Jill-te' tuuksuk lunglungdan khawng poimoh hizawlou a, a rhyme leh meter-te khawng poimoh hizaw chih kihilh khaak in om ngeilou hi. Huaiziak in sum hiai zah seng a kum hiai zah skul i kai nung un leng a phattuam ding bang in phatuam zoulou hi.

 

Mi chih in siamsinna i poimoh bang in nam in leng siamsinna i poimoh hi. I khodaak a, nam lohching leh khangtoute' paidan khawng sui a, huai khawng i etton a khantouh i kizil ding uh ahi. Hun teng a Israel-te mitsuan a, a tangthu peuh ua kikhamuan thei gigete i hi uhi. Ka demkei. Naakpi in a ettonhuai ngut uhi. Himahleh eite'n bel tanglai a Mosi-te, Joshua-te kia i en tageet a, amau hunlai a Pathian' gamtatdan leh tua a tatdan kibang nawnlou sim ahihman in etton theih taktaklou uh hileh kilawm hi. Etton sapsap di'n bel a makai uh Ben Gurion-te khawng ettonhuai ka sa hi. Bangmahlou apan Israel gam tunding pih in, a kiim leh kiang a nge hon in naungek piangtung nawmvalh ding bangmai a a um lutlut lai un leng a melmaate taikeeksakzou uhi. Pathian in leng hun deuh lai ahi kha ding. Ei leng ei pan theihna teng ah pang le hang a baan teng Pathian in moh a pona ke!

 


A gamthak neih uh gamdai gam ahi a, haichi chiin theihna ding tui kiningching omna mun neuchik ahi. Himahleh ka gam uh gamkeu, buh leh baal pianlouhna ahi, chia gamdangte' kiang a khutdoh mailou in a gamkeu uh tuh gamhing dipdip suah in neek ding kiningching nei hithet uhi. Ben Gurion in tunung chia a maban uh kingakna tuh simlam a Negev gamdai ahi chih a thei kilkel hi. A telsuimite (scientist) kiang ah tua gamdai tuh gampalak suah ding in thupia hi. A telsuimite'n thil hitheilou ahihdan ahilh uleh ama'n tua thil hitheilou chi telsuimite kheek in midang sep a, tu in gamdai lianpi gamhing dipdip suahta uhi. Amau a ding in tuh thil hitheilou himhim omlou hileh a kilawm hi. Galvan chi le hang lah gamdangte'n a galvan bawlte uh lei zungzung uh. A sepaih leh thuguk sai mite uleh khovel a mite' kihtak pente. Huchi bang a melmate'n a um uleh mite'n tua bang a khankhiatna ding in zang uhi. Isreal-te etton sawm a, amaute' tangthu apan i kikhamuan nop leh tuate khawng etton le hang itu-itate khamuang in a om ding uhi.

 

Hiai khawng ka ngaihtuah chia nou tuailai thahat laite hon hasuan nuamlua ing a, na hong pai theihlouh ding bang uh ana laulua ka ka. I nam leh gam maban nou khut a kinga hi in chin. Gingtalou in na ut dandan in om le uchin leng den chia nou liangkou a om ahihdan hon theikhe thouthou ding na hi uh. Kidangkoih sawm le uchin leng hiai mohpuakna in na omna ua pan hong zongkhe thouthou ding ahi. Ut in utkei le uchin nikhat hong mukhe thouthou ding ahi. Tu a huai ding a na kisakkholhkei uleh a hong muhkhiat hun chiang a kikhel ding ahi. Ke'n leng huai ahi ka hihkhelh. Nam leh gam thu khawng mi dang deuhte' sai ding himhim dan in ka na koih nilouh a, kei pen pangkha hetlou leh poimoh hetlou dan in ka na kikoih hi. Himahleh tu in bel kei ana pil hi leng ka nam in naakpi a phattuampih ding hitah chih ka hon theikhia a, lah ka na pil khakei hi.

 

Nam leh gam a dia banghiam phatuam thoh thei dinmun a ding napi a thoh ding neihlouh heelhuul tuh a lungkimhuai hetkei. Huai ziak denchia huai bang dinmun a na dinlouhna ding un sepna muhna ding kia a siam hon sinlou a, na gam leh nam uh tunding theihna ding khop a siamsinna hon hahbawl ding in ka hon hasuan hi. Tu leh tu a i taaksap uzaw thildang sang mah in leng scholar ahi. Huaiziak in Cambridge, Oxfort chihte khawng hon mitsuan un.

 

Nou ma a khangte'n hiai bang dinmun ah a hon koih ua, nou na tu leh tate uh bang dinmun a koih na sawm ua? Nou mohpuak hi a na theihlouh kaal ua thil teng a kikheel geet khaak ding lau ka hi. Huaiziak in hiai thu na lungsim uah vom gige unla, siamsinna ah hong hahkaat un aw.

 

Manipur lah buai deuhdeuh ve'n, ahun-aphat in leng na laisimnalam uh na zuan thei ding uam le theingam khang. I gam lungzinhuai tak a lam-etna leh kipahna ka muh bel hiai ahi, tu a i gengen kineeksiatna, dikloutak a vaihawmnate, sum leh pai etlahnate noute khang a i utleh phiatmang thei a, dik leh tang a vaihawmna, tagah-meithaite awlmohna, sum leh pai sang a gam leh nam itzawknate ngeina leh paidan a na hon neih hun ding uh ahi ka ngaklah.

 

Tutung thiltung vengvungte khawng bang na thangpaih uleh siamsin hong hahkaat unla, vaihawmna tutphah teng luahdim di'n hong kiik le uchin phuba laakna hoihpen himai ahi. Thuneihna deihziak a pate hilhial khawng that a a laltutphah uh luah ngamna khovel a ei nam neuchik khat leh nih hamphatna neuchik ziak a i na kizulhzausan khawng uh thil thupi ahi hetkei. Politics i chih khawng hiai mah ahi. Mahni a dia hamphatna ding kilaihkhiat theithei a pil leh hampha hi mai. A huchi siamloulou tuh nehden a om hi mai. Huaiziak in hiai thilte tengteng vom gige in na va painawn ding ua, noumau lampi chiat ah n'ong hahkaat unla, na pianna gam uh hon mangngilh hetkei un. Nam khetkhat bel mi kidaih uh ahihman in utut a ana om ding leng kidaih thei a, himahleh ei pawl bel a om sunsun kidangkoih thei omlou i hi. Hiai thute mangngilhlou in va kiiknawn unla, khuam muanhuai hi ding in n'ong kisin ding uh aw!

Read 336 times
Login to post comments