You are here: HomeArticlesGeneralLaibu Etkiikna: “Hoihnu – Zalmang Lianu” leh “Nang Kia Na Hi”

Laibu Etkiikna: “Hoihnu – Zalmang Lianu” leh “Nang Kia Na Hi”

Written by  Khwp Hs Published inGeneral Tuesday, 31 January 2017 01:13
Laibu Etkiikna: “Hoihnu – Zalmang Lianu” leh “Nang Kia Na Hi”

Enkiiktu: Khwp Hs

 

Love story chizen sam l’eng, romantic tangthu khawng asim gige hikei mahleng, ka simkhaak peuhpeuh bel nuam ka saklouh a om naikei. Tutung phalbi suty inn a ka pai hun in, eipau a love story abu a kisuah thak “Nang Kia Na Hi” chih, Valte Ginkhenpau in agelh ka sim kha a, nuam ka sa mahmah. Atangthu gelh a simnop ziak leh eipau a hichi bang tangthu bu hong omkhe thak ahih ziak in ‘etkiikna’ bawllou theilou hi a kikoih in kon kum nuam tei aka.

 

Alaibu kipatna i phen patleh, agelhtu’n ama a laibu asuah, “Hoihnu – Zalmang Lianu,” asutzopna ahihdan ka mukhia a, hileleng huai pen sim masa tuanlou in hiai pen mah ah ka pattouh leh, nuam veve. Ahitak in, atangthu bullam kitheilou inchin, i suangtuahna toh hiai a bu nihna kisim toutou kha anopna riau khat om daih ka sa. Hiai laibu pen ka sim zoh in, amasapen ka leh patthak daih. Nuam thouthou!

 

Laibu Khatna: HOIHNU – ZALMANG LIANU

“U Pau’” lungdeihnu “Hoihnu” in Ward’s Lake (Shillong) ah khenlouh simthu tong na chiam pih mawk veh aw. Himahleh, khang theibang ahong loh leh a zalmang lel ana hi nemnum maimah! Hiai ziak hi’nteh a tangthu’ min zong tua ahih: “Hoihnu” pen “U Pau” adia a ‘dream girl’ chihna hilou, amang kia a amuh (atak a om hilou) chih leng hisam lou, a it leh a ngaih mahmah, itna simthu a leelna tongdam pha ngak a a omlai a hiai bang zalmang hon man hiveh aw.

 

Tangval fel “U Pau” leh melhoih mahmah “Hoihnu” ki-itna tangthu, first person zang in agelhtu’n a tangthu gelh paisuak a, a sim nuam tuan sak mahmah hi. Hiai “U Pau” leh “Hoihnu” ki-itna pen, tuun-leh-zua hal le hi samlou, lawm-leh-vual hal le hi samlou (a mual-leh-tang hal, chih di ahi di) in, love story pangaitak achih theih mai di. Ahi a, akaal simthu uh bel zang tak a pai zomzom thei bel hisam lou – network ginaatlouh ziak bang, text message/call kithuktuah khaak pahpah louh ziak khawng, leh kholai thuleng ziak khawng in akaal uh buai dek naak khem hi. A mode of communication uh dungzui in a tangthu hi 2006 nung lam hi peuhmah leh kilawm (ataktak gam a et in). Aziak, mobile phone zang unchin, whatsapp zanglou ua lah SMS zang ua, hilele Facebook azat lamtak uh chu kimuthei leuleu. Innsung kichuuptak a khangkhe tuak hiai “U Pau” leh “Hoihnu” kha a first love tuak uh hidan eive ua. “U Pau” pen Lamka-Imphal kawmtuah a om, “Hoihnu” bel Barapani’ chiau gaal ah. Atangthu tawpna ah alungtup uh tangtun in kumsawt khenlouh simthu leel khawm thei ua, nui heuhau kawm a a laibu koihkhiak theih in om hi.

 

Imphal a college kai a om “U Pau” kha ‘eimi tangval fel mahmah khat’ chi a minthang hi inchin, gam buai mahmah Manipur a vanleeng phualpi (Tulihal Airport) a hong boh, strike leh bandh ziak a lamsam a omte Lamka paina di gari ngaihtuahsak zelzel. Ni khat, Shillong apan a Lamka hong zin innkuan khat, Lamka-Imphal strike ziak a hiai vanleeng phualpi a taang kha dia om uh kha, a nu un “U Pau” call bawl a, gari ngaihtuahsak dia ngen. “U Pau” in le phone tungtawn a gari hire di khat houpih a, saifel sak ta. Huai innkuante Imphal hong tun ua buai sim thak un, “U Pau” kiang a dawn dia thukhaak uh. Huai hun tak dan eive “U Pau” in “Hoihnu” amuh masakna pen – atangthu ah ‘a lungsim leh ngaihtuahna tengteng luahdim ngal’ chitel veh. “Hoihnu” chu “U Pau” adia ‘Muhchiil vangngaih’ ahi tlat!

 

Kha khat khawng Lamka a ataam sung un, “U Pau” in “Hoihnu” muhtheih na di lamchiteng zong kual himai! Lohching. Kimu uh. Simthu leellou, thaikawi tongluan a Shillong a kha khia. Imphal a a college kaina a, Milong numei khat, “Angela” kichi kha “U Pau” toh gen baang dia hong om kha sim. “U Pau” in bel, a itna an ape utlou hithet: “Hoihnu” mah chi tinten. Barapani chiau gaal kaan theihna di hunlem zong nawn vutvut maita. Anau toh anite’ veh kawm dia phalbi suty zang dia Shillong pheiphung va suan ngei hi. Ni nih khawng kithuah man in, pai hun man zel. Itna simthu tong in leelleel saam mah leh, “Hoihnu” apan dawnna kichian mulou a, vangkhua chiahkiik hun tung. “Hoihnu” in leng “U Pau” pyar thou mah leh, a “U Pau” tongleel sang dia kimanlou ahihdan hilh. “U Pau” zong lungnuamlou pi a khaubang chiahkiik. Hichia laibu masapen, “Hoihnu – Zalmang Lianu,” khit a om.

 

Laibu Nihna: NANG KIA NA HI

“Hoihnu” in “U Pau’” tong a saan theihlouhna ziak kha, ani’ ta pilot khat adia tun-le-zua’ lemruat ana himawk dan. Hitamahleh, “Hoihnu” in lah “U Pau” lungguuktak a na veikhin. “U Pau” le huchi bok. Khat vei tuh Lamka a “Hoihnu-te’” sungkuan hong zin ua, “U Pau” in le a tun-le-zua sumbang bia top mai. “IAS ka gelhching dia, Hoihnu kei ading ahi,” chi mai ek saam. Huchia, tun-le-zua in zong a kaal uh hal teitei nawnta lou. Hunte paizel, itna kum le liamtou zel. “Maman” kichi, “Hoihnu’” cousin, hong kilang. “U Pau” toh MU a Master zilkhawm ua, kithuah hoih khasim uh – facebook khawng a lim tampi ana kaapkhe kha zengzung hihtuak. “Hoihnu” adia puak siam vual ding na hilou. A kaal uh chu lungkhamna tam himai. “Hoihnu” bang mahni kithat hi khawng a thu hong thang thepthup – “U Pau” in khakham na veiloh man hial. Kum chu kiveitak ahidi, “Angela Kamei” in le pasal ana neita. U Pau kipahna mah. Khatvei lah kaal khat di vel, a innkuan ua “U Pau-te” Hanship a tousa gou dia kuan uh. Network omlou nilouh, tong kisang theilou a om nilouh uh. “U Pau” adia sun sawt kiveina na hizel.

 

Khatveina a Civil Service hong chinglou tuh, “U Pau” hong diiphawm sim. Ahi a, asungkuante’ huaihotna a thathak hong la. Anihveina a bel, Prelims hong ching. Huai kawmkaal a Hoihnu naakpitak a hong china in, “U Pau” kankan hihtuak. “U Pau” lah Mains exam di ziak a “Hoihnu’” bul a le tu manlou. Hun hong kivei zek in, lohchinna kipahhuai tak toh makhua hong vaakta. Kumsawt khenlouh, heikhawm denden dia tongchiam simthu hong leel uhi. ‘Zatam lai ah nang kia na hi’ na chi paisuak takpi mah uhi. “U Pau.” “Hoihnu.” “Nang Kia Na Hi.”

 

“Hoihnu – Zalmang Lianu” ah athupatna dan a agelh nalh ka sa law mahmah thamlouh gelhfuh ka sa lua a, thuvual tamlou kon eukhiak ana sim him mah dih:

 

“Itna kichi kipianpih ahi diam ka chi hial hi. I neu apan i kithuahpihte toh itna khau kilenkhawm kha chitchiat khollou hivaw. Gintak luatte leh mite’n hon demdemte uh toh bang leng kingaih khak louh khawng a omzaw hileh kilawm. Huaichiang a, kuahiamte bang a omdante ua kipan hon ngailaw ding i sakte bang in leng peuh hon na ngai hi khollou uh hileh kilawm. Akhenchiang alah i gintat louh pentak bang in hon ngai ana hi thethup zel chihkhawng om mawkmawk zel. Huihah! Theih hak ka samai...”

 

THUKUP TAMLOU:

A tangthu kha serious tak a paisuak thahah lou. Nuihna di le hun khop tak om. I nehnou ut lele hon nehnou sak di le thu tampi om veve. A tangthu kha tangthu pangaitak ahi a, a selam a hong pi theidi omdan hiam, kammal hiam om in ka theikei – aneu-alian in simkop theih ding hi. A tangthu le tulai (modern love story) mahmah hi.

 

Nungak-tangval kingaite kikaal a kitheihsiamlouhna omthei naak sekte bang ziak hi a, bang chi kitheihsiam (sak) theih ding hiam, chih khawng hiai tangthu na sim leh hon navaak sak tuan di’n ka um.

 

Apoimoh mahmah i it a i ngaih (i love story, chi ni) om peuhpeuh nu-le-pa theihsak ahoihdan leh amau apan a thumop don pen thil paidingdan hihim ahi chih “U Pau” leh “Hoihnu” ki-itna tangthu apan na zilkhiak ding khat ahi.

 

A tangthu sung ah “U Pau’” sanggam neihsun, anaunu, “Chiching” kha lungsim siangthoutak toh hong paukhe kaukau zel inchin, atangthu sunuam tuan mahmah ka sa.

 

Message a chat dialogue-te kha nuam thei law latlat uh aka; agelhtu’ zeina lamtak ahi ka chi.

 

A laibu sung ah printing mistake chih ding ka mu himhim kei a, a standard mahmah ka sa. Printing layout kha ahoih a, asim thanop huai mahmah.

 

PLS laigelhzia thukhun toh kizui a agelhtu’n a tangthu gelh in, simnuam tuan mahmah; kammal gawmkhawmdan ah kiva mahmah in, thumalte sim ziahziah theih in om.

 

Abangbang hileh, hoih bukim chih omtheilou ahihchiah, a tangthu anuamzaw dia gelhtheih ding ahi chih ziak in 5 lak a 4 star rating ka pia.

 

Agelhtu tangthu gelh dang tampi le vannuaizom (internet) ah tampi mahmah muh theih ding ahi: Simthu Leelpi (fb group and page), thaikawitongluan.com, chihte na enkhe tei lechin ka chi.

 


 

Read 684 times Last modified on Tuesday, 31 January 2017 01:36
Login to post comments