You are here: HomeArticlesGeneralIntending Candidate Hile'ng...

Intending Candidate Hile'ng...

Written by  ZM Tonsing Published inGeneral Sunday, 19 February 2017 21:10
Intending Candidate Hile'ng...

~ZM Tonsing

 

Khatvei facebook ah mikhat in "Heutu piangthak diktak gam-le-nam itlou omlou hi" chi'n a status ah hon taklang lehlah hi. Tua status pen ka 'like' zoh in nungak-tangval thu hia, ahihke'h insung leh khotang banah heutu-te' tung a lungkim manglou, tua a lungkim louhna teng uh 'social media' kiangtun mi bangzah omlai hiam chi'n ka mouse ka tawlsuk hi. Bangtan hiam ka tawlzoh in, den a status pen va comment beeklouh lungkim thei mahmahlou ka hi pen mai di e - mouse lehtawl kiikthak in "Chihleh heutu piangthak neitellou dan i set ve ua le maw!?" ka va chi guigui hi.

 

Sawtlou nung in "Kua e hon gen dih le ka theinuan" ahon chi a, ka nuih a za sim lehlam zozen hi. "Na chihdan tak a heutu piangthak diktak nei hile i gam a hichi siat laitel lawmlawm dia hia? Chihbel, min gam a it chiang ua maw a gam uh puah ua, kem un chin, zuun uh eive. Eilawi bang i chi ua leh? Zuunlouh Zogam chih laa kia sa khop hilou ihi umaw? Huanah, Solkar a kipan thil hongpai peuhmah ahi bangbang a zat leh, a mu dite kiang a piak a om kei" ka chi gega a.

 

Aman bel, solkar in gam khantouhna dia hon piak - development fund/scheme i chihzen samte ahi bangbang a zat, nekmang leh heilamdang a omlou a, a mu dia kilawmte kia mah in mu ngitnget dan a ana koihkha hihtuak! Amah bangbang ngen hile hang bel gam-le-nam it a, gam puah lunggulh a, tua dia hong kisa heutu kipoimoh nawnlou diing hi. I gam kem a, zuun a, puah a - nekgukna chihte omlou hileh Paris khopi a teng mah kibang zieng talou di?! Ahon nget dungzui in i gam a government scheme tuamtuam tampitak lak a tamlou chik petmah, khatehnen hong kaikhe kha zenzen te ka gen zoh in, heutu dia kua hoih ding hiam chih hon dong mahleh heutu dia hoih ka sak gen dia va comment ka hihlouh ziak in ka dinkhawl leulou uhi.

 

Hichitel ihi uh! Mu gegu a mulou lem kineih; thei gegu a atheilou dan a om! Gam it ka hi chichi alah gamsung a kineksiatna, golhgukna leh dikloutak a vaihawmna na gum teitei. A diklel gen a zaw gam it taktak om khang, kuate hiam maivil leh mahni gilpi khualziak lel a it ihi uh. Business bawl hilim ve hang. Tu'n le 3bills tungtang buaipih in i buai kheukou ua, hinna manphatak 9 hial i taankia uh hilou in mi 80 val mawngmawng damsung poihlong di'n i koih uh. Ahi, ei koih ahi! I tuhgah at i lel ve ua le! Huaiziak in, amaute zahna sangtak i piak kawmkawm in ahon ngaihdamna uh i ngen!

 

Gamzuak chi'n heutute' kitawp di'n i phu lalaih ua lah i lohching si kei uh, a zuak masa eimah ihih ziak un. Amau huai theilua ua kisiam tanlouhna himhim neilou a d'uam maw, daih a! E'n zuak masa, amau hon lei un chin zuaksawn nawn uh. Hiai eivoi business i chihchih kha. Mi kimawlna lel e'n sih ngam a it hitel hang a! Itlouh theih himaileh maw?

 

Houh, gam it theilua hang a itsual gawp i maimah uhia? Hakai pahtak alungvei. Hiai a dan om hilai, a tawpchia gam it hilou in it di gam nasan le i neih nawnlouh khak d'uh a lauhuai. Gam a om nakleh a it di bel bei ngeilou di, tam deuhdeuh di a diak a election kuan chia. Tu'n le a chiang voi, maban a i maituah pah di election di ziak in kilkawm teng ah gam it i phulkhe souhsouh ta ve ua le. Hiai zahzah gam it om di'n le ka na gingta sam a! Om le om keimah, election kuan ahihziak a hong om maimai hi'n te, pouh in. Ahon zuak i chihte'n le nak it lolai uh a'hbang! Ahi a, election i hon zou dia, chiltui kai zungzung zen a gam-le-nam it bangzah hiamte' gam itna ahong bei dia, kum 5 zohchia ahon it thak nawnzel di ua! Eilawi gam itna maw MP/MLA/MDC tan kia eive, leuhlouh maizen. Long term policy i chihdeuh zaihzaih te utuh long term petmah, mang a mat bat le hikei. Ngaihtuah tamlouh a thra!

 

Huaiziak a, Sixth Schedule i chi hia, State within a State i chi zaw hia, Separate State i chi zaw hia, theizou khang, ahi hi hita ve - khawng i chichi khempeuh na ua zaw muh taktak khak di le lau lo-tel di i ve ua! Gawl bohtan mah bang maimah di ihih chia! MP/MLA/MDC utte a dia lah vote zonna dia hoih mahmah; gam-le-nam it pawlpi te a dia sum nak! Papi khenkhat a dia lah hotel houlimna tangzang.

 

Hilele tua i candidate neih lellel te uh zaw gam it taktak ngen hi di eive ua, gingta vek ka hi! Huaiziak a, ke'n tuh a vek ua deih, a manifesto te bang utuh nak hoih theihlua banah amau le a sepsuah louh d'uh himhim omlou pi! Nehsoh theilel unte! Deihthusam bang gen zualle - thuneihna nei bang hi peuhmah le'ng support tuam neilou a a vek ua chingsak sipsip di keitel voi, ke'n tuh maw. Huaichia constituency jurisdiction, portfolio, fund chihte a kikim a kihawm sak di chih khawng ngaihdan nei ing a. Hilele hiai ka deihthusam zat theihlouh ahihna ah, a ching penpen in mahni gilpi, tanau-laina leh beh politics kia sailou in, i gam mipi'n a kilual a i hamphatpih theih dite mah uh hon sai mahmah ta le uh maw. Nget in nget thoh maini. Kamsiam louh toh! Plizzz!

 

Huanah, telching a omlou te'n le gam-le-nam itna dia kum 5 sese ngak kenkon nawn mailou a, tua i it bangbang in it tawntung le i gam hong khangtou dia, maban a MLA ut teitei ihih leleng panlak nuam deuh diing chih k'on thuchah ahi. Hun paisa a gam a dia thilhoih leh phatuam di sepkhiat nei manglou, election kuan chiangkia a gam it a, mipite hamphatpih theih diing thil tuamtuam banah dikna leh tanvou-te tangkoupih zual kia pen mipite a dia kinepna taaklou deuh hikha ding hi.

 

Ahi a, heutu ana hi leh hilou te'n gam-le-nam a a dia i septheih dan a kibangkei chihpen nial vuallouh thudik theihsa ahi. Huaiziak tak a a tamzaw-te' ngaihdan a bel heutu hi masa diing, huai apat nasa deuh a nnasep hehu maimah di chih dan hitangpi hi. Huaiziak le himah inte, ke'n leng tutung kiteelpi na ah heutu dinmun letsawm a, 'intending candidate' bang hi zenzen le'ng telching a ka om leh maban a sep-le-bawl di (manifesto) bang a guktak in ka na neitei a....

 

Mipite' deihsakna tang a, heutu dinmun bang lenthei dia ka om in tuh tua i movement tungtang uh nasa tak in pan ka lapah hehu di. Huanah, i martyrs te un a dik a vaihawmna a ngah ua, ahinna uh leh sisan uh mawk a aluanlouhna di'n pan ka la ngeingei di chih capital letter with bold letter in amasapen leh a first in lian deuh biahbuah leh chiang deuh sihsiah di'n ka gelh di. Hiai movement leh martyr-te' tungtang gentel khate'n mipi' bil deng puaksek deuh abang! Support a ngah uh. Support!

 

Election ah bel kuapeuh mimal hi'n pawlpi hitaleh support kinei chiat hi. Himahleh, mimal right nelhsiah zen a pawlpi ahong kigolhluat chiang in mipite dikna leh tanvou bangmahlou suah a, tua in ahoihlam sang in a hoihlou lam tun zaw hi. Theihsa. Theihluatsa!

 

"Free and Fair Election" chih bang gen deuhzut lah pawl om thei liaisiah in support neichiat, a pawl support kia hilou midang va convince sawmlai! Pawl khat in mikhat a support hang a huai pawlpi sung ah 'solid vote' a support nu/pa un a mu diam? Gintak huai chiahlou maw le! Huchi ahihleh i support in bang om zia a nei dia le? Ei-le-le kisuneu maimai ihi zaw kha diam? Hoih deih selua bangmahlou suak chih bangle thil om thei khat hi'n maw. Pilvan tuakthou eingal, heutute!

 

Bang hiam khat ziak a mikhat support ihi a, pawl khat in a support nana-na chu mimal hamphatna di ahikei chihleng theihsa ahi, ahi a, huai i support nu/pa bang hongching kei ta mawk zenzen leh i support nasan (a cause) i dinpih ngamlai diam? Ahihke'h ei-le-ei kituisa buah?? Chingzou tuanlou chi a ei-le-ei kisu thadah maimai i suahkhak di bang lauhuai sim in. Huanah, i support louh pa' maban nnasep di su thadah maimai bangle hihkhak theih hilai in maw. I support pen a ching teitei di chihna thu om tuan khollou ahih mawk chia.

 

Huaiziak in, pawlpi'n tuh deih i neih lehleng deihthoh lel in ah a kilangtang tak in support va puang demdom hialkei theile chidam huaipen diing hi. I support pen ching lele i deihdan tak in lah i talkalh thei tuan kholkei dia! Mipite a dikna uleh tanvou uh zangsak a, siangthou tak a election neisak ding, huai a a ching penpen pawlpi te'n kithuahpih a, akul leh poimoh bangbang in taw sawn le akua-akua kipak ding a, huai hunchiang in khantouhna taktak hong om pan ding hi.

 

Bangteng hileh mipite hai nawnlou chi phanphan hive hang, hai nawnlou taktak ihih leh hihlouh tu election ah hong kithei mai inte. Hilele, hilele! Mipite pilta hilele pawlpi tuamtuamte pilkhe thei nai mahmah lou ihi d'ua aw chih khawng ngaihtuahna ah honglut tualtual thouthou veh. Sehsuh. Pawlpi'n mimal khat vawkching sawm sang a mipi' deihchu pawlpi deih ahi i chihtheih poimawh petmah hita lou hiam?? Zalentak in vote khia in ah, hihsual khak lele a hihsual tengmah thuak nainai le. Tutung beek ah heutu piangthak diktak, gam-le-nam it neikha mawk guih zenzen le naknop na'n chia!!

 

19/02/17

 

Read 370 times
Login to post comments