You are here: HomeArticlesGeneralNa Omdan Uh Khrist Tanchin Hoih Toh Kituak Sak Un

Na Omdan Uh Khrist Tanchin Hoih Toh Kituak Sak Un

Written by  Pastor Rawna Kopsiam Published inGeneral Wednesday, 01 March 2017 00:57
Na Omdan Uh Khrist Tanchin Hoih Toh Kituak Sak Un

Pastor Rawna Kopsiam

 

I gam ua Gospel khua vak hong lut nung kum 100 a valta achi uh. Himahleh i omdan uh Khrist tanchin hoih toh kituak thei mahmah lou, bangziak a hi di ? Tangthupha i gam ua honglut tunglai in Pi leh Puten Ginna toh na kibulphuh uhi. Tulai Khristiante ahihleh Ginna toh hilou in Sakhua toh i kibul phuh uhi. Chih bel a piangkhia masa sa Khristian Sakhua a om himai. Ginna pen kigen kha nawn talou. Pathian thu pen Sakhua a neih mai ding hilou in Ginna toh san ding ahi. Abraham in Pathian a gingta a huai a ginna tuh a Diktatna in a sim sak hi. ( Gal.3:6; Jacob 2: 23 )

 

Sakhua hilou in Ginna toh kibul phuh leng diktatna in honzui mai ding dan ahi. I Khristian na uh Ginna toh kipan kha nawn talou. Khristian Sakhua a i om nung milim biate sakhua a om lah hilou hanga bang a ginna va chihchih kul nawn tuan hia chi hileng kilawm. Kuapeuh Pathian tapa gingta in tangtawn hinna a nei. Pathian in khovel a it mahmah a huchin a tapa tang neihsun a pia hi. Kuapeuh a mah gingta tuh a man that louh a tangtawn hinna a neih na ding in. Hiai Ginna toh i kibul phuh louh ziak ua i gam ua diktatna himhim om nawn lou ahi.

 

Midiktat thumna in thil thupitak ahih sek hi. Elija leng eite mah bang a pianken nei mihing khat ahi. Vuah zuk louhna ding in a thum a kum thum leh akim vuah a zukei mai mah hi. Ei khang ah leng misiangthou ginna tak toh a thum mite thumna ziakin thil lamdang pipi piang khia sek hi. Ei thumna in bang mah thil thupi tak ahih gen ding om ngei mahmah lou. I diktat zoh louh deuh ziak mah uh ahi diam ? Khelhna lam a sikhin a diktatna lam a i hin theihna ding in Khrist in lah a thuak khinta ngala. Diktatna in nam a tawisang chichi hang a lah eilawi tawisanga om malak a niam kiak deuhdeuh bang hi ve hang aw maw. A ban i sim zel leh khelhna zahlakna ahi chi zaw mah. I minam pumpi ua zahlak gawpta leng hilou i hi uh maw. Kuapeuh diktatna hihlou tuh Pathian a suak ahi kei. Mi Khrist a a om leh thilsiam thak a hong hi, thilluite a mang a ngai un a hong thakta chi chu hi hia mawle. I Hinkhua uah kikhek a om ngai hiveh aw.

 

Unaute Diktatna hi ngaihnep theih vual hi kei veh aw. Jesun na diktatna un Pharisaite leh Laigelhmite diktatna a khup ken zaw van gam ah na lut kei hial ding uh chi hi. Lut e zenzen na chi sim hia ? Kel leh Belam khentu ding Jesu mah ahi kha. Ei ut dandan a van gam lut sawm mawk chu baih lam kei leh kilawm maw. Pharisaite leh Laigelhmite maw mi dangte toh kiteh den uh. A mau hoih kisa un midangte bang mah a mulou. Kal khat a nihvei ann ngawl. Sawtpipi thumna nei sek uh mi khemna in. A gen siam mahmah uh lah zuituan dek lou uh. Puakgik mi suan uh a mau lah pua ut dek lou zel. Rabbi chi a sap bang ut sese uh. Van gam lampi daltu a om nilouh uh a mau lah lut sawm mahmah lou. Sawm a khat pia uh ahihang a diktatna, hehpihna leh ginawmna chihte himhim limsak lou uh. Sunglam hilou in polam kilatdan pen ngai khawk zaw uh. Hiaite lawi sang a i diktatna uh a hoih zawk ding a hih chu, Van gam lut i ut leh.

 

I salam damtheihna uh a hoihlouh ziaka mi nek leh dawn bang leng hih thei lou a kidek kenkan hi hanga maw. Min singpi khum hon pia le uh leng ken singpi khum dawn thei lou chi a dawn ut lou bilbel. Sameh limchi tak ahihkeileh malta meh hon nek pih ut leh uh leng ken ne thei lou chi geih mai. Chi al na tawm ne lou a kidek thei mahmah hi hang a maw. A hihleh i khalam dam theihna ding in Khrist tanchin hoih toh kituak loute bang zah nawl khin i nei ngam ua le. Khristian ka hi a hiaite zaw Khristiante omdan ding toh kituak lou ahi chi a bang dia nawl khin mai lou i hi ua le. Salam toh kisai a i kidek kenkan na in kum bangzah i damkum hon sau sak zou dia le? Salam i ngaih poimawh sang mah a thupi zaw in Khalam hinkhua ding ngai poimawh leng a kum a gen hilou tangtawn a bei ngei nawn lou ding hinkhua hilou maw. Salam a sawtpi tak dam ut in khalam ah bel sih pah poisa lou hi ve hang aw maw. Huchi ahih in bang chin i omdan uh Khrist tanchin toh a kituak ngei mah dia.

 

Naupang khat a pa’n world map kibotsia pia in lem thak nawn ding in sawl hi. Vang phat huaitak in world map nunglam ah Jesu lim lian pi a kigelh a na om a, tua map lam pang en lou in Jesu lim en kawm in hiai Jesu lim lemdik leng map pen hon kilem dik mai ding ahi chih gingta in a leplep leh world map hong kilem dik chet mai hi. Tua bang in nang leng na omdan Khrist tanchin hoih toh kituak ding in lem lechin na lep dik nak leh diktatna a kilamthak chihchih ngai nawn tuan lou in diktatna lampi zui na hi der mai ding.

 

Ginna toh kibulphuh phot peuhmah lehang huai i ginna uh Pathian in i diktatna un hon simsak kha mawh lou ding hi. Ginna ah na om uh hia omlou nou mau ki-en chian un. Ginna toh kibul phuh phot lehang diktatna a kilam thak pen haksa nawn lou ding a, tua diktatna a i kilamthak khit chiang un i omdan uh leh Khrist tanchin hoih hong kituakta ding hi. Amen

____________________

Read 263 times
Login to post comments