You are here: HomeArticlesGeneralNa Deihtelna (Vote) Zang In Na Deihlouh Pai In

Na Deihtelna (Vote) Zang In Na Deihlouh Pai In

Written by  T. Gouminlal Published inGeneral Friday, 03 March 2017 00:48
Na Deihtelna (Vote) Zang In Na Deihlouh Pai In

By T. Gouminlal

 

Election are won by men and women chiefly because most people vote against somebody rather than for somebody
By Franklin P. Adam

 

Deihtelna na tungtawn a nang a ding leh na mi na sa a ding gensak tu palai vaihawmna innpi a sawl thei ding a hamphatna I neih pen thupi in hoih mahmah hi. Hiai hamphat na pen a mok a I muh a hi kei a mi a sang sim ten hinna leh sisan suah in na lei uhi. Hiai mah ei lak hon tun theih na ding a sa leh gal tam tak na kisat khin in, ei phok phak ma in hiai bang hamphat na I na tang uhi.

 

Nidang in bel, tung a vaihawm te pen mipi deih leh mipiten a muan te uh hilou in utlou sa sa leh haksa sa tak in vaihawmtute ana thuak kinken uhi. Greek ten huai haksat na thei tinten in mipi vaihawm na, mipi deihtel na in na pai ua, huai zoh in French gam in huai mipi deihtelna tungtawn a suaktatak leh zalen tak a ki vaihawmna na sual un na ngah uhi. Huai mah America gam ten hon pai pih zalenna leh thudik a vaihawm na toh zalenna na puang uhi. Hiai mipi deihtel na a ki vaihawm na in zalenna leh thudik a vai hawm na (Rule of Law) hon tun a huai in nasatak in leitung sim lei vai leh sum leh pai ah khan touh na a tun cih I haih kei hial uhi.

 

Hiai bang hamphatna I neih pen I zat dik leh I mi nam a ding a suahtak na leh khantouh na leh bit na hon tun ding a,mi nam khangtou, zalen nam I hon hi thei pah ding uhi. Himah hiai deihtelna zalenna I zat khial, I deihtel na pen I zallenna pen I zat khelh leh sal tang den ding mi nam ihi ding uhi.

 

Hun paisa ah mipi ten hiai deihtelna zang in I sik ua pallai Manipur vaihawmna inpi at tamveipi I na saw ta uhi. Kum 1952, Manipur UT a awm lai a pan in singtang miten Manipur inn pi ah pallai in sawl uhi. Huai hun lai Nambing a pallai kisawl hi, Paite ten PNC candidate khat I sawl, Kuki National Assembly cih bang, Naga National League cih te bang min zang in Manipur singtang miten mah ni nambing a party min phuak in pallai na kisawl hi. Tunitan in party tuamtuam te zang in tatsat lou in pallai I na sawlta uhi. Ahih hang in I singtang gam ah nelhsiah na nasa dedeuh, zanggam miten singtang mite leh singtang ah simmohna uang semsem in alang hi. Hiai pen a lang chiang mahmah thu ahia, I khang thu tomchik enkik leng, I thei siam ding uhi.

 

Huai ziak in tua I gen ut pen ahih leh, hiai deih telna zat dik a poimoh dan thei siam thak leng cih ut huai I sa mahmah hi. I na tuahsa te ua pan I ngaihtuah na hon pia bel, mipi ten I tel louh ding uh na kitel kha nak hi. Bang ziak a hiai deihtel na zang khial kha nak a, I mi I nam, I gam humbit tu ding leh mipi te a ding tangkou tu ding a I tel ten hon zuau san maimah hiam cih I et kik chiang in mipi ten bang chi bang a deihtel na exercise ding ka hia, bang chi bang in ka mitel ding ka thei dia cih I theih chiang louh man uh hi ding ing ka gingta hi. Bang chi bang in I deihtel na pen zang dik thei ding I hiam chih tawm chik in kikum suk leng chih lungulh huai kasa hi.

 

Vote Aman phat dan:

America President minthang penpen leh vaihawm na diktak dinsuah tu, Abraham Lincoln in hichin na gen hi, “deihtelna (Ballot) pen thautang sang in hatzaw hi” chin na gen. American President minthang mahmah Thoedore Roosevelt in, “ I deihtel (Vote) pen MEITHAL toh kibang hi, a zang tute khut a ki nga ahi.” Chin na gen hi. Hiai a president tegel in ana gen uh dik mahmah hi. Democracy gam ah mipi deihtel na pen mipi te a ding a I gal van muan huai pen uh ahi. I melma bel I tel thei kei a, hi mah leh I melma I deih kei leh I dou ding dan, a dou tu ding leh koih khiat dingdan pen mipite deih tel na ah ki nga hi.

 

Hiai a tung I thuvual I laksawn ten hon muhsak thil nih a awm hi.

(a). Na vote pen nang a ding thau (Gun/bullet) ahi. Huai awmzia bel,nang a ding na kihumbit na ding galvan piak a awm ahi. Na hinna ding in na zang thei a, nang leh nang ki kaplupna ding in na zang thei hi.
(b). Abraham Lincoln in a gen na ah thautang sang in thil hih thei zaw hi. Thupil dang khat ah laikung pen, temsau sang in thilhih thei zo kichi hi, ahih hang tu in bel, ballot pen thautang sang in thilhih thei zo hi. Hiai in a gen ahih leh, na ballot paper na zat dik leh, thau tawi te na lauh ngai nawnlou ding, thautawi teng mipite ong lauta ding hi cih hon theisak hi. Bang ziaka thautawi te lau den I hi uh hiam I cih chih leh, mipiten I khut a I thautawi uh a muahhuai leh a thil hih theih na theilou a, thautawilou ikisak ziak a meithal tawi te lau gige ihi lim uhi.

 

Hiai awm zia bel, na vote tungtawn in midik leh vaihawm siam na tel thei a, huai na tel dik ngeingei leh huai in nang suahtak na thauvui thautang in a hon piak theihlouh hon pe thei ahi cihna ahi. Huai ziakin mipi leh mimal I theih ding bel, MLA hiam, government hiam hoihlou, negu, mipi te nelhsiah I cih cih te pen, mipiten nelhsiah ding te I nelh siah khak louhziak uh nahi den hi.

 

Huai ziak, hiai vote pen a mai mai, na khut pi muk a seal tui kitat maimain hilou in na hinna ding leh na suahtak na ding thilhihtheih na, magic power ahi chih theih chiat le hang, kua ahia, a melma pa kiang a athau a thawn a pe ding?

 

I vote pen I khut a thau om toh ki bang, thau tang sang a hat zaw I vote ahi. Hiai thei hi le hang, lampi zui, nisa vuah zu nuai, lamka leh Delhi khotual gim thuak I kah nate uh I khut tal mong a kok mang thei ding thuneih na a nei te I hi uhi. Hiai thilhih theihna hat tak I khut muk a awm pen a zat ding dan I theih louh chiang in a zang tu mipi te a ding a gim thuakna tuntu hon hi zel hi.

 

Hiai a na thil hih theih na pen hun teng in nang na zang thei gige kei hi. Kum 5 hal in khat vei chauh na thau tawi na kap thei hi. Huai awm dan bel tulel a I din mun uh et in, melma toh kimai tuah in na ding a, na thau tawi tang khat chauh awm hi. Na kap khelh a, na melma pa na kap puk kei leh, kin a kin nang hon pummat hon sual thei pah ding in na melma pa na mai a ding bang mai ahi. Phai zang mite ki gal ging sa dimdiam in singtang mite neih leh lam gou, pupa a iluah sa gam uh hon laksak ut a ki sa sa uh ahi. ML&R Act hon pan ua, deih bang in a loching kei ua, 3Bills chia I theih uh in a hon kap ek nawn ua, mipin, khu zen in I nang ua, luang 9 kikham zen in I nang uhi. Tu in ah huai sang a lauhuai zo, Singtang mi hih theih na ding ngetna na bawl uhi. Zanggam miten a gam uh kochik dan a thei ua, singtang mite gam lak sak theih na ding, India constitution nuai safeguard provision I neihte uh lakmang sawm in pan mun khoh theih na lam teng khoh in a hon bei uhi.

 

ST status bang hon mu zenzen le uh pen, tua Bill 3 I sualsual ten awm zia a nei nawn kei dia, singtang mite hamphat na teng amau tang vek in na gam na leitang amau’ a mah hon suak vek ding hi. Huchi bang melma huham dou ding a kisa I hi cih theih ahoih ding hi. Huchi bang melma huham in hon pumvalh ding in na mai ah ding hi. Na thau tawi a na kap khelh ngei ngei leh melma pa khut a lut ding na hi cih na tuk ahi. Huai ziak in I khut I thilhih theih na khat vei chauh na zat theih ding ah pilvang mahmah a ngai hi.

 

Bangchin ka Mi vote ding ka thei dia?

Hun pai sate ah khok ngaihna (seriousness) tell hetlou in hiai vote ki khia pen a poimohna thei pha ban lou leng I kha maithei a, ngaihtuahna sau pi pe hetlou in vote I na pe zel uhi. Himahleh huai ziak tak in ahi I na hihkhelh zel uh. Tutung ah bel mipin I ngaihtuah nate zang in, kua pen Makai tatak hi a, kua pen I gam it tatak hi hiam chih I theih chiang mahmah uh ngai hi. Bang chin Makai tatak I thei thei dia? “Lungsim a gitlouhna gel kawm a, kam khum’ a mipite thuzoh ahih chiang in gam ah lungkham na thupitak a tung hi.” Chin Euripides in na gen hi.

 

James Freeman Clarke in hi chin na hilh chiang hi, “Politician ten kitelnawn (Election) hun ding a ngaih tuah ua, himah leh heutu tatak in bel khang sawn te a ding a gel hi.” Hiai kha thudik awmsa hin ka thei hi. Ei lak ah leng enveng veng leng, election hun ding chauh ngak, election ma a dai dide. Mipi nasatak kiphin lampi a miksi hon sa zong bang I ki zuih noi noi ua, I kahna aw ging ki mangilh bawl a, election hun kuan a hon ki kou khe pan ten khang sawn te khankhua ding gel pha lou mah uh hi cih a a chiang hi. Ahih leh hiai heutu nih te bang chi theih khen theih ding I hi ua?

 

A thil tup uh leh a thil ngim uah:

Election chiang in sepsuah ding thil tup leh thil ngim (Election Manifesto) Candidates ten a nei vek uhi. Hun tamzo hiai thil tup te mangilh in, a ching chiang un sepkhiat awm kei mah leh, Political Psychologist te gendan in hiai in a mihinna, a personality, a thil muh phak na tan uh leh a thilgel na tan uh bang tan hiam in muh theih ahi a chi uhi. Dik mahmah ding in gintak huai hi. Etsakna ding tua ei lak ah en ta leng, candidate teng in Salpha kuate kamteh in a nei nak uhi. kamteh kha ut hetlou bel awm veve hi. Ahih leh bang chin opportunist mipa na thei dia? Salpha te tungtang a hon gen uh chiang un, election tan en pan bel salpha te lungdam tak leh kipahna tan vui khiat ding thu leh a sihna event tan uh hon gen ding ua. Mipi te emotion hon play sawm in I lampi zuih dan thu te uh hon gen ding uhi. Himah leh khang sawn khual tupen in bel, a sihna ziak uh, leh huai a sisan man uh gam leitang humbit ding thu leh metei te policy te a alauhuai dan chiang tak in hon gen thei ding hi.

 

Hiai ka gen awmzia bel, khang sawn muban pan, khangsawn te adding a gel na ziak in tu leh tu thil tung ten khangsawn te bang chi bang a su kha ding hiam cih lam thu hon vek ding a, himah khangsawn mupha banlou pan bel tu a I tuah tan lel thil te hon gen ding hi.

 

Aminifesto in bang lam a kok, Manipur singtang mite suahtak na ding a kok hia, a hih kei sum leh pai zonna nek leh tak zonna lam khangna (Development) lel et in a nei hia. Huai development a et leh, a basis, khantouhna ding in kipatsuahna ding in pansan bang hi hiam? I gam I leitang mah humbit masak a eithu igam hausaknate zek theih hun ding tan plan a bawl pha ban hiam cih ah hon ki nga lian mahmah ding hi.

 

Leader diktak in bel vision saupi khangsawn te di tan mu ding a himah leh a vision ah realistic tak in short term goal and long term goal ah khen thei ding hi. Shorterm goal ah tulel a mipi te poimoh leh taksap political leh policy through a solve theih ding bang bang hi hiam cih chiang tak in a a thei mi hi ding hi. Short term goal pen mipi te longterm goal muh ma ham haih leh lung mang awm sak lou in political motivation and aspiration leh leader ah a muanna uh legitimacy a koih gige theih na ding ua poimoh mahmah hi.

 

Aparty zop dan uah-

India democracy pen party party sytem a pai ahih man in party poimoh mahmah hi. Hit amah leh, Political party I chih pen mok mai a ki form hilou in ngaihdan paipi, a paipih uh a thugin kibulphuhna hoihtak nei leh huai mah paipih ding, huai mah tangkou pih ding a hon kipan ahih man un ah party in poi mohna lian tak nei hi.

 

Huai ziak in vote I khiat ma in, mipi ten le hiai party tuam tuam ten bang gindan nei bang chi bang a nasem uh hiam cih I theih a igel pih uh kisam mahmah ding hi. Etsak na ding, party khat, sahkhua khat suk hat sawm a kisa, singtangmite bang huai nuai koih teitei sawm panla party pen in bel singtangmite safeguard te hon suk hat pih na ding hiam cih I gel veng veng ngai hi.

 

Leader tatak in bel, election din theih na ding ahih phot leh party ka muhmuh ka join ding a chi kei ding, bang party in singtangmite buai na hon ngaih khok pih thei ding hiam? chin party a mah thugin toh kituak party a bel ding hi. Huchia amuh louh tawp in leng amah kia pang in, singtangmite AW tangkoupih a sawm lai ding hi. Tu lel I party zop te uh BJP, NPP, RPI cih te thugin leh pai pi tawm chik a muhsuah theih pah ding hi.

 

Etsakna ding in BJP ten singtangmite a ding bang na a sem ua? a manifesto uah, bang a tangkou pih kha ua? NPP ten tua singtang mite buai na toh kisai bang solution hon pe ding ua? RPI ten bang tan ah singtang mite rights hon gum ding ua? cih pen I sui chet uh kisam kasa hi. Aziak pen ahih leh, Party in thuneihna lian tak nei, party toh party candidate pa ngaihdan a kituah louh ciang in party mimal pen party a pan nohkhiat chih bang awm ahih man in.

 

Mikhat in party a hon zop chiang in party thunuai kitah lut ding party thugin lemsakpihna piakmasak hon ngai hi.Hiai a gen omzia bel, Bill leh law poihmoh tatak te Assembly or parliament ah puaklut ahih chiang in, a diak in money bill te bang, party member te lak party whip ki suah khum zel hi (Uttarakhand Government Buaina). Hiai party WHIP pen under Anti-Defection law 1952 nuai pansan in issue hi zel hi. Hiai issue ahih chiang in Party member khat 3 sentence whip a ki issue khum chiang in, huai awm zia bel, bill favor a vote khe teitei ding thupiak chihna tuk ahi, party member in huai thupiak a zuihlouh chiang in a din mun leh party a pan pai khiat theih ahi. Hun tamzo a leader tamzo ministerial dinmun len ten hiai pen haksa sa in party deihdan mah a pai in Bill a deihlouhpi uh leng vote kha uhi.

 

Ei Manipur dinmun bang en ta leng, HAC I nei a, himah huai in party WHIP apan ina hon protect louh man in ah, HAC leng deih bang in a function thei kei hi. Etsak na ding, rurling party a member khat na hih na ah Bill poimoh mamah, na party ten hon introduce ta, HAC ah, hon refered chiang in deih lou in against in vote le ching leng na party in anti-defection law dungjui a hon suspend thei veve. MLA hi a, minister hih theihna ding party kituh in diang sosouh uhi. Himah leh, leader diktak in bel bang party in kei stand hon thukim pih or thuzoh nop zo ding hiam cih ah party zong ding hi.

 

Amau mimal hinkhua ah Ngaih khokna awm Hiam?

Gam leh nam ngaina min bel, mipite kahna husa ging a daihsan mai kei ding a kuaman phok pha kei mah leh, midang te ihmut kal in gamgi siat na mun munte ana enkhe vek ding a, sukbit a ngaih na mun, akek na mun leh melmate hon luttheih na mun teng hoihtak in a vel chian ding a thei suak ding hi. Nehemia, in 450 BC hun lai vel in Jerusalem tungding thak ding a kisak in zan lai, mipi te ihmut lai in Jerusalem kulh bang siatna lailai a vel chian hi.. Hiai a mawl zo deuh in gen leng, tutung I buai na toh kisai pen, gam it tatak min, tutung kia I buai na tan kia ah a en kei ding a, chik a kipan hon kipan? kawi a kipan? meiteiten a dan bawl kuate a apan alaksawn uh hia?, Atul leh a ngim uh bang hi hiam? Chih te vel chiang in a thei chiang ding hi.

 

Himahleh, Season politician ten bel, vote muh na ding uh ahih nak leh, gen ut teng a gen ding ua, a hunciang in gam it na nei hileh kilawm tak, mipi te emotion hon play ding uhi. Mipiten I theih ding ua hoih bel, gam it mi leh I gam heutu ding pathian ana sel Mosi, luipang a selguk a, a hon let chiang a mite it na ziaka tual na that Mosi mahbang ana sel guk, gam leh nam it taktak mi, I nam in I nawl khin khak ding uh lauh huai hi. Huai ziak in thei chian ni in limsak ni, I lam pang kua ahia cih?

 

Theihna Kichian leh muhkholh na nei mi a hia hiam?

Theihna leh theihkak na, hiai pen a poimoh mahmah te lak khat ahi. I gam leh I nam humbit na I cih pen, BILL thu kia hon hipah lou in, devlopment activities leh project tuamtuam ki guang ten bang chi bang in gam su kek, I hihna Identity hon sukha thei ding hiam? Chih te theih chet a poi moh mahmah hi. I gam a diak in tribal te gam leh tribal mi hih na suse thei tampi tak awm hi. Manipur legislative Assembly tribal gam laksak na ding dan pass hi sese kei le leng, Mipi ten I ngaih sang mahmah development projects, bang ahih kei leh Environmental project toh kisai ah tribal ten hun tampi leh muntam pi a gam uh na taan un a hihna (identiy) uh man suah theih dingkhop in na awmta hi.

 

Etsakna ding in, development project ki guang khentkhat, Timpaimuk dam, leh Manipur Oil exploration (AA-ON-2009/1) chihte in gam I leitang leh I tribal Identity bang chi bang hon su kha pha ding hiam? Chih te a gel detdet thei mi I neih poimoh mahmah ta hi. Environment toh kisai bang ah en leng, Kaihlam sanctuary in Thanlon gam khua tampi uap kha, inn leh lou neihna gam leh in khosak na gam lianpi uap kha hi. Hiai teteng in Tribal te gam leh hih na cultural rights infringe kha ahih dan thei siam mi. Huai te thei siam alternative protection of environment through traditional practices in the tribal areas, law leh dan awmsa khek thei ding khop a policy bawl thei suggest thei leh huai pressure group to ki coordinate thei mi ki poimoh mahmah hi.

 

Atung a I gen, development project, leh Environment project ten, legislative ah Bill pass masak a ngai kei, government in resolution passed a huchia, sep theih pah ahi. I gen ut bel, Bill chik chia hon introduce uh de aw chia va ngak vuak hilou in I dou ding tampitak in honna ngak khin ah cih ahi.

 

Huai banah, India kivaihawmna daanbupi sunga kigelh, tribal te a ding kihumbitna ding tribal development provisions tuamtuam te, theihchiang ngai mahmah ding hi.India daanbupi polam ah, UN in tribal leh nam niam te a ding humbit na ding dan tuamtuam a bawl te, UN Delcaration on Indegenous Rights, cih te bang ILO dan te, huai te tuntawn in India a government ten I tribal te uh gou leh gam, te suh sak a hon sawm chiang ua, India daanbupi pua a awm UN daan te tung tawn tana I hih na hon humbit pih thei ding kita sam pet mah ihi ta uh. Aziakt ahih leh, tu hun ah economic development pen nak tak poimoh sakna ziak in India government hita leh, state government tuamtuam ten, gam sung hauhsakna te laisuah tu ding in Multinational company te toh agreement, Bilateral Investment Treaty a signed te un tribal te right protection bang mah gen kha lou ahih man in, ei gam ah leng hon lut pah ding ahih man huai hun chiang a panmun khoh thei heutupil I neih kei uhleh, mangthei thei gige ihi uhi.

 

Central India Tribal ten hiai te a paltou khin ua sual lel lel uhi.Vedanta case bang, Andhra Pradesh Government and RAKIA etc. Tuni tan in Jharkhand state government in hiai bang project sepsuahna ding tribal te gam sukek thei MOUs 74 BIT tungtawn in sign hi, huchi mah bang in Chattisgarh in MOUs 121 sign khinta hi. Manipur ah leng Oil Exploration, Ministry of Petroleum and Natural Gas in Jubilant Oil and Gas Private Limite Neitherland gam pansan Company kiang ah phalna na pe khin a, Manipur Government in leng phalna 2009 in Evironment Clearance bang mah omlou in na pe khin hi. Manipur tribal mipi te leh gam leh hihna humbit ding a kisa mi khat in hiai te nounel tak leh ngun tak a theih tel banah bang chi sual ding chihtan a theih mahmah ngai ding hi.

 

Huai ziak in I gam I nam humbit ding a I kisak lai tak in theihna kichian nei Makai I neih kei leh hon ham haihsak thei, I gam I leitang ei thu neihna apan hon laksak thei, I et lah mahmah development projects te bang, ahih kei le la, Indian Army te a dia mun leh mual lian pipi koihkhiat/sehkhiat a hon awm thei gige te pan in bang chin I gam I humbit thei dia chih a kimvel a gel kichiang thei mi heutu I nei uh a hun mahmah ta ahi.

 

Hiai theihna nei mi I cih chiang in bul a I gen vision nei leader hon hipah mai hi. Theihna kia nei himai lou, policies leh projects tuamtuam te analyse a thei siam mi, tribal te a ding maban ah bang implication nei hiam cih thei thei mi, mi na vak leh pil kiukiau I neiuh uh kisam hi.

 

Mipil, theihna nei mi, visionary leader in mipi te toh a sep khop theih uh, leh pai khawm theih ding kisam mahmah hi. Amah pen gal matong I neih ahih man in, I gal matong pen in melma te, a theih chiang kei a, melmate hon pai a muh ban louh a, ihmut gige leh bel, a nung pai mipite bel mangthang dingsa ahi. Makai tupen in thilhoih lou hong tung ding mukhol a, mipi te ki gal ging thei man ding a pengkul a mut siam ngai hi.

 

Thukhitna: Makai pil bangchin in nei thei dia?

Ahoih deih miten Makai hoih I tel chiang un in Makai hoih leh pil inei ding uh. Khovel pen, migilou te suksiat hizo louin, mihoih ten suksiat a awm ding a dallouh ziak a khovel kisia ahi zo hi. Mi diktat ten diktatlouhna I khok ngaihlouh uh chiang in, thil hoih deih ten, thil hoihlouh bei na ding a pan I lak louh chiang in in khovel kisia hi.

 

Huchi mah bang in, Makai hoih I neihlouhna ziak uh pen, Makai hoih deih ten Makai hoih tel ding a vote khia dia I innlum nuse ut lou, tap kotong a I phun phun ziak ua, Makai tampi hon dok te tel ching louh a tum mang zel uh hi zo hi. Makai hoih deih na pi, I deihtel na tel theilou ding hon koih tute I dal sawm louh gige ziak uh ahi. Tutung in bel, Makai hoih leh deih huai tel ding in kua peuh in khut a magic power in neih uh zang chiat leng, Makai hoih hon piang mai ding hi.

 

George Jean Nathan in hichin na gen hi, “Makai hoihlou te pen, mi hoih ten vote a khiak louhna tungtawn un a tel ching uhi.”Hiai pen dik mahmah hi. Makai hoih deih mahmahna pi a mihoih I deih pen I va votelouh chiang in, na deihlouh pen min na vote ching zel uhi. Huai ziak in ah hiai paulam te pai san in I vote manpha tak, I gam humbit na ding in zang in, I galvan neih sun, kivaihawm na dik imuhna ding zang chiat ni.

 

Vote na khiat kei a, na deih pen na tel ngei kei leh,na deihlouh mi khat in na tung vai hon hawm gige ding ahi cih thei kawm in, na deih,nang hon pi tu ding tel siam in na deihtelna melma te dou thei hi.

Read 242 times
Login to post comments