You are here: HomeArticlesGeneralKhemna ah Honpilut kenla Giloulak ah Honhuh zaw in

Khemna ah Honpilut kenla Giloulak ah Honhuh zaw in

Written by  jamin H vualnam Published inGeneral Saturday, 04 March 2017 00:54
Khemna ah Honpilut kenla Giloulak ah Honhuh zaw in

-jamin H vualnam

 

Toupa’ honsinsak thuumna igengige uh lah izuih hetlouh uh “Khemna ah honpilut kenla giloulak ah honhuh zaw in” chih ahi. Ahi a Toupan bel khemna ah ahonpilut kei dia, huan giloulak ah leng ahonzohsak gige ding chih athuchiam ahinon hi. Himahleh tuabang a zohna tuh miteng tung a tungvek hituanlou zel hi. Khemna a pilut a i omlouh nang leh zohna ingahtheih nang in eilam apat hihding leh zuihding om veve zel hi.

 

Tampi omte lak a tulel dinmun et in denzek chiang a kiteelna/election ineih nang utoh kisai in kikum cheuh leng maw. Candidate te vote zong a sukdian toudian hun abeita, himahleh tu hun-nanung a ipilvan kholdiak uh kisam petmah hi. Aziakbel tuhun mahmah in ahi khemna ahong pai a, gilou ahong laan hun. Khemna ichih tuhun adin; sum-le-pai a kizolna bang, sepding bawlding kitahna bang, innmun loumun kitahna bang, sepna/kaam piakding chihte a kikhemna leh atuamtuam hithei hi. Huchibang a kilawm leh siangthou hi-awmtak a khemna ten atopchiang in gitlouhna ah honpilut ahi chih mangngilh louh deih huai hi. Tuabang khemna limchitaktak leh etlah huai taktakte ahonglut lellel ahikhamoh kei ding. Himahleh huaite apan a kihemkhia a khauhtak a inadaal kei leh bel baihlam tak in huai khemna a pilut ihi maimah ding hi. Nawlkhin a ina ngaihsak louh tuh idamna leh vualzawhna hong hizo ding hi. Ahuchih kentuh ithuumna uh “khemna ah honpilut kenla gilou lak ah honhuh zaw in” i chihchih uh chikmah chiang a tangtung ngeilou ding ahi. A ut ut in bang chibang teng in hon hih tot-tot in chiamtheih chiammoh in hongzol mah le uh khemna a honpilut sawm a gilou lak a honzuak som ahihdan uh phawk ni hang. Tuabang ihih keilebel diktatna leh gin-omna belhawm leh a potham a guhvuak ihilel ding hi. Huan chik mah chiang in gilou izou ngeikei dia atoptop in gilou salou te’ thang a awk in suahtak nang lampi a om nonkei ding. Aziakbel eimah mimalmal ten tua khemna tuamtuamte ina dallouh/nanlouh ua ina welcome pop-pop ziak uh hilel hi. Huaiziakin manthatna leh beidotna te’n idamsung teng hontuam in kineksiatna, kituahlouhna, zulhzauna, niamkiatna leh muhsitna mun leh mualte zuan a hinkhua zang ding ihi tamai ve. Kei diktatna leh gin-omna in midang namdang hilou in kei mahmah hon nungdelh dia, lohchinna, vualzawlna, hamphatna leh khantouhna ten niteng hunteng in kanung kama ah honkhiang ding hi. Huan tuabang ahih chiang in Toupa’n khemna a honpilut lou in gilou salou a honzoh sak ding ahi zaw hi.

 

Tuabang teng tomchik a ngaihsun detdet kom a ithupi mang ngilh lou leh denchiang a i vote khiak ding (dan/te) khatvei chiimtak in ngaihtuah thak leng mo. Aziakbel nangmah deihtelna leh nangmah gamtatdan in natunung ding awl awl a kholkhom tou chiatchiat ahihman in. Khemna a kipilut sak a gilou kizousak ding maw??? Aih’keh khemna pumpelh leh pampaih a gilou nuaisiah a delhmang/holmang ding??? Nang thuthu chu 

Read 304 times
Login to post comments