You are here: HomeArticlesGeneralRights for Persons with Disabilities Act, 2016 (in Paite)

Rights for Persons with Disabilities Act, 2016 (in Paite)

Written by  Centre for Community Initiative Published inGeneral Thursday, 27 April 2017 22:52
Rights for Persons with Disabilities Act, 2016 (in Paite)

 

 

 

Pulakna

India in United Nations Conventions on Rights of Persons with Disabilities 2006 (UNCRPD) pompihna leh suaikaihna October 1, 2007, a neih toh kiton in hiai toh kinaih thei pen diing in Rights for Persons with Disabilities Act, 2016 (RPD Act, 2016) chih Dan (Act) bawl thak in Persons with Disabilities Act, 1995 kichi khekkhia diing hi. Hiai RPD Act 2016 pen India Parliament House nihte gel a passik ahih nung in President in December 27, 2016 in lemsakpihna pia a, The Gazette of India ah December 28, 2016 in suahkhia hi.

 

RPD Act 2016 pen UNCRPD toh kituak dia bawl ahihbang in gindan phungpi (principles) hiai anuai ate ahi. 

  1. Mihing khat a pianna zahtak sak a, mimal thuneihna pomkip a, mahni deihteelna zalentak a zang thei a, mimal zalenna kepbit

  2. Kuamah khentuam omlou;

  3. Nautang lak a kihel leh phatuam dia kizang a, khentuam omlouhna khotang;

  4. Songnawina ziak a kibatlouhte mihing ngeina dan ahi chi a hihna bangbang zahtak leh pom;

  5. Miteng in opportunity kibang neih

  6. Accessibility

  7. Numei leh pasal kikim

  8. Songnawi naupangte mihing khantouhna dungzui a a theihna uh khangzel ahihdan zahtak sak a, nuapang hihna bangbang zahtak sak.

 

Chapter I : Preliminary

Hiai Bung I na in RPD Act 2016 sung a thumal tuamtuamte hilhchetna bawl hi. Tuate lak a poimoh diak khenkhatte ahihleh

High Support – songnawi ziak a taksa, ngaihtuahna leh niteng hunzatna amah-le-mah kigamtat a thutanna kilaktheihna dia hunteng a kithuahpih ngaite a genna ahi.

Person with benchmark disability – songnawina 40% neite a genna ahi.

Person with disability (songnawi) – kuahiam in damsung daih taksa, ngaihtuahna, pilna leh theihna a bukimlouhna a neih ziak a kim-le-kiang toh kipawl theilou leh midangte bang a khotang a hoih tak a a tel theiloute

Inclusive Education – Ngeina skulte a songnawi naupang kai sakna

Public building – mipi zattakpi govt leh mimal inte a huam

Reasonable accommodation – songnawite’n haksatna om lou a milak a teltheihna diing ua bawllem ngaite bawllem sak a, huai in a bawllemsaktute a dia puakgik ahihlouh ding

 

Chapter II : Rights and Entitlements

Midangte toh kibang a songawite a om ua, amau hihna bangbang hinkhua zang thei a, midangte toh kikim hinkhua a neihtheihna diing ua a kisaikhakpih solkal in pan a lak diing. Hiai in numei leh naupang songnawite inle midangte bang a amau ngaihdan genkhe thei diing a a om sak diing ahi. Khotang leh nautang lak a ngeina bang a om thei diing uh. Kuahiam in a songnawina ziak ua tuambawl, bawl gentheih leh nawlkhin a omlouhna diing ua solkal in pan a lak diing. Tuaban ah buaina tuamtuam – tuahsiatna hiam, kangmei-patau leh kidouna phual na tawm a midangte bang a venbitna a neih diing uh ahi.

 

Songnawi naupangte a nu-le-pate uh toh khen (separated) louh diing, kemtu diing kichian a omlouhna a dan in a phalsak court tungtawn a amau kepna diing bawl diing ahihkeileh amau kemtu diing Legal Guardian a neih diing uh. Huan, songnawina ziak a suan-le-pak neihna diing toh kisai thute im ahihlouh diing.

 

India khua-le-tui hihna ziak in vote a khiak theih diing ban uah dan dungzui a apoimoh bang a court a naih diing uh.

 

Chapter III : Education

Siamsinna toh kisai in Government school leh recognised school khat peuhpeuh miteng huam a laisinna (inclusive education) dia a bawl diing uh, songnawi ziak a admission a nawlkhin theih ahi kei, school in songnawite huamkha thei diing a curriculum a bawl diing, building leh campus sung a songnawite zalenntak a om theina diing ua a bawl diing uh (accessible building & campus), naupang dangte bang a kimawlnate aleng a tel theihna diing ua pan a lak diing uh ahi.

 

Akisaipih solkal leh local authorities (appropriate govt and local authorities) in kum 5 hal zel a school a songnawi omte theihsuahna dia survey a bawl diing uh, survey masa pen hiai Dan (Act) kizat apan kum 2 a hih ngeingei diing. Miteng huam laisinna kichian om theihna diing a school in a semtu tengteng leh teacher teng leng training piak vek diing, songnawi naupangte kituahpih bang laibu leh vanzat tuamtuam a piak diing ahi.

 

Akisaipih solkal leh local authorities in songnawi pichingsate siamsinna (adult education) diing a poimoh bang a a piak diing uh ahi.

 

Chapter IV : Skill Development and Employment

Mahni khe a dintheihna dia siamsinna lam tuamtuam a kisin theihna diing ua solkal in pan a lak a, kisinsiamsate a diing a loan baihlam tak a ngaihtheihna diing a a bawlsak diing diing.

Solkal in songnawi ziak a sepna toh kisai a a nawlkhin theih hilou hi. Tuaban ah solkal leh solkallou khatpeuh inleng sepna toh kisai a songnawite khentuam lou a laak a om theihna dia policy kichian a neih diing ahi. Tuaban ah songnawi sepna neitate leng record hoih tak a kep diing. Lungkimlouhna neite a diing a tutna diing Grievances Redressal Office a koih chiat diing uh ahi.

 

Chapter V: Social Security, Health, Rehabilitation and Recreation

Akisaikhakpih Solkal in amau economic toh kituak a songnawite aa diing programme leh scheme a guan ua, songnawite amau khosakna changkangzaw a om theihna diing ua pan a lak diing uh ahi. Songnawi numeite neek-taak zonna a kithuahpih a, ata kepte uh etkaina a kouzaanna tut diing. Huan, songnawite vanzat poimoh tuamtuamte uh a thawn a muhsak a (aid and appliances), songnawina uh toh kisai a bawldikna dia ki-atna (corrective surgeries) athawn a angah diing uh.

 

Songnawite’damtheihna leh a kepna toh kisai in akisaipih solkal in solkal damdawi innte a thawn a ngahtheihna dia pan a lak diing, building leh structure-te accessible a bawl diing, mi tampi kiline hun a songnawite masaksak diing. Damtheihna toh kisai mipite theihsiam sak a, songnawina ngahlouh theihna dia kivendan tuamtuamte mipite a theihsak diing uh. Mipite ban ah school a semtute, damdawi inn a semtute, angganwadi worker-te leng a theihsiamsak diing uh ahi.

 

Songnawite’ milak a tel a, mite toh kipawl a, kipawllimna tuamtuamte a teltheihna diing ua akisaipih solkal in pan a lak diing uh, tua diing a kimawlna mun leh kipolhkhawmna munte accessible ahih diing. Tua ban ah, songnawite a diing a amau toh kituak kimawlna tuamtuamte hanthawn a, amau a diing a programme tuamtuam bawlsak diing.

 

Chapter VI: Special Provision for Persons with Benchmark Disabilities

Benchmark disabilities nei a chihte uh (40% tante) in a thawn a lai a sin theiih diing uh, huai diiing a a naihna penpen solkal skul hiam ahihkeileh a tuambik skul (special school) ah kum 6 apan kum 18 mi kikal in a athawn a (free) sintheihna dia akisaipih solkal in pan a lak diing.

 

Tuaban ah, siamsinna in sangzaw ah songnawite’ admission na diiing a reservation a om diing, songnawite a dia kum 5 relax diing. Admission kia hilou a kaam/nasepna (job) aleng amau a dia reservation a om diing, solkal nna kia hilou in private leh company tuamtuam inleng tuabang a reservation a neih diing uh chih ahi. Sokal lou private hiam company hiam in huchi bang a 5% reservation nei a songnawite sepna a piak chiang un solkal in tua private or company kiang ah kipahman sum (incentive) pe diing hilai hi.

 

Sokal in Special Empoyment exchange a bawl diing ahi a, employment exchange neute ah register tuam in songnawite chiamtehna a bawl diing ahi. Tuaban ah akisaipih solkal leh local authorities in songnawite kiang ah loubawlna diing gam, ahihkeileh khantouhna diing leh zawnna hihbeina dia programme tuamtuamte ah 5% pen songnawite a dia a siit (reserved) diing uh ahi. 

 

Chapter VII : Special Provision for Persons with Disabilities with High Support Needs

Songnawina nei a hun teng a kithuahpihna poimohte in a kisaipih thuneitute thuzaak diing ua, tuate in a ngetna hoih tak a a velchian diing uh a, huai muhsuah apan apoimoh bang a solkal in kithuahpihna a piak diing ahi.

 

Chapter VIII: Duties and Responsibilities of Appropriate Governments

Akisaipih solkal in Chief Commissioner leh State Commissioner toh kithuzak in songnawina toh kisai a mipite theihsiamsakna leh songnawite a diing a hiai Dan in hamphatna a piakte pichin diing a pan a lak ding uh. Tuate lak ah hiai Dan nuai a songnawite nautang leh khotang lak a kiheltheih diing, tuambawl louh a nawlkhin louh diing, mihing hihna bangbang a pom diing. Tuate ban ah songnawite in amau a hihtheihna omte khansak a, a kizat theih bangbang ua kizang diing a ding a hanthawn ding ahi.

 

Phualpi Solkal in songnawite a diing a lam tuamtuam a haksatna om hetlou a a kihel theihna diing ua Standard of accessibility a bawlkhiak diing.

 

Akisaipih solkal in public transport-te a songnawite a diing a haksatna omlouhna ding a abawl diing, mipi paikhawmna munte a songnawite gari koihna mun diing a tuamseh ding, dailen buukte a haksatna omlou a songnawite’n a zat theih diing uh ahi.

 

Kuahiam songnawi khat amah-le-mah a kigamtat theih a utleh tua om theihna diing a akisaipih solkal in scheme leh program a bawl diing ahi, tua diing in mahni a khualzin-gamvak utte a diing a sum-le-pai a huhna a bawl dia, amau taitheihna diing a gari bawllem thak (retrofitting) ngai omleh tua a huhna a piak diing chihte khawng ahi.

 

Solkal in thuthehzakna a bawlte songnawite a diing a theihsiam theihna dia a bawl diing, audio, sign language, leh adangdang. Nautang vanzat theih tuamtuamte a bawltute in songnawite inle a zat theih diing ua bawl diing.

 

Phualpi Solkal in Standard Accessibility a bawl dungzui ua building leh structure kibawl di peuhmah a om diing, huchi bang a om keileh Solkal in a bawlna diing sum pelou diing, bawlzoh a hihchiang ale huchi bang a bawl ahih keileh completion certificate piak theih hilou diing hi.

 

Hiai Dan zat ahih nung a mipi paikhawmna building luite leng hiai Standard Accessibility a toh kituak a bawllem thak vek ahih diing ahi. Abiik in damdawi inte, siamsinna inte leh adangdang.

 

Chapter IX: Registration of Institutions for Persons with Disabilities and Grants to Such Institutions

Organisation hiam institution khat peuhpeuh in songnawina toh kisai a sep utleh Solkal in hichi bangte registration bawltu diing thuneihna a piak tungtawn a registration a bawl diing uh ahi.

 

Chapter X: Certification of Specifies Disabilities

Songnawina neite in certificate (disability certificate) a ngahdan diing ua zuih diing a bawl dungzui in songnawi tengteng in Disability Certificate a neih diing uh ahi. [India in tulel in Unique ID bawl diing in panla lel a, hiai RPD Act 2016 toh kituak a hon bawl diing un a gintak huai hi]. Huchia kuahiam in Certificate neihna diing a ngetna a bawl a hun bang a ngah kei uhleh court ah hekna a bawl thei diing hi.

 

Chapter XI ah Central and State Advisory Boards on Disability and District Level Committee a om a, ei a dia zat theih diing in District Level Committee a hong om I gingta hi. Huan Chapter XII ah Chief Commissioner and State Commissioner for Persons with Disabilities guandan diing leh a thuneihnate uh kigelh hi. Chapter XIII ah Special Court ah Chief Justice of High Court in hiai Dan toh kituak a sepsuahna diing in districtte ah Court of Session a om sak diing chih a omsak uhi. Chapter XIV ah National Fund for Persons with Disabilities thu gelh a, Chapter XV ah State Fund for Persons with Disabilities chih leng a om diing thu gelh uhi. Huan Chapter XVI ah Offences and Penalties om a, hiai Dan kalh a gamtangte gawtna piak dan diing thu kigelh hi. Kuahiam in songnawite a diing a hamphatna kipiate diklou tak a a zat/ zar a zou khakleh leng gawtna piak diing chihleng tel hi. Chapter XVII a tawpna ah Miscellaneous

 

Hiai Chapter teng ban ah hiai RPD Act 2016 dungzui a songnawinate (Specified Disabilities) chihamtehna THE SCHEDULE chih om hi. PwD Act 1996 ah songnawina chi 7 kia huamsak ua, himahleh RPD Act 2016 in bel songnawina chi 21 huamsak uhi. Tuate hiai anuai abang ahi:

1. Physical Disability

  1. Locomotor Disability

a) Leprosy cured person

b) Cerebral palsy

c) Dwarfism

d) Muscular dystrophy

e) Acid attack

  1. Visual Impairment

a) Blindness

b) Low Vision

  1. Hearing Impairment

a) Deaf

b) Hard of hearing

  1. Speech and Language Disability

2. Intellectual Disability

a) Specific learning disabilities

b) Autism Spectrum Disorder

3. Mental Behaviours

    Mental Illness

4. Disability caused due to

a) Chronic neurological condition

i) Multiple sclerosis

ii) Parkinson's disease

b) Blood disorder

i) Haemophilia

ii) Thalessemia

iii) Sickle cell disease

5. Multiple Disabilities (including deafblindness)

6. NOTOFIED BY GOVT (hiai a telkha lou Solkal in huamsak dia hoih a sak omleh a khonung ale hap thei diing hi)

 

 

 

Issue in public interest by

Centre for Community Initiative

Nehru Marg, Central Lamka,

Churachandpur 795128, Manipur

 

 

 

Read 216 times
Login to post comments