You are here: HomeArticlesGeneralLungsimneu, Kideihkhop Leh Tlawmngaihna Neihlouh Vai

Lungsimneu, Kideihkhop Leh Tlawmngaihna Neihlouh Vai

Written by  jamin h vualnam Published inGeneral Thursday, 11 May 2017 18:38
Lungsimneu, Kideihkhop Leh Tlawmngaihna Neihlouh Vai

 

 

 

-jamin h vualnam

 

October ni 7, 2016 ni a Lamka tungsuak ngeingei dia Dimapur a Winger, zingkal baihtak a kipankhete kazan delh leh kinep banglou tak in kalap zoukei a, dak-kua vel a kipanding te ah ticket kala thouthou hi. Midang katuanpih dingte bel Imphal chiang ahi tangpi ua, akinoh louh ban uah, tun nakleh chite ahihman un a manmoh hetkei uhi. Keibel Phai a pan a Lamka lam Line Bus te kalap teitei ngai ahihman in leh giahlouh teitei ka ut man in kakinoh a, Driver te bang paipah a tai mengmeng di’n ka gen nilouh hi. Passenger full lou a honpaipih lou ahihman un ka phevelvul a kahi tengtung maimah hi. Huchih lai in ‘Eimi’ (Paite) siang kilkel numei khat leh pasal khat, Lamka chiang paisuak ding hong om zenzen ua, lawmding omta chi’n kakipak mahmah le’nla’n hi. Kapai makal uleh lampi (motor sung) ah kakihou nilouh ua, a numei pen katheih chiah louh hang in a sang-gampa leh a zi, asungte’ innkuan ban ah, a nuneu tate ka theihluat ngen ahih sonson ziak un ka gamlum tuan mahmah non hi. Huan tua numeinu te leh kouveng kigamgi ahihban ah amau inn leh kou inn kigamlalou, minute nga vel pai a tunmai ahihziak in kalungsim a tawldam tuan mahmah hi. Pasal pen ahihleh Khomoi te a hi a, kouteng thum singtangmi ‘Eimi’ ngen kahihman un anuam tuan mahmah. Zing ann bangleng table khat a nekhom in kaki neelsim chiat uhi.

 

Kei kakinohziak adiam ah motor bang hatlou kasa a, denchiang in line bus lap keileng buaihuai ding chihte ngaihtuah in katukip theikei hi. Kalawm tegel (min genlou di) Lamka paisuak ding himahle uh kinohlou leh muangchang in line bus laplouh ding huphulh hetlou in a om heuhau tuak ua, lamdang sasim a kadot leh; Numei pen in, ka u in car toh honpi ding ahi honchi a, e huchidan maw, ahoih lua kachi leuleu hi. Huchihtak in ka ngaihtuahna ah; ahoih himhim, painang kibang van nei lah omlou, Eimi chiat kihizomah belhtheih mahmah un teh chi’n kalung muang pongmawk hi. Gintak sang in ka tuanna motor uh ahatlouh ban ah, a khawl thithe a kana ning mahmah mai hi. Tuaziak mah in azekailam kahita ua, nitaklam dak li (4pm) vel agin in Maram khua tungnailou in kigalmuh kuau zel lel hi. Huchih lai in Aak ihmu kabang a, manglam a mi buai vengvung dan a thei in ka khanglou phut hi. Kadak vialvial leh tua kalawmtegel (Eimi gel) Maruti Swift Car sandup kiikiai sung ah akiguanglut gaih ua, hoihdeuh a ke-etthak leh asung ah amaugel leh a hektupa kia tuang in hon tailiam san vangvang uhi. Amaunung ah kouleng awl-awl in kakikhin nalhnalh ua, sawtlou nung in muhphak leng ahi non kei uhi. Keileng ka houpih dinglah omnonlou ahihmanin, hichibang khongte ko’n ngaihtuah neuhneuh taget hi. Kei ngaihtuahna leh kalungsim dan ahihban ah, kanakinep luatziak chu ahi peuhmah chihman thu hi. 

  • Kamsiam bek in, ka u in hondawn a kou kana paituam mai uh aw honchi di uh kasak leh bangmah genlou in hon nuse tel ua.
  • I painang uh kibang hiven, na-utleh nangleng ahithei dandan in nong kihen maidiam honchibek di uh kasak leh.
  • Van (luggage) kahau lua ua, hikeile zaw nangleng hongtuang theimai di hi chin a  chibek di uh kasak leh. Amau lah naupangte skul bag chia khat-tuak zaw aliang ule hilou in akhut un khai langlang tuak ua.
  • Motor liandeuh khong hileh zaw  beek honchi sam le uh kilom hi a. Tua chih dia le, atalou hituanlou ua, mihing nga tut theih na a mihing thum tuang chu haksa keileh kilom.
  • Midang namdang leh chituamdeuh hileng bel thukhat, tuanak sang a Eimi chiatchiat, vengkizom hinalai, asang-gamte, asungte kithei vek hizomah.
  • Painang kibanglou, muntuam leh lampi tuam totding chihle hituan samlou hi a.
  • Ken, van haupetmah a buaihuai lua tazoulou chihle hisamlou, amau sang mah a van neilouzo kihi zomah.

 

Gensa bang in, midang, sadang, namdang leng kihi samlou, Lamka a paichiat ding akihihban ah, veng kigamgi hilhel hizomah. Uang-genleng van lah kineilou lai, a motor ua mi thumkan tuantheih louh chih le hilou phetlou a, a awngheuhou a hon nusetel chu ahi ua. Huan a kambek ua kana huchi khachi di uh, kuk-e-kak e kichih lah omtuanlou, melma lah hisamlou hing a maw. Chipih sapih, khopih tuipih, biakna leh pupa ngeina kidanglou zaw hi a, chi’a ka ngaih tuah chi’an lamdang leh khasiathuai kasa. Amau motor leh amau thu zaw hilotel, kei gentheih ding leh phun-nang bangmah omkei mah. Himahleh, chipih, nampih leh khopih hibuang di’n huchibang te tuh; lungsimneu, ngaihtuahna kochik, kideihkhop, kiliansak, awlmohnabei leh phat-tuam ngaihna neihlouh vai kasa (kei kana kinep ziak chu ahilona a…. hileh le’ng….). Huchibang mite igam, inam, ikhua-le-tui, isaptuam leh pawlpi sung a atamluat ziak a ‘Eimite’,  tuantual, khangtou lou, masawnlou, lohchinglou, kituaklou leh pangkhawm theilou a om nilouh ihi d’uam chi ut kahi zaw. Isepna khatpeuh uah, office ah, nektak zonna ah, siamsinna leh sumbawlna ah, initeng hinkhua ah, makaihna leh heutu hihna ah, nungzuihna leh biakna ah, nek-khawm dawnkhom na ah, zinsuk zintouhna ah, mimal kal leh bangkim ah; lungpigelna, phattuam ngaihna, awlmohna, panpihna, kihuai dialdialna, kim-le-pam veina lungsim himhim kuaman ineinon kei uh.

 

Tuasang mah in ikideihkhop thei vanglak ua, lungsim neuchik toh ipauthau thei kangkang ua, midangte kuamah imimuh kei zomah uh, awlmohna leh phat-tuam ngaihna himhim agimleng inam nonkei uhi. Keitung ah ni saden henla, midang tung ah vuah zu nilouh leh chih hinpih Zomi te ihita uhi. Ka innveng te’n ngawl uhenla kou alom atang in kiphakvak kekuih le ung chih policy paipihte ihi ta ua, ken ka hamphatpih a ka nek-khak nakleh midangte awlmoh ngaikei chih doctrine khoipiching te ihi ta uhi. Anei leh neilou kal a kideidan na khukpi ah ituaklut souhsouh ua, ilamdang thei seepsuup uhi. Agenzou leh pauzou/pauthei te ipibawl ngial ua, dai kilkaal leh genthei liangvai te I nelhsiah un I nengniam zosop uh hilou hia? Muhdan leh sepdan/saidan diklou tak a hinkhua zang a khosa eu au te I ngaisang un I Pathian bawl hial ua, amaipha uh zong in uipi duhgawl bang in iliak phialphial uh hilou maw? Adik amaan a sem a gamtang leh hinkhua zangte lah imi muhlouh ban uah, koihna khat inei henghang tel ua,lamdang khatel mah hang!!! Tuabang dan in zaw; lohchinna, khantouhna, masawnna, kituahna, pankhomna, kipum khatna, thahatna leh pichinna gamla deuh laileh kilawm isakei u maw?.


( : kalawm gel demnatuam hilou in, Ei’ Zomite alompi a kagen nopziak ahi zaw )

 

 

 

Read 63 times
Login to post comments