You are here: HomeArticlesGeneralLamka-te leh Khristian' Hinkhua

Lamka-te leh Khristian' Hinkhua

Written by  ZM Tonsing Published inGeneral Tuesday, 23 May 2017 00:58
Lamka-te leh Khristian' Hinkhua

~By ZM Tonsing

 

"I gam Khristian' hinkhua aw ka ngaihsut chiang in,
Mahni masialna leh duh-amna gam ahi,
Thuneihna leh lalna, thupina delh i tam ngei;
Hon it a ei Hontantu'n bangchi'n hon ngai diam aw?"

~ Buonglienkung

 

Tangthupha vaak in i gammial ahon tanvaak nung kum 100 (century) bang val thamta hi. Huaikia hilou in, tualsung saptuam bangzah hiam leng saptuam kiphuh khiatnung kum 100 melmu thei bangleng om ta. Hiai Tangthupha in i niamna leh tuantualna ua kipan hon hunkhia in hon domsang a, i lam-et batlouh mun-le-mual, neih-le-lam, pilna-siamna leh kong bangkim ah hon piikai in, mite’ neih bangbang hon neisak hi. I pu-pate’n hiai bang dinmun a ding diing in hon koih uh a lam-et huai kei. Ahi a, e’n leng ipu-pate’ sulnung zui a, singbul-suangbul leh dawi-le-kaute ana be-tou ngiitngeet lai hile hiai bang dinmun i tungkei hial ding uh chih theihsa ahi.

 

Lamka lak kia hilou i district sung pumpi uh et-in milip za-a-za (100%) Khristian ihi uh. Nam tuamtuam tengkhawm ihih dungzui un saptuam bel kibang vekkei mah, huanah, pau kibang ngoingoi leng saptuam kibanglou; thu-up/sinsak (doctrine) tuam bang in om mahle hang Pathian hingbia ngen ihi uhi. I heisuk-heitouna uah Pathian thu i za ua, zakkia mai hilou in mit mahmah a muhtheih di'n le kitaakkhe zengzung hi. Huaikia hilou in saptuam programme bang i hau thei mahmah ua, 'Hotdamna Chialpi' ahihlouh chiang in 'Halhthakna Chialpi' chih ahi zel. Pathianthu bel i thei mahmah mai uhi. Himahleh, hiai Pathianthu pen awm-phaw dia zanglou a, polam kilawmna lel a zangkha ihi di uam?

 

I om dan leh gamtat dante uh Khristian' hinkhua toh akituakna hia? I gam ah lemna-muanna, galmuanna leh ki-itna te'n mun a neilai hia? Khat veivei Pathian bekhalou a mihing bia i di uah aw ka chihhun a tam mahmah. Mihing ihihziakin phat leh pahtawi utlou ki-om keimah himahleh ei mihingte kipahtawina in Pathian' mel a liahkhuh khak diing kiven ngai hi. Banghiam khat lam-et ziakin milian-milalte i mai-et ua, mizawng leh dai kilkal a mite' phawk phaklouh leh neng chimit in om hi. Hiai thudik in khalam a i heutu, saptuam makaite leng a hawi tuankei! Saptuam sung mahmah bang ale ahau leh neinung deuh, sawm-a-khat leh Pathian' gam nnasepna chizen a donpi-donke neuhneuh petam theite ama dawk huaihuai uhi. Hiai maw Khristian-te om didan?

 

Angmasialna leh sum-le-pai deihtakna ngen in i pumdim ua, ei i hin nakleh midangte' sihleng poisalou Khristian-te ihi uhi. Galmuanna himhim a om kei. Sum in vai a hawm a, sum mai ah tuh thudik i gup ngamlouh kia mai uh hilou in i Khristian hihna uh i dawksak ngamkei uh. Toupa nang ka gam uah vai honghawm in, lemna Pathian nang k'on ngai uhi chi'n sai-ip puan silhzen in kikou mahle lemna leh muanna in i gam taisan hiaihiai hi. I lungtang taktak un Pathian i sam kei ua, mihing' mitmuh a kilawm di lel a ihih ziak un i deih uh i ngahkei uh.

 

Huanah, nekgukna, diktatlouna leh kineksiatna te'n i gam a tuam dim gawpta. Thunei, heutu hih ut in i kituh souhsouh tamai uhi. Diktatna himhim a om nawnkei a, thudik a vaihawm chihle a om samkei! Solkal a kipan thil hongpai peuhmah lah ahi bangbang a zat khatlel leng a om kei. Om kei mah! Mizawng leh dai kilkal a mite' tan di nasan le nekguksak teitei Khristian-te ihi uh. Ki-itna leh kideihsakna te'n i gam ah mun a neizou nawnkei.  Mihinpihte itna neilou Khristian ihi uh, Lamka-te!

 

Insak-inkhang banah tanau-laina kikawmtuah dialdial chihte a om nawnkei. Kimuanmohna leh kimuh dahna ngen in i pumdim ua, i dai (fencing) te uh sang hiaihiai in i lungsim teng uh i umm lum gawp uh! Huanah, innkuan sung mahmah ah le ki-itna a tawmta a, innkuan kituaklou gah tu'n i khotang in i ne lellel uhi. Innkuan sung puahphat sawmlou in khotang hoihna di kia i gen ua, huaituh singkung kal dek in a lek a kipatsawm toh kibanglel ahi. Khotang hoih diing i deihleh mahni innkuan chiat kibawlhoih masak ngai hi. Innkuan sung ahoih a, i kithunun zohpeuh nak ua leh khotang bel honghoih mai diing hi.

 

Hiai khovel thilchiin hoihlou tuamtuam - khamtheih-guihtheih banah numei-pasal kal a thangtatna te'n i gam a luahdim khinta. Himahleh, gingtu Khristian ihi veve uh! Khalam Khristian hilou in salam Khristian ihi maimah uhi. Khamangthangte veina leh awlmohna a om kei a, saptuam budget leh biakinn hoih khawng a kidem in biakinn thupi taktak tungkhe ngelngol mahle hang a sung a kikhawm di kitawm deuhdeuh hi. A diklel a gen in i Khristian' gam uah Toupa' mel a langzou nawnkei!

 

Ahi a, Khristian kichi ihih ziak un huaimah tuh i lenkip tinten vanglak uhi. Pathian mitmuh a kilawm leh kilawmlou di chihte khual omlou in ut leh dah in Pathian min i lou zatzat ua! Nna khat pepeuh a Pathian tuh amasapen in i koih veve uh.  Nekgukna leh dikloutak a kilamkhia neih-le-lamte Pathian' vualzawlna chi'n Pathian kiang ah kipahthu i gen ek ua. Tua banah, thil khat hih dekle Pathian kiang a panpihna ngen a; Pathian kiang mah a kipahthu gen a zouzelte ihi uh. Uang genle, khalam melma lianpen nnasepna di mun nasan bangle Pathian kiang a thumna toh laan a, hongkhe thei di hial ihi uh, Lamka Khristian-te!

 

Khat veivei ka ngaihtuah zel a, tu, eikhang chiang ah Khristian hihna pen kingainep gawp, Khristian kichihpen ahi di bangmah dan a koihkha ihi di ua aw ka chihhun a om tham hi. Huaiziakin, sahkhua dang ana nei a, huai i sahkhua ua kipan a Khristian a kihei hile i ginna uh tua sang a hatzaw in, Pathian vualzawlna leng dongzaw di'n ka kingaihtuah hi. Ahi a, tu'n leng i ut leh dah a om in, i haksat leh mangbat hun chiangkia ua Pathian lamnaih Khristian-te himahle hang A hon taisan tuankei a, A hehpihna ei a di'n a kiningching mahmah mai hi.

 

Himahleh, tuabang ngen a i om zomtouh nilouh uleh denchia A thangpaihna Ahon sungbo kei di chih kua'n a genthei a? Khristian hiloute sang in ei Pathian thu thei a zui, Khristian kichite thuak houh a hong sahzaw maimah diam chih lauhuai lahlou hi. Huaiziak in, Ahehpihna kong kihon lai in Toupa lam ah kiikthakni. Khristian hihna kum 100 bang valta; ann-chiim hilou a ann-gum ne dia kilawmte'n maw ann-chiim mah i nek nilouh lai diing uh?? Hiai tan honpi a, khovel theih a hon domsangtu bangtan taisan a, kitheih mohbawl nilouh lai di ihi ua?!

 

(“Lamka-te leh Khristian’ Hinkhua” chih thulu pansan a facebook Group ZOMI TIMES te’n thugelh kidemna a sai ua khatna ahi)

Read 190 times
Login to post comments