You are here: HomeArticlesInterviewOnline interview with Pumkhothang Tonsing and The Lamka Post

Online interview with Pumkhothang Tonsing and The Lamka Post

Written by  The Lamka Post Published inInterview Monday, 11 August 2014 10:41

Online interview with Pumkhothang Tonsing

(Online tungtawn a interview bawl ahihman in ‘edit’ omzek mahleh a tamzaw ahi bangbang in hong kisuah hi)

 

BIO DATA OF T. PUMKHOTHANG

1. MIN : T. PUMKHOTHANG

2. PA MIN : (L) T. PHUNGZACHIN

3. NU MIN : (L) JAMCHONG

4. PERMANENT ADDRESS : BUNGMUAL, LAMKA

5. PRESENT ADDRESS : LAMPHELPAT, IMPHAL

6. PIANNI : 11th AUGUST, 1968

7. PIANNA KHUA : P. MUNLIAN (Va-ngai)

8. ZI MIN : MANKHANMUAN

9. TATE MIN : DONTHIANSIAM, NINGNUNNEM, HAUNGAIHSANG.

10. KITEN KUM : 1st SEPTEMBER, 2006

11. UNAU PHA ZAH : UNAU 11 LAK A 8NA

 

LP : Pathian la phuah masakpen ?

PKT : Ka la phuah masak pen “Aw Tuailai” chih ahi.

 

LP : Na La phuahte lak a na lungkhoihpen/hoihsakpen bang ahia ?

PKT : “Toupa i Zuan ding” chih la ahi.

 

1.Toupa na tate lai ah kawlni suak sim in, Huhamna leh siatna in ka gam uh a luahzou;

Ki-itte kilaizomte dougal a suak zouta, Ki-itna’n mun a neinawnta lou.

I thouding aw i zuan ding Toupa i zuan ding uh, I gam zong Toupa’n a hon it lai;

Banghang a i Toupa mel liahtu i hih lailai, Kisik in Toupa i zuan ding uh.

 

2.Khelh vang in aw sen momnou sanggah a tamngei, A it huai a naupangte nangawn in zong a thuak;

A poi in a mulkimhuai tulai i nuntakna, I Toupa a melsiatna ahi.

 

3.Zuang hongthou un tun leh zua, chin leh tuaite aw, Kisathei in om kei ni kingaihniam a hunta;

Kisik a i sulhei leh ngaihdamna i tang ding, A liamma’n i zuan meng ding uhi.

 

LP : Zomite/Singtangmite Gospel singer-te lak a ngaihsangpen ?

PKT :  Singtangmi lak a ding in Lalparzo Sanate siam leh ngaihsanghuai ka sa. A ziak ahihleh la a siam banah kei na muhdan in Pathian phawk in ka thei hi. Huai banah ei singtangmi la mawlchikte a saksiam ziak in ngaihsanhuai ka sa hi.

 

LP : Zomi/Singtangmite lak a Country song singer ngaihsang pen ?

PKT : Amah la phuah mah sa Pu V. Siampu mah ngaihsanhuai lailai ka sa.

 

LP : La lam toh kisai a i nam/gam dinmun na muhdan ?

PKT : La toh kisai in i nam khangtou mahmah in ka mu, a diak in lapawl ah i khang diak un ka thei, nidanglai siamna toh teh in sit-huai nawnlou ahi. Lasatu lam et in solo lam ah pasal lasiam tawm mahmah lai, numei lam bel lasiam hunkhop kipha thei in kipahhuai mahmah. Hinapi a poi ka sak guukbel i nam in a bat phak ding late sang in namsang deuh a i theihte pahtak late kia delh in, i mi i nam chawm kha ding late niamsa in i taisan un ka mu.

 

LP : Album bangzah na bawlta dia ?

PKT : Album piching ka na bawlkhiak tutung a “Phatna luangkhawm Vol I” kia ahi.  Album khenkhat ah bel ka na tel kha zeuhzeuh lel, 1995 in Audio kia in ‘Gam Ngaihla’ ka na bawlkha, huchilou gen ding omlou ahi.

 

LP : Na late i etleh gospel la kia hi’n a kithei a, gamngaihla leh zawlla phuak khalou mah na hi hia?  Gamngaihla leh zawlla tungtang bang a na ngaihdan?

PKT : Nidang in zawlla chih dan deuh pianthak ma in ka na naupang phuah kha ngei, huai nung in Pathian la ka hon phuak a, gamngaihla leng 10 vual ding phuak kha hi’n ka kithei. Himahleh tuchiang in Pathian laa kia ka phuakta hi. Zawlla leh gam ngaihla i chih a siatna genni chi leng gen ding tawm mahmah, ahihhang kipakta lou deuh ahihman in hoihlouhna khat a nei a hi’nteh chih dan in ka koih lel mai hi. Ken bel a saite mohsakna ding ka thei kei, gamngaihla sa pawl, zawlla sa pawl bang om lehang bukimna hi zaw ahi.

 

LP : Laphuah lam ah na lungtup mualsuah zou hi in na kithei hia? NA la phuahte a ngaikhetute'n phattuampih un na thei hia?

PKT : Laphuah kei mah a kilawpna om bangbang in ka na phuaktou zel a, ka lametna tunglam pek ah Pathian in a zang chih ngallouh gen didan ka thei tuan kei. Huan, a ngaikhetu /satute a pan kammal “Na late’n hon chawm... hon vua... kei/kou a dia n’on phuahsak ahi...ka hinna a sukha..” chih khawng ka zak zelte a pan in midangte’n phattuampih uh hi’nteh chih ka gintakdan ahi.

 

LP : Na laphuah sa tenglak a na deihtuam khat leh a ziak hon hilh ve.

PKT : “Hon domsang” chih la ka deihtuam deuh gige ahi.  A ziak bel Pathian thu in kei mahmah hon domsang ka sakluatman ahi.

 

LP : Na nung hon zui di khangthakte bang thukhah nop na nei a?

PKT : La i phuah chiang in mipite batphak ding a phuah sawm ding ahi. Huan, i chi i sate sak ding mah ngim a phuah hoih ka sa, bang la kaih paiziate, la thu bang lamte kipahpih i hiam chihte ngaihven kawm leh lapau a tam theilam zang a phuah a hoih. Huan, la tam phuak pen hih sawmlou in, la phuah sunsun hing leh hoihtak ahih ding ngim lehang manpha zaw ahi. Huan la paizia toh kisai in sapte pahtak ding bang mai a, a mau la pai ziate zui a i phuah chiang in amau lak a lah kizang ban tuanlou, eilak a lah kizang tuanlou in a valkha maimah thei.  A phuaktu kia in sa, aihkeh a satu sak a bei mai mah thei ahi. Huan Pathian la lam phuak ding i hih leh Saptuam/khalam vai a kizattam in laphuah ding tampi hon pia ahihman in kizattam a poimoh mahmah hi. Pathian gam nna gimpih-tawlpih khaloupi a la hoihtak phuak ding a kilam et ding thil hitheilou khat ahi chih phawk kawm in, khalam mah ah kizang tam le’ng deihhuai ka sa hi.

 

LP : Na la phuah teng bangzah a pha zou dia ? Huai lak ah bangzah video album in na bawl a, bangzah bawl nailou?

PKT : Ka la phuahkhiak himhim Pathian la kia 60 vel khawng in ngaihtuah theih inteh, phuah teng leng zattheih veklou ahi. A zattak chiang zaw 30 lak vel ahi ding. Tu kum tan a kiphuak a zattheih chiang zaw video a veng tuamtuam album ah om kha chiatta hi in ka thei. Huan video album a bawl ding chih pen kei bawl di’n ka na ngim ngei kei a, tukum in utna khat hon nei in album k’on bawlkhia a hiven, ka bawlte leng a tamzaw mi khumsa/bawlsa ngen mah ahi. Ken k’on bawlthak nawn leh bel mi bawlsa teng mah hon bawlnawn ding suak ka hi, bawllouh la bel omta dihlou hi.

 

LP : Na la phuahte nang na sak hia ahihkeh mi sak ngen hia?

PKT :  Biakinn khawng a lapawl a ka sakkhak ahih ngal kei leh, ka la phuahte album ah zaw sa khalou ka hi, midang sak ngen himai dan eive.

 

LP : Chik kum a pan la phuah na pan a, bang la na phuak masa pen a?

PKT : La phuah pat kum 1986 ahi a, zawlla phuak masa pen ka hi. Pathian la 1987 a pat phuak pan in ka kithei.

 

LP: Na la phuahte nang mimal hon sukha ngen hia/ahihkei leh midang tungtawn a pan a na phuah hia?

PKT : Kei mah hon sukha ngen ahi vek kei, midang tanchin a pan bang, midang sermon a pan bang leh zon suahthoh a hong piang bang ahi ua, Pathian hon piak zaw hi pen mai ahi.

Read 5608 times Last modified on Monday, 11 August 2014 10:43

  • whoami
    whoami
    Wednesday, 20 August 2014 15:25

    Laphuak/ lagelh te kiang a kidong hamtang sek: La na gelh/phuah chiangin a thu nei /gelh masa maw ahihkeileh a tune(music) kichi sek hi. Amah Pu Thangin a koipen gelh masa a diam maw?

Login to post comments