You are here: HomeArticlesInterviewLasiam minthang Vungkhanching toh houlimna

Lasiam minthang Vungkhanching toh houlimna

Written by  Sd Khuptong Published inInterview Sunday, 28 September 2014 18:55
Lasiam minthang Vungkhanching toh houlimna

1980s, 1990s vel a kipan Guite Kual leh i gamsung a lasiam a minthang Nu Vungkhanching in audio record a bawl masakpen ahihleh "Lunggulh dang nei ke'ng" kichi Manga leh Ngaihching toh a bawlkhawm uh ahi. "Lunggulh dang nei ke'ng" kichi ahihleh Audio Cassette a kibawl hi a, hiai a late lak a tamzaw V. Siampu phuah hi'n Nu Vungkhanching in gen hi.

 

Tua zawh in Zogam Artist Assn (ZAA) in 'Tunnu Zogam' Vol - I a bawlna ah Kapsangkhum in a phuah leh V. Siampu'n a kaih a bawl "Buh-al khuang e, Lailung kuai e" chih la siamtak in sa a, hiai la tungtawn in minthanna thupitak ngah in tunitan in hiai la pen tullou hi. Hiai la toh kisai Nu Vungkhanching in a genna ah, "Heutupa V. Siampu'n ZAA Album ah la khat hongsa in chi'n a hon zawn a, lasiam dan a kikoih ngeilou ka hihman in kilawpna nei mahleng zumhuaisakna lungsim ka nei hi. Tua ziak in hiai la record dia Studio ka lut in, Pathian kiang ah panpihna ka ngen a, cassette honkhiak zawh in mi tamtak a kipan kipahpihna ka zakte'n Pathian in ka thumna hon dawng ahi chih hon phawksak" chi'n gen hi.

 

 

"Tunnu Zogam" Vol-I a la khat record a bawlnung in, Nu Vungkhanching in "Vanglian Jehovah" leh "Nampi Mosi" kichi video album nih August 2012 in hongkhia hi. Hiai album tegel ahihleh a pasal Rousang Valte makaih a, a bawl hi a, album a late leng a tamzaw V.Siampu leh a pasal Rousang Valte phuah ahi. "Vanglian Jehovah" leh "Nampi Mosi" album bel Gospel leh  Social Gospel Song (Gam Ngaihla) hi a, huai lak ah "Nampi Mosi" kichi la pen hoihsa leh ngaisang mahmah ahihdan gen hi.

 

Hiai a tung a album nihte ahihleh India gamsung a Hill Station minthangpente lak a khat Himachal Pradesh a om Manali leh mun tuamtuam banah Songtal a 'motion picture' bawl ahihziak in, video album tamtak sang in tungtuangzaw hi.

 

Pianpih a la siam na hi hia ahihkeileh kisintawm a siam na hi hia ? chih dotna a dawnna ah, lasak kisin chih theihna ding neituanlou ahihdan leh function tuamtuam a lasa a pan zelte a kisinna himai ahihdan gen hi.

 

 

 

La lam a makaihtu leh hiai tan tuntunte:

Nu Vungkhanching ahihleh a neulai in Imphal a Brighter Academy a school kai a, huai lai in tulel a Evangelical Bapstist Convention Saptuam a Dorcas Co-ordinator Heutunu Liankhoman in tuailai bangzahhiam kaikhawm in Gospel Music Team bawlkhia a, huai lak a tel in Biakinn khong ah phatna la sa zel uhi. Huaiziak in la lam a hiai tan a tunna dia ana bulphatpih leh makaihtu Heutunu Liankhoman tung ah kipahthu gen hi.

 

Brighter Academy, Imphal a class-VII a zawhnung in Singngat a Hill Model High School ah class-VIII sunzomnawn a, huai ah leng Modelites Music Group a tel in Siamsinpawl Khawmpi leh function tuamtuamte ah la ana sa zel uhi.

 

Maban a tup-le-ngim :

Maban ah album bawlnawn na sawmlai hia ahihkeileh tup-le-ngim chih khong na nei hia ? chih dotna Nu Vungkhanching in a dawnna ah, bawlzou ngeingei ding chih hikeimahleh Pathian in lem a sak leh "Khristmas La" bawl lunggulh ahihdan gen hi. Himahleh tulel dinmun in bel innsung nu ahihman in buaina tuamtuam om a, hiai hun a bawlkhiak ding chih bel genchiangthei nailou hi.

 

Artist ngaihsangte:

Artist-te lak a kua na ngaisangpen a chih dotna Nu Vungkhanching in a dawnna ah, amah la phuahte mah sa leh la tamtak ana phuak a, a la phuahte tunitan a leng tullou leh gam ngaihla a phuahte leng tunitan a diktou lailai V. Siampu ngaisang pen ahihdan gen hi. Tua banah V. Siampu pen amah (Vungkhanching) bang a mi lak a lasa ngamloute tawsawntu leh dopsangtu ahihdan gen in, gam-le-nam itna diktak nei mi hi'n gen hi.

 

Numei lam ah ahihleh tunitan a leng a 'aw' hoihna kiamlou leh Pathian la mah ana sa tawntung Cingsan ngaisang mahmah ahihdan gen hi.

 

Hinkhua sukha pen la :

Na lasakte lak a bangla in na hinkhua ahihkeileh na lungsim hon sukha pen a chih dotna a dawnna ah, Rosiamlian in a phuah "Honpi In" chih la in a hinkhua sukha pen ahihdan Nu Vungkhanching in gen hi. Hiai toh kisai a genna ah, nidang in koi mun peuh ah lasakna ding omleh kihohthei a, hiai a hohleng hichi ding chih ngaihtuahna leh huai a tel pen hoihlou ding ahi chih ngaihtuahna bangmah neilou himahleng Pathian in honpi a, thil hoihloute a pan hon na pikhezel ahihdan hiai la tungtawn in ka theikhe thakthak chi hi. Tua banah a hinkhua a hiai tan a tuntheihna pen Pathian' pina ziak ahihdan leng gen hi.

 

La phuaktute mangngilhlouh hoihsa:

Pathian la, Social Gospel Song (Gam Ngaihla) leh Zawlla hita leh a hong piankhiakna ding in mi khat in a hinkhua a haksatna hiam kipahna ahihkeileh veina liantak a neihziak a hong piangkhia ahihman in la satute'n a lasakte uh phuaktute a mangngilhlouh uh hoihsa ahihdan gen hi. La siam mahmah khat in la hoihtak a sak pen koi a hong kipan a, bangchi bang a hong piangkhia hiam chih a theihban ah, tua la a sak ding chiang a, a phuaktu taklat pen a laphuaktu pahtawina hilou in thil kilawm ahihdan leng gen hi.

 

"Vanglian Jehovah" leh "Nampi Mosi" video album in koitan dengpha hiam, hiai album tungtawn in 'feedback' bang a chi a chih dotna a dawnna ah, hiai album in i gamsung mun tuamtuam a den banah USA, Burma leh Mizoram tanpha leng tung a, Burma a pan kipahpihna thu tamtak a ngah banah Mizoram ah leng Local Channel tungtawn a khahkhiak hisek ahihdan gen hi.

 

Album bawlpen sumdawnna chinglou

Album bawl kichi nekzonna leh kingaknatak ching hiam chih dotna a dawnna ah, album bawl pen sumdawnna ding hileh sumdawnna ching zoulou ahihdan gen hi.  A ziak ahihleh nidanglai dan a "Audio' vuak a bawltheih hinawnlou a, album i bawl leh video toh a hihteitei ngaita ahihman in, a 'capital' na tawm muhlouhtheih ahihdan gen hi. Hiai toh kisai in i lasiam leh artist-te mipi'n tawsawndan siam a, hun leh tha banah sum tamtak seng a video album kibawlte kizahtaksak a, phalna bei a 'write/copy' chihte chiinlouh deihhuai a sakthu Nu Vungkhanching in gen hi.

 

La lam toh kisai khantounna di'n

La lam toh kisai tua sang a i khantouh zawkna ding un bang kitasam lai hi'n na thei a ? chih dotna Nu Vungkhanching in a dawnna ah, Zogam Artist Assn [ZAA] hiam ahihkeileh Agency/Company khat omthei henla, gam khangtoute bang in album bawl ding a chitna leh siamna neite etkhiak masak hithei leh album i bawlkhiakte uh hoihzawlai ding hi'n gen hi. Tulel dinmun in bel album bawltheiteng in kibawl a, a hoihkei chihna ding omkei mahleh a zuakna lam ah haksatna omthei hi. Lapawl hi in mimal hita leh Agency hoihtak nei in, amaute'n pha a sakte un album bawl hileh tua sang in la lam ah kikhangtou zaw ding a, a zuakna lam leng baihsamzaw in a bawltute a ding inleng sumpi tanpha man ding launa omlou ding hi'n gen hi.

 

Khangthak lasiamte kiang a thuchah

Mizo lasiamte lasak a pau theilou Meiteite nangawn in ngainuam uhi. Banghanghiam chih leh amau a hihtheihtawp in kisin ua, album a bawl peuhmah uh 'quality best' a bawlkhiak teitei a sawm ziak un album a baw peuhmah uh lawhching hi. Huaiziak in khangthak lasiam album bawl dingte'n siamna neisa pen kisin beh a, a hoihtheipen dia bawl hileh chih a deihthu gen hi.

 

Tua banah lasiam leh album bawltute theihdia hoih ahihleh i lasakte'n a mi zawh theihna dia gamtat khohei leh kampau tanpha a pilvan poimawh ahihdan leh omdan hoihlou in lawhchinna ding naktak a dalkha thei ahihdan gen hi. Huaiziak in lasiam leh khangthak artist-te'n 'character' hoihtak kembit a, zu leh sa a kibuallou ding inleng hasuan hi. Huai banah kicheidan tanpha a leng mite ettontak ding a kicheina kilawmhun zat poimawh ahihdan leh a khengval a kicheinate'n mite etdan tuamsakthei ahihdan leng gen hi.

 

Tua lou in, khangthak lasiamte'n 'aw' hoihna dia tep-le-nuam leh chindan hoihloute a pan kikemsiangthou ding in ngen hi.

 

Lamka Post in local artist-te tanchin tomkim hiai bang a hon kitaklat zel pen bang ngaihdan na nei a ? chih dotna Nu Vungkhanching in a dawnna ah, hiai bang a artist-te tanchin taklat a omzel pen kipahpih mahmah ahihdan leh artist-te puakgik leh ngaihdante puankhiakna hoihtak ahihziak in, kipahpih mahmah ahihdan gen hi.

 

 

 

 

Profile

Min : Vungkhanching @ Vungnou

Pianna Khua : Singngat

Piankum : October 11, 1967

Pa Min : L. Khamsiam

Nu Min : Pamnu

Pasal Min : Rousang Valte

Pasal Neihkum : March 20, 1996

Ta neihzah : Tapa 2 [Muansiam Valte, Class XI, St. Paul; Siambiakthang Valte, Class X, Young Learners' School]

Address : Vengnuam, Khupching Road, New Lamka.

 

Read 1101 times Last modified on Sunday, 28 September 2014 19:15

  • phualva
    phualva
    Monday, 06 October 2014 08:22

    la sak siam peuhmah ei!
    a tamsem honsa lai ou

Login to post comments