You are here: HomeArticlesMusicsPupa’ La

Pupa’ La

Written by  Vz Vualnam Published inMusic Monday, 21 October 2013 23:27
Pupa’ La

~By: Vz Vualnam

Khangthakte’n i pupa’ la toh kisai theihna i nei tawm mahmahta ua, thei hetlou leng i hisim lim uhi. Huaiziak in pupa’ la toh kisai i theihtel theihna di’n tamlou kikum ni.

 

 

Pupa la i chih la tuamtuam tampi hi a, ahun leh amun zil a kisa ahi. Tuate avek in bel theikim khang in, i theih zahzah kikum ni.

 

 

Zangta la:

Zangta chih tuh zanggam mi, adiakkhol in kawlte (burmese) ana chihna deuh uh ahi a, tuate athah chiang un la kaih khat sa in laam ua, tua a lasak uh tuh zangta la akichi a, alaam tuh zangta laam kichi hi. Himahleh kawlte hiam, phaizaang mite kia athah chiang ua asak uh bel hisamlou zel hi. Gal la chi le hang adik ding hi. Sa-le-gaal a kinei mi ahi ua, sa-le-gaal amat chiang ua asak tangpi uh ahi. Himahleh sa-le-gal kialou in leng, khua-le-tui toh kisai, lungzuanna toh kisai, nungak toh kisai leh thil tuamtuam toh kisai leng zangta lakaih in saktheih veve hi.

 

 

Zangta la leng kaih chinih-chithum omsawn lai hi. Zangta la ngeina, Mualpi zangta lakaih kichi leh Bukpi zangta lakaih om hi. Bukpite’n amau zangta lakaih kineih uh ahiman in zangta la ngeina pen zangta lakaih a simlou in ‘sannem lakaih’ ahisak uhi. Hiai tegel baan ah Lousau zangta la kaih leng omlai hi.

 

 

Zangta la tampi mahmahte’ lak a tamlou chick taaklang ni:

 

Bukpite zangta la:

 

 

Ka dou aw e, ka dou aw e
Ka dou kawlpite aw e
Ka dou kawlpi saumang tuunnu’n
Ka hehluat neem zoulou e

Dou lah neemlou ei lah neemlou
Kua aw i neem saam diam aw
I neem saam diam seinou vual aw
Dou’ lu lah alva’n bawm e

Ka tem aw e lunlai tem aw
Zaangsuang ah va nawl ing e
Zaangsang ah va nawl ing e
Ka dou luunlai saat ing e

 

 

Mualpi zangta la:

Mualpi ka vangkhua aw e
Zin leh leng baanna aw e
Zin leh leng baanna aw e
Ngousai tuang tunna aw e

Mualpi ka vangkhua aw e
Khuva leng in khuplah e
Khuva leng in khuplah ta e
Sabuaivom in nawklah e

Pupa’ khuamual sangsing leel ah
Sumlu biing bang khai ing e
Vontawi teng toh ka kawlchiang toh
Leidou manoh zel ung e

Khuakiim aw hon nehlou aw
Sakamkei bang gial ing e
Sakamkei bang gial ing e
Ngousai ing hansuang daw’ng e

 

 

Sannem la:

Sannem la tuh nungak leh tangval kingaihna, leitung hinkhua leh lungzuannalam chihkhawng ahi a, himahleh thil teng leng ahithei veve hi. Sannem lakaih leng chitampi omsawnlai hi. Khua atuam dungzui in lakaih tuam kineih theizel uhi. Zuneekna mun khawng a asak mundeuh pawl uh ahi.

 

 

Anuam in bang anuam hiam aw
Zua’ lam lensialki leh khuang nuam e
Zua lam lensialki leh khuang nuam e
Ziin lailenkal tang bang dam nuam e

Pham masa ding mel kitheilou
Maimit kisuansuan ni e lawm e
Maimit suan a houlung chimlouh
Mel kimuhlai chi ni e ngaih aw

I aw sannem nang toh tualsung khat ah
Nang toh zaanglawi bang thang le’ng chi’ng e
Nang toh zaanglawi bang than le’ng chi’ng
Besam puaksiam phualgia bang ke’n zuun le’ng chi’ng e

 

 

 

 

Ton la/ Sialsut la:

Ton la ahihke’h sialsut la kichi tuh a ton/sialsut chiang ua asak uh ahi. Tong/sialsun kichi tuh mi neizou leh that leh manzoute’ nopbawlni ahi a, sagou in zu-le-sa toh khozaang in nuamsa tak in om uhi.

 

 

Kiang toh ka lam sawmsial aw e
A kii ngousai ha bang e
Kiang toh ka khoh setang aw e
Khokhang leenli vei bang e

Gam a sesing munmuang ta e
Taang i nu’n sial in la’ng e
Taang i nu’n sial in latah e
Gamsing bang mang song aw e

Sim a hong suak sawmsial lian aw
Pusei tonsawl ziingsak e
Pusei tonsawl ziing nuai ah aw
Tuunliang mu bang ngai ing e

Ka sial aw e sialtum kaang aw
A kii tangtawi ka lapna e
A kii tangtawi ka lapna aw
A phaw laltang ka nohna

 

 

Lakhiang la:

Lakhiang la tuh hunbi nei leng hituanlou in lunglen hun khawng ua asak maimai uh ahi.

 

 

Lakhiang la leh tang a mi kilawm e
Kho lentawm leh haudoh tuang kilawm e

Lakhiangla sak bang puang e sen a gual
Kha i kiak leh kulsin ah baang na hi te

Khake le’ng lah koi laidiip dap pua’n teh
Omlai aw gi bang ei hawi maita aw

Lung kituak geel neihtong chiandal ging bang
Gaal a zaak in sing lengtal khuan toh lawm e

Singlengtal khuan thang khokhaal toh lawm e
Limsing dangkai deih lungzuan toh lawm e

Singlengtal aw kha na keta hiam aw
Nahsing nuai teng gialtui bang adai e

Michin suihlung zuanna di’n singlengtal
Al bang mangsa kotsial bang asuak e

Al bang mangsa kotsial bang asuak e
I tuun khakia kotsial bang suakmoh e

 

 

Ailawng la:

Ailawng la leng lakaih kithang mahmah khat ahi nawn leuleu hi. Sak hun tumta omlou a kisa khat ahi mai ding e. Hiai leng utut saktheih lakaih khat ahi nawn hi.

 

 

Ningzu khum tulmoh henla dawndawn le’ng
Thai lianu tulmoh henla kawikawi le’ng
Ningzu khum bang tang’ sakluang dawn nuam ve’ng
Solkha bang val lou bang tulpih nuam ve’ng

U-le-nau simthu kidawn diildial ni
Tou chiilchial in siambel tu bang chiing le’ng
Tou chiilchial in siambel tu bang chiing le’ng
I hawmkhelh zong ziin’ hawmkhelh chi ve ni

Tuun’ nial zua’ nial ngaih aw heisa suak le’ng
Tul i leel ah nuun khat in kaiton le’ng
Tul i leel ah ei nuun khat in kaiton le’ng
Gual i lohlah ding in aw sang tuam le’ng

 

 

Latawm la:

Latawm la leng lakaih poimoh mahmah khat ahi nawn hi. Hiai lakaih in leng utut saktheih leuleu hi.

 

 

Temtaat khi leh Kalzang bu e
Dai ah mawng bang ka peempih e
Zakai pa aw e

Dai ah mawng bang ka peempih e
Hauta na tongsuah neem aw e
Lalphung u aw e

Tengtong leng mauhing kaal ah e
Muvanlai bang lengtuak e
Zamang u aw e

Ka lawmnu na pai masa aw
Dallawn tuisiang na thaal aw e
Dimhau u aw e

Deih toh ningzu ka dawnna e
Khimziin laitual ka lenna e
Aitang zawl aw e

 


Sazolh la/Salu la:

Hiai tuh samat hun chiang khawng a kisa deuh ahi:

 

 

A sa hong lawi aw sachih hong lawi aw
Bualzang a sa hong lawi inla sachih hong lawi aw
A mi hong lawi aw michih hong lawi aw
Kawlzang a mi hong lawi inla michih hong lawi aw

 

 

Khodou la:

Khodou chiang a kisa, Thanghou’ la ahi:

 

 

Douna lingling douna lingling e
Gual in khumkhua douna lingling e
Gual in kumkhua douna lingling e
Dou’ haan ah nau bang va kap ta’ng e

Zawl La:

Zawl la leng lakaih kithang mahmah khat ahi a, ut peuhpeuh sak theih hi.

 

 

Hiai atung ate lou leng tampi, lakawi la, Silap la, Huihnung la, Laphei la, Simai la,la-ngui la, la tahtuan, lapaak la, Chianchiin la, Khupching leh Ngambawm la, Thanghou la, Chilzang la, Chiantuang la leh adangdang tampi om a, theihseng a gelhseng ding leng hilou hi. Lasak kia hilou in a tumthoh kia (instrumental) bang leng om hi. Tuate tuh daak la leh phiit ahi. Theih dia poimoh bel hiai laminte a kaihmin hilel zaw ahi chih ahi. La dang teng kaih zang in la na utut na phuakthei hi. Himahleh mi’ min nei, Khupching leh Ngambawm la, Thanghou la chihte bel akaih kila khollou taangpi hi.

(La kisate a kigelhte sese ahikei a, akaih theihna ding lel a kikhoih ahi. A tung a i gelhte toh kituak bang leng omkha ding a, kibanglou leng omkha ding hi).

 

 

Ahihleh tu a khangthakte’n hiai i pupa’ late uh bang loh ding i hi ua? Mangthang sak mai ding i hi uh hiam? Huai tuh tu a i hih lellel uh ahi a, hihkhial i hi uhi. I zuun a, i kepbit ding uh ahizaw hi. A hidantak (originality) a kepbit tuh apoimohpen ahi a, huchih kawmkawm in tulai khovel toh kituak a heikawidan bang leng i zon ding uh ahi. Jazz, blues, rock, pop leh adangdangte toh gawmtheihlua hi. Hiai ding in khangthak lasiam leh tumging tumsiamte kisa ni.

 

 

Mi’n a pupa’ late uh bang loh uhiam:

 

 

 

 

 

 

Read 3706 times
Login to post comments