You are here: HomeNewsWorld NewsInternationalChina-Myanmar gas pipeline zat hita

China-Myanmar gas pipeline zat hita

Written by  Published inInternational Tuesday, 22 October 2013 15:12

BEIJING, Oct 21: Zan a kipan China-Myanmar gas pipeline zat a omtaak dungzui in China in Myanmar apan hiai pipeline tungtawn in gas laklut panta hi. Hiai project ahihleh gam nihte’n $2.5 billion bei a thautui leh gas lakna ding a kilemna a bawl tungtawn ua sepkhiak a om hi’n kigen hi.

 


China National Petroleum Corporation ( CNPC) in a taklatdan in hiai gas pipeline tungtawn in China in Myanmar a kipan kumteng in natural gas 12 billion cubic ngahthei ding a, huai in suangmeihol (coal) a kingakna pen kum khat in 30.72 million ton in kiamsak zou ding chih taklang hi.

 

 

Hiai gas pipeline ahihleh China leh Myanmar in project tuamtuam a neihte lak a khat hilel a, project dang patnawn ding gamnihte’n a neih uh ahihleh China gam Yunnan province leh Myanmar kal lamlian bawl ding chih ahi hi. Hiai lamlian bawlding pen India gamgi toh a kinai mahmah ziak in China leh Myanmar kawmtuahna ding lamlian bawlna ding toh kisai India in lemsakpihna a bawl poimawh ding in kilang a, himahleh tunitan India in bangmah gen nailou hi. Huailou in China in Myanmar toh gamgi zul ah thautui laisuahna khat bawlkhiak sawm a, huaiding in Myanmar a Naypytaw mun ah tuilam (irrigation) project khat a bawlkhiak masak poimawh laiding hi’n thusuak om hi.

 


Thusuak in a taklatna ah, China in sumdawnna lam a India demzawh teitei sawm in muhkikna ding omloute nangawn ah leng Myanmar gamsung ah project tuamtuam pankhia a, India apan companyte nohkhiakna ding in Myanmar deihsakna ngahsawm in pan naktak a la hi’n taklang hi.

 


Hiai pipeline nasepna ziak in kum beisa in Myanmar sepaihte leh Kachin Independence Organization-te kal ah kitheihsiam louhna thupitak piangkhia a, galvan tanpha zat in om hi. Huaiziak in Kachin state a kipan in mi tamtak China ah galtai uhi. Hiai project ahihleh 2010 kipan hita a, kilometre 2,520 in sau a, Myanmar gamsung ahihleh kilometre 793 lel ahi hi. (TNN)

 

 

Read 743 times
Login to post comments