You are here: HomeRSS FeedsThe Lamka Post

The Lamka Post | March 13, 2017

Monday, 13 March 2017 08:18

BJP Parliamentary Board in Amit Shah tung ah CM ding thupukna thuneihna sangpen pia

New Delhi, Mar 12: BJP Parliamentary Board in UP a legislature party makai thak ding telna ding a central observ­er ding in senior party makai leh Information and Broadcasting Minis­ter Venkaiah Naidu leh party General Secretary Bhupendra Yadav-te guang uhi.

 

Uttarakhand a ding a observer ding in Union Minister Narendra To­mar leh party leader Saroj Pandey-te guan in om ua, Manipur a ding a observer ding in Union Minister Piyush Goyal leh party makai Vinay Sahasrabud­dhe-te guan in om ua, Goa a observer ding in Union Minister Nitin Gandkari guan in om hi. Union Minister J P Nadda in a gendan in, Board in BJP President Amit Shah tung ah, observer-te a kipan report a ngah zoh chiang in, Chief Minister taktak dingte telkhiak theihna thuneihna sangtak pia hi.

 

 

Manipur Govt formation:

BJP in Manipur a Govt bawlna dia number poimoh zah nei hi’n gen, Governor kimuhpih ding

IMPHAL, March 12: Manipur a party min­loh leh genphak a leng om ngei leng hilou BJP himahleh tunai zek a zohsiang a om state as­sembly election ah seat 21 luah ua, tuni Pathianni nitak in state government bawlkhezou ding uh hi­dan in kikhamna chikhat bawl ding uh chih ahi.

 

Press conference a senior party makai Ram Madhav in a gendan in, state BJP makaite’n gov­ernment bawlkhezou ding uh ahihdan theisak ding in Governor kimuh­pih pahta ding uh chi’n gen hi. Assembly House member 60 omna a ma­jority hihna ding in BJP in seat 10 poimoh lai ua, himahleh member kich­ing nei khin uh hidan in gen uhi. Seat 28 luah Congress in single larg­est party hihna luah a, himahleh government bawlna ding in member kidaih ngahzou tuanlou hi.

 

Nikum a BJP zom Assam akipan BJP makai thil hihthei mahmah Hi­manta Biswa Sarma in a gendan in, MLA 30te laithonte kep hilel a, a 31na in a laithon Gover­nor kiang ah khak ding hi. Governor in member kiching nei uh a hih­dan notification a suah­khiak poimoh a, Inpi a floor test ah chetna piak hiding chi’n gen hi. Mr Madhav in a gendan in, BJP in National People’s Party(NPP), akizoppih Ram Vilas Paswan’s Lok Janshakti Party(LJP) leh Naga People’s Front(NPF)-te toh kithei­hsiamna neithei gige chi’n gen hi. NPP MLA 4 leh LJP MLA 1 in a hon nungthuap ua, member khenkhat leng BJP toh om khen den ua, Inpi a floor test ah chetna bawl hiding a, Congress gov­ernment kalh a thunei­hna laksuh ding chih a hih ziak in, non-Congress party-te pangkhawmvek ding uh chi’n gen hi. Naga People’s Front in non-Congress government a hih nak leh nungthuap ding hidan in puangkhin hi. Lok Sabha Speaker lui PA Sangma in a phuhkhiak regional party NPP inleng, gupna piak ding thu ah tunitak a thupukna bawlfel sawm chih ahi. Hiai party nihte’n seat 4 tuak nei ua, nikum a As­sam assembly election a BJP in vualzohna a ngah nung a kikhuikhawm anti-Congress party-te front organisa­tion North East Democratic Alliance(NEDA) ah leng telkha tuak uhi. Manipur a government bawlkhe ding a BJP in panlakna a neihte a lohchinpih leh, Manipur kichi Northeast a BJP in a thuneihkhum state 3na hita ding hi. Nikum in BJP in Assam a assembly election ah vualzohna ngah hi. Arunachal Pradesh in leng BJP gov­ernment nei hi.  

 

 

Guv leh CM in Yaoshang message khak

IMPHAL, Mar 11: Manipur Governor Dr. Najma A. Heptulla leh Chief Minister O. Ibobi in tuni, March 12, 2017 a kipan Yaoshang festi­val toh kisai in Manipur mipite deihsak thukhak uhi. Governor in a tak­latna ah, Holi leng kichi Yaoshang in lungsim ngaihtuahna thaksak a, kipahna leh ngaih­tuahna thak hon tut ziak in kituahlouhnate leng manghilh in kipumkhat­na omsak hi’n taklang hi. Yaoshang kichi sahkhua toh kisai festival ahihban ah kimawlna sports lam chituamtuam a zat leng hi a, huai tungtawn in Manipur gam nuam leh muanna gam suahsak sawm chiat ding in mipite deihsak thukhak hi.

 

Chief Minister O. Ibobi in mipite deih­sak thukhak kawm in Yaoshang kichi Manipur a dia nopbawlna (festival) thupipen hi a, naupangte a kipan upate tanpha a dia kipahna hun nuam hi’n taklang hi. Huaiziak in Yaoshang festival tung­tawn in Manipur a nam (communities) tuamtu­am omte lak ah ki-itna, kituahna leh kipumkhat­na kipsem a omsak deih­sakthu puang hi. Huailou in GOC Red Shield Divi­sion in Yaoshang festival ding toh kisai in Manipur mipite deihsak thukhak hi. Aman Manipur ah Leikai tuamtuam a Yo­ashang hun in sports lam ah kidemna tuamtuam om a, Yaoshang festi­val toh kiton in mipite’n kituahlouhnate koihkhia in kipumkhatna leh ki-itna ban ah muanna leh bitna a tut ding a deihthu taklang hi.

 

 

SSPP Tuivai Block in school 5 veh

LAMKA, Mar 11: Siamsinpawlpi (SSPP) Tuivai block President D. Tuankhanlal makaih in Vice President Gou­biaklal, Secretary Jamza­vum Guite leh Asst. Secy Songgousuan in March 9 & 10, 2017 in SSPP Tuivai block huamsung a Unit 4 – Thuangtam, Mualnu­am, Songtal, Khuanggin leh huai khua a siamsin­na inn omte lohchingtak in vehna neizou uhi. Huai hun­sung in Unit heutute toh pangkhawm in siamsin naupangte toh kithuah khawmna hun zang ua, siamsinna lam chitua­mtuam omte pulakna leh kisinsakna hun zang khawm uhi. Hiai hun ah SSPP’ panlakna sate pu­lakna leh maban a pan­laktouh dingdan leh sep­suah ding a gelsa omte leng pulak uhi. SSPP Tuivai block in Unit-te vehna ding a gari zang­saktu Thanglianpau tung ah kipahthu gen uhi.  

 

 

NPP candidate in Worker-te kimuhpih

LAMKA, Mar 12: Tuni, March 12 sunnung in Hebron Veng, New Lamka a Salem House ah Ex-Minister Phung­zathang Tonsing, NPP candidate, 58-Ccpur AC in worker-te toh meet­ing nei uhi. Hiai hun ah NPP candidate in, kilchih a pan doudalna leh hak­satna tamtak kal a dei­hsaktu mi hiai zah omte ziak in kipahthu gen hi. Huai ban ah tutung elec­tion a lohsapna a tuahte ban ah thiltung tuamtua­mte leng pomsiam ahih­dan gen in deihsaktu leh ngainatute’n leng thei­siam ding in ngen a, khat­vei tei lohchinna ngahn­awn ding i hi uh chi’n deihsaktute khamuan hi.

 

 

Irom Sharmila in politics tawpsan

IMPHAL, Mar 12: Manipur ‘Iron Lady’, Irom Sharmila in elec­tion result a suah toh kiton in, politics tawpsan ding ahihdan taklang hi.

 

Irom Sharmila in Thoubal constituency ah Manipur Chief Min­ister Okram Ibobi Singh maituah a, vote 90 lel mu in nakpitak in zoulou a, Chief Minister hihna 3-vei ana lenta Ibobi in vote 10,740 mu in nua­mtak in zou hi.

 

Right activist, Irom Sharmila in Armed Forc­es (Special Powers) Act (AFSPA) lakkhiak ding tungtang, ann ngawl a kum 16 sung vingveng a campaign na nikum a, a khawlsan ziak in mipite’ thangpaihna maituah hi.

 

Vote sim ni ding in Sharmila in, a chin kei leh 2019 national elec­tion a ding nawn ding ahihdan gen hi.

 

Sharmila in elec­tion result in buaisaklou chi a, mipite’n sum leh mimal thahatna zat a om ahihdan thei chiang mahmah hi chi hi.

 

 

Class X & XII exam dingte hasotna leh thumsakna nei

LAMKA, Mar 12: Lungchin Welfare Com­mittee saina in tuni sun­nung dak 12:30 in Upa. N. Chinkhanlian’ inn, Elim Veng New Lam­ka ah tu kum, 2017 a Lungchin khomi Class X & XII exam dingte ha­sotna leh thumsakna programme nei uhi. Hiai hun ah Upa. G. Pumchin­thang, Vice Chairman, LWC in vaidawn thugen a, Lianzapau Samte, President, SSPP-GHQ in hasotna thugen hi. Hiai hun a SSPP president in a genna ah, Pathian phawk kawm a, Laisiangthou a kibulphuh siamsin hid­ing in naupangte hasuan a, tup-le-ngim kichiantak nei a laisim ding ahihdan leh mahni kithununna hoihtak nei a kuhkaltak a laisim a poimohdan a gen ban ah, mahni a ding kia a lai simlou a, sungkuante leh khotang a ding tan a phatuam dia laisin ding in hasuan hi. SSPP-GHQ President in a genzelna ah, i khotang uah ‘law’ toh kisai tak­sapna lian mahmah ahih a, i lak ua research scholar kitawm lua ahihdan gen hi. Tutung a class X leh XII exam ding student-te’n lo­hchinna sangpen a ngah uh deihsakthu khak in a thugen zou hi.

 

Pastor(Rtd) H. Laithang in Mosi tangthu a pan in exam ding nau­pangte hasotna a neihzoh in thumsak a, LWC a pan in leng member leh advis­er-te’n hasotna a neihzoh un Upa L.Tualzanang, Finance, LWC in kipahthu genna nei in, G. Luaik­hothawng in thumna in hunkhak hi. Hiai hun ah tu kum a Class- X exam ding mi 17 leh Class- XII exam ding mi 6 tel uhi.  

 

 

Ni 9 sung Police Custody ah om ding

LAMKA, Mar 11: Police-te’n zan, March 11 in Mr K. Doukhum (36) s/o K. Nengzalian of Elim Veng; Th.Thonglunthang Simte (30) s/o (late) Lamhau of Simveng leh T. Haulallian (30) s/o (late) T. Khamzathang of Gangpimual, Chief Judicial Magistrate/Cc­pur court ah dingsak ua, court in March 20, 2017 tan Police custody ah om ding in phalsak hi. Mi 3-te ahihleh March 5, 2017 nitak a Lamzang khomi pasal nih - Thangmuansang (27) s/o (L) Goukhansuan of Lamzang leh Thangsuan­mang (18) s/o (L) Zam­khanpau of Lamzang, pimang leh soisakna toh kisai a mat a om hi uhi.

 

Hiai toh kisai in Police-te’n March 6, 2017 in Thangsuanlal (31) s/o (L) Goukholian of Thang­nem Street, Elim Veng, New Lamka leh Thang­khanlun Samte (31) s/o Lalzahau Samte of Beau­lahlane, Central Lamka mankhia ua, March 8, 2017 nitak in Ginzomsang (40) s/o Chungkhohen of Chiengkonpang mankhia uhi. Hiai toh kisai in Po­lice in FIR No.13 (3) 2017 CCP-PS U/S 400/34 IPC registered uhi.  

 

 

Offset Operator Training ding kideih

The Lamka Post in Offset Operator Training-cum- Helper ding khat kintak in kideih hi. Huai ding a lun­glutna nei pasal kum 18 a pan a tunglamte’n min, pa min, address leh contact No. gelh in, mahni khut a gelh kingetna Lamka Post office ah office hour sung in piaktheih ding hi.

Kha loh ding ahihleh kihoulem dandan ahi ding a, ngetna omte lak ah Publisher in hoih a sakte in­terview ding in a sam ding a, sapkhaklouh om leh huaite’n buaipih ngailou ding hi.

 

 

Arunachal Govt in scheme thak Adarsh Gram Yojana pankhia

Itanagar, Mar 12: Arunachal Pradesh Gov­ernment in singtang bial a gentheitak a khosa mipite toh kizopna hoihtak leh a haksatnate uh dawnzang­khaina ding in scheme thak- Adarsh Gram Yo­jana kichi pankhia hi.

 

Prime Minister khuak pilna toh patkhiak a om Sabka Saath Sabka Vikaas toh kizawitawn in hiai programme patkh­iak in om hi. Hiai scheme nuai ah, circle khat a kho­ta khatzel huam in, khota 123te fiscal year 2017-18 sung ngei in ‘model vil­lages’ in puah hiding uhi. Infrastructure develop­ment a ding in kum nawn budget ah Rs. 93 crore bikhiah in om hi.

 

 

Manipur Assembly election:

Ccpur district a AC 6 ah BJP leh Congress seat 3 tuak in kihawm

LAMKA, Mar 12: March 4 leh 8, 2017 leh March 9 leh 10 a 11th Manipur Legislative As­sembly election leh re­poll zohsiang ahihnung in zan, March 11, 2017 in vote sim in om hi. Zan a vote simna ahileh zingkal dak 8:00 kipan a, nitak­lam dak 5 vel a zohsiang in om hi.

 

58-Ccpur AC ah BJP candidate V. Hangkhan­lian in sitting MLA leh NPP candidate Phung­zathang Tonsing khenkh­ia in telching in om hi. V. Hangkhanlian in vote 10246 mu in, amah zom in Phungzathang Tons­ing, National People’s Party in vote 9632 mu a, vote 614 in Hangkhanlian tamzaw hi. Amau gel zom in Paukhansuan Khup­tong, North East India Development Party in vote 6411 mu a, Thang­biaklian Hangzo, Repub­lican Party of India (A) in vote 3712, Chintwahlian @ C.T. Lian Guite, In­dependent in vote 3040, Haukhanthang, Indian National Congress in vote 535, Dr. D.K. Mang, In­dependent in vote 156 mu a, None of the Above ah mi 108 in vote khia uhi.

 

59-Saikot AC ah TN Haokip INC; Paukholal Haokip, BJP leh Holkhol­un Lhungdim, LJP lak ah Congress candidate TN Haokip telching in om a, aman vote 16354 mu in, amah zom in Paokholal Haokip, Bharatiya Janata Party in vote 11253 mu a, vote 5,101 in kikhia uhi. Holkholun Lhungdim, Lok Jan Shakti Party in vote 6096 mu in, None of the Above ah mi 189 in vote khia uhi.

 

55-Tipaimukh AC ah Dr. Chaltonlien Amo, INC; Dr Lallukhum Fi­mate, BJP; Ngurivung, Independent; Thangth­atling, Independent leh Ngursanglur Sanate, NPP lak ah Dr. Chalton­lien Amo, Indian Na­tional Congress telching in om a, aman vote 4997 mu in, amah zom a om Dr. Lallukhum Fimate, Bharatiya Janata Party in vote 4371 mu a, vote 626 in kikhia uhi. Huai ban ah Ngursanglur San­ate, National People’s Party in vote 2167 mu a, Independent candidate Ngurrivung in vote 132, Independent candidate Thangthatling Sinate in vote 106 leh None of the Above ah vote 25 om hi.

 

56-Thanlon AC ah Vungzagin Valte, BJP; T Nengzakham Tomb­ing, NPP; Dr Chinkholal Thangsing, INC; Thang­khangin Ngaihte, LJP leh P Khamsanglian, Inde­pendent lak ah BJP can­didate Vungzagin Valte telching in om a, aman vote 9752 mu in, amah zom in INC candidate Chinkholal Thangsing in vote 2583 mu a, vote 7,169 in kikhia uhi. Huai ban ah Thangkhangin, Lok Jan Shakti Party in vote 795 mu a, T. Neng­zakham Tombing, National People’s Party in vote 413, P. Khamsanglian, Independent in vote 107 leh None of the Above ah vote 37 om hi.

 

57-Henglep AC ah T Manga Vaiphei INC Con­gress; Thongjamlien, NPF; Thangzalam Haokip @ TTHaokip, BJP; Letza­mang Haokip, NPP; Mang­cha Gangte, MNDF leh Dr Jemson Haokip, AITC lak ah BJP candidate T Thang­zalam @ TT haokip telch­ing in om a, aman vote 11810 mu in, amah zom in INC candidate T Manga Vaiphei in 8153 mu hi.

 

60-Singngat AC ah Chinlunthang, BJP; Gin­suanhau, INC leh Hen­lianthang Thanglet, NPP lak ah Ginsuanhau @ GS Haupu telching om a om in vote 8131 mu a, amah zom in BJP candidate Chin­lungthang in vote 6969 mu in, NPP candiate Henlian­thang Thanglet in 3124 leh Nonte of the above ah vote 111 om hi.

 

 

Shaktiman tuahsia ah mi 6 si, 7 liam

LAMKA, Mar 11: Henglep Sub-Division huamsung a om Loilam­kot leh S. Nabil khua ki­kal ah March 10 nitak dak 9:00 vel in sing beam pua Shaktiman MN02-9527 tuahsia a, gari a tuang mi 6 si in midang 7 liam uhi. Hiai tuahsia a si leh li­amte Moirang Police-te’n gari 2 leh Army-te’n gari 1 zang in delh ua, first aid pia in zan sawtnung in a liamte Lamka Damdawi Inn puaktung in om ua, misi 6-te leng KKL Com­plex puaklut in om uhi.

 

S. Nahbil gamsung a tailai Shaktiman brake­fail in lamkhou phukha a, gari a singbeam henna sikkhau (chain) kitan in singbeam in gari a tu­angte delhkha hi’n thutut kingah hi. Shaktiman ac­cident ma in Shaktiman dang khat ah passenger bangzahhiam va tuang ua, huchi hilou hileh si leh liam tamzaw lai ding hi’n leng thutut kingah hi.

 

Shaktiman neitu ahihleh Md. Heladin of Kwakta hi a, zanhal ni­tak mah in KIC makaih in KKL complex ah gari neitute leh misi lamte kihou in Kuki custom­ary law dungzui in gari neite’n siluang 6 teng Saipikhup Puan in tuam ua, misi 6-te lukham (pillow) leh mit­tang (eye) ding in Rs. 12,000/- pia uhi. Huai ban ah gari neite’n “Hi­amkham & Kosah” a bawl ding uh, gari ac­cident-na mun S. Nah­bil gamsung suksianna ding a gan goh ding, a liam teng ki-etkolna a sum beiteng a piak ding uh leh April 11, 2017 ma a misi 6-te zangnadopna mi 1 ah Rs 1 lakh chiat piak ding ban ah misite a khua tan uh a puak­tung ding un kilem uhi. Hiai tuahsia a site ahihleh Henglep Sub-Di­vision sung a om Bolkot khomi Thangneh zi’ Tin­glhing (48) a tate mi 2 - Lamneithem (13), Lun­minlal (11), Bolkot khua a pan mah Upa Paolen tate 2 - Johnson (9), Kam­minlun (7) leh gari driver Thangjahao @ Haopu (27) s/o (late) Ngamsei of M.Gangpijang hi uhi.

 

Liamna tuak mi 7-te ahihleh Bolkot khua a om Upa Paolen’ zi Hoik­hovei (46), a mai liam in a kongguh nasa a, a tate 3 - Chungkholal (33), a taklam khe liam in a kongguh nasa a, Ben­jamin (12), a lu liam a, Lhunminsei (14) a lu liam hi. Mangkhopao (51) s/o Letkhoseh of Bolkot, a lu liam a; Lenpu (17) s/o Mangkhopao of Bolkot in a kongguh leh a ngawng­guh nasa in Solomon (27) s/o Letmang of Mata Lambulane in a taklam khe leh a ngawngguh nasa hi.

 

Hiai accident ah Bolkot khua a om Upa Paolen’ tate 2 si in a zi leh a tate 2 liam a, Bolkot khua mah a om Thang­neh’ zi leh tate 2 leng si uhi. Misi 6-te lak ah 5 teng zan zingkal in KKL Ambulance zang in a khua uh Bolkot pua ua, gari driver leng a khua uh M. Gangpijang ah pua uhi. Shaktiman accident-na mun pen Loktak Po­lice juridistion ahihziak in Loktak Police-te’n case la uhi.

 

 

 

 

 

 

 

 

NEWS TOMKIM

 

Curfew lakkhiak hita

LAMKA, Mar 12: District Magistate/Ccpur in March 7, 2017 a pan Hebron Veng, New Lamka ah 144 Cr.P.C 1973 tungtawn a Curfew a puan pen thuthak om masiah lakkhiak hita ahihdan taklang hi. Himahleh thuthak om masiah Hebron Veng leh New Lamka area sung a 144 CrPC koih hilai ding leh mun khat a mi 5 sang a tamzaw omkhawm phal ahihlouh ban ah hiamhei leh galvan tawikhiak phal hilou ahihdan taklang hi.

 

 

Suty ni 3 kizom

LAMKA, Mar 12: Manipur Govt nuai a office-te a kizom in ni 3 sung suty uhi. Huaite ahihleh zan, March 11 pen Second Saturday hi a, tuni, Pathainni ahihban ah zingchiang, March 13, 2017 pen Yaoshang suty hilai hi.

 

 

Kha 11 sung in gari 1224 registration bawl

LAMKA, Mar 12: District Transport Office, Ccpur ah April 2016 a pan Feb 2017 sung, kha 11 sung in gari tuamtuam 1224 in registration bawl ua, huai tungtawn in revenue collection Rs. 84,13,107/- mukhia uhi. Feb. 2017 sung lel in gari thak 126 in registration bawl ua, huaite ahihleh light goods vehicles 4, light passenger vehicles 4, diesel auto 4, car 27, jeep/ gypsy 6, bike/activa 80 ahi. April 2016 a pan Feb. 2017 sung in truck 5, medium truck 4, geavy bus 1, light goods vehicles 55, motor/car 178, jeep/gypsy 43, diesel auto 73, bike/activa 857 val in reristration bawl uhi.

 

 

YPA Elim Veng in ‘Etsan’ puang

LAMKA, Mar 12: Young Paite Assn., Elim Veng unit in tuni, March 12, 2017 a emergency meeting a neih hun ua thupukna dungzui in, March 5 a Lamzang khomi Mr Thangmuansang leh Mr Thangsuanmung pimang leh soisakna a kigolhkha hi a theih ahihman in thuthak om masiah, tuni a kipan Mr K Doukhum s/o K Nengzalian, ‘Etsan’ puang uhi. Huai ban ah tunung-tuban a unit member kuapeuh in YPA-GHQ thupuan zahtak a zuichiat ding inleng ngen uhi.

 

 

SUNNA:

Nemkhanching (58) w/o (L) Pautinlian of Tipaimukh Road, Hiangtam Lamka, cancer natna ziak in tuni, March 12 zingkal in si a, tuni mah in Lamka hanmual ah kivui hi. RIP.

 

Chiinkhoniang (78) m/o Pausanglen of G Mualkoi, zan, March 11 sunma dak 9 vel in cancer in si a, zan mah in G Mualkoi hanmual ah kivui hi. RIP.

 

 

 

 

 

 

 

 

…for more detail : here