You are here: HomeRSS FeedsThe Lamka Post

The lamka Post | February 04, 2017

Saturday, 04 February 2017 17:48

Congress in Manipur poll a ding in candidate 60-te list puangkhia

IMPHAL, Feb 3: Tuni Sintawpni in Con­gress Central Election Committee (CCEC) in, Manipur a term 4 a kizom a vualzohna ngah ding mitsuan kawm in, ruling Congress candidate 60te list puangkhia hi. March 4 leh 8 a 11th Manipur Leg­islative Assembly Election tuh ding candidate list 60te lak ah Chief min­ister O Ibobi Singh tapa Surjakumar Okram leh a sanggampa tapa Okram Henry-te leng tel uhi.

 

A paisa Nilaini a ki­pan New Delhi a kikulh chief minister O Ibobi Singh leh MPCC presi­dent TN Haokip banah Congress makaite’n hun sawtkuamtak houlimna a neih nung uh, zan Nin­gani a Congress presi­dent Sonia Gandhi in state election committee in lemsakpihna a piak candidate 60te a pompih nung in, tuni’n New Del­hi ah All India Congress Committee (AICC) Gen­eral Secretary Madhusu­dan Mistry in candidate list puangkhia hi. Candi­date list puankhiak ahih toh kiton in, list ah ruling party pawtsante chihlouh tulel a Assembly a Minis­ter leh MLA-te telkimvek uhi.

 

Candiddate list dungzui in, Ibobi tapa Surjakumar Okram in, a nu MLA O Landhoni in term nih a na let khitna, Thoubal district a Khang­abok Assembly constitu­ency a kipan in election tuh ding hi. Assembly poll hun kuan in, Landhoni in, kum 29 a upa a tapa in a nu-leh-pate khekhap a zuihtheihna ding lampi honsakna ding in, active politic a kipan ki-awngsut ahih thu puang hi.

 

List a telkha chiam­teh tham candidate dang khat ahihleh chief minis­ter O Ibobi Singh sang­gampa tapa Okram Hen­ry ahi. Aman Assembly pailel kimlaitak a Con­gress toh kigawm Mani­pur State Congress Party (MSCP) official nominee dan in, a khatveina ding in election ana tuh khinta hi. Ibobi government toh kikangtuah den leh party kibang a om veteran Con­gress makai leh minister lui Yumkham Erabot in November 2016 a Con­gress party pawtsan a BJP a zop nung in, Henry in vangphat huaitak in Congress ticket ngahthei hi. List a telkha candidate dan­gte lak ah Assembly election ding kuan a, party dang a kipan Congress party zom MLA dang 6 leng tel uhi. Manipur a national highway nih a UNC economic blockade pailel suk­beina ding a Centre a BJP makaih NDA government panla lou ahi chi a BJP a nutsiat ma a MLA ahihna a kipan kitawp BJP makai lui khat in Congress nominee dan in Thang­meiband A/C a kipan in election tuh ding hi. Senapati district a Tadubi A/C tuh ding in, Congress in, a lut thak RS Henry Hiilii guang a, aman Congress party nusia a BJP zom minister lui Francis Ngajokpa kibei­hpih ding hi.

 

Kum 2012 a state assembly elec­tion ah Congress in seat 60 lak ah 42 luah in, Ibobi a ding in term 3 thu­neihna len zom ding in lampi sialsak in om hi. Congress leh MSCP MLA 5te a kigawm nung in, tulel in Con­gress in MLA 47 nei hi. Kum 15 sung Congress in Manipur ah thuneihna lenta a, kum 2002 a kipan in Okram Ibobi Singh in chief ministerial post lentou den hi.

 

Manipur in March 4 leh 8 a phase nih a poll maituah ding ahih toh kiton in, Centre a ruling party BJP-te’n thuneihna a kipan Ibobi paikhiakna ding leh state a kipan Congress zungkalhkhiakna ding in campaign neitou den uhi. Janu­ary 23, 2017 in BJP in maban state election a party nominee ding in candidate 31te list suahkhinta hi. Himahleh BJP in Assembly seat 60 tuh ding candidate dang 29te min puangkhe nailou hi. Tuni a puangkhezou ding ua gintak himahleh hichibang thu zak ding om tadihlou hi.  

 

 

GoI, GoM leh UNC Tripartite Talks:

UNC in Feb 7 in blockade lakkh­iak ding thu genkhawm ding

Dimapur, Feb 3: Manipur Government in district thak 7 a bawlkhiak tungtang leh district thak bawlkhiak deihlouhna a national highway a hun­chiam omlou economic blockade bawl a om tung­tang genkhawm in tuni, Feb 3, 2017 in New Delhi ah United Naga Council (UNC), Government of India leh Manipur Gov­ernment in ‘tripartite talk’ nei uhi. Himahleh tuni a kihouna a tel UNC, Govt of India leh Govt of Manipur palaite’n maban a Manipur assembly elec­tion zohsiang ahihchiang a kihouna neihnawn ding in thupuk uhi.

 

‘Tripartite Talks’ ahi­hleh North Block, New Delhi ah nei ua, Govern­ment of India palaite Satyendra, Joint Secre­tary, Ministry of Home Affairs (MHA), in charge of North East in makaih a, tuni nitaklam dak 3 a pan kihouna kipan in nitak dak 8 tan kihou uhi. UNC palaite ahihleh UNC president Gaidon Kamei in makaih a Mani­pur Government palaite ahihleh Suresh Babu, Ad­ditional Chief Secretary in makaih hi.

 

New Delhi a pan thusuak in a taklatdan in, Manipur government palaite’n UNC makaite kiang ah hun bangtan­hiam economic blockade lakhe ding a ngen uh hi’n taklang hi. Huai ban ah UNC palaite’n a din­mun uh enthak ding leh ‘election model code of conduct’ ziak a Manipur Government in tu le tu a bangmah hihtheih ne­ilou ahihman in national highway a economic blockade bawl a om hun bangtanhiam sung lakhe phot ding a ngen uh hi­dan inleng taklang hi.

 

Manipur Govern­ment palaite ngetna UNC makaite’n a dawnna uah, economic blockade lakkhiak ding tungtang ahihleh UNC ‘presiden­tial council meeting’ a thupukna bawlthei pan chauh ding uh hidan in gen ua, UNC ‘presidential council meeting’ ahihleh hongtung ding February 7, 2017 chiang a Senapati a om ding hidan in UNC makaite’n gen uhi.

 

Thunung-thuma omlou a UNC president Gaidon Kamei leh UNC information secretary SK Stephen khahkhe ding a ngetna toh kisai Manipur Government palaite’n a dawnna uah, hiai thu Imphal tunkik ahihchian a kintak a thu­neihna sangzaw tawite kiang a tun ding uh ahi­hna gen uhi.

 

Tua bangkal ah, muanhuaitak a pan thu­suak in a taklatdan in, UNC in ‘Presidential Council meeting’ a nei­hzoh chiang a economic blockade lakhe maithei hi’n taklang uhi. Huailou in, Manipur Government inleng UNC makai nih a matte thunung-thuma omlou dia khahkha thei gige dinmun a om hidan inleng taklang hi.

 

 

 

VDF te’n khalawh elec­tion ma in mu ding

LAMKA, Jan. 3: Village Defence Force(VDF) in govern­ment kiang a ngetna a piak dungzui un a khala­wh uh mess fee tel a Rs. 5,000/ zel a lak uh Rs. 7,000/- tan a khangsak dia a nget uh tu’n process paita hi’n tuni’n press te kiang ah theisak uhi.

 

Hiai toh kisai a press-te kiang a, tuni a, a gen dan un election ma ngei a muh kinem uh ahihdan gen uhi. Huai lou in a paisa Jan. 30, 2017 nitak a Police leh VDF te duty ding a Lanva a gari a, a paina uah VDF No. 020478 Lalramlian s/o Lalrohlu of Langja Vill. gari apan kia in a lu liam in Imphal a Hospital ah etkol in om hi. Hiai ki-etkolna ding in SP/CCPur in Rs. 20,000/- a piakna tung ah leng Press tungtawn in kipahthu gen uhi.

 

 

Kohima ah police-te kaplup pasal 2te vuil­iam in om; NPF Youth Wing in Rio ngoh

KOHIMA, FEB 3: January 31, 2017 a Di­mapur a police-te’n a kaplup uh tuailai pasal 2-Thejavino Metha leh Bendangnungsang—te luang vuikhiak ahih toh kiton in, tuni’n Kohima ah hinkhua ngeina bang­kik nawn phialta hi.

 

Zingchiang Kiginni a kipan in Kohima ah dawr leh sumsinna munte ngeina bang in pai nawn ding a, himahleh Govern­ment gari leh government office nasepnate ah ban paizomzel lai ding hi. Naga pawlpite ai-ohtu Nagaland Tribes Action Committee (NTAC) in state govern­ment kiang ah, Urban Lo­cal Bodies (ULB) election process toh kisai “bang­mahlou” dan a puang ding in ngen a, hiai leng zan Ningani in pichinsak in om khin hi. Himahleh thilnget dang nih a neihte uh pi­chinlouh a omte ahihleh Chief Minister T R Zeliang leh cabinet minister-te a kitawpvek ding, tuailai 2 kaplumna a ‘firing or­der’ petu police officers/ personnel-te suspend ding chihte ahi. NTAC thusuak dungzui in, thilnget dangte pichin ahihma teng gov­ernment gari leh govern­ment office nasepna toh kisai ban sunzom zel ding uh hidan in taklang hi.

 

Kaplup a om tuailai pasal 2te luang tuni a vui­khiak ahih toh kiton in, mipite kikhenzak ngal ua, Kohima khopi ah mipi sousanna dai tuan mahmah hi. Tuailai pasal nihte luang ahi­hleh MLA Junction, Kohima kiang ah vui in om hi.

 

Tuabangkal ah, Naga People’s Front (NPF) Youth Wing in, Sep­nawnni nitak a mipi huaisetak a kiphin ding a fuihsetu Lok Sabha MP leh Chief Minister lui Neiphiu Rio hidan in ngawh ua, Nagaland a buaina piangsaktu leh lemgelpipen Neiphiu Rio hidan in NPF Youth Wing in ngoh hi.

 

NPF’s Youth Wing in a taklat­zelna ah, Neiphiu Rio in hun paisa in T R Zeliang government paih­khiak sawm sek mahle lohsam a, Nagaland a President’s Rule koih ding tanpha tup a nei in Nagaland buaina kuangzaksak hidan inleng gen uhi.

 

Zan Ningani a New Delhi a kipan Nagaland zuan Neiphiu Rio in a gendan in, mipite toh pang­khawm ding a Nagaland zuan ahi­hdan gen hi. Rio in a genzelna ah, tulel a buaina toh kisai in, kikang­tuah pawlpi nihte’n thukhitna ki­chiantak, kuapeuh in a pompihvek theih ding, pilhuaitak a hepkhiak theihluat ahi chi’n gen hi.

 

Nagaland commercial hub Dimapur ah tutan in bandh om­tou den lai a, Dimapur a kiphi­nna makaihtu Joint Co-ordination Committee (JCC) in, tu in bandh lakkhiak ding leh lakkhiaklouh ding thu toh kisai in thupukna puangkhe pahta ding hi. Hiai thu gelh ahih tan in JCC meeting pailel hi. Tuni Sintawpni in state pumpi a sousannate daivek simta in kilang mahleh government in internet data services leh SMS-te khaklai hi.  

 

 

CCPur District ah Election Observer 7 om ding

LAMKA, Feb. 3: Manipur a 11th Manipur Legislative Assembly elec­tion om ding ah CCPur district ah Election Ob­server mi 7 hong pai ding uhi. Amaute ahihleh Gen­eral Observer ding in mi 2: Ravikant Jain, IAS (2003), aman 55 A/C, 56 A/C, 57 A/C enkai ding a, Ashutosh Kumar, IAS (2002) in 58 A/C, 59 A/C, 60 A/C en­kai ding a, amaute Feb. 14 apan March 11, 2017 sung Lamka ah om ding uhi.

 

Huaiban ah, Gen­eral Obsever mi 2; N. Shivaprasad, IPS (2000) in 55 A/C, 56 A/C, 57 A/C enkai a, Kumar Vishwajeet,IPS (1994) in 58 A/C, 59 A/C leh 60 A/C enkai ding a, amaute leng Feb. 14 apan March 4, 2017 tan Lamka ah om ding hi.

 

General Awareness Observer ding in Shri Kripa Shankar Yadav, in CCPur District sung teng enkai ding a, Feb. 6 apan Feb. 11, 2017 sung Lamka ah om ding a, Expenditure Observer ding in mi 2; Shiv Raj Singh, IRS (2006) in 55 A/C, 56 A/C, leh 57 A/C enkai ding a, aman Feb. 7 - 9, 2017 sung Lamka ah om ding a, huai banah Feb. 19 - March 4, 2017, leh April 5 - 12, 2017 sung in 2nd leh 3rd visit hong nei ding hi.

 

Huai banah, Lalmal­sawm Pachuau, IRS (2008) in 58 A/C, 59 A/C, leh 60 A/C enkai ding a, 1st visit Feb. 7 - 9, 2017, 2nd visit Feb. 19 - March 4, 2017, leh 3rd visit April 5 to 12, 2017 hong nei ding hi. Election Observer mi 7 te Tuibong a Mini Secretariat building ah om ding ua, tuni apan amau omna mun ding DC/ CCPur Office in buaipih in van poimoh tuamtuam kai­khawm uhi.

 

 

Biaklun Shoute in Award ngah

LAMKA, Jan 3: Biaklun Shoute, Man­ager - Corporate Affairs, Hindustan Unilever Limited in amau Unile­ver Company in South Asia Region a dia Legal & Corporate Affairs Annual Conference - 2017, An­daman Havelock Island ah a neihna uah zan nitak in “Performance Award for partnering Business” leh “Legal & Corporate Affairs Director’s Appre­ciation Award’ sang hi.

 

Conference zang ding in India, Srilanka leh Bangladesh a pan in Le­gal leh Corporate Affairs a Manager te paikhawm ua Hindustan Unilever in Assam a Factory thak a hon theihna ding a As­sam Government Cabinet Approval leng January 18, 2017 in muta hi. Hiai Factory in Tresemme, Ponds Vaseline leh Fair & Lovely te bawl beh ding a, hiai ah Rs.1000 lakhs in­vest ding uhi.

 

 

TO ah Deptt bill 80% vel pass ding in om

LAMKA, Feb. 3: Finance department in Jan. 20 apan pay bill a khak (ban) a bawl nung uh Jan. 2017 khaloh ding pass theih mai ding in tuni tan in Treasury Office CC­Pur ah Govt dept pay bill 80% vel om hi. Govt in bill pass theihna dia zing­chiang Feb. 4, 2017 kia hong hi a, hiai ni a passed loutte’n bill hon nawn hun a ngak uh ngai ding hi.

 

 

Ann nek hoihlouh ziak in IIIT Manipur student-te kiphin

IMPHAL, Feb 3: Indian Institute of Infor­mation Technology (IIIT), Manipur Student-te’n hostel a omte kiang a, ann hoihloutak piak a om toh kisai lungkimlouh lahna in, a paisa Ningani a kipan in kiphinna nei uhi.

 

IIIT, Manipur a kiphinna nei student-te makai khat in a gendan in, ni 5 vel paita in hostel a om student kiang a ann hoihlou piak thu toh kisai in complaint bawl in om mahleh IIIT thuneite’n panla nuamlou uh hidan in gen hi. Thuneite’n complaint bawl a om toh kisai sukvengsak nak­sang in, campus veng ding a koih a om secu­rity personnel-te kiang ah complaint bawl a va­pai student-te zep ding in thupiak lehbawlkhum hi. Zan Ningani a kipan in student-te’n Campus ah kiphinna pankhe mahle uh complaint sukvengsak ding ahihkeileh kihouna nei ding in IIIT thuneite kimanzoulou uhi.

 

Student-te’n a gen­zeldan un, kiphinna neih ahih sung in, thuneite’n chabi in hostel kalhkhum ua, hostel pawlam a dakkal sawt taktak kingaksak sek uh hidan in gen uhi. Cam­pus pawlam a om pasalte hostel ah hostel ann nek ding bawlsek ua, zan sawt nung a ann ne ding a numei student-te a pawtkhiak ding thil hak­sapi suah uh hidan inleng gen uhi.

 

IIIT Manipur kichi Indian Institute of Infor­mation Technology khat ahihna toh Manipur a Senapati district a koih det ding chih himahleh July 2015 akipan in Mantripukhri, Imphal a temporary campus ah class patkhiak in om hi. IIIT Manipur in India leh gamdang a institute minthang-te akipan in PhDs leh research expe­rience toh kithuah full time faculty kineih tuam hi. Tu semester pailel ad­ing in library in textbooks leh reference book tam­lou poimoh hi. Tulel in IIIT Manipur ah 2015 leh 2016 batch ading in stu­dent 70 vel pha uhi.  

 

 

KNF(N) cadre mat in om

IMPHAL, Feb 3: Manipur police in kipi­mangna leh thagum a sum ngetna a kigolh hi­dan a ngoh a om Kuki National Front (Nen) faction cadre Thomas Lenminthang Guite (27) s/o Thangjapao Guite of Khopibung vil­lage, Kangpokpi district mankhia uhi. Amah ahi­hleh I/E Commando-te’n operation a bawlna ua matkhiak a om ahi.

 

 

Zillai in Educational Awareness 1st phase zou

LAMKA, Jan 3: Zillai General Head­quarte in programme a neihsa bang in 1st phase na ding in zan in Henglep sub-division leh Thanlon sub-division ah Educa­tional Awareness Tour nei ua, tunitak in Lamka hong tungkik nawn uhi.

 

Hiai toh kisai in tuni­tak dak 7:30 a press brief­ing a neihna uah Chong­khozou JB school veh ua, huai ah hausa leh kho­sung nu leh pate kimuh­pih in education system puahpha thak ding dan toh kisai houlimna neih­pih uhi.

 

Huai banah, tuni’n Thanlon Sub-Division sung a om Tuilileibul veh ua, huai ah private school kia om a, tulel in student 46 pha uhi. Singtang gam a government school mipite a dia kingakna tham ching ahih theihna ding in a kisaipih govern­ment department in en­kai ding in ngen uhi. Huai banah, nu leh pate’n leng mahni tate mahni omna khua mah a school kaisak ding in ngen uhi.

 

 

SSPP Joint Hq. in free Coaching nei ding

LAMKA, Feb. 3: Siamsinpawlpi (SSPP) Joint Headquarters Lamka in tukum a Class- X exam dingte a di’n “Free Coach­ing” Lamka College ah hon­gtung ding Feb. 13, 2017 apan sai ding uhi. Huai hun ah lunglut Class X exam dingte’n registration form Siamsinpawlpi Tower, Hi­angtam Lamka , Pick & Smile Hebron Veng, New Lamka, Ngaihlun Variety Store, Ngulthong Bazar Vengnuam ah muhtheih ding a, fill-up sa in Feb. 11, 2017 sunnung dak 3:00 tan in SSPP Joint Hq Office Hiangtam Lamka ah piak­lut theih ding chih thutut kingah hi.

 

 

Sum sisa neite gawtna piak­theih hiding: Lok Sabha

NEW DELHI, Feb 3: Lok Sabha a bill thak tuni a puaklut a om dungzui in sum note sisa Rs 500 leh Rs 1,000 note sawm sang a tamzaw neite gawtna piaktheih leh Rs 10,000 tan liausak theih hiding chih ahi.

 

Hiai Bill ahihleh De­cember 30, 2016 a dan bawl a om khekna ding a puaklut hi a, huai dan dungzui in November 9-December 30, 2016 ki­kal a sum note lui bank a koih manlou gamdang a omte’n RBI tungtawn a March 31, 2017 tan a koihthei lai ding chih ahi. Tuni a Lok Sabha a puak­lut a om Bill thak pen Par­liament a pom ahih chi­ang in sum note lui sawm sang a tamzaw neite gawtna piaktheih leh Rs 10,000 liausak hiam ahi­hkeileh a sum neihzah uh a lehnga hiam a tam zaw zaw liausak hiding uhi.

 

Specified Bank Notes (Cessation of Liabilities) Bill ahihleh November 8, 2016 a RBI leh govern­ment in ‘demonetisation’ a bawl toh kisai a Finance Minister Arun Jaitley in a puaklut hi a, hiai Bill ahihleh dankalh leh gam a dia thilhoihlou hidan a gen in Trinamool Con­gress in naktak in dal hi.

 

 

CCPUR A DI’N PETROL 12 KL

Manipur a oil pump tuamtuam a di’n Govt in tuni’n petrol 150 KL leh diesel 216 KL pekhia hi. Hiai a piakkhiakte lak ah Lamka a oil pump 2 a di’n petrol 12 KL pia hi. Huaite ahihleh, Suakh­nun & Sons a ding in 4 KL, Lamka filling Station a ding in petrol KL 8 ahi.

 

 

One day workshop om ding

LAMKA, Feb. 3: ZEO/CCPur saina in National De­worming Day Feb. 10, 2017 a sepsuah ahihtheihna dingin Feb.7, 2017 sunma dak 10:30 in ZEO/CCPur temporary Office campus ah One Day Workshop nei ding uhi. Huai hun ah DI of Schools CCpur, Thanlon, Henglep, Tipaimukh, Singngat leh Samulamlan apan School tengteng a Teacher 1 zel telding uhi.

 

 

CMO (NFSG) team Lamka hong tungkik

LAMKA, Feb.3: Centre apan Dr. R.K.P Singh, CMO (NFSG) makaih technical Staff 2 ban ah CMO/Pherjawl District leh a teamte a paita Jan. 30, 2017 a Lamka apan in Pherjawl District a zin zan nitak in Lamka hong tung kik uhi.

 

Amau a zin sung un CMO/Pherjawl leh Staff teng toh meeting nei ua, Pherjawl ah giak ua, Pherjawl PHSC, Par­bung CHC, Bukpi PHSC leh Thanlon PHC te veh in spot verification bawl uhi. Dr. R.K.P Singh, CMO (NFSG) leh techni­cal Staff 2 te ahihleh zan nitak mah in Imphal ah paisuak uhi.

 

 

DC thak hong kituah lut ding

LAMKA, Feb. 3: Election Commission of India in DC/CCpur ding a order a suah dungzui in Shri R. Sudhan, IAS in zan a charge la in Imphal ah paisuk a, tuni’n leng Imphal apan office hong kai in sunma dak 11:00 in election toh kisai a Nodal Officer meeting amah office chamber ah neihpih a, mi malmal in introduction bawlsak hi.

 

Amah tuni’n Imphal ah kik nawn a, zingchi­ang in DC/CCpur Official Bungalow/Residence IB Road ah giaklut ding a, huai ziakin DC/CC­Pur Staff te’n DC/CCpur Residence hahsiang ua, van poimoh dingte kai­khawm uhi.

 

Lunminthang Ha­okip, IAS, DC/CCpur lui ahihleh tuni’n CCpur nusia in Imphal ah pai a, driver te’n a van teng toh gari in vakha uhi.

 

 

 

 

 

NEWS TOMKIM

 

Malaria positive 1 mukhia

LAMKA, Feb. 3: District Malaria office in Jan. 2017 sung in malaria vei dia ginlelh damlou mi 834 sisan a test na uah positive 1 mukhia ua, muhkhiak a om ahihleh (PF) hi a, malaria lak a, a lauhuaite hi’n leng thutut kingah hi.

 

 

Vungginmang Court in Jail a koih ding in thutan khum

LAMKA, Feb. 3: Numei Naupang kum 13 mi rape-tu Vungginmang (45) s/o Haugen Manlun of Lunmual, court in jail a om ding in thutanna bawlkhum hi. Amah ahihleh Jan. 27, 2017 nitak a New Lamka Vengnuam a Bolero sung a omlai mipi kipunkhawm in a mat nung ua, police in a lak ahi.

 

 

License Thau 720 val koihlut hita

LAMKA, Feb. 3: District Magistrate CCPur in apaisa Jan. 4, 2017 ni a CCPur District a thau license nei tengteng in Police Station a koihlut vek ding a order a suah nung tuni tan in 720 val Police station ah koih lut hita chih thutut kingah hi. CCPur District ah License nei thau 1721 om a, huai lak ah 1000 vel koihlut louh omlai hi.

 

 

WY tang 150 toh mankhawm

LAMKA, Feb.3: Zan sunnung dak 3:30 vel in Police drug Cell in Tunkhopau Tonsing (36) s/o Tualgou of Kanan Veng, New Lamka apan WY tang 150 toh mankhawm uhi. Tuni’n Court ah dinsak in om a court in Police custody ah Feb.5, 2017 tan om ding in theisak hi.

 

 

SUNNA:

Upa Tuanzathang Phaipi (91) f/o Upa Ngilkhanpau of Zenhang Lamka, teknat ziakin tuni zingkal dak 7:00 vel in si a, tuni mah in Zenhang Lamka hanmual ah kivui hi. RIP

 

Lhinglam Haokip m/o Pao-on, Tuinom, Tenky Veng, tunitak dak 7 in damlouhna ziak in si hi. RIP.

 

 

 

 

 

 

…for more detail : here