You are here: HomeRSS FeedsThe Lamka Post

The Lamka Post | December 23, 2016

Friday, 23 December 2016 16:09

CM O Ibobi in ‘centre in state a security person­nel 4000 sawllut’ hidan a report toh kisai nial

Imphal, Dec 22: Manipur state a econom­ic blockade pailel dou ding a Centre in state a paramilitary force per­sonnel 4,000 sawllut hi­dan a report om toh kisai Chief Minister O Ibobi in nial hi.

 

India Today TV toh houlimna hun a CM in a gendan in, central Govt in state ah additional force a sawllut kei, hiai report diklou ahi. Tuni’n leng Assam Rifle, CRPF leh BSF-te toh combine meeting neih in om kh­inta a, personnel 4000te koi a om? chi’n India Today TV in CM thugen taklang hi. Report in ahi­hleh state in additional force company 10 sang a tamzaw ngah khinta hi­dan in taklang hi.

 

CM in a genzelna ah, revenue district thak 7 bawlkhiak tungtang ah NSCN(IM) leh UNC-te deihdan toh kituak in, Union Home Minister kigolh chi’n gen hi. CM in news channel a theihsak­dan in, Govt of India tel in, thuneihna len khat­peuh in, state thuneihna huangsung a om kha ahih ziak in, state Govt vai­hawmna thuneihkhum ding a, a kigolh ding uh nawlkhinsak khin hidan in gen hi. Centre in ni­kum a peace accord suai a kaihpih Naga helpawlte khamlou chi’n Chief Minister in gen a, UNC in indefinite blockade a puan toh kiton in, kintak in Delhi ah Home Minis­ter Rajnath Singh ka vakimuhpih chi’n gen hi.

 

Peace talk kichi Govt of India leh NSCN(IM) kal ahihziak in, hiai ki­houna ah state Govt a kigolhkha kei chi’n gen hi. Ground rule diktak ahihleh NSCN(IM)-te Nagaland state kia a, a om ding uh, huai leng designated camp ahih ding ahi chi’n CM in gen hi.

 

 

Joykishan in Congress a zop thu in Congress Bhavan buaisak; Jotin worker-te’n vauna bawl

Imphal, Dec 22: BJP MLA Khumukcham Joykishan in zan a Con­gress a zop thu in, tuni Ningani in Congress Bhavan, Imphal bouruak buaisakzou mahmah hi. Chief Minister O Ibobi Singh in Joykishan kiang ah Congress party tick­et piak a chiam ziak in, MPCC General Secretary Salam Jotin gumtute’n buaina bawl uhi.

 

Salam Joti in Thangmeiban Assembly Constituency tuhsawm a, maban assembly elec­tion a Salam Joti kiang a congress ticket piak ahi­hkeileh thiltung huai­setak patkhiak hiding chi’n Congress candi­date Joti leh a worker-te’n vau uhi. Salam Joti gumtu khat in agendan in, congress party toh kum 30 sung na kisem­khawmta a, zanzek a Congress party zompan Joykishan kiang a bang­chidan a ticket piak ding Chief Minister in chiam thei hiam chi’n gen hi.

 

 

Manipur BJP makaite’n Home Minister kimuhpih

IMPHAL, Dec 22: Manipur unit BJP makaite’n tuni’n New Delhi ah Union Home Minister Rajnath Singh kimuhpih ua, huai ah state sung buaina tung­tang genpih uhi. Thusuak in a taklatna ah, Mani­pur a pan BJP makaite’n Union Home Minister kiang a Manipur buaina hihvengna ding a panlak theihna teng a panla ding a ngen uh hi’n taklang hi.

 

Rajnath Singh in hiai hun ah Manipur BJP makaite kiang ah Central Government in Mani­pur a national highway vengbittu dia security kiningchingtak pe ding leh national highway a van puaktuahna buaina bangmah omlou dia se­curity-te duty sak hiding a gen hi’n Manipur BJP thusuak in taklang hi.

 

Kum nawn a Mani­pur assembly election om ding a BJP hat ding a lam-etna liantak omlai in, centre government bawltu BJP in Manipur buaina ngaihsaklou chih ziak in BJP niamkiak hi­aihiai ding bang in kilang a, tua ziak a Manipurt BJP makaite’n Union Home Minister kimuhpih uh hi’n thusuak in tak­lang hi. Tua bangkal ah, Con­gress pukse ding a gin­takna liantak om mahleh UNC makaite government in a mat ziak in phaizang bial ah Chief Minister O Ibobi Singh dinmun in hoihlam nawt hiaihiai hi’n kigen hi. Chief Minister in economic blockade toh ki­sai a khauhtak a panla leh aw gumtaktak a suahkh­iakte ziak a phaizang bial a Chief Minister ngaih­sangna lian deuhdeuh hidan in thusuak in tak­lang hi.

 

BJP MLA 1 leh NCP MLA in a omna party ua kitawpna pia a zan a Con­gress party a zop un hun bangtanhiam paisa toh tehkak a O Ibobi Singh leh Congress party din­mun in hoihlam manoh ahihdan taklang hi. Mi tamtak in Congress dei­hkei mahle uh state sung buaina pen Congress in a dinmun bawlna ding a zangkha thei suak hi.

 

Thangmeiband as­sembly constituency a pan BJP MLA Khumuk­cham Joylishan Singh leh Keishamthong as­sembly constituency a pan NCP MLA Ibomcha Singh in ahihleh Mani­pur mipite thuakna BJP makaih NDA Govern­ment in donsaklou chih thu ziak a lungkimlou a Congress party a lut uh hidan in gen uhi. Joyk­ishan leh Ibomcha Singh ahihleh zan in Manipur Pradesh Congress Com­mittee (MPCC) office ah vaidawnna thupitak om hi. Tu in Manipur Legis­lative Assembly ah BJP in MLA khat lel neita suak hi.  

 

 

NSF in Manipur zuan garite tung a ‘Total Blockade’ a bawl sunzom ding

DIMAPUR, Dec 22: Naga Students’ Federa­tion in tuni a, a taklat­dan in, Nagate luahna bialsung a Manipur zuan ding garite tung a ‘to­tal blockade’ a bawl hun hunchiam omlou a sun­zomtou ding uh ahihdan leh Manipur Govt in Ma­nipur a Nagate humbit a bitna pe ding ahihdan thuchiam a bawl masiah ‘blockade’ lakkhiak hi­lou ding hi’n taklang hi. Himahleh vacation zang ding a Manipur a pai stu­dent-te ahihleh khahkol hiding hi’n NSF president Subenthung Kithan in gen hi.

 

Kithan in a gen­zelna ah, Manipur zuan ding garite ‘total block­ade’ bawlkhum ahihlai a, Khuzama check gate ki­ang a truck khat hal a om leh Kigwema area a om garite’n a puakte uh leng suahkhiaksak a om hi’n gen hi. Huai ban ah Khu­zama kiang a koltang truck 150 velte leng Dimapur a kikkhinta uh hi’n gen a, NSF in blockade a bawl zahtakloute’n thil hoihlou tuakthei uh hidan inleng vauna bawl hi.

 

Kithan in Chief Sec­retary of Manipur kiang ah Nagaland a om Meite­ite humbit leh bitna piak hiding a, a tung ua thil hoihlou bangmah tunglou ding hi’n chiam hi. Huai bang a Manipur a leng Nagate humbit a bitna pe ding leh Mani­pur Government in Ma­nipur phaizang leh state sung pumpi a om Nagate humbit hiding a thuchi­am bawl ding in Chief Secretary of Manipur ki­ang ah ngen hi. Hiai toh kisai in Manipur Chief Secretary inleng Manipur phaizang leh state sung pumpi a hindan ngeina sutzop ahihtheihna dia theihtawp a panlakna pailel ahihdan zasak hi’n thusuak in taklang hi.

 

 

SVEEP Christmas Carol nei

LAMKA, Dec 22: District Election Officer (DEO), Ccpur leh Joint Artists Fellowship (JAF) kithuah in tuni’n Lamka khopi sung mun tuamtu­am ah SVEEP Christmas Carol nei uhi. Hiai pro­gramme ahihleh Kangvai khua ah kipan a, huai ah Lunminthang Haokip, IAS, DEO/DC Ccpur in ‘Systematic Voters’ Edu­cation and Electoral Par­ticipation’ (SVEEP) toh kisai gen in JAF artist-te’n lasa uhi.

 

Sunnung dak 1:30 in Sumkong Bazaar ah nei nawn ua, huai hun ah leng DEO in SVEEP toh kisai gen in, sunnung dak 4:00 in Rengkai Bazaar ah nei ua, huai hun ah S. Thienlaljoy Gangte, AC, OSD (Election), Ccpur in SVEEP toh kisai gen hi.

 

A tawpna ding in New Lamka Filling Station, He­bron Veng ah nei ua, huai ah Campaign leh Christ­mas Carol zousiang uhi. Hiai hun ah Shaktiman khat zang in a nunglam teng Stage a zat hi a, kholak a paituah mipi tamtak in hiai hun a thu kigente leh la kisate ngaikhia uhi.

 

 

‘Zingsol’ music video album hong ding

LAMKA, Dec 22: Zingchiang, Dec 23, 2016 nitak dak 5 in Hornbill Cable Network Studio, Mission Road ah (L) Muana Ngaihte theihgi­gena dia kibawl “Zingsol” kichi, music video album honna om ding hi.

 

Hiai hun Langkhan­pau Guite, Chairman ADCC in chief guest hi­hna toh uap in music video album hongkhe ding a, functional presi­dent, guest of honour leh chief host in Gouzamang Guite, EM/ADCC, T. Goukhomang, ZEO, Cc­pur leh Thangkhosuan­mung Guite, EM/ADCC pang ding uhi. Hiai music video album ah zawlla leh gam ngaih la tuamtuam om a, MC Muan Ngaihte leh RD in a sak uh ahi hi.

 

 

Yangangpokpi ah mipi’n ‘curfew’ lakhe di’n ngen

IMPHAL, Dec 22: State sung buaina ngai­hsaklou a state govern­ment a omlai in, phaizang bial mun khenkhat a bik in Imphal East leh Ukh­rul district kikal a om Yangangpokpi ah phai­zang leh singtang a pan nam tuamtuam paikhawm in, “Pumkhat i hi ua, i lak uah lemna om hen” chih slogan sam in kihouna husa thupitak om hi.

 

Yangangpokpi ahi­hleh theihphaklouh hun a kipan Tangkhul, Meitei leh Kukite ban ah nam tuamtuamte kituaktak a tenkhawmna mun ahi.

 

Imphal-Ukhrul road in a totkhak Khurai leh Seijang kikal ah buai­na dinmun in siatlam manoh mahleh tunitan in state sung a thunei­tute kuamah in hiai mun va delhlou in om hi. Himahleh Yangangpokpi Area Chingmi-Tammi Peace Committee saina in tuni’n Yangangpokpi Keithel ah community meeting om a, huai ah Tangkhul, Meitei leh Kuki community ban ah tribe tuamtuam a pan mi tamtak paikhawm uhi. Hiai hun a thugentute’n tulel a state sung buaina pailel toh kisai a com­munity tuamtuamte kal a kitheihsiam louhna tunthei ding thute kua­man thehzaklou a, nam tuamtuamte kituak leh kilemtak a tenkhawmna ding a panlak poimoh ahihdan gen uhi.

 

Yangangpokpi Area Chingmi-Tammi Peace Committee Gen. Secy Elangbam Shyamkishore in a genna ah, hiai pawlpi ahihleh 2011 a kiphutkhia hi a, community khat leh khat kal a kitheih siam­louhna om ching a lemna thugentu a pang ahihdan gen hi.

 

Huai ban ah hindan ngeina sutzop ahihthei­hna ding Khurai leh Sei­jang kikal a hunchiam omlou a ‘curfew’ puan a om lakhe ding in state Govt thuneitute ngen hi. Huailou in, Christ­mas leh Kum Thak fes­tival zang ding a inn lam zuan a pai singtangmite thovengtak a paisuaksak ding leh thagum suahna kuapeuh in tawpsan ding inleng ngen hi.  

 

 

‘To Save a Life’ movie hongkhia

LAMKA, Dec 22: Tuni sunma dak 10:15 in Rayburn Chapel, New Lamka ah Rayburn Col­lege Evangelical Union (Higher Secondary) in, “To Save a Life” kichi Lamka a pau tuamtuam a, a bawl/a lehkhiak (trans­late) uh honna om hi. Hiai hun ah Lem, Secy, RHS EU in vaidawnna thugen a, Abhishek, Pres­ident RHS EU in movie toh kisai pulak hi.

 

Abhishek in movie pen lehkhiakthoh ahih dungzui in a selam leh hoihlam neituak a, movie in a tup ahihleh a entute’n hoih lamtakte lak ding chih ngimna hi’n gen hi.

 

Rev. Khen P. Tomb­ing, Principal, Rayburn College in entute lungsim zou ding leh Pathian min thupina ding in Movie hongkhia a, Uncle Tualkam, Senior Advisor in Pathian min a laan in, Aunty Didim, President EGF in thumna in hunkhak hi.

 

“To Save a Life” ahi­hleh Lamka khopi sung a tengkhawm unau 10-te pau zang a lehkhiak hi a, honkhiak ahihtoh kiton in Rayburn College Station­ary, Hebron Veng, New Lamka, Boipu Stationery, Tuibuang Bazaar, M&G Medico, Rengkai Bazaar leh M/S SM Pharmacy, Colony Veng, Bungmual ah Rs. 100/- in leitheih ding hi.  

 

 

Revenue Dept post tuamtuam a ding result suak

IMPHAL, Dec 22: Manipur Govt in Revenue Dept nuai a post tuamtu­am a sem ding lakna re­sult suahkhia a, huai a lo­hching eimi hiai bang ahi.

 

MANDOLS: Jangmang Haokip, T Thanghaulun, T Jangkhothang Haokip, Lunminthang Kipgen, Paolenmang Kipgen, M Johny Kom, T Lienmal­sawm, Ts Gogou Haokip.

 

LAMBU: Lalhlunsiem, Thanglal Haokip, Lenlal Hangsing, Themkholen Baite, Thongminthang Haokip, Lalthahmang, Kimkhohoih.

 

ZILLADARS: T Chink­hotuan Paite, Lhunk­hopao Touthang.

 

 

Health Deptt a MHW lakna result suak

LAMKA, Dec 22: Health Dept., Govt of Ma­nipur nuai a Male Health Worker lakna result suak a, huai a lohching ST can­didate-te hiai bang ahi.

 

L Toneihmun Kom, Khoirentak Khuman; Sk Makuthui, Longmai (Noney) Part-I; Thang­khansiam V, New Lam­ka (V); Ening Newme, Guigailong, Tml-II; Kis­han Thapa, Moreh Ward No. 6; Py Thungwar, Salluk; Phungzamuan Naulak, New Lamka; Wangshol, Hitler Anal, Khambathel; Douza­mang, Zoar Veng, Bung­mual; Stephen Nangsha, Beaulahram; V Chin­biaksang, HQ Veng; Saniilanah, E-tech Inf­ocis; Lalchunglung, Sar­tuinek; Keenjoy Kodar Maring, Rilram Centre; Ashon Thoitak Chiru, Dolang leh Lalzarlawm, Parbung hi uhi.

 

 

EBC worker-te kisuankual

LAMKA, Dec 22: Evangelical Baptist Con­vention in school leh of­fice a semte lak ah semtu bangzahhiam hiai bang in suankual hi.

 

Amaute ahihleh Upa Kamkhohen, AT, Chi­angpi CES a pan Mis­sion Compound CES; E. Khailianthang, Head­master, Suangdoh CES a pan Buangmun CES; Nemngaihmawi, Head­mistress, Sinzawl CES a pan Suangdoh CES; V. Chinpu, Headmaster, Be­hiangjang

 

 

CES a pan Khawkawn CES; T. Muanlal, AT, Hi­angmun CES, Mizoram a pan Tuimajang CES; V. Tualkhenmang, Head­master, G. Mualkawi CES a pan Mualnuam CES; Ngaizaching, AT, Tui­majang CES a pan Behi­angjang CES; Tualzakam Guite, Warden, Mimbung CES a pan Beth Haran Hostel; H. Ginmuan, AT, Warden & Tutor, GBC a pan Thanlon CES ah suan in om uhi.

 

GAD nuai a semte lak ah Ningngaihniang, UDA/Office Asst., Dor­cas Hall a pan Lamka North Division office; Manniang, UDA/Ac­countant, GBC a pan Dorcas Hall; G. Lian­suanmung, UDA/Ac­countant, Mizoram Division a pan MEBC Imphal; D. Ngaknu, LDA/Office Asst., Lam­ka North Division a pan Lamka South Division; H. Ginzakam, LDA/ Jr Accountant, Lamka North Division a pan Mizoram Division; Chi­inthiannem, LDA/Jr Ac­countant, Dorcas Hall a pan GBC; T. Thangbiak­lian, LDA/Office Asst. MEBC, Imphal a pan Lamka North Division; J. Tawnzau, Grade-IV/ Peon, Mizoram Division a pan Imphal Division; T. Chinzalian, Grade- IV/Peon, Imphal Divi­sion a pan Thanlon Divi­sion ah suan in om uhi.  

 

 

Chinlunthang in Singngat AC a candidate ding ahihdan puang

LAMKA, Dec 22: Tuni sunma dak 11:30 in Zoveng, Zenhang Lamka ah Chinlunthang, President, UZO-GHQ in kum nawn, 2017 a Manipur assembly election ding a 60-Singngat AC a candidate ding ahihdan puangkhia hi. Hiai hun ah Singngat AC sung Singngat area, Behiang area, Su­angdoh area, Lungthul area, Kang­kap area, Tuining area, Sangaikot area, Khaukual area, Singheu area, Dongzang area a pan hausa 100 val tel ua, UZO block leh unit tuamtu­am a pan makaite leh tribes leader-te ban ah NGO makai tamtak in­leng uap uhi.

 

Hiai hun zatna ahihleh Dan­iel, Secy. Finance, Singngat Vi­sion 2020 in makaih a, Catelas Kammang in thumna in hun pan hi. Sebastian Lunsuanpau in vaid­awn thu a gen zoh in Rev. Stephen Chinzathang, Exe. Secy., ZPCS in hasotna thugen in Chinlunthang leh a zi a din in thumsak hi.

 

Hiai hun a Singngat AC a in­tending candidate Chinlunthang in a thugenna ah, mipite a ding in hiai ka sem ding a, huai ka sem ding chih gen tam ngai nawnlou in August 31, 2015 a thiltung pen tunitan mipi lungsim a manglou leh bangziak a huai bang thil hong piangkhia hiam chih kuamah a theilou omlou ahi chi hi. Huai ban ah i gam in tu hun a, a poimoh pen ahihleh langva piak ding, sanction piak ding, solar light piak ding, cul­vert leh community hall bawl ding chihte sang a i gam leitang kepbit a, gamsung vai diktak a hawm ding chihte poimoh zaw hi’n gen hi.

 

Huai ban ah MLA-te sep ding leh bawl ding bel a tung a kigensa gamsung khantouhna ding toh ki­saite ahisa hi a, huaite sang a i po­imoh zaw uh bel i gam dinmun leh politics dinmun ahi chi hi. Huailou in, Suangdoh Sub-Division tung­tang ah a lemlou khenkhat omte bawlthak tuak hi’n gen hi.

 

Singngat AC sung a siamsinna, kikawmtuahna leh damtheihna lam ban ah tuinek toh kisai puah­phat leh bawl ding tamtak om hi’n gen a, hausate toh pangkhawm a mipi a dia poimohte sepkhiak lung­gulh ahihdan leng gen hi.

 

Kum nawn, 2017 a Manipur assembly elec­tion om ding a 60-Singn­gat AC sung a candidate ding ahihdan mipi lak a puangkhia in, candidate ding ahihdan a puankh­iak toh kiton a tawpkik nawnlou ding leh mip­ite toh pangkhawm a mailam nawt a paitou zel ding ahihdan Chinlun­thang in puangkhia hi.

 

Huai ban ah poli­tics toh kisai in a pa (L) Thangkhanlal, Ex-Minis­ter a kipan hita a, haksat­na tuamtuam leh inn hal tanpha ana tuak uh ahi­hdan gen hi. Himahleh haksatna tampi lak a Pathian in mipite nasem thei dia bawl a, mipite a sapna leh deihsakna tang ahihdan gen kawm in kuapeuh mah i gam a dia panla a pangkhawm chiat ding in ngen hi.

 

Hiai hun zatna ahi­hleh Singngat AC sung a MDC 4 teng in uap ding chih himahleh buaina khenkhat ziak in Suanchinpau, MDC, Lungthul teltheilou a, himahleh Grace Zam­nu, EM/ADCC & MDC, Muallum; Hausuan­thang, MDC, Singngat leh Pumtulthang, MDC, Sangaikot in uap ua, amaute’n leng thugen chiat uhi. Hiai hun ah Singngat AC sung mun tuamtuam a pan mipi tamtak paikhawm ua, programme zoh in an­kuang umkhawm uhi.  

 

 

Janata Dal (U) in State Assembly Election 2017 manifesto puangkhia

LAMKA, Dec 22: Janata Dal (United) in a hong tung ding 11th State Assembly Election, 2017 ding toh kisai in zan in Singngat Community Hall a “The 1st State Lev­el Political Convention of Janata Dal (United)” neihna hun ah Manifesto ding Arun Kumar Srivas­tava, General Secretary, JDU & North East in/ charge in puangkhia hi.

 

Manifesto-te ahi­hleh, Mainland India apat Manipur gamsung a niteng nek leh tak puak­lutna ding a alternative Life-line (route) bawl ding; Manipur a helna permanent settlement bawl theina ding a stake­holder teng toh table khat a genkhawm ding; Manipur Legislative As­sembly a numeite ding 33 percent seats reservation bawlsak ding leh Autono­mous District Council leh Panchayats & Local Body election a numeite a ding 50 percent seats re­searvation bawlsak ding; State pawlam ngai sese lou a student-te’n fur­ther study abawl theihna ding ua Universities leh Coaching Center bawlkh­iak ding; Tourist-te etlah theih dia Loktak Lake puahphat ding leh Mani­pur mipi’n Loktak Lake apat tuinek kiningch­ing a ngah theina ding a special project bawl ding; lampi diklou leh anti-so­cial activities a khangth­akte a kibual louhna ding ua laisiam khangthakte kitoudelh theihna dia Rs 3000/per month pen­sion/allowance bawlsak ding; Meithaite a ding a Rs 1000/per month per head pension scheme bawlsak ding; Manipur gamsung a comprehen­sive farming system pat ding leh State machiner­ies, Gram Panchayats, Zilla Parishads & Auton­omous District Council toh kithuak a gamsung a zu leh khamtheih doudal ding chihte ahi.

 

Arun Kumar Srivas­tava, General Secretary, JDU & North East in/ charge in hilchienna a bawlna ah Bihar Govt. in kum khat sung in Zu man (liquor tax) in Rs 5000 crore mu a, himahleh Ni­tish Kumar Govt. in risk lianpi la a Bihar gamsung a liquor ban abawl leh 18 percent road accident kiam zou in crime, ex­tortion, kidnap, rape etc. leng naktak a kiamzou hi’n gen hi. Hangkhanpau Taithul, Ex-Minister & Presi­dent, Janata Dal (Unit­ed), Manipur State Unit in 60-Singngat A/C a MLA dia telching ahileh MLA term (5 years) sung in a khaloh la lou in khanvual phaloute leh meithai-tagahte pan­pina dia zang ding ahih­dan gen hi.

 

A genzelna ah, CCpur mipi dreams “Ring road around CCpur Town” sepsuah ding, Chura- Sugnu road zohlouh a om ngaipoimohpen ding leh Aizawl City water supply system project bang a CCpur mipi’n Khuga Dam apat tuinek kiningching a ngah theihna ding a revisited and re-modernized bawl ding ahihdan gen hi.  

 

 

 

Sanghekna khawl bawlkhia

LAMKA, Dec 22: Bungmual a om Langgin Tombing in tuma zek a sanghekna khawl (ma­chine) a bawl zousiang in tu’n sanghek theihta hi. Hiai sanghekna khawl ah a ha tuamtuam khen­theih a, vaimin leng hek­theih ding in bawl hi. Hiai khawl ahihleh a bawl ma­sak sang a zangkhai zaw leh hatzaw hi’n thutut kingah hi.

 

 

District 2nd Division League 2016 zousiang

LAMKA, Dec 22: Tuni sunnung dak 1 in Peace Ground, Tuibuang ah Ccpur District Sports Association (CDSA) saina a (L) Damien Letmin­lun Gangte Memorial District Second Division League 2016 khakna leh final match kimawlna om hi. Hiai hun Letjamang Haokip, intending candi­date, Henglep A/C; Holk­holun Lhungdim, intend­ing candidate, Saikawt A/C; Albert Lallunmawia, Mahajon leh Kae Haopu Gangte, Gen. Secy., KSDC in chief guest, guest of honour, functional presi­dent leh chief host hihna toh uap uhi.

 

Lalvullien Joute, President, CDSA in hiai hun ah vaidawnna thu gen a, CDSA makaih in khuallian leh donor sungkuante’n kimawl dingte enkhia in, (L) Damien Letminlun Gangte sunna zoh in final kimawlna kipan hi.

 

Tuni a (L) Damien Letminlun Gangte Me­morial District Second Division League 2016 khakna hun ah Tracy Ngaihching leh Bryan Mangneo Haokip in lasa ua, Jamchinthang, MDC, Thanlon in leng a uap ban ah mipi tamtak in uap uhi. Final Match ah Len­lai Club leh Zeals Sport­ing Club kimawl uhi.

 

District Second Division League 2016 kimawlna zoh ahih toh kiton in FC Zotal, Zillai FC, Khallai FC, Zeals SC leh Lenlai Club-te First Division a kimawlthei dia a dopsang ahihban uah, LTYC, KCFC, TYAU, LTFC, KJYC, TFC, RRC, HTFC, MFC leh MVYC-te Third Division a dia koih­niam hi uhi.

 

Ccpur District Sports Association in ahihleh kum nawn January nipikal nihna lakvel in District Third Division League sai ding sawm ua, huai ding toh kisai in District sung a Third Division Team/ Club-te’n CDSA Tem­porary Office, Peace Ground, Tuibuang ah thuchian kimzaw ngaih­ven theih ding hi.

 

 

GGM saina ‘Worship Night’ zang

LAMKA, Dec 22: Go Grace Mission makaih a “Return to Your Rest” chih thupi pansan a, ‘Winter Retreat 2016’ neih a om tuni, Decem­ber 22, 2016 nitak dak 5 in St. Paul Institute Cam­pus, New Lamka ah a ni tawpni ahih toh kiton in ‘Worship Night’ zang uhi.

 

Hiai hun ah Lalmuan Guite leh N. Thangkhan­siam in biakna leh phat­na hun makaih ua, Rody Za Lien Sing leh Ning­muanching in phatna lasa in, Upa Dr. T Neng­khanmang in Winter Re­treat 2016 khak hi.

 

Winter Retreat ahi­hleh a paisa December 20, 2016 a Upa Ricky Vanlallawm Guite in a honkhiak hi a, Retreat zatsung in N. Thang­khansiam in thugen hi.

 

Hiai programme ahi­hleh Go Grace Mission in tuailai tamtak siatna tuamtuam a lut ding leh lutsate pikhiak a, lam tu­amtuam a vual phaklouh ziak a kingaisia a mahni hinna tanpha lak utna lungsim neite hutkhiak a, Pathian’ lam a kaihlut ding chih tupna a, a sai uh ahi.

 

 

Miz CM in NE NCC Director General Maj. Gen. RGR Tiwari kimuhpih

Aizawl, Dec 22: Tuni Ningani in Mizoram Chief Minister Lal Thanhawla in Aizawl ah NCC ading a plan leh thuchiam tuamtuamte genkhawm ding in, NCC Director General, NCC Direc­torate, North Eastern Region, Maj. Gen. RGR Tiwari, Brig. Chatterjee, Group Commander, Silchar Region leh Wing Commander K. Goel, Ist Mizo Air Squadron NCC-te meet­ing neihpih hi.

 

Maj. Gen. RGR Tiwari in, state dangte cadet-te sang in Mizoram NCC Cadet-te hoihzaw tham uh chi’n phat a, kimawlna leh kong bangkim ah leng teizaw tham uh chi’n gen hi. Delhi a NCC band khahkhiak a hih hun in, official leh mipite’n etnopsa leh chituam biksa mahmah uh chi’n gen hi. Tuirial Airfield a NCC Academy leh Air Wing Headquarters leh Lunglei a NCC Battalion phuhkhiakna ding in plan om a, hiai ading in joint survey pailel chi’n Maj. Gen. Tiwari in gen hi. Lunglei a NCC Battal­ion patkhiakna ding a lai poimoh bangkim Ministry of Defence khut ah piakkhiak hita a, kum 2018 kim­lak in zohsiang hiding chi’n Maj. Gen. Tiwari in gen hi. Mt.Everest kaltung NCC cadet Lalrintluangi lohchinna in Mizo mipite’n tup guh nei uh ahihdan langsak chi’n Major General in gen hi. Siamsinna innte a leng cadet tungtuante a ding a seat koihkholsak ding in Chief Minister kiang ah ngen hi.

 

Republic Day Parade zoh a neih a om sek Beating of Retreat parade ah Mizoram apan NCC Band Party-te leng tel ding ua, hiai parade ah Prime Minister leng tel ding hi.

 

 

 

 

 

 

 

NEWS TOMKIM

 

Tuni a pan recharge centre kikhak nawn

LAMKA, Dec 22: All Manipur Electricity Employee Union (AMEEU) in a thil ngette uh pichin dia Govt phutna a Dec 6, 2016 a kipan nasemlou a nuakna a neihnung un Dec 17, 2016 a kipan in nasep pan nawn uhi. Himahleh Chief Minister toh a kihouna uh a lohsap ziak in tuni a kipan in kiphinna pan nawn ua, tua toh kiton in tuni sunnung a kipan in Lamka a electric prepaid recharge centre kikhak nawn a, fee pe dia kuan tamtak leng thawnkik uhi. Huailou in, AMEEU in kiphinna khawlsan a nasep a patnung in Lamka khopi ah leng Electricity Dept in nasep pan in, prepaid metre box bulh ua, zan tan in metre box 16,150 bulhta ua, huai lak ah 15,100 activate-sakta uhi.

 

 

SSPP in MCSCC Exam a lohchingte kipahpih

LAMKA, Dec. 22: Siamsinpawlpi, General Headquarters a Secy, Public Relations, Lianzamung Tonsing in tuni a kipahpihna Thupuan a bawlna ah, Manipur Civil Services Combined Competitive Exam, 2016 a lohchingte teng kipahpihthu puang a, huai ban ah SSPP member lohchinna ngahte kipahpihthu leng taklang hi. Amaute ahihleh Teresa Tangpua, Manipur a 6th rank leh ST lak a 1st rank; Lianminthang Samte, Manipur a 10th rank leh ST lak a 3rd rank; T Chinkhansiam, Manipur a 125th rank leh ST lak a 21st rank; Glory Chingthiankim SP, Manipur a 131st rank leh ST lak a 24th rank leh Pauminlian Guite, Manipur a 159th rank leh ST lak a 48th rank hi uhi. SSPP-GHQ in amaute lohchinna kipahpihthu puang in, lohchinna pia Pathian tung ah kipahthu gen hi. Amaute’n maban ah Pathian laudan siam kawm a nna hon septouh uh deihsakthu leng khak uhi.

 

 

SUNNA:

 

Upa T. Lamenthang (71) s/o (L) Khamthuam of Dorcas Road, New Lamka in tuni, Dec 22 sunnung dak 2 vel in cancer natna ziak in si a, zingchiang, Dec 23 in New Lamka YPA hanmual ah kivui ding hi. Amah ahihleh EBC a dia mi poimohtak khat ahi. RIP.

 

Sawiminlal Gangte @ Neu-ah (48) S/o (Late) Pastor Kâmkhopau of Happy Valley, Shillong, tuni sunnung dak 12:15 in damlouhna ziakin NEIGRIHMS Hospital ah si hi. RIP

 

Hatkholhing (83) m/o Mrs Aneng Guite (w/o Dr. Khamkhanpau Hangluah) & Mrs Kim Guite of GCK Veng, New Lamka tuni 22-12-16 sunnung in si a, zingchiang in kivui ding hi. RIP

 

 

 

 

 

 

 

 

…for more detail : Here