You are here: HomeRSS FeedsThe Lamka Post

The Lamka Post | August 04, 2016

Thursday, 04 August 2016 15:26
PARLIAMENT MONSOON SESSION DAY 13:

Rajya Sabha ah Bill pending lianpen ‘GST Bill’ pass in omta

New Delhi, Aug 3: Parliament Monsoon Ses­sion pailel ah tuni Nilaini zingkal dak 11 in Rajya Sabha ah session 13na ki­pan nawn hi. Tuni Nilaini a RS a tax reform poimoh Goods and Services Tax (GST) Bill puaklut leh genkhawm ding chih a hih dungzui in, Finance Minister Arun Jaitley in, nitaklam dak 2 in, Rajya Sabha ah, GST Bill kichi tax puahthakna ding po­imohte lak a khat ahi chia gen toh thuah in, Inpi ah Goods and Services Tax (GST) Bill pawlut hi.

 

GST Bill in, state-te tung ah thuneihna sang­tak peding a, state leh Centre-te summuhna khangsak ding a, “no tax on tax” kichi omlou ding ahi chi’n gen hi. Bill a dan poimoh 3- Parliament in 2 leh State Legislature in khat- a pass teitei kul ding chi’n gen hi.

 

Finance Minister lui (Cong) P. Chidambaram in a thugenna ah, kum 2011 leh 2014 kikal in ‘char dham’ piandeuh ka hih khin a, principal Op­position party-te gupna zang in Congress in GST Bill passed sawm mahleh kilohsam hi. A paisa kum 2 sung in, BJP govern­ment in principal Oppo­sition party-te gupna tel­lou in pass sawm mahleh lohsam veve chi’n gen hi. Congress in GST a nial kei a, genkhawm leh de­bate leng a om kei a, Bill dal thoh lel uh hizaw bill bukimzaw neih theih a hihdan lungsim in nei uh chi’n gen hi.

 

Congress in Bill gum a, himahleh consumer-te tung a puakgik tuntu lel a suah ding ziakin, GST rate in 17-18% a khenlouh ding ahi. Maban kum 50-100 tan sukha ding dan po­imoh mahmah ahihziak in, GST proposal thak ding Finance Bill dan a et ding leh Money Bill a hihlouh himhim ding ahi chi’n gen hi.

 

Arun Jaitley in a dawn­na ah, State finance minis­ters-te’n GST rate 18% tan a bawl ding thukimpihlou uh ahi chi’n gen a, 17 -19 % kikal tan a GST Rate etkai theih hamham maithei ding ahi chi’n gen hi. RS a party 32te lak ah AIADMK-te chihlouh party dang teng in GST Bill gum uhi. Rajya Sabha Dy Chair­man PJ Kurien in GST Bill toh kisai vote piak ding in koihkhia a, vote piak ahih ding kuan in, AIADMK MP-te’n Inpi pawtkhiaksan uhi. Rajya Sabha Secretary General in member-te kiang ah, voting procedure toh ki­sai hilhchian hi. Hiai zoh in, Constitution (122nd Amnd.) Bill, 2014 toh ki­sai ‘clause by clause’ in vote piak in om hi. Clause teng ah voter phazah leng 196 a kipan 201, 203, 2015 tan in khangtou hi. Voice vote in Subbirami Reddy’s amendment a zohkhiak toh kiton in, Rajya Sabha ah Constitution (122nd Amendment) [GST] Bill, 2014 passed in om hi. Hiai zoh in RS Inpi August 4, 2016 zinglam dak 11 tan a ding in khawlsak in om hi.

 

GST Bill puaklut a hihma zinglam in, Ra­jya Sabha ah, tunai zek a telching a om MP Dr. Subhash Chandra, Ind., Haryana kichiam a, MP te’n amau tutna mun chiat uah report a neih bang­bang uh koihkhia uhi. BSP chief Mayawati in Inpi ah Uttar Pradesh a numeite tung a tatsiatna omte tangkoupih nawn hi. Jaya Bachchan, SP, Uttar Pradesh leh MP tua­mtuam in thubuai kibang tangkoupih ua, hiai in RS Inpi buaisak zou mahmah uhi.

 

Lok Sabha ah leng Question Hour toh kith­uah in vaihawmna pat in om hi. Mukhtar Ab­bas Naqvi in a gendan in, numeite tung a tatsiatna omte genkhawm ding a government mansa in om chi’n gen hi. Lok Sabha ah TDP MP-te slogan sam in kikou ua, Andhra Pradesh ah special status ka ngen uh, thudik a thukhenna ka lunggulh uh chi’n kikou uhi. LS ah Pradhan Man­tri Kaushal Vikas Yojana toh kisai leng genkhawm uhi.

 

Union Minister of State Skill Development and Entrepreneurship (Ind Charge) Rajiv Prat­ap Rudy in a gendan in, PM Modi mahmah in­leng amah government in mizawng leh tasam pan­pih ngaite a ding a nasem ahihdan genlang hunt­awk chi’n gen hi. Minis­ter of Steel, Chaudhary Birender Singh in, sepna thak a kihon hunteng in employment exchange theihsak in om gige a, regular basis in sepna piak hiding chi’n gen hi. Inkuan 16,000 lak ah mi7,473 –te kiang ah sepna piak in om chi’n gen hi.

 

 

 

Sendra area ah eviction drive kipan; mi 10 liam

IMPHAL, Jul 03: Tuni’n Bishnupur district administration authority-te’n tourist munpi Sendra Hill ah dan kalh a gam luahte tung ah eviction drive nei ua, government eviction drive dal sawm a panlak a hih hun a police-te toh kinawktuahna ah numei khat tel in Sendra khomi 10 liam uhi.

 

Tuni Nilaini zingkal in, Bishnupur district a SDO Moirang makaih in district authority official-te’n eviction drive pan ua, Sendra Hill bul lak leh lam kiang a dan kalh inn leh dawr kibawlte susia uhi. District thuneite’n eviction drive a neih uh dal sawm in, Sendra area a kipan khomi thangpai tamtak Moirang-Than­ga Road kongzingte ah kisukhawm ua, police-te toh kinawktuah ua, mip­ite hawldalhna ding in police-te’n tear gas leh mock-bomb zatkhum uhi.

 

Deputy Commissioner Bishnupur W Bobby in a gendan in, kha tamlou paita a kipan Moirang Sub Division nuai a Sendra bi­allak CrPC 144 koih a om khinta ahi chi’n gen hi. Langol Reserved For­est a Lamlongei mun ah leng dan toh kituaklou a gam luahte Imphal east district thuneite’n hawlkhia uhi. Amaute Nepali mi ngen hi ua, kum 5 vel paita a kipan in hiai mun ah khosatou den uhi.

 

 

GoI-NSCN-IM framework agreement’ kum 1 chinna zang

IMPHAL, Aug 3: Tuni Nilaini in, Manipur state sung Chandel leh Ukhrul district ah Unit­ed Naga Council(UNC) panlakna toh, August 3, 2015 a New Delhi a Gov­ernment of India (GoI) leh National Socialist Council of Nagalim- Isak- Muivah (NSCN-I/M) kal a frame-work agreement suaikaih kum khat chin­na zat in om hi.

 

Chandel Naga People’s Organisation (CNPO) lamkaihna nuai a Ma­nipur Chandel district pansan Naga civil society-te’n khangthu a chiamteh tham kithukimna suaikaih kum khat a chinna theih gigena in, thumkhawmna nei uhi. Thumna pro­gramme zatna hun ah Naga in a huamkhak sung a tribal pawlpi tuamtuam a kipan makaite, khotang pawlpi, numei pawlte, student, saptuam, kho hausate, social worker-te leh NSCN(IM) chief func­tionary-te tel in makai 500 vel paikhawm uhi. CNPO president WS Kanral Anal leh NSCN(IM) Steering Committee co-convener Thumpa Turiim -te’n mipi paikhawmte ma ah thugen uhi. CNPO’s joint secretary Wng Prem in PM Narendra Modi khut a piak ding memorandum simkhia hi. Hiai zoh in Chumbang Baptist Church Pastor Y Halpu makaih in frame work agreement ad­ing in thumkhawmna leh special prayer neih in om hi.

 

Ukhrul ah leng Tang­khul Naga Long (TNL)- te’n frame work agree­ment suaikaih a hih nung kum khat chinna theih gigena hun zang uhi.

 

 

I-Day ding ziak in venbitna khauh

IMPHAL, Aug 3: Kum tamtak sung helpawlte ziak a buaina ana maituahtou den Ma­nipur a August 15, 2016 chiang a ‘69th Indepen­dence Day’ lopna om ding a venbitna lam toh kisai a panlakna omte khauhsem a paipih utoh kiton in, tuni Nilaini in, security force-te’n Imphal West’s Langthabal Kunja area ah combing operation nei uhi.

 

Police thusuak dung­zui in, tu zingkal a 6 As­sam Rifle personnel, commando leh Imphal West Police women per­sonnel-te’n pangkhawm a operation a neih sung un, Lanthabal Kunja area kipan in mi 3 mankhia ua, velchet ding in Singjamei Police Station ah pekhia uhi. Helpawlte’n August 15 chiang Independence Day lopna sukbuai sawm a kivaulauna chi tua­mtuam neih a sawmte uh theikawm in, maban ah state sung dengdelna mun leh Imphal khopi sung ah combing operation neizomtou zel ding uhi. Independence Day lop ding hun a naih hiaihiai toh kiton in, state ah ven­bitna lam leng khausem in paipih uhi. Kum tamtak paita a kipan in, helpawl tuamtuam in kum teng in, August 15 , Independence Day boycott puankhum sek uhi.  

 

 

Lamka Public Ground bawlna in masawn

LAMKA, Aug 3: North Eastern Coun­cil (NEC) Fund a kibawl Lamka Public Ground a nasepna paizaom zel in, tunitan in ground lev­eling a zohtak ban uah fencing bawlna pailel hi.

 

Lamka Public Ground bawlna ahihleh June 2016 khatawp lam in ki­pan a, nasep taktak ahi­hleh July nipikal nihna vel a pat in om hi. Tulel in ground kiim ah fenc­ing bawl sanlel ua, huai zoh ahih chiang in pub­lic gallery leh VIP gallery a tung nei a bawl hiding hi’n thutut kingah hi.

 

Gallery ahihleh tut­theihna ding dan 10 vel omtheihna dia bawl hid­ing a, huai ding in khuam (pillar) 80 val bang ki­tung ding a, tulel dinmun in nasep dan lungtunhuai mahmah hi’n kilang hi. Lamka Public Ground zoh ahih chiang in main gate 2 om ding a, gallery nuai ah office, ‘changing room’ leh toilet koih ahih ding ban ah mun a kidaihleh parking/ga­rage ding leng bawl hid­ing hi’n thutut kingah hi. Hiai nnasepna ahihleh V. Guite etkaina nuai a sep hi a labour 50 vel, group 5 a kikhen in niteng in nasem ua, zohsiang ahi­hna ding in kum 1 val lut­lai ding hi. Lamka Public Ground puahna ding in NEC a pan Rs 4.8 crore sunction om hidan inleng thutut kingah hi.  

 

 

YPA-GHQ makaih a khopi sung hahsiangna paizom zel

LAMKA, Aug 3: Young Paite Association, GHQ in siangthouna ngai poimoh a khopi sung a mun niin diakte hahsian­gna a neih uh sunzomtou zel in tuni’n, YPA Lamka block mah toh Lamka Po­lice Station kiimlak hah­siang nawn uhi.

 

YPA-GHQ panlakna a town area sung hahsiang­na ah zingkal khat a mun tampi zoulou ahihna uah, zingchiang in leng sun­zom nawn ding ua, zing­chiang in New Bazar kiim lak hahsiang nawn ding uhi. Khopi sung sian­gthouna ding toh kisai, khopi sung neitu kuamah dang hilou a, kuapeuh in mahni mimal a dan a ngai a kem siangthou chiat ding in YPA-GHQ in ngetna bawl uhi.

 

Tuni a socialwork ah, Lamka Police Station khang a niinte hahsiang mahle uh, a kiang a om zunbuuk pen hahlouh, puahlouh a om ahihna ah, a kiim-le-kiang a omte a ding in damtheih huailou hi. Hiai zun­buuk ahihleh mipi a ahi­hdungzui a kuapeuh in a sung a niin paihlouh a, tui luankhiak theihna ding a kep leh zat hileh chih hiai kim a omte’n gen uhi.

 

 

Sinzawl EBC School ah dam­lou tamtak om

LAMKA, Aug 3: Sinzawl EBC School a kai naupangte lak ah khosik hii a len ziakin Headmis­tress in tuni apan Aug 8 tan school khak hiding in thusuah bawl hi.

 

Thutut kingah dan in hiai school a naupang kai 300 vel lak ah 100 val bang khosik ziakin kai theilou uhi.

 

 

JE case ziak in mi 1 sih behnawn

LAMKA, July 3: Ccpur District sung a Jap­anese Encephalitis (JE) ziak a damlou bangzah­hiam om ban ah si leng omnung in Lingsiphai khua ah mi khat JE case in Thiemneihoi (50) w/o Damkhup si nawn hi. Amah ahihleh nipikal pai­sa August 28, 2016 (Nin­gani) nitak a pan in a luna sa in om a, dam mai ding­sa in ki-enkollou in om mahleh a ni nawn nitak sawtnung in a luna pha tuanlou in om a, a tawp in khophawklou in om a, Pathianni zing in Lamka Damdawi Inn a casualty puaktung in om hi.

 

Huai hun in Doctor-te’n kintak in JNIMS Hospital, Imphal ah re­ferred ngal ua, Imphal a sisan a test-na ua pan in JE positive ahihdan thei­hkhiak in om hi.

 

Thiemneihoi ahihleh tuni August 3, 2016, sun dak 12:00 vel in si a, tuni mah nitaklam in a luang a tenna inn Lingsiphai puak­tung in om a, zingchiang, August 4 in Liangsiphai hanmual ah kivui ding.

 

Amah ahihleh New Ba­zar a mehzuak a sum zong hi a, ta numei 5 leh ta pasal 2 ban ah a pasal nusia hi. Hiai toh kisai in District Malaria Department, Cc­pur in tuni sunnung in Lingsiphai khua leh a kiim ah ‘fogging’ kap ngal uhi.

 

 

Aug 31 a program dang bawllou di’n JAC in ngen

LAMKA, Aug 3: Joint Action Committee Against Anti-Tribal Bills (JAC) in tuni a ngetna a bawlna ah, Manipur As­sembly in anti-tribal bill 3 - ‘the Protection of Ma­nipur People Bill, 2015; leh the Manipur Shops & Establishments (Sec­ond Amendment) Bill, 2015’ a passed ziak a singtangmite’n a gam uh, rights leh identity humbit­na dia pan a lakna uh Au­gust 31, 2016 chiang in kum khat chingta ding hi.

 

Joint Action Commit­tee Against Anti-Tribal Bills (JAC) leh Hmar In­pui, Thadou Innpi, Unit­ed Naga Council leh Zomi Council kigawmna Outer Manipur Tribals’ Forum (OMTF) in July 18, 2016 a meeting a neih hun ua thupukna dungzui in, Au­gust 11, 2016 tan a Union Government in singtang­mite haksatna toh kisai a ngaihsakkei leh JAC leh OMTF in kiphinna chi­tuamtuam pan ding in thupuk uhi.

 

Hiai thupukna thei­kawm a, singtangmi mi­mal leh pawlpi tuamtuam ban ah educational institu­tions leh public office tua­mtuamte kiang ah India Govt kiang a ngetna dawn ahihkeileh maban a 70th Indian Independence Day lopna ding toh kisai a ki­sakkholhna bawllou ding in JAC in ngen hi.

 

Huai ban ah JAC leh OMTF in joint meet­ing ah, August 31 pen singtangmite luahna munteng a Tribal Mar­tyrs-te phawkna toh “Tribal Unity Day” a zat ding chih thupukna bawl uhi. Tua toh kiton in Tribal Movement kipat­khiakna munpi (epicen­tre) Lamka a mimal leh pawlpi tuamtuam in Au­gust 31 chiang a “Tribal Unity Day” zatna ding programme toh kituak dia programme dang ana bawllou ding in JAC in ngen hi.  

 

 

Kuki nam makaite’n meeting nei ding

LAMKA, Aug 3: Kuki Innpi Manipur in 2016- 2017 sung a nasep ding (work plan) a guan ban ah July 16, 2016 a KIM Executive Meeting thupukna bang in hon­gtung ding August 11, 2016 sunma dak 10:00 in KIC Hall, Tuibong ah “Constitution on Political Stand of Kukis and way forward” chih toh kisai in meeting om ding hi. Huai hun ah district leh block a pan KIM makaite, KSO-GHQ, KKL-GHQ leh unit, KOHUR leh KWU a makaite ban ah Kuki Senior Citizen makaite, KSO/Ccpur leh nam se­paih makaite leh KReF makaite tel ding uhi.

 

 

PTC-GHQ CWC meeting om ding

LAMKA, Aug 3: Paite Tribe Council-GHQ a Central Working Commit­tee in hongtung ding Au­gust 13, 2016 sunma dak 11 in PTC-GHQ Conference Hall ah meeting nei ding uhi. Huai hun ah agenda tuamtuam ban ah PTC-GHQ Executive Committee nasepkhiakte genkhawm­na leh pomna, PTC-Tuivai Block leh Valpakotsuah Block election result pomna nei ding uhi. Huai ban ah PTC-GHQ in JAC Against Anti-Tribal Bills a palai a sawlte leh Zomi Council a palai a sawlte ua pan report om ding a, thu poimoh tuamtuam leng genkhawm ding uhi.

 

 

Emirates Plane EK 521 kichi Dubai aiport ah kuangzak; Passenger-te bitvek uh

DUBAI, Aug 3: Tuni Nilaini zinglam a Thiruvananthapuram, Kerala a kipan lengkhia India mi 226 tel a pas­senger 295 pua Emirates airline flight Boeing 777- EK 521 taklam kha(wing) a meikuang a om ziak in, nitaklam dak 12.45 vel a Dubai International Air­port a bawh nung sawtlou kuangzak hi. Himahleh meikuang a thupi laut madeuh in, lenna sung a tuang passenger-te emer­gency exits pansan in bit­tak in hutkhiak in om vek uhi. Lenna engine part khenkhat leng kia hidan in gen uhi.

 

Thawnging ngaihtak khat om a, cabin sung teng meikhu in pumtuam hi. Hiai zoh in minute khat sung in passenger-te pikh­iak in om vek uhi. Hiai thiltung a mit mahmah a mu pilot in NDTV a theih­sakna ah, hattak a leng lenna in, aiport a boh hun run­way tail phukha masa a, meikuang thupitak muh ding om a, hiai zoh in, lenna body in runway phukha nawn in, land­ing gear taklam kichim a, right engine leng kitol chi’n gen hi. Emirates official-te’n a gendan un, tuahsia thiltung in airline nasepna dakkal 4 sung vel ding zekaisak chi’n gen uhi. Dubai a kipan flight zekai loh ua, Sharjah zuan ding in hei­kawi in om uhi.

 

Emirates CEO Sheikh Ahmed Bin Saeed Al Makhtoum in passen­ger leh crew sihna tuak kuamah a omlouh kipah­huai mahmah chi’n gen a, passenger leh crew-te bitna ding mah poimoh ngaih masakpen hitou den chi’n gen hi. Trivan­drum Airport ah Emir­ate Emergency help line number 0471-3377337 leh helpline number dang UAE - 8002111, UK - 00442034508853, US – 0018113502081 koih in om hi.

 

 

Director, AYUSH in JE damdawi ‘Project Belladonna 200’ hongkhia

LAMKA, Aug 3: Tuni, August 3, 2016 sunma dak 10:30 in Lamka Damdawi Inn a OPD Conference Hall ah Dr. K. Lokendro Singh, Director, AYUSH, Govt. of Manipur in Japanese Encephalitis (JE) dalna ding damdawi chikhat “Project Belladonna 200 - For Preventive Support o Japanese Encephalitis” kichi hongkhia hi.

 

Hiai hun zatna Imphal a pan in Dr. Guneshwor Sharma, State AYUSH Officer; Dr. L. Promila Devi, Joint Director (AY­USH); Dr. K. Benedict Mary, State Nodal Of­ficer, AYUSH Manipur; Dr. Bishuranath Sharma, Medical Officer (Hono­co); Dr. Sophia, Medical Officer (Honoco); Dr. P. Iboton, Medical Offi­cer (Honoco); L. Depin Singh, Finance Manager, Directorate of AYUDH leh Dr. Y. Lukhoi Singh, Medical Officer(Yoga & Nature) in leng uap uhi. Huai ban ah Lam­ka Damdawi Inn a pan in Dr. Thangchinkhup Guite, CMO/Ccpur; Dr. J. Son Gokham Samte, Medical Supt., District Hospital, Dr. VC Pau Tonsing, DFWO/Ccpur; Dr. Liankhozam Guite DMO/Ccpur leh Dr. T. Pumzathang, TB Officer/ Ccpur leh Chingzaniang, Nursing Supt. District Hospital inleng hiai hun zatna uap uhi.

 

Dr. K. Lokendro Singh, Director of AY­USH in genna ah, Ccpur district sung a JE case muhkhiak ahihban ah hiai natna ziak a si om ziak in mipi patau a, tua ziak in Manipur Govt in “Project Belladonna 200 - For Preventive Support o Japanese Encephali­tis” kichi JE dalna ding a kibawlkhia Homoeopath­ic damdawi hawmkhiak ding a panla a, tua toh kiton a tuni a Imphal a kipan JE dalna damdawi Ccpur district sung a hawm ding buk 7,000 hon pua uh ahihdan gen hi.

 

Hiai damdawi ahihleh scientific-tak a kibawl ahihman in nek dingdan kigen bangtak a nek ahi­hleh phatuam mahmah ding hidan in gen hi. Huai ban ah hiai damdawi pen CMO/Ccpur office tung­tawn a hawmkhiak hiding in leng Dr. K. Lokendro Singh in gen hi.

 

Director of AYUSH in a genzelna ah, Lamka a AYUSH Hospital bawlna ding a Muolvaiphei hausa Lalzarlien Darngawn in gam a piakna Muolvai­phei a Bethesada Nursing Training Institute kiang ah tu kum sung a AYUSH Hospital bawlna ding a foundation stone phumna neih hidia lam-en ahihdan leh hiai hospital pen lupna 50 omtheihna dia bawl hiding hi’n gen hi.

 

JE dalna ding damdawi tuni a honkhiak a om nek dingdan ahihleh naungek kum 1 nuailamte’n zingkal an nekma a ni khat a tang­khat zel ni 3 sung nek ding hi a, kum 1 a kipan kum 5 kikalte’n zingkal annekma a ni khat a tang 2 zel ni 3 sung nek ding leh kum 5 a kipan kum 15 kikalte’n zingkal annekma a ni khat a tang 3 ni 3 sung nek ding hi a, kum 15 tunglamte’n zingkal annekma a ni khat a tang 4 ni 3 nek ding hi­dan in Director in gen hi.

 

Tuni a JE damdawi ‘Project Belladonna 200’ honkhiakna hun ah Di­rector of AYUSH in hiai hun zatna uap press/ media-te kiang ah a sungkuan ua nek ding JE damdawi pia hi.

 

 

‘Quality Seed Production on Oilseeds and Pulses’ training nei

LAMKA, Aug 3: Tuni, August 3, 2016 in Krishi Vigyan Kendra Churachandpur leh ICAR Research Complex for NEH Region, Manipur Centre, Imphal saina in “Quality Seed Production on Oilseeds and Pulses in Churachandpur District, Manipur” kichi om hi. Hiai training programme ahihleh ICAR Seed Proj­ect sponsored-na nuai a neih hi a Ccpur District sung mun tuamtuam a kipan in loubawlmi (farmers) 53 tel uhi.

 

Hiai training pro­gramme ahihleh Dr. Ni­ranjan Lal, Programme Coordinator, KVK Churachandpur leh S. Gunamani Singh, SMS (Plant Breeding), KVK Imphal West, Ts. Leen­da, ACTO - Plant Breed­ing, KVK Chandel, leh N. Ajitkumar Singh, SMS (Plant Protection) KVK Ukhrul in makaih uhi. Programme honkhiakna hun ah L. Somendro Singh ACTO (Soil Sci­ence) KVK Churachan­dpur in keynote address gen in ‘Quality Seed pro­duction of Oilseeds and pulses in Churachandpur and seed security for self sustenance’ poimohna toh kisai leh huai tung­tawn a louneimite sum muhna khansak ding­dan gen hi. Dr. Niranjan Lal in ‘quality seed pro­duction for oilseeds and pulses’ poimohna toh ki­sai naktak in gen hi.

 

Tua zoh in input distributions, techni­cal sessions, leh farm­ers experts interaction programme zang in lou­neimite kiang ah pulses seeds leng hawmkhia uhi.

 

Technical sessions ah L. Somendro Singh in, “Nutrients Manage­ment in Quality Seed production” chih thupi zang in sinsak a, S. Gu­namani Singh in, “Pros­pect and procedure of Quality Seed production in Churachandpur Dis­trict, Manipur” chih thu­pi zang in sinsak a, Ts. Leenda in, “Quality seed production on oilseeds crop” chih toh kisai sin­sak hi.

 

Huai ban ah N. Ajit­kumar Singh in, “Plant protection measures in Quality Seed production” chih leh Dr. Rk Roshan in, “Vegetables seed pro­duction” chih thupi zang in sinsak hi. Technical session zoh in farmers experts interaction pro­gramme om a, hiai hun ah Krishi Vigyan Ken­dra of Churachandpur, Imphal West leh Ukhrul a pan farmers expert-te toh lounei mite’n a hak­satnate uh leh a buaina khenkhat uh genkhawm uhi.

 

 

JE leh viral fever toh kisai in Monitoring Cell hongkhia

LAMKA, Aug 3: Medical Directorate of Health, Govt of Manipur in July 29, 2016 a order a suah pansan in tuni sun­nung in Dr. Liankhozam Guite, DMO/Ccpur in District Surveilance Offi­cer hihna len ding in Dr. Thangchinkhup Guite, CMO/Ccpur a pan in charge la hi.

 

Tua toh kiton in, Cc­pur district a ‘viral fever’ hii leng leh JE outbreak toh kisai a surveilance lam etkaina ding Moni­toring Cell leng tuni’n honkhiak hi a, CMO/ Ccpur office campus ah niteng in doctor duty om ding ua, JE case leh viral fever toh kisai a damloute’n sunnung dak 2:00 tan hiai mun ah si­san test-sak theih ding hi. Hiai mun a sisan test ding lak a omte ahihleh Lamka a JE testna om­louh ziak in Imphal a khak hiding hi. Zingchi­ang, August 4 in in Moni­toring Cell ah Dr. Leivon Belami Kom leh Dr. O. Jotinkumar Singh duty ding uhi.

 

 

MJS Grade-III Of­ficers seniority list suahkhia

Imphal, Aug 3: Registrar General High Court of Manipur A. Guneshwar Sharma in theihsakna a bawldan in July 27, 2016 nitak­lam dak 3:30 a full court meeting a thupukna dungzui in MJS-Grade III Officers final seniority list a nuai a bang in taklang hi. Amaute ahihleh Ms N. Lanleia; Ms Manalisa Maibam; Ms A. Shanta Devi; Mr. Alek Muivah; Mr. Nepram Sonykumar; Mr Y. Somorjit Singh; Mr. Lamkholal Kipgen; Mr. Janggoulen Haokip; Ms Ashem Tarunakumar Devi; Mr K. Nirojit Singh leh Mrs Masana Evange­line Panmei hi uhi.

 

 

 

 

NEWS LAKTOM

 

Gelmol ah MDC thak lawm

Tuni’n Gelmol khua ah tutung a MDC nominate member a guan a om Holkhojang, MDC kipahpihna hun zang uhi. Hiai hun TN Haokip, MLA & President, MPCC leh Langkhanpau Guite, Chairman/ADCC te’n uap uhi.

 

 

Addl CEO in CEO/ ADCC incharge len ding

August 1, 2016 a Dy. Secy, Govt of Manipur in order a suah dungzui in, August 1, 2016 a pan Sept. 10, 2016 tan Lal Bahadur Shastri National Academy of Administration, Mussoorie a IAS Officers 118th Induction Training Programme hun a Mannuamching, IAS (MN2011) in a tel sung in H. Thanglet, Addl. CEO/ADCC in CEO/ADCC incharge len ding in order suah a, tuni’n CEO/ ADCC incharge la hi.

 

 

Diesel Auto Assn in IB Road bawl ding

Lamka khopi laizang a om Tedim Road leh Tipaimukh Road kikal IB Road a kisiat mahmah ziak in All Ccpur District Diesel Auto Owners Association (ACDDAOA) in August 5, 2016 sunma dak 11:00 apan nitaklam dak 3:00 tan social work ding uhi.

 

 

July khasung in Malaria 8 mukhia

District Malaria Deptt in July 2016 a report suahkhia ua, July 2016 sung in damlou mi 2101 sisan test-na lak ah Malaria Positive 8 mukhia ua, huai lak ah Malaria PF 3 om a, himahleh July kha sung a Malaria ziak a si, official record bel omlou hi.

 

 

JE dalna damdawi hawm ding

Director of AYUSH, Govt of Manipur in tuni a ‘Project Belladonna 200’ tungtawn a JE dalna ding damdawi hawm ding a honkhiak toh kiton in, zingchiang, August 4, 2016 in Lamka Damdawi Inn ah OPD hour sung in JE dalna damdawi a thawn a hawm hiding hi. Hiai hun ah damdawi late’n innkuan sung a damdawi nethei ding omzah leh a kum zah uh lai a gelh in damdawi laktheih ding hi.

 

Sunna: Zamzalian f/o Kamlianjohn, Mata, tunitak dak 10 vel in JN Hospital, Imphal ah damlouna ziak in si hi.

 

 

 

….akim zaw deuh in : Here