You are here: HomeRSS FeedsThe Lamka Post

The Lamka Post | May 31, 2017

Wednesday, 31 May 2017 07:55

Mipite tung a nelhsiahna in NE ah hel nasepna uangsak: CM N Biren

Imphal, May 30: Zan Seppatni a New Delhi a North Eastern Council 66th Plenary Meeting nei­hna hun a Manipur Chief Minister, N Biren Singh in a thugenna ah, hel nas­epna toh kisai NE pumpi a buaina himahleh Mani­pur state toh kisai a muh­dan diklou piankhiaksak sawm a ‘national media-te’n hel nasepna in Mani­pur state tung a thilpoilua sukha banlou hidan a thu­suah a bawlte uh toh kisai naktak in kalh hi.

 

CM N Biren in a gendan in, hel nasepna kichi NE pumpi a buaina ahi a, himahleh national media-te’n Manipur ah thilhoih lam himhim suahkhe nuamlou uh chi’n gen hi. Hiai in Ma­nipur pawlam ate ngaih­tuahna naktak in sukha chi’n gen hi. North East a khantouhna sang a secu­rity solution a om theihna ding in, Manipur CM in Northeast a Chief Minis­ter leh Governor-te kiang ah pangkhawm a Prime Minister kimuhpih ding in ngen hi. N Biren Singh in, Manipur singtang bial a awlmohna toh kisai tangkoupih nawn a, hat­sem a khantouhna paipih tuak ahihleh tribal mipite khantouhna ding a pan­lak kin poimoh ahihdan gen hi. Hill Area Devel­opment Programme kichi singtang a khotang-nek­tak dinmun khantouhna ding leh mipite kituaktak a, a khantouh theihna ding ua kibawlkhia hidan in gen hi. Singtang bial ah in­frastructure development programmes patkhiak tuak mahmah hidan in­leng CM N Biren in gen hi.

 

Chief Minister in Del­hi leh Imphal kal a tang­tak a kikawmtuah a om ding poimoh hidan inleng gen hi. Hun paisa a mipite tung a nelhsiahna nasa­tak in, NE a hel nasepna uangsak ahi chi’n gen hi.Singtang bial ah armed personnel-te sawllut sang in, khantouhna ding nas­epna leh panlaknate sawl­lut hizaw leh mipite tung a kimuanna tokthouthak theilai ding ahi chi’n gen hi. State khopite kawm­tuahna ding lampi hoi­htak omlou chi’n gen hi. Sepna leh khantouhna kichingtak a om poimoh chi’n gen hi. Government of India officer-te kiang ah leng Manipur state veh ding leh state in hihtheih­na a neihte toh kisai Min­ister leh PM kiang tunzaw ding in ngen hi.

 

 

Cabinet in Internal Finance Division bawlkhiak ding thupuk; Bandh leh blockade dalna di’n dan bawl ding

Imphal, May 30: Manipur Cabinet in tuni’n state government nuai a department teng a Internal Finance Division (IFD) bawlkhiak leh state sung a bandh leh block­ade khamna/ dalna ding a dan bawlkhiak ding in thupuk hi.

 

Hiai thu ahihleh Chief Minister N. Biren Singh makaih a tuni a Chief Minister’s Secre­tariat cabinet hall a cabi­net meeting hun a thu­pukna bawl a om hi a, state government nuai a department teng a finan­cial management system kibang zat ding leh bud­getary discipline internal control om theihna ding ngimna hidan in thusuak in taklang hi. Internal Finance Division (IFD) bawlkhiak ahih toh kiton in department teng a ac­counts, budgets, audit, planning sections chihte Internal Finance Division (IFD) nuai ah lutvekta ding hi. Hiai toh kisai in Manipur Finance Service officer-te zat hiding uhi.

 

Tuni a cabinet meet­ing ah Manipur Sports Development Author­ity bawlkhiak ding leng lemsa uhi. Manipur Sports Development Au­thority in annual sport a tuailai tamtak a kihelthei­hna ding un panla ding a, kimawlna toh kisai a ‘tal­ent’ nei tuailaite zongkhia in tulel a sports leh academy omte puah­phat dingdan ban ah government leh public private partnership a sub-division, district leh state level a kimawlna lam khansakna ding toh kisai in panla ding hi.

 

District thak bawlkhiak a om Kakch­ing leh Jiribam a gamgi bawlfel a, Zilla Parishad nih bawlkhiak ding leh tu kum sung ngei a Pan­chayat elections neih ding chih leng cabinet in thupuk uhi.

 

Footballer mint­hang leh head constable (Manipur Police) Ms. O. Bembem Devi pen As­sistant Sub-Inspector rank a kaisangsak ding tungtang leng cabinet in lemsakpihna pia hi.

 

Super Fight League a champion martial arts fighter Kario Issac Ma­heo kiang a Manipur Police Department nuai a Meritorious Sports Quota tungtawn a Sub- Inspector piak ding leng cabinet in thupuk uhi. Kario Issac Maheo ahi­hleh Karong village, Se­napati district a om L. Ashikho Mao’ tapa hi a, amah ahihleh Super Fight League Challeng­ers (SFL) India a Mani­pur a kipan champion hihna ngah masapen ahi. Amah ahihleh Chief Minister N. Biren in tuma a Senapati a phak hun inleng a lohchinna thupitak ziak a Manipur Police Department nuai a Sub-Inspector piak hiding in ana genta a, maban a leng lohchinna sangzaw hon ngah deih­sakthu gen hi.

 

Huailou in, tuni a state cabinet meeting hun ah pawl tuamtuam in state sung a bandh leh blockade a bawlsekte uh ziak a mipite thuakna leh haksatna tungtang sawtkuamtak genkhawm uhi. Hiai toh kisai a High Courts of Kerala, West Bengal leh Meghalaya in thupukna a bawlte uh a genkhawmnung un, bandh leh blockade bawl pen dankalh a gamtatna suahsakna ding a dan bawlkhiak ding leh mip­ite a dia hoihzaw ding ban ah van hihsiat chi­hte omlouhna dia bandh leh blockade bawltu leh sponsor-tute tung a gakna bawl ding thu genkhawm uhi.

 

Huai dungzui in bandh leh blockade bawl ziak a van leh thil hihsiat a om teng bandh/block­ade bawltute’n (sponsore &b organisers) a dit/ bawlthak ding uh; bandh leh blockade bawlna a kigolhte matkhiak ahih uh leh a tung ua thubuai bulhkhum ahihban uah government employ­ment nuai a sepna nei­theilou ding leh govern­ment scheme khatpeuh hamphatpih theilou dia gakna bawl ding in cabi­net in thupuk uhi.

 

Bandh leh blockade bawl kichi pen Constitu­tion of India nuai a Ar­ticle 19 leh 21 tungtawn a Fundamental Rights kalhna ahihdan leng cabinet in genkhawm uhi. Supreme Court of India inleng bandh bawl kichi pen constitution toh kituaklou leh dank­alh a gamtatna ahihman in bandh ziak a thil hi­hsiat a omte leh manna om tengteng bandh sponsors leh organiser-te’n a ditkik vek ding uh ahi chi’n thupukna bawl hi. Bandh bawltute’n bandh bawltheihna ding a phalna nei uh hidan a kigen a, dan amau khut a tawi a sawm uh leh state government in mipite khualna a tua bang mite matkhiak ding chih leng cabinet in thupuk hi.

 

 

Old Age Pension sum hawm ding

LAMKA, May 30: Ccpur District Social Welfare Officer in thei­hsakna a bawlna ah, Cc­pur district sung a Ma­nipur Old Age Pension Scheme nuai a Purple Colour Card Holder-te a ding March 2016 a kipan February, 2017 tan, kha 12 sung a ding pension sum June 1-8, 2017 sung a District Social Welfare Office, Lamka a hawmkh­iak hiding hi’n taklang hi. MOAP nuai a Purple Co­lour Card Holder neiteng in mahni card chiat leh Aadhaar card xerox copy ban ah bank pass book tawi a taksa mahmah a sum va la ding in thei­sak hi. Himahleh sum la a kuantheiloute’n June 12, 2017 tan a DSWO/ Ccpur kiang a ngetna pe ding leh ngetnate vekchet ahihnung chiang a, pen­sion sum piakkhiak hipan ding hi’n leng taklang hi.

 

Pension sum hawm dingdan ahihleh hiai bang ahi. June 1 & 2 sun­ma dak 10:30 a pan sun­nung dak 3 kikal in Ccpur AC sung ate hawm hiding a, June 3 in Tipaimukh AC; June 5 in Saikot AC; June 6 in Henglep AC; June 7 in Thanlon AC leh June 8 in Singngat AC sung ate hawm hiding hi.

 

 

World No Tobaco Day 2017 zang ding

LAMKA, May 30: District Tobaco Control Cell, Ccpur saina in zing­chiang, May 31 sunma dak 10 in CMO Conference Hall ah National Health Mission nuai ah World No Tobaco Day 2017 zat­na om ding hi. Huai hun ah chief guest, functional president, guest of hon­our leh special invitee in Shyam Lal Poonia, IAS, DC/Ccpur; Dr. Kimngai­hching Simte, CMO/Cc­pur; Dr. J. Songoukham Samte, Medical Supdt leh Rakesh Balwal, IPS, SP/ Ccpur pang ding uhi.

 

Zingchiang a World No Tobaco Day 2017 zatna ding toh kisai in tuni sunma dak 11 in ral­ly om a, Dr. Kim Simte, CMO/Ccpur in hiai rally flag off hi. Rally ahihleh Lamka Police Station, Tedim Road ah kipan a, Dorcas Hall, New Lam­ka tan pai uhi.

 

 

ICAR Seed Processing Unit honkhiak in om

Imphal, May 30: Tuni Sepnawnni in Sec­retary DARE and Direc­tor General, ICAR, Dr. Trilochan Mohapatra in ICAR Research Complex for NEH Region, Manipur Centre, Lamphelpat ah Seed Processing Unit of In­dian Council of Agricultural Research (ICAR) Complex, North East Hill Region (NEH) hongkhia hi.

 

Hiai hun zatna ah Chhabilendra Roul, I.A.S. Additional Secre­tary DARE & Secretary ICAR; Dr. A.K.Singh, Deputy Director General(Agricultural Extension) ICAR; Dr. K.Alagusundaram, Depu­ty Director General(NRM & Agricultural Engi­neering) ICAR leh Dr. S.V.Ngachan, Director ICAR-RC-NEH Region Meghalaya leng tel uhi. Hiai hun in Farmers’ Hostel for ICAR Research Complex for NEH Region bawlna ding suangphum­na leng neih in om hi. ICAR scientist-te leh KVK staff-te ban ah a kisaipih official-te’n leng program zatna hun uap uhi.

 

 

Food Safety Team in enkhia

LAMKA, May 30: Tuni sunma in District Food Safety Team in Mualveng leh Tuibong a sang bawlna (bakery) omte vetchetna (inspec­tion) nei uhi. Hiai hun ah sang lak a kihel zel nahtang muatsa khong mukhia ua, sang bawlna mun leh sang bawlkhiak a omte leng mihing nek dia damtheih huailou ahihdan gen uhi.

 

Huailou in, Mid-Day Meal (MDM) toh kisai a Food Safety Certificate lakna ding in tunitan in District Food Safety Office ah ZEO/Ccpur leh CEO/ADCC nuai a government school tua­mtuam a headmaster/ headmistress 150 val in application form lata uhi.

 

 

‘Cyclone Storm Mora’ toh kisai in SSPP-GHQ in theihsakna bawl

LAMKA, May 30: Benjamin V Jamkhan­pau, Secretary, Public Relations, Siamsinpawlpi General Headquarters in tuni, May 30 a theih­sakna a bawlna ah, East Central Bay of Bengal tuipi tung a pingpei huai­setak leh huihpi hattak toh vuahpi kithuah ‘Cy­clone Storm Mora’ in India gamsung mun tua­mtuam leh Northeast bial mun khenkhat hon nawk ban dia gintak ahih ziak in gam kuan/loukuante, munken leh luipi-luita gei a teeng kuapeuh mah pilvang ding in theisak hi.

 

Hiai toh kisai in SSPP-GHQ in district mipite bitna ding deihna in Lamka DC Shyam Lal Poonia leng thuzakta ua, a poimoh bangbang a panla ding in District Disaster Management Team-te kigingsa in omta uhi. Hiai huihsia vuahsia a pan a pilvang a kuapeuh ahitheitan a gamkuan leh vakkhia omlou a mahni inn chiat a ahithei tan a om ding in SSPP-GHQ in ngetna bawl uhi.

 

 

Police & AR-te’n AK Rifle tang 2780 mankhia

LAMKA, May 30: Helpawlte’n Tedim Road tawn a thautang tamtak puaksawm chih thuguk police-te’n a ngah dungzui un, tuni, May 30 sunma dak 11 vel a pan in Bishnupur district police leh 25 As­sam Rifle-te’n Kangvai area, Tedim Road ah gari taite check/frisk­ing bawl uhi. Hiai hun ah car khat a pan in 7.62x39mm ball CTN (AK rifle) tang 2,780 mankhia ua, hiai toh kisai a case chiamteh in suizui uhi. Hiai toh kisai mah in Kangvai leh Imphal ah muan­moh mi 3 leng mankhia uhi. Amaute ahihleh Khaiginlal Haokip (34) s/o Jamkai Haokip of Gamphajang, Ccpur; Jangkhohao Khong­sai (40) s/o Thenk­hothang Khongsai of Thingkangphai, Ccpur leh Simon Gurung (31) s/o (L) Lal Bagadur of Mantripukhri, AT Line, Imphal East hi uhi.

 

Huailou in, state police in traffic toh kisai a special drive a neihna uah tunitan in fake driv­ing licence 337 mankhe­ta ua, huai toh kisai in FIR 7 chiamteh in hiai thu a kigolh hidia muan­moh mi 4 mankheta uh hi’n PRO/Police Dept in thusuah bawl hi.

 

 

‘Cyclone Mora’ in Miz leh Ccpur district nawk; Kangkap ah inn 7 kisia

LAMKA, May 30: Tuni, May 30, 2017 zing­kallam a pan in ‘Cyclone Mora’ in India gamsung a North East India a state khenkhat a bik in Tri­pura leh Mizoram nawk a, huai ban ah Manipur simlam a Ccpur district sung mun tuamtuam leng nawkkha hi.

 

Huihpi hattak leh vuahpi toh kithuah hiai ‘Cyclone Mora’ in tuni zingkaltung a pan in Tri­pura, Mizoram ban ah Myanmar gamsung mun khenkhat leng nawk a, Mizoram ahleng huihpi hat mahmah in Saiha district sung ah vuah tam law kei mahleh huih hat mahmah in Saiha Dam­dawi Inn muutsia hi’n thusuak in taklang hi.

 

Mizoram state sung Khawbung ah tenna in huihpi’n mutsia a, Lungchhuan, Serchhip district ah inn 2 mutsia in inn khat pen luahthei­hlouh ding in kisia hi. Saiha district leh Lun­glei district sung ah hui­hpi hattak toh kithuah in vuah tamtak zu a, tenna inn bangzahhiam a kisiat ban ah singkung bang­zahhiam leng mutpuk (bullot) hi.

 

Tuni a huihpi hattak toh vuahpi kithu­ah in Ccpur district sung Singngat Sub-Division a om Kangkap ah leng tenna inn 7 naktak in mutsia a, huai ban ah Kangkap a om Assam Rifle-te camp sung a inn bangzahhiam leng kisia hi’n thutut kingah hi. Kangkap khua a huihpi’n inn a mutsiatte ahihleh Songkhopau s/o Nekzakham; Thong­khangin s/o (L) Aizam; Paukhankhup s/o Kam­vai; Kaizasiam s/o Kai­kap; Nekthianlam s/o Zamkholet; Phungkho­pau s/o (L)Lalkhopau leh Nengzagin s/o (L) Haugou-te inn ahi.

 

Tuni a huihpi hat­tak toh vuah zuk hun in Lamka khopi sung mun khenkhat ah leng huih hat sim mahmah a, himahleh inn-le-lou ki­sia omlam bel theih hi­lou hi. Huai ban ah Ma­nipur state sung Chandel district leh Khoupum ah leng huihpi hat mahmah a tenna inn bangzah­hiam kisia hi’n thutut kingah hi. Chandel dis­trict sung Anal Khunou a huihpi nung a vuah tamtak a zuk ziak in Sa­jik Tampak, Khengjoi, Dingpi leh Lonpi-Long­ja area kikawmtuahna Chakpikarong Lei tui in taise nawn hi.

 

Huai ban ah Myan­mar gamsung Rakhine state ah leng huihpi hat­tak toh kithuah in vuah tamtak zu a, tenna inn bangzahhiam a kisiat ban ah Chin State sung Thlantlang khua ah­leng tunzing dak 7 vel in huihpi’n tenna inn 6 mutsia hidan in thusuak in taklang hi.

 

  

Dy CM in ICAR 23rd Regional Committee Zone III Meeting uap

IMPHAL, May 30: Tuni a City Convention Centre, Imphal a Indian Council of Agricultural Research (ICAR) 23rd Regional Committee Zone III Meeting neihna hun a Deputy Chief Min­ister Shri Yumnam Joy­kumar Singh in a gendan in, state a thil piangkhiate naktak a khansak semna ding in, integrated farm­ing, cash crop cultiva­tion leh double cropping chihte uangbawl sem po­imoh chi’n gen hi.

 

Deputy Chief Minis­ter in a gendan in, state a farm sector ah buaina tamtak om a, irrigation system hoihtak, storage capacity leh technological knowhow taksapnate ziak in gah piangkhe dingte naktak in niamkiaksak chi’n gen hi. State ah inte­grated farming leh double cropping patkhiak in om mahleh tutan in khangtou theilou chi’n gen hi. State mipite buh kia chiing mailou a, sumsuah theih ding haichi tuamtuamte leng chiing ding in ngen hi. Singtang bial a sing­tang loubawl leh terrace cultivation chihte suk­kiam a hihtheihna ding in, horticulture leh floricul­ture lam uangbawl sem poimoh chi’n gen hi.

 

Agriculture Minister Shri V. Hangkhanlian in a gendan in, state a milip a khantouh zel toh kiton a, loubawlna munte leng keklet zel poimoh ahi chi’n gen hi. Rice Re­search Station-te’n tang­sanna munte ah High Yielding Varieties (HYV) leh Ikop leh Kharung Pat munte ah deep water paddy variety-te a patkh­iak uh poimoh chi’n gen hi. State ah KVK 9 in nas­emkhia ua, government in district teng a KVK khat chiat koihbeh sawm in panla chi’n gen hi.

 

 

JPO in Get- Together nei

LAMKA, May 30: Manipur assembly in August 31, 2015 a Bills 3 a passed ziak a si leh liamte buaipih a pang Joint Philantropic Or­ganisation makaite’n tuni sunnung dak 3:30 in KKL Complex ah kimuh­khawmna nei uhi. Hiai hun ah Bills 3 ziak a si Tribal Martyr-te luang vuikhiak a om theihtak ziak in kipahthu gen uhi. Hiai hun zatna Lianza­lal, President, ZYA-GHQ in makaih a, YMA leh KKL makaite’n thugen in HYA-GHQ President in thumna in ankuang laan a, kipahthu genna an­kuang umkhawm uhi.

 

 

Health Edn Training nei ding

LAMKA, May 30: District Malaria Office (DMO), Ccpur saina in June 1, 2017 in CMO Mini-Conference Hall ah ‘One Day Health Educa­tion Training’ om ding uhi. Huai hun ah MPW 15 - T. Chinzakam, Kham­chinlian, Lalremthang, Athang Kom, Thu­amkhanlam, K. Khen­thang, Zamginmang, T. Manglianmuan, Thianza­lal, Seithang Mate, Rem­ruotsang, Lalmalsawm, T. Thangminlian, Robert Pauzalal leh Jamzadou tel ding uhi.

 

 

Bethesda School of Nursing ah admis­sion kihong lel

LAMKA, May 30: Muolvaiphei, Ccpur a om Bethesda School of Nurs­ing in 2017-18 a ding BSc leh GNM zil nuamte a ding in admission ki­hong lel hi. BSc Nursing (4 years) a ding in seat 30 om a, huai ding in class- XII science zou hih ngai ding hi. GNM (3 years) a ding in seat 40 om a, huai ding in class-XII Arts leh Science hithei tuaktuak hi. Admission form ahihleh

 

 

Bethesda College of Nursing, Office leh ICI HQ office ah leng lak­theih ding hi.

LAMKA, May 30: District e-Governance Society (DeGS) nuai a Common Service Cen­tres (CSCs) leh Treasury Office, Ccpur in May 12, 2017 a pan Jeevan Pra­maan (Digital Life Cer­tificate for all Pensioners) Camp a sai uh lohching­tak in paitou zel hi. De­partment of Information Technology, Government of Manipur a pan theih­sakna dungzui in May 31, 2017 tan hiai camp neih ding chih himahleh June 10, 2017 tan a dia behlap in om hi.

 

Ccpur district sung a Civil Pensioners/Family pensioners 3661 om lak ah tuni a Aadhaar Updat­ing/Correction bawlsak 65 toh sim in pensioner 703 in Aadhaar Updat­ing/Correction bawlsakta ua, tuni mah in JP a pen­sioners registered 106 om hi.

 

Fresh Aadhaar En­rolment a kipat a pan in tunitan in pensioner 45 zouta ua, Annexure-I form leh document po­imoh teng pelut 2025 phata hi. Pensioners/ Family Pensioner-te lak a Aadhaar correc­tion leh Pramaan ID nei nailoute’n a kintheilam a bawlsak ding in District Manager DeGS Ccpur Peter G Bieklien in theih­sakna bawl hi.

 

 

Union Minister in RTSR mun veh, silk produc­tion hatsak semna di’n panpihna chiam

Imphal, May 30: Tuni Sepnawnni aMantripukhri a Re­gional Oak Tasar Research Station (RTSR) enkhia Union Minsiter of State for Textiles, Government of India, Shri Ajay Tamta in thuthaksaite kiang a, agendan in, state a silk production hat­sak semna ding in central government in kong bangkim ah kithuahpih ding chi’n gen hi.

 

Shri Ajay Tamta in a gendan in, Ma­nipur kichi Northeast state pumpi a silk khau piangkhesak tampen hi a, state ah lung ekpuan nei(silk variety) tamtak om a, silk khau tamsem piansakna ding in Station a scientist-te’n lungnou thak tamsem piansakna ding in pan a lak uh poimoh chi’n gen hi. Silk production in state a sepna tamtak a piakkhiak ziak in, Central Government in silk production khansak semna ding in kong bangkim ah kithuahpih ding chi’n gen hi. Union Minister in lungnou(cocoon)-te koihna munpi Oak Tasar Grainage mun leng veh a. Regional Oak Tasar Research Station (ROTRS) a huanbawlte leng houlimpih hi. Union Minister a hihleh Commerce and Industries Minister Shri Th Biswajit leh Sericulture Department official-te’n kithuahpih uhi. Hiai zoh in Union Minister in Classic Grande ah Commerce and Industries Minister Shri Th Biswajit leh Parliamentary Secretary of Sericulture Awangbow Newmai leh sericulture and Textiles Department official-te meeting neihpih hi.

 

 

 

 

 

 

 

NEWS TOMKIM

 

Ph.D ngah

LAMKA, May 30: Manneihou d/o N.R. Chandran & w/o Pauzamuan Vaiphei of Leisang, Ccpur in May 24, 2017 in Manipur University a pan Doctor of Philosophy (Ph.D) ngah hi. Aman Prof M Mani Meitei supervise-na nuai ah ‘ Colonialism and Nationalism: A Study of Kanthaura, Thing hall apart and a grain of wheat’ chih thesis tungtawn in Ph.D ngah hi.

 

 

Tuivai a kia zonglel

LAMKA, May 30: Tuni’n Daidou leh Chaihpui kikal Tuivai lui ah Parvachawm khomi nupi khat kum 40 vel ding mi kia a, tu in khomipite’n a luang zonglel uh hi’n thutut kingah hi.

 

 

JSK/JSSK sum kihawm ding

LAMKA, May 30: Lamka Damdawi Inn a JSY/JSSK May 2017 sung a hawmkhiaklouh om teng zingchiang, May 31, 2017 in kihawm ding a, a kisaipihte’n ngaihven ngai ding hidan in a saitute a pan thutut kingah hi.

 

 

DC/Ccpur in mipite pilvang di’n theisak

LAMKA, May 30: Shyam Lal Poonia, IAS, DC/Ccpur in tuni a thusuah a bawlna ah, maban a huihpi hattak leh vuah tamtak toh kithuah nung thei dia om ziak mipite pilvangtak a om ding in theisak hi. Hiai toh kisai in SDO/BLO teng inleng amau area sung chiat hoihtak a enkai a, huihpi leh vuahpi ziak a siatna leh thil hoihlou tung a om leh kintak a DC/Ccpur office a report pe ngal ding in theisak hi. Huai ban ah huihpi leh vuahpi ziak a buaina tuakte’n telephone number 0384-233875 tungtawn a thuzak theih ding hidan inleng taklang hi.

 

 

SUNNA:

Upa Kap Nang (83) f/o Pa Khen Khup of Moreh, teknat in tuni May 30 zingkallam dak 4:30 in si a, tuni’n kivui hi. RIP

 

 

 

 

 

 

 

…for more detail : Here