You are here: HomeColumnsGapkhuamKideek Haksa

Kideek Haksa

Written by  Pauzagin Tonsing Published inGapkhuam Tuesday, 02 September 2014 02:40

~ By: PauzaginTonsing

 

Khamtheih goihsate’n kideek haksa a sa mahmah uh chih i thei chiat ua, khamtheih sese goihlou in zing singpi goihte bang inle kideek haksa i sa ngoihngoih mai uhi. Goih (addicted) neite a dia i goihsa apan kideek ana haksa mahmah a chi sek ua a dik ding in ka gingta. Laigelh chih bangle ana kigoih tei in chin kideekdeek mahle a hong pawt hun a tam luat chiang a kideek zoh son diing ana hikhollou hi ve aw.

 

Gelhsa suahkhiak louh leh gelh diing a tam a, tutung chu suahkhe himhim awle chih ngaihtuahna toh ka gelh ziak in gelh ut a tam a bawng-ek denzaak a bang phiah, hilou abang phuah mai ka chi. Hah! Koi apan diing ka de aw chih ka ngaihtuah lai in ka article gelh masak pen LTTE-te kipat tuung a Black Tiger-te khawng uh ka gelhdan ka lungsim ah a hong lang a, Sri Lanka in a nuaichimitna ua ‘Human Right’ palsat a a nawkdan khawng uh lungsim ah hong lang hi. Gelh tuung lai jat (tribe) based chauh in pawlpi anei lai a, tuni a ‘pawlpi’ i chih maite dan khawng a piang nai kei hi. Pawlpi lian khat phuan a, huai a jat hilou nam (nation) humhalh diing poimoh sakna lianpi khawng ana kinei tei ahi diing a, ‘Saangsavai diing Tang Ngalliam Kua?’ chi a chouna toh ka gelh laikhawng ka ngaihtuah hi.

 

Haichilh (fanatic) kihimai ei ve, huailai chu! Pawlpi le a hong om petmah a, i nam in a dam pih a, i lungmuang a, tha hon pia in bit kisakna a om a, mipite in neitu hihna toh ‘Sial in chilchil leh neek a thuah’ chih bang in sawiseelna (critics) [gensiatna hipahlou] toh neitu hih ziak in akua-akua in i kikawk huan souhsouh gouh uhi. Ahihhoih chiang un lungsim guuk ah kisaktheihna toh i om hang in ‘nam phunchiak’ i hihman in hichi zawdeuhleh i chih bawl man un i gen uakuak uhi. Ahihkelh chiang un amau sang a pona zaw in i kamsiamlouh uh langsak in i genkhe toihtoih uhi. Tuni chiang ngial ah lauhthawngna toh i om ziak un social media ah mahni min zang ngamlou in deuna (destructive criticism) i bawl miahmiah mai uhi. Hiai in bawlhoihna a tun kei diing a, thangpaihna a tut toh kiton in engtat utna leh guun bawlna a piangsak zaw sek hi, ngaihtuah thei a dia chiinlouh chi ahi.

 

Hiai lam hiai ah khin liuleu ni hang. Huchi kawm in khosa kawmkawm i hihna uah i niteng khantouhna ua poimoh thilte nelhsiahna thupi tak a om man in i lung uh a kim thei mahmah kei hi. Elektoral politiks in i niteng khantouhna uh hon tut di pen a hon tutlouhna ah mipite i lunghaang uhi. I en ua, i ngaihtuah ua, mundang leh gamdang toh i etkak chiang un i gam ua khantouhna a tunlouhdan i mu ua, i thangpai mahmah uh, kei tel in. Nidang in elektoral politiks i gen chiang un MLA i gen ua, MP bel i genban kei sim uhi. Neuchik kikhangtou ahi ngei diing a MP bang leng lunglutna i nei pianpianta ua khantouh vaai mahmah hi. Tua kia hilou in i sumtual ua om MDC bangle a zang siamte a diing a khantouhn hoih tak tun thei i neita uhi.

 

Vaite khat toh hoihtak in houlimna khatvei ka nei kha ua, nou Independent hiam Sovereign State ngen in deih hile u chinle tua na teenna teng mah uh huap diing ahih ziak in na gam uh khangtou sak unla, tua Solkal (India) in khantouhna dia hon piakte zang in puah ve ua hon chih kha dik ka sa mahmah hi. Ei lawi bel ‘gam’ bang ngen khempeuh in hilehle zingni a i taisan diing bang mai a i gamsung puahna di kuamah in ngaihtuah lou hile kilawm, kikhual mawngmawng omlou! Mipite le kikhuallou, heutute’n le khuallou pawlpi tuamtuam inle i gamsung khantouhna diing khuallou in gilpi chauh khual hilel tak ve hang aw, na chi hia?

 

Ka lunglutna keniam hia ka thei kei, ka awlmoh zim leh neu hia ka thei kei, hilehle ekmong gozen a pang fenfen a khosa lah tak a om i mipite i et chiang in mittui a dai mahmah ziak in ka hon gelh diing. Kuamah ka dem kei a, hihtheihdan leh hihnopdan kituam a, theihdan leh sepsuah utdan kituam ziak lel zaw hikha in teh. Ahihhang in gam it taktak i chihleh i mipite a masak ngai hi ve aw, mipi mangthang a gam changkang chih om thei lou himhim. Mipite hong changkaan chiang ua gam khangtou hithei pan di hi veh.

 

Eh! Mipite changkaang mahmah ve hang aw, muhlouh kineilou, theihlouh le kineilou, teknolozi khan toh kiton a i mipite khang hulhul uh hilehle heutute’n hun lui puak a puak sawm, hunlui kep a kep sawm hilel i hizaw hia? Ka neu mahmah lai un kiteelna khat a om dek a, candidate pu vote zonna kha nalh ka sa, ‘Hon vote ua antang k’on pe di’, tangval hon in a phuah beh ua, ‘Na hon vote uh leh lampi a dung leh vai kikim in ka sial di,’ hiai hun kha beita ei ve!

 

I ban gen sim a a mankhate in zaw mankha mah unte, gam itna diktak zaw a sung a teeng i minam pihte itna a a kipat diing hi di ei ve maw.

 

© January 2014 | Pauzagin Tonsing

 

Read 1006 times
Login to post comments