You are here: HomeColumnsPhualvaKa Pen Drive' Mang

Ka Pen Drive' Mang Featured

Written by  Zo Phualva Published inPhualva Wednesday, 04 June 2014 01:00

~By: Phualva

 

HP company bawl, 4 GB, silver rong pen drive neuchik  khat nei hi ve’ng, sun a office’ computer a ka thuah botkhe khalou in nitaklam a ka paisan khak ton om a; a khen chiang in lah puanak sakhau a i kuah, sakhau sunga a ompih dang sum ahiam, romol ahiam, chabi ahiam i lakkhiak chiang in amah leng ana pawtkhe tei in a zing khong in office a tutna gei peuh, gari sung peuh ah muhkik hun om hi. Huchia kum khat/nih ki om ahihman sumang den thei taktaklou dia ki ngaihna omsim hi. Ahihhang in lungsim khat ah, "neulua ahihman ina hichih chih mawk leh mang taktak khong di hiveh aw” chihna om veve a motor chabi peuh toh i khaikhawm netnat le lah a pen drive khaina hoih chiahlou ahihman in “mangzaw kha in teh” chi in a om masakna, sakhau sung mah tungkik thou hi.

 

Laigelh khong i lunglut tei hang in nasep i buai hun, i gelh peihlouh hun leh i hul hun a tamzaw a; office khong a nasep ding a omlouh chiang in lungsim a honglut khenkhat gelh ding chi a kipat hun bel om sek sam hi. Gelhfuh ni in pai zungzung mahleh, kihul a paragraph khat kan le ngahzohlouh ni bang a om hi. Office khawlni khong a inlam a gelh ding i chihsim chiang in le huchibang mah hi nuam sek hi. Huchi ahih chiang in office computer leh inlam khong ah laigelh khat abul kipan, zohlouh a om nengnung pawl om sek hi. Office a huchi a om zengzung pen hi khinlou ahihman in huchibangte pen drive a lakhia in office computer apan nulmang zel in om hi. Man hunhun, peih hunhun a va etkik, puah kik ding chi a pen drive a kikoih ahihman in i peih chiang in va ki en kha zauh zel hi. Huaiziak a pen drive pen sakhau a kuah a i paina lamlam a kizuisak le a ki hi sim hi.

 

Laigelh, a diak in thu houchik leh tomchik a i gelh khenkhat hun tomchik sung in ki gelhzou mai a, aban gelhbeh ding le omlou, et leng ki enpeih nawnlou in i koihna didi a koihpah mai pawl om mahleh a khenkhat i va etkik chiang a puah ding, bawl ding a tam a tam, idea hoihzaw sem hileh kilawm hong pawt thei pawl om hi. Tuni a hoih i sak a i gelh bang a zingni, thaini a i etkik chiang in hichizaw leh chih tampi  omthei hi. Hun a hong paipai chiang in eipau a laigelh dan bangle a gelhdan “hichi dikzaw, hoihzaw di hiveh” i chihpawl hong omthei nawn hi. Gelhpeih, puahpeih in bawlbawl le hun sawt i lak peuh leh hoihsem mai ding pawl om  a bang hi. Laigelh khenkhat, data leh thu tuamtuam kaihkhawm a gelh ngai pawl a om a, a huchite bel ka gelh ngei mang kei hi. Ka laigelh tamzaw khualzinna leh hun paisa ahiam, internet khong a kinialna om thu khenkhat toh kisai leh thu hou chikchik ngen ahi sim hi.

 

Facebook, whatsapp leh a group khong a i bual nung bangbang hiam lungsim a hong pawt, gelhnop  a om chiang in le a tuam a va gelhkhiak sang in huai lak mah a tom chikchik khong a mi houlimtheihna ding a va gelhkhiak (post) suk pah a baihlam zawk ton om nawn hi.  Huailam zaw i gensau dah dia, laigelh zohsa, zohnailouh inn leh office computer leh pen drive a ki koih zengzung, a khen chiang in office a a bul i pat khat inlam a i sutzop ahihkeileh inlam a i gelh pat, office a i sutzop chihbang omthei hi. Inlam a i gelh ahihlouhleh i sutzop khat i matutna pen office a i va sutzop dek chianga pen drive a koihkhaklouh i na puah pen inlam computer ana om khong hithei, ahihkei leh office a i matutna inlam a sutzom sawm bang ki hithei a buaihuai ahihman in pen drive a koih peuhmah office bang ah ka nulmang tawmtawm mai sek ka chikhin hi.

 

Kiginni hi in ka thei, office khawlni khat in ka pen drive inn a om ka sak ka mu zoulou nawn mawngmawng kei a, gintakna leh zontheihna teng ka zon hang in ka muzou kei hithet mawk hi. Inteeknu kiang peuh a dong in, amah ka ngohbawl chiang in aman lah mukha a kichi hetkei hi. Amah fellua ahihman a office kaitawp inn i tun chianga i puansilhte sawp ding chi in niteng in a sakhau a omteng lakhia in hon sawpsak sek hi. Huchia sakhau a thil omte aman lakhe sek ahihman a amah ki ngohbawl ahih chiang in aman le haihot sim a a koihna theilou hikha dia ki muangmoh in zontheihna teng a hon zonpih hang in in a muh tuankei hi. Office a nuse kha ka hi ding chi a office kai nawn ding ngak mai a nagita hi. Office kainawn chiang in office computer ah leng ana kithuah tuan keia, drawer sungteng pheklek mah leng pen drive muh ding ana om tuan kei hi. Office a inphiatte khong i dot chiang in le kuamah ka mukha a chi a omta kei hi. Koilam ana tung ahimah diam ah..

 

2012 kum a Zogamonline a userte min poetry le hichiahlou ka bangelh khat a khonung a saktheih ding la a bawltheih dia ngaihtuahna hong piang thak ahihman in a kaih hon bawlsak ding in Zomi musician muanhuai taktak Zen Lian, JK Kam, Alfredz Lian Zomi, Duel Khual chihte internet apan a ka houpihna thu teng ka gelhna, LA PHUAH LE BAIH CHI KEI E chih thupi a ka zat hiven. Zomi musician internet a ka kizoppih khakte ki maingap chia khat khit khat a kaih hon bawlsak ding a ka ngetna leh ka ki dawr dan uh thutak himahleh chiamnuih pianism a ka gelh ahi a, la dia kiphuak hilou ahihman a a kaih bawl ding pen a kuapeuh in haksa sa ahi ngei ding ua, Duel Khual chihlouh a kaih hon bawlsak dia ka nget peuhmah toh ka kizopna uh siatloh hipen mai in ka thei hi. Duel Khual pen Guwahati Zomi Meet 2014 a hong hoh ding chih kigen ahihman a huai khong kan kawm a net a khatvei ki houpih lel ka hihman uh leng ahi kha ding. Huai la tuni tan in le a kaih final pomkip nailouh in a omlai hi. Hun a hong paizel a, kum khat val bang a hong kivei chiang in hiaithu ah gelh ding hong tam deuhdeuh in, ka gelhdan khong kon puah thak chiang in hong sau tektek a, ka khoih nasa in ka puah nasa mahmah hi. Laigelh sawt ka sual pawl ahi ding. Pen drive in hon taisan nung in inn a ka laptop a a latest om ding ka sak leh ana omkei maimah a, office a lah nulmang khinta, fb munkhat a ka gelh tunglai a ka koih pen lah anung a kinak puah lota, ki nak gelhsau lota ahihman in zattak nawnlou zel hi.

 

Adang, Goa leh Mumbai zinna leh bangbang ahiam zohsianglouh pen drive sung a om omsam mahleh, hiai laigelh pen ka pen drive toh a hong mang hiau mai chu kua a ding in bangmah hikei lele ka it in pammaih ka sa mahmah lai hi. Goa leh Mumbai zinna bang le pammaih kasakna khat a om a, huai tuh Guwahati leh Mumbai kal lenna sung a zi leh tate zawn(line) khat a tukhawm ua, kei a tuam ka tut khak leh lenna a hong len sawt chiang in kimkianga vaite’n a laptop uh, a tablet uh, a mobile uh hon lakhe souhsouh ua movie en, game kimawl peuha a hong om souhsouh chiang ua kei leng kipan in ka laptop lakhia, lenna sung mah a ngaihtuahna leh kimkianga thil tungte Chapter nih phial ka gelhkhit ahihna ah kei a ding in CIAL bik deuh a ka ngaihman ahi hi. Tun va bulpat dek nawn le lenna sung a ka lungpuak leh ka kimkiang a thil om leh tungte ka gelh, huaibang in ka va gelhkhe thei nawn peuhmah kei ding chih chiang ka hihman in gelhthak dia kipatna se le om ka sa kei hi.

 

Huaibang mah in la kaih bawl tungtang pen le va bulpat thak nawn na zia omlou hi. Hun sawtpi ka na khoih nilouh ahihman in gelhsa pen huaidan in ka gelhkhe thei nawn ding in ka gingta kei himhim hi. Pen drive mang pen muhnawn kilamen in khathum khong a thak le leinuam lou a ka om hang in ki muzouta lou ahih chiang in atawp in a kibang mah, tutung chu 4 GB hilou in 8 GB ka lei khongta hi. Neu in a kep haksa a mansak baihlam chih thei mah leng “ka mangsak nawn kei ding” chi a choubawl a a kibang mah ka lei sese ahi hi.  Ka leini office kai tawp a koi a koihkha ka diam ah a zing in ka muzoukei pah ngal a; office lam a lah nuselou peuhmah, a bawm apan lakhia in a bawm dustbin a pai, a pen drive pen ka drawer sung a koih, ka paidek a lakhia a ka sakhau a ka guan lamtak chiang tak a thei ka hih chiang in inn a muhzohlouh pen lamdang ka sa sim mahmah hi.

 

Ki mu zounawnlou, a mang hinawnta chia ka om nung kalkhat hiam a pai khit in ka tapa pan pen (laikung) koihna bawm (nou chih zawk di hia) sung ah a hon mukhia a, huai le a luipen hi di a na sa a ka kipahsimten leh kon velchian chiang in a thakpen ana hi zomah hi. Awl a hoihtak a i ngaihtuah thak leh lawmnu'n ka puansilhte sawp dia a sakhau a omte a lakkhiak drawer tung a a koih kha a manlouhna ding chia penbawm sung a ka va khiaklut hita in ka thei hi.

 

30|05|2014

Read 943 times Last modified on Tuesday, 20 October 2015 15:09
More in this category: Tu hun a laibu kepbitna khat »
Login to post comments