You are here: HomeColumnsSuanlyan TungnungLungsim Damtheihna ( Mental Health)

Lungsim Damtheihna ( Mental Health)

Written by  Suanlyan Tungnung Published inSuanlyan Tungnung Saturday, 09 May 2015 07:32

 

~ By : Suanlyan Tungnung

 

Tulai in Lamka khopi sung ah sihdan ngeina hilou deuh ‘gui-awk’ ahihkei leh mahni hinna la ahong tam mawk a, lungkham huai mahmah hi. Bangziak tak a igam hichi khop a chidamlou ahia chih suut ding chita lehang a ziak gen ding atam dia, huaite lak a khat ‘mental health’ kichi neuchik kikum khawm ni.

 

‘Mental Health’ kichi bang ahia ?

Lungtang ichih chiang in atangpi in taksa a sisan pump khe tu (heart) chihna ahi a, lunggel leh thil ngaihtuahna lam toh kisai igen chiang inle LUNGTANG akizang thou hi. Mental Health chia igen dek pen ahihleh sisan toh kisai khollou, lungsim, thil ngaihtuahna leh feelings lam toh kisai LUNGTANG pen ahi hi. Huaiziak in LUNGTANG NA ichih chiang in HEART PROBLEM hizawlou in, a ngaihtuahna/lunggeel lam toh kisai ‘LUNGSIM DAMTHEIHNA’ ahizaw chih theichiat ni.

 

Leitung idamsung in taksa leh thil ngaihtuah theihna lunggel a tuam a kheng khiak theih ahikei. Mihing khat a taksa a damtheih ziak in “mi damthei” ahi tuankei. Mi damthei kichi khat in a taksa kia hilou a, a lungsim ngaihtuahna natawm a damtheih a ngai hi. Taksa a damlouh theih bang in, mihing lungsim leng damlou thei sam hi. Himahleh ei singtang mite lak ah lupna ngak jen ahihkei aleh ‘damlou’ kichilou hi. Lungkhamna chih khawng damlouhna dan in akikoih kei a, adiak in pasalte bang bangchi tuk in lungkham/lungziing leleng akahlouh ding chih ahi zawmah hi. Lungkham/lungziinna neu chikchik hong kigawm khawm in atopna ah thuakzoh vual hong hinonkei mahleh panpih theih ahih lam kuaman athei kei hi. Huai buaina tuamtuam kigawm khawmte thuakjou nonlou khenkhat in a hinna tanpha uh manpha asa kei ua, sih a telzawta uhi.

 

Mihing khat in lungsim suangtuahna aneih ding, niteng buaina neuhneuhte a sukveng theih ding ban ah lawm-leh-vual, tanau chihte hoihtak a apolh theih ding ahi. Himahleh mi khenkhat a ziak gentheih omlou in a om deeduu ua, kuamah phawkphalou hileh kilawm in, amau om om in a om uhi.

 

Mi khat mentally healthy ahong hih chiang in -

 

a)        A  omdan nuam asa

  • Amah leh amah a kimuang ngam
  • Sepkhelh/bawlkhelh aneih chiang in moh apaw ngam
  • Self- respect anei

 

b)        Midangte ading natawm in nopna apia:

  • Midangte ittak leh zahtak tak in a bawl a, a muang ngam
  • A lawm-le-gualte adi’n muantaak khat ahi.
  • Mi teng toh a kipawllim thei.
  • A mihing pihte a ding in a pan theina teng a theihtop a suah

 

c)        Niteng haksatna tuamtuamte a palkan jou jel:

  • Buaina bang hiam a om hun chiang in sukveng theihna ding lampi a zong thei
  • Ama septheih tan atheih ban ah, thupukna le ala thei
  • Tup kichian anei thei
  • A mohpuaknate gin om tak in a sem suah
  • Lauhna, lungneuna, hehna, thangpaihna leh thil tuamtuam ziak in a nasep a buaikei

 

Bang pentak in Mental health disorder/problem piangsak ahia ?

Tuni tan in lungsim natna piangsaktu theihsuah hinaikei mahleh khenkhat bel khuak a hong kipan ahi chih theihkhiat ahita hi.A hon suangtu nu-leh-pa CHII (gene) hiam, natna ziak, liamna ziak, sisan ahiding bangtak a khuak a alutlouh ziak, vitamin taksap luat ziak chite’n khuak subuai thei a, huai in LUNGSIM NATNA a tunthei hi. Itna ana donglou ahihkei leh hasotna hiam, thununna chih himhim ana tuahlouh ziak in naupang khat in a hinkhua ah banghiam taksap nei hileh kilawm in thawmhau thei a, a pichin nung in huai thawmhauna LUNGSIM NATNA ahong suak thei hi.

 

Zawnna leh gentheihna, nekzonna a taksapna, nelhsiahna, dikloutak a vaihawm khumna, nuainetna leh khotang hinkhua a tuambawlna ziak in LUNGSIM NATNA neihtheih ahi hi.

 

Thil puaknatluat khat hiam, lauh luatna hiam ahihkeileh haksat-gentheihna leh genkhiat theihlouh lungzinna ziak a niteng hinkhua a hiding bangtak a zat theihlouhna pen tak Mental Health problem akichi hi. Mental health in mihing lunggel leh nasep a subuai thei hi. Himahleh hichi dan a lunggel tuamtuamte’n niteng hinkhua leh hindan ngeina a sukbuai hial ma in panpihna zon theih ahi a, sukdam theih ahi lai hi. A neu-alian, a tek-akhang in LUMGSIM DAMTHEIHNA a poimoh gige chih theichiat masa hi.

 

LUNGSIM NATNA neite atangpi in etmai a theih hikei mahleh hiai a nuai ate apat in theihtheih ahi hi.

 

  • Ihmut ahikeileh ann nek kichuplou (ann duhlua ahikei leh duhlou/ihmu theilou)
  • Lawm-le-vual apat kihem khia, mahni chauh a om nuamsa
  • Tha neilou or zoi ngoihngoih
  • Poisak neilou, hi melmul
  • Taksa mun tuamtuam na sa
  • Kinepna neilou, ki ngaisia
  • Nahzial, zu leh khamtheih a kibual
  • Nidang banglou tak a thil ngaihtuah theilou, lunggel kikokalh, thil mangngilh hat, heh/ khase pahpah, lunggim leh lau mawk
  • Mi kikou khum ek-ek ahihkei leh kinak pih (Yelling or fighting with family and friends)
  • Mood swing (kipak phut, heh phut, dah phut)
  • Thil banghiam lungsim a ngaihsun den, paikhe theilou
  • Aw ging khawng ja ahihkeileh banghiam a omlou khawng a om dan a ngaihtuah in a taktak dan a koih.
  • Mahni hiam midang suknat/sukliam ding lunggulh
  • Niteng nasep ngeinate semsuah theilou ahihkeileh haksa sa

 

MENTAL ILLNESS CHI TUAMTUAMTE:

Mental illness ichih a chi tuamtuam a om hi. Leitung a psychiatrist tuamtuam in ICD 10 hiam DSM TR kichi zang in hiai natna a khen uhi. A tangpi a eilak a omte khenkhat ahihleh:

 

1)       Anxiety disorders: Hiai damlouhna neite’n mun khenkhat ahihkei leh banghiam thil tung khenkhat a om chiang in a lau ua, a taksa tung bang uah natna tuamtuam a neithei uhi. Huaite lak a khenkhat ahihleh lau-leh-liing (nervous), lungphu kin, khosa neel in buak leh thabei zungzung chihkhawng ahi deuh hi.

 

2)       Mood disorders: Hiai neite a genhak mahmah uhi. Khat veivei kipak petmah ahihkei leh dah petmah chih khawng in a om uhi. A tangpi in lungzinna (depression), poisak neihlouhna (mania) ahihkeileh bipolar disorders (kipak petmah, dah petmah) chihte a nei uhi.

 

3)       Psychotic disorders: Psychotic disorder ichih in lungsim ngaituahna buai petmah lam a gen hi. A tangpi in chi 2 in a kilang khethei hi. HALLUCINATIONS – thil omlou khat a om dan a koih, mi kuamah omloupi a mi pau khawng za ahihkeileh mi mu. DELUSIONS – mahni suangtuahna dikloute thudik dan a pom, mi’n hon that dek ahi chi khawng a lau in mi khenkhat bang ngohbawl mawk chihkhawng ahi deuh hi. Schizophrenia natna neite psychotic disorder etsakna hoih mahmah khat ahi.

 

4)       Eating disorder: Lungkham ziak hiam, lunggel diklouh ziak hiam ahihkeileh omdan diklouhdeuh ziak hiam a ann tampi ne ahihkeileh nelou bilbel chihte ahi.

 

5)       Impulse control and addiction disorders: Hiai neite’n mahni utna a control joukei ua, ama siatna ding hiam, midang siatna ding hita lehle a utna uh suk pichin ahih na di’n poisak a neikei uhi. Etsakna in zu leh khamtheih chiing zongsangte

 

6)       Personality disorders: Hihna khat dik in dikkei taleh sumkuang chiang keih a, midang toh kituaklou leh mahni deihna kia ngai thupite ahi deuh uhi. Hichi dan buaina neite a omna mun peuh ah midang toh aki tuak theikei uhi.

 

Treatment

Mi tamzawte ngaihdan in hiai lungsim natna or mental illness don (treat) theihlou ahi. Himahleh khovel khantouh dungzui in hiai natna don leh kep theih ahita hi. Hiai natna donna chi 2 in a khentheih hi – psychological leh pharmacological ahi hi. Himahleh a natna dungzui a don a ngai hi. Huaite a kimzaw sem in anawn chiah kikum khawm ni.

 

A tangpi in hiai natna neite kepna a kalpi poimoh tuamtuamte hiai a nuai a bang ahi:

  1. Psychological management
  2. Drug management
  3. Rehabilitation
  4. Psychiatric emergency

 

Thukhitna:

Nu-leh-pa kuapeuh in hiai atung a igen natnate nei thei/ vei thei gige ihi chih thei masa in, a neite tuambawl dah ni. Amau le mihing ahi ua, mihing ahihna dawl ua zahtak a poimoh uhi. A natna sang mah in akiim-akiang a amihinpihte’ tuambawlna leh nelhsiahna in siatna tampi tunthei ahihlam theichiat ni. 

Read 677 times
Login to post comments