You are here: HomeColumnsSuanlyan TungnungKhantouhna Ding In Social Action Apoimoh

Khantouhna Ding In Social Action Apoimoh

Written by  Suanlyan Tungnung Published inSuanlyan Tungnung Wednesday, 18 September 2013 01:09

“A real people’s movement has to be fully indigenous and self-reliant” - Dhanagare

 

Gam khantouhna a omtheih nading in mahni mimal khantouhna (personal development) a om masak angai hi. Personal development ichih chiang in laisiam, training tampi jou, lam tuamtuam a siamna leh pilna neite hipahlou hi. Nang-leh-nang (mahni) kitheih siamna, hihna (values), gindan (believes) leh thil tuahsate apan banghiam zilkhiat (experiences) thilte’n mimal omdan (behavior) ah hoihna, pilna, siamna, lungsim geelsiamna ape thei a, huaite personal development ahi chi ut deuh ihi. Damsung a maban sawntou jel ihihna ah, siamna sang theipen tun theih nadia hon thathou sak (motivate) bang ahia chih zilna leh theih touhjelna bangle personal development khat ahi. Leitung ah thil kikheng toujellou hileh chimhuai leh ninhuai petmah ding chih thei mahle hang, kikheng lamdangna khat a om dek chiang in NA isa ua, ‘Tu ka dinmun mah nuam kasa’ chih lungtang nei kitam hi. Nuam isakna tan a omna in thil bangmah akheng lamdang kei a, maban a phatuam ding bangmah ahong guan kei hi.

 

Himahleh mihing tawndan-khandan a tuam dungzui in mahni leh midangte kitheih chianna a tuamchiat a, akibang hetkei mawk hi. Hiai kitheih siamna in kitanauna a khangsak a, mimal khantouhna adia poimoh – theihna (cognition), it/hehpih theihna (emotions) leh a hoihzaw/sangzaw tunna dia thapetu (motivation) ahong guan hi. Ei singtang mite lak ah mahni khe a din utna (individuality) atawmlai ziak in, kingaihnatna a om lai hi.  Mahni mimal lungsim sang in innkuan ngaihdan, mipi/khotaang ngaihdan chihbang inei lai ua, kipah huai petmah hi. Americate’n hiai kingaihnatna leh sungkuan dan a ki-itna anei tawm mahmahta uhi. Huai ki-ngaihnatna in mimal khantouhna dal a, gamsung khantouhna om saklou adiam ? Ahihkei leh mahni kingaihnatna (individualism) a ot deuhdeuh ziak a igam khantoulou ahizaw diam ?

 

Damtheihna lam a et in, pharmacy bang Lamka ah atam petmah a, damlou gimdeuh a itheihte government hospital tuamtuam bang muanglou in aman tam private clinic khawng ah i-ensak uhi. Poimoh hi maithei, hilou maithei, lab test tuamtuam ahon(g) bawlsak ua, drip khawng hong khai in ei kipah theihna ding dandan in ahong kem uhi. Vanzat tuamtuam ahoih ban ah, amun ngial bang anuam a, siangthou in a damtheih huai deuh abang hi.

 

I gamsung omdan et in, gam changkang abatna atam mahmah hi. Niteng phial in building thak, dawr thak, motor thak, latest fashion, IT etc muhding a om a, sepna zonna lam alah sepna hoih pipi mu aki behlap gige hi. Kiletsakpih taak mahmah dang ahih leh government office tamzaw phial (Lamka et in) ei singtang mi mahmah in iluah dim a, State Assembly alah Minister, Parliamentary Secretary chihkhawng inei ua, Chief Secretary natawm ei singtang mi mah ahilai hi. India khopi tuamtuam genlouh, gamdang a nasem bang kitam mahmahta chileng genkhelh luat omding in ka gingta kei hi. Huaite ban ah India gam khopi atamzaw ah Zomi Worship Service, Kuki Worship Service etc. leh eima denomination a saptuam iphut chiat phialta uhi. Lamka ngial ah ibiak innte uh a thupi thei in, a hoihthei mahmah a, saptuam chih inlah car, jeep etc inei vek phial a, saptuam a sem hi in, private school a sem hitaleh motor a kuanlou a tam nonkei hi. Contractor, Social Worker, Philanthropist lah adim a dimthoh hita. Khangtoulou chih ngamding dan in I om kei uhi. Ahih leh igam khangtoulou ahi lai diam ?

 

Siamsinna lam ah en jel lehang school leh college atam mahmahta hi. Siamsin naupang bangle atam a, kidemna asang petmahta. Kimawlna lam ah ikhangtou ua, kumteng phial in kitaitehna tuamtuam ah ipangjou gige ua, football diak bang national club tuamtuam a kimawl bang atamta hi. Sum-leh-pai ah ihausa ua, mundang a ann limchi genlouh nikhat a ann 2 vei a nekzohlouh lai un eite’n hotel ah singpi leh nektheih nejou phet ann deihkhop in ine a, kuva, talab, raja, khaini etc toh ithuahjou lai uhi. Mobile phone neilou bang avaang mahmah mawkta hi.

 

Himahleh, mihing adia thil poimoh petmah khenkhat et in bang hiam kitaksapna om kasa.Tulai in Psychiatry OPD, Churachandpur District Hospital ah placement dan in ka kaijel a, niteng in OPD a doctor ki-ensak dia ngak tampi kamu gige hi. Huaite tuidawn ding a om hiam chih kava enkhia a, ka mu ngei a, lungkham huai kasa hi. Huai tuibawm sung a tui dawntak taktak ahi nadiam chihkhawng ka ngaihtuah vungvung hi. Khenkhat in houh a basin kuva tui siatna in azang ua, asan ziazua hi. Huaikia hilou in, waiting room toilet ah kava lut nawn a, pasalte toilet ah bangmah a omkei mawk hi. Bang(wall) a khohsuk mai ding chi uh lah ahi kei dia, guta khenkhat in gukhia adiam lah kathei kei hi. Thamlou in niteng tanchinbu khenkhat ah ‘hospital a battery 3 kigukhia’ chih khawng ahong om a, ‘nidang ale thil tampi kigu khinta ahi’ chih mi khenkhat apan kaza zawmah hi. Diagnostic Center, X-ray leh a minthang CT SCAN mun khawng ka en utlai mahmah na a, ka en ngam nonkei hi.

 

Khuga Dam kava en nawn a, hoih in thupi kasa petmah hi. Tui a tam mahmah a, Lamka leh a sehvel hoihtak a supply jou ding in ka gingta hi. Himahleh ikhopi Lamka ah tuineek aki ningching kei a, well leh rickshaw a tui kizuakte ne a hing kitam petmah hi. I khopi lailung a Tedim road ah kahong taisuk nawn a, traffic rule gen sese dah ni, kuak leh lampi se petmah hi.

 

‘A gam a teengte lah changkang mahmah, hausa huntawk, thunei tute lah singtangmi mah, nasem a solkal contractorte lah eimi mahmah hingal, gam ngaina a sih poisalou a kipekhia salpha tampi ki om a, bang achih leh khanthouhna ichih omlou adiam’ chih ka ngaihsut lai in, isiamzilna leh isiamzildan dikjoulou adiam chih bang ka lungsim ah ahong lang hi.

 

A tangpi in siamsinna mun tamzaw ah Rote learning zat ahi lai hi. Huai tuh lesson teng sim a by-heart chileng atheih nop pen ding hi. Personal development, life-skills, critical thinking etc., chih khawng hilh khalou ihi maithei uhi. Naupang khat aneulai in text book polam a siamna-pilna poimoh tak omte hilhkei lehang ahong let chiang in bang a kheng lamdang (transform) tuan dia ? Personal transformation omhetlou ahih ziak in, laisim in, degree sangtak nei mahlehang igam ah khantouhna diktak muh ding a haksa mahmah hi.

 

Thil lamdang kasak nawn khat ahih leh igam a Social Worker leh Pharmacist kichi hichi tuk a atam lawmlawm ! Nam lamkai, student lamkai, politiciante, contractorte leh mi chawmngai deuh (philanthropist) kichi himhim avek a SOCIAL WORKER himawk. Lamdang !

 

I gamsung vaihawmna paizangna ding leh khantouhna a omtheih nading in quality education ban ah Social Action Group(s) a om poimoh petmahta hi. Social Action ichih chiang in ‘mi bengvak deuh bangzah hiam kipunkhawm a neksiatna leh nuainet/nelhsiah a omte douna/ doudalna doudal a dopsangna’ chihna ahi hi. Organization khat phutthak ding chihna hilou in, organization omsate pangkhawm a social action pat theih ahi hi. Hiai in niteng hinkhua leh hindan, vaihawm dan a hoihlam in ahong kheng lamdang thei dia, social transformation ahong tunthei ding hi. Hiai social action in nekguk-takguk ziak a nasep hoihloute, kideidanna leh kinuainetna adou dia, khantouhna, khotang khantouhna, sum-leh-pai a khantouhna ahong tunthei ding hi. Thamlou in mipi van (public property) kepbit utna leh  hoih deihna lunggeel ahong tun ding a, huai in siamzilna, vaihawm dan leh nasepna ah khantouhna ahong tun ding hi.

 

|||11092013|||

Read 968 times
Login to post comments