You are here: HomeNewsFeature NewsAngels' Vision News | November 26, 2016

Angels' Vision News | November 26, 2016

Written by  Angels' Vision Published infeature News Sunday, 27 November 2016 08:32

THUTHANG LAKTOMTE

@@ TRVM JHQ Lamka in RTI Helpline a bawl tuni'n honkhiak in om

@@ Manipur High court in blockade ziak a koltang gari te thagum zang a paipih theiding in state solkal phalna pia

@@ NATO leh Russia kal ah Cold war thupitak piangkhia.. Russia in missile defense system hunkhop kigingsa in koih

 

 

 

TUALSUNG THUTHANG

Diocesen Social Service Society (DSSS)/CBIRDAT saina in tunin P. Kamdou Veng ah natna tuamtuam nei damdawi inn naih zouloute a ding in Free Medical Health Camp om hi. Hiai medical camp ah P. Kamdou Veng leh a sehvel a om natna tuamtuam nei damlou mi 300 val ki-ensak ua, MSF apan Dr. Jiten leh Lamka Damdawi Inn apan Dr. Ramesh, Medical Officer ten damloute en in Lamka Damdawi Inn apan Nurse 2 in kithuahpih ua, damdawi leng a om bangbang damloute kiang ah a thawn in hawmkhia uhi. Thutut kingah dan in, DSSS ahihleh panpih ngaite leh gentheih-haksana tuamtuam thuakte panpihtu dia kibawlkhia hi a, CCpur sung ah area 20 vel ah nna sem in, tuni a free medical camp neih a om leng activity khat dan hi a, kum teng in amau targetted area ah damlou gentheite a ding in hichibang free medical camp ana sai zel uh hin thutut kingah hi.

 

 

Langkhanpau Guite, Chairman, ADC/CCPur makaih in hongtung ding November 29, 2016 (Seppatni) sunnung dak 2:00 in ama Office Chamber ah Lamka khopi sung a dawr bawlte leh bankers te'n joint meeting nei ding ua, hiai meeting ah sum Rs. 500 leh Rs. 1000 note sihsak a omna toh kisai a mipi'n haksatna tuamtuam a tuahte uh suk kiam theih ding dan toh kisai genkhawm ding uhi. Hiai meeting ah bankers leh traders banah association tuamtuamte kimtak a kihel ding in CEO/ADC, CCpur in theihsakna bawl hi.

 

Rajiv Aggarwal, IAS, Joint Secretary, Election Commission of India leh a zi Mrs. Dr. Aarti Aggarwal, SVEEP Consultant, ECI te'n tuni'n Lamka hong pha in, B. Vengnom Community Hall ah vualbanloute toh kithuahkhawmna om a, District Election Officer, CCpur in Election toh kisai a vualphaloute toh laa a bawl uh honkhiakna om hi. Hiai hun zatna ahihleh CCpur District District Disable Union te'n inntekna la in, Lamka khopi sung leh a sehvel a om vualbanlou tamtak kihel ua, SP/CCpur Rakesh Balwal, IPS tel in mi poimoh hunkhop in hiai hun zatna uap uhi. Programme ahihleh sunma dak 11:00 in kipan a, District Election Officer Lunminthang Haokip, IAS in vaidawnna thu gen in, tuni tan a Election toh kisai a kisakkholna paidan pulak in, SVEEP Campaign toh kisai panlaknate leh maban a sepsuah ding tuamtuam omte gen a, tuni tan a buaina bangmah omlou a lohchingtak a paitou zel ahih dan gen hi. Hiai hun ah Election Youth Icon te'n election toh kisai a DEO/CCpur in laa a phuahte sa in, Rajiv Aggarwal, IAS apan thugen ngaihkhiakna om hi. Aman a thugenna ah, kum 20 sung election ah kihelta mahleh hichibang hihdan leh ngaihdan thakthak phuaktawm theina lunggel nei mi tuak kha nailou ahih dan gen a, Election Commission of India in tutung Election pen Festival of Democracy chia a minvuah hiai mun ah muh theih a om hi'n gen hi. Mrs. Aarti Aggarwal, SVEEP Consultant in tuailaite election ah kihel luat ding ahih dan gen in, 100 percent vote kikhia chih om theikei mahleh vote a tam theilam khiak ahih theihna dia panla ding in ngetna bawl a, tutung election apan i maban ding bawlna dia kalbi poimohtak ahihman in kuapeuh gam bawl hoih dia kisa chiat ding in ngetna bawl a, DEO/CCpur in vualphaloute toh Election a ding Music Video a bawl uh hongkhia a, CDDU President Sianmuanthang pen Election Youth Icon khat a dia guan a om ahih dan puangkhia hi.

 

Churachandpur District Legal Services Authority in CCpur toh kithuah in tuni sunnung dak 2:00 in Lalhmasuon Joute Memorial Hall, Life Cafe, Rengkai Road ah Law Day zang uhi. Hiai hun CCpur District Bar Assn te ban ah Civil Police a Rank Officer teng kimtak in kihel ua, SP/CCpur sik in David Piaklian, Addl. SP/CCpur in thugenna hun zang hi. Hun zatna ahihleh Margereth, Advocate in makaih in Letkho Kipgen, CJM/CCpur in vaidawnna thu gen a, Law Day hong kizat pat dan pulakna nei hi. Aman a gendan in, Law Day (Samvidhan Divas) kichi ahihleh India Constitution bawlkhetu Dr. BR Ambedkar theihgigena dia 2015 kum apan November 26 teng a zat dia a bikhiah hi a, India khua-le-tuite kingakna Constitution sukkipsemna ding tupna a zat a om hi'n gen hi. Programme hunsung in lasa siam minthang Mami Sinate leh Angu Singson, SI te apan lasak ngaihkhiakna om in, David Piaklian, Addl. SP (Law) in thugenna hun zang a, Dan leh Police kichi kikhen theilou ahih dan gen in, hichibang porgramme te'n Police-te a ding in Dan toh kisai theihbehna ahihman in phatuam mahmah ahi chi'n gen hi.

 

New Delhi a om North East mite a dia tournament thupipen NE Tamchon Memorial Football Tournament ah SSPP FC in hih hoih mahmah in, pool champion hihna la in Quarter final lut hi. NE Tamchon Memorial Football Tournament ahihleh apaisa November 19, 2016 a kipan hi a, SSPP FC pen Pool B ah Nirvana Rhino, Chandel FC leh Exodus FC toh omkhawm in, match masapen ah November 20 in nei ua, Chandel FC 4-0 in zoukhia uhi. Match 2na ahihleh November 24 in nei ua, huai ah Exodus FC maituah in 4-1 in vualzohna ngah ua, match nanungpen tuni a nei in, Nirvana Rhino maituah ua, 3-1 in vualzohna ngah uhi. SSPP FC in group match ah match teng ah vualzohna ngah in Point 9 toh Group Champion hihna la in Quarter Final lut uhi.

 

Tribal Rights Vigil Manipur (TRVM) JHQ Lamka in Right to Information (RTI) toh kisai a Helpline a bawlkhiak uh honna leh latna tuni sunma dak 11:00 in Mini Auditorium, Dorcas Hall Campus ah nei uhi. Hiai hun zatna ahihleh DC/CCpur in uap a hongkhe ding chih himahleh election vai a mikhual zintun ding a neih ziak in kihel theilou a, ama sik in Mrs. Lalthazam, MCS, AC to DC, SDO/Saikot in uap a, District Level Officer bangzah hiam a kihel banuah mun tuamtuam apan mi hunkhop hiai hun ah paikhawm uhi. Hun zatna ahihleh Muanthang Kipgen, Moderator in makaih in Thangbiaklian Hangzo, Chief Moderator in Introductory Note gen in, i gam bawlhoihna leh kitundin thakna ding toh kisai a kalsuanna ah khotang (social community) kia hilou a, saptuam lam in leng pan a lak mahmah ngai hi'n gen a, a suk khak ding officer-te teng kiang ah chialna kibawl suak vek hi'n gen hi. Mrs. Lalthazam, MCS in a thugenna ah, Indian Constitution in hon piak Right to Freedom of Expression i zat taktak theihna ding in government sung a bang teng om hiam chih theih masak ngai a, hiai pen government in thei in 2005 kum in Right to Information Act kichi hon pankhia hi'n gen hi. Officer hi in koi mun peuh ah om leng le, khotang apan khangkhia a kihihman in kuapeuh in khotang hoihna dia pan i lak ding uh ahi chi'n gen a, TRVM in hangsantak a hiai bang thil hon patkhiak uh kipahpih mahmah in, hichibang nasepna ah lohtak bangmah a omlouh ding banah mite gensiatna thuak ding maimai himahle hang lungkelou a kali  suan ding uh ahi chi'n gen hi. TRVM JHQ Lamka in a patkhiak RTI Helpline ahihleh Mrs. Lalthazam, MCS in hongkhia in Rev. Lian Benson, Executive Director, EELC in Pathian kiang ah lankhai hi. Right to Information kichi ahihleh Constitution of India pansan a mipite dikna leh tanvou solkal nasepna khempeuh dot theihna leh thu kankhiak theihna dia Centre Government in a patkhiak hi a, RTI in a tuppen ahihleh mipi te'n solkal thuneihna nuai a thu omte dan toh kituak a thu ngahtheihna leh imm bangmah omlou a akisaipih teng in a theihtheihna ding ua kibawlkhia hi a, Jamu & Kashmir chihlouh State teng ah zat a omta hi'n kigen hi.

 

 

 

GAMSUNG THUTHANG

Manipur state sung a Economic Blockade khauhtak om ziak a niteng poimoh thilte vaang a muh a omsunte leng a man a tamtheih luat toh kisai in, Manipur High Court in hiai toh kisai genkhawmna nei in, huai ah Manipur High Court in Manipur state solkal kiang ah van pua garite paisuak theihna ding in a poimoh leh thagum zang un chi hi. Justice Rakesh Ranjan Prasad, Justice Kh. Nobin leh N. Kotiswar makaih Bull bench in Manipur State solkal a theihsak dan un, tulel a Manipur state sung a blockade pailel lakkhiakna ding in, panla ding in theisak ua, a huchih keileh leng van pua gari te bittak a Manipur state sung a lut theihna ding ua thagum zang ding in phalna pia hi. Hiai high Court thusuak ahihleh Imphal khopi sung a teeng R. K. Joysana Singh in 2011 kum a Manipur High Court a Petition a khiak pansan a thupukna a bawl uh hi a, tua petition tungtawn in UNC kichi Dan toh kituaklou pawlpi Unlawful organization hidan a puang ding in leng nget in om a, tua petition tungtawn mah in Highway a blockade bawltu peuhmah muh masak sak kaplup theihna shoot at sight order leng peding in ngetna om hi. Himahleh hiai petition 2011 kum a khiaklut a om himahleh tuni tan sepsuah louh in om a, tutung in ngaihtuahna neih hipan hi. Huailou in zan nitaklam a Blockade ziak leh Highway a taituah vanpua garite hal ziak a a tung a thubuai bulhkhum a om UNC President Gaidon Kamei leh UNC information Secretary mat ahih thu ah, All Naga student Association Manipur (ANSAM) in thusuah bawl in huai ah a kin thei bangpen a mat a om minihte khahkhiak ahihkei leh thiltung deih huailou taktak in zuiding hin state solkal vau uhi. Manipur a Naga pawlpite kipawlkhawmna lianpen ANSAM President Seth Satshang in a gendan in, UNC in blockade a puan toh kisai ahihleh Sadar hill bial teng District pichinbg a bawlkhiak sawmna toh kisai in, stake holder teng kithukim a genkhawm ahihma teng blockade lakkhiak hitheilou ding hin gen a,  District piching a Sadar hill puankhiak sawmna pen Political issue ahih ziak in, Political thil a genkhawm ngai hi a, himahleh UNC president leh Information secretary mat a omna pen Political issue hilou ahi chi hi. Economic blockade ziak in phaizang a teengte kia hilou in Nagate'n leng nasatak a thuak uh ahihman in, hiai thu hihveng na ding in tukha November 15 in phualpi solkal, state solkal leh UNC in kihouna neiding chih himahleh State solkal taisia in kilang utlou chi hi.

 

West Bengal state sung a Naungek piangtuung Biscuit bawm sung a thun a om leh zuaksawn a om zel ahihdan theihsuah ahihnung in, Kolkata khopi apan simlam pang a a om Thakurpukur kichihna mun ah naungek numei 10 velding taksa upa lamte kepna mun ah muhkhiak in om nawn hi. Police thusuak in a gendan in, tuanbang a naungek 10 velding upate kepna mun a muhkhiak ahihnung in, NGO khat in a luah uh building khat kiang ah naungek 2 sisa a vui a omna mun uh leng muhkhiak in om hi. Tu in Police te'n Baduria leh Thakurpukur kikal a om nursing home te nasatak in suina neilel uh a,  Police team bangzah hiam in naungek zuakna toh kisai suina a neihlai un,  College Street ah Criminal Investigation Department police team (CID) in gamdang sum US dollar 200, Hong Kong dollars 2000, Euro 1200, India sum 15,000 leh gold hunkhop mukhia uh hin kigen hi. Naungek zuakna toh kisai in Police in tuni tan in mi 15 mankheta uh a, tamsem matbeh a omlai ding ua gintak in leng om hi.

 

Delhi leh National Capital region a huihsianglou nasatak om toh kisai in, India gamsung a thukhenna innpi lianpen Supreme Court in Diwali hunpi zatna om nung a pan huihsiang loute sukbei na ding in phualpi solkal kiang ah Crackers zuaktute'n halpuak zuak thei nawnlou ding leh license a thak issue nawn lou ding in theisak hi. Supreme Court in tuabang thutanna a bawl na ziak ahihleh Crackers natak a kihal ziak a Delhi khopi sung a huihsiang lou tuni tan a pumdim lai ziak hi a, Chief Justice T S Thakur  makaih three bench in tu le tu a Crackers zuakna khaam ahihkei leh tunung a Delhi khopi sung tenna taak nawnlou ding hin gen uhi. Crackers khaamna bawl ahihziak in huihsianglou omte zan khat thu a beiding hikei mahleh awlawl a hongbei ding hin Supreme Court thusuak in gen hi. Tuabang a kitenna leh hunpi poimoh hong tungpah dingte ah halpuak nasatak a halna hong om ding ahih ziak in, halpuak zuaktute license renew theihlouh ding leh a thak issue phallouh phot ngai hin Supreme Court in gen a, kum khotawn a kham bikbek ding chihna hikei mahleh tu leh tu a khaam ngai hin gen hi.

 

Gujarat state sung a Jamnagar kichihna mun ah Reliance Industries in a etkol thautui khitsiangna munpi ah meikuang thakhat thu a om phut ziak in, mi 2 kanglum in midang 8 in liamna tuak uhi. Meghpar Police station thusuak in a gendan in,  meikuang omna mun ahihleh Jamnagar a Reliance Industries Limited in a etkol uh thautui khitsiangna munpi Moti Khavdi refinery hi a, gas leaked khak ziak a meikuang kipan hin gen uhi. Reliance te Fire Brigade in meikuang a phelhmit ma in mi nih a mun ah kanglum uh a, himahleh kintak a meikuang phelhmit theihpah a om ziak in, midang sihbeh manlou in meikuang phelhmit in om hi. Meikuang ahihleh tuzing baihtak a Company in fluid catalytic cracking unit (FCCU) kichi Gasoline a bawlkhiakna mun ua kipan hidan a gen hi a, himahleh thautui tamtak kang manlou a phelhmit in om hi.  Reliance neitu Mukesh Ambani in ahihleh meikuang omna mun Gujarat state sung a Jamnagar ah thautui khitsiangna munpi hoih mahmah nih nei a, tua Refinery nihte tungtawn in nikhat in thautui barrel million 1.2 zuakkhe gige hin kigen hi.

 

 

 

GAMDANG THUTHANG

North Atlantic Treaty Organisation (NATO) a kikhaikhawm gam te'n  Europe suahlam pang a NATO gamte kihumbitna ding a missile defence system a koih uh thukkik na dan in, Russia solkal in leng Russia gamsung tumlam pang a om Kaliningrad kichihna mun ah nuclear galvan pawthei missile hunkhop nawnlut hin kigen hi. Kaliningrad  mun a Russia in missile a koihte ahihleh S-400 leh nuclear-capable Iskander missile systems hi a, tua missile tamtak puaklut a omte a vek in bulhkim in om naikei mahleh S-400 surface-to-air missiles leh nuclear-capable Iskander systems bulhkim ahih chiang in NATO missile tea pan Russia kihumbit theiding hin kigen hi.  Viktor Ozerov, chairman of the defence committee in the Federation Council, Russia's upper house of parliament in a gendanin, NATO in missile tamtak Russia neh lam a a nawnlut ziak a Russia in leng a kivenna ding a tuabang missile system te a koih mai ngaita hin gen a, NATO panlak dan dungzui a Russia in gamtatna a neih hin leng gen hi. Kaliningrad ahihleh Poland leh Lithuania tehtuah a om hi a, US makaih NATO gamte'n Rusiia toh Cold war a neihnawn nung ua, missile tamtak ut hunhun a Russia kap theiding a Russia gamgi zul a nawnlut nung ua, tuabang a Russia in leng a kivenbitna ding a missile defence system hunkhop a koih hin kigen hi. Russia in ahihleh NATO gamtatna in Russia nuclear galvante hihsiat sak sawmna hin ngoh mahleh NATO leh US in naktak in nial ua,  kum tamtak paita apan koih a om khin hizaw hin taklang uhi. Tukum May in leng US in leitual pansan ground based missile system kichi Romania ah koih a, Russia neh deuhdeuh a missile a koih ziak in, Russia a guktak a patau in, 1987 kum a kilemna hihse thei hin gen hi.

 

Iran gamsung a om North Central province a Semnan kichihna mun ah rel tailai nih kiphutuah kha in huai ah a tawmpen in mi 44 in sihna tuak uhi. Iran solkal thusuak in a gendan in, Rel kiphuttuahna mun ahihleh Hemnan sung a Haft-khan station kiang hi a, passenger pua Rel tailai nih thakhat thu a a kiphutkhak nung un, tu in mi 44 si in, midang 100 val liam uh a, sihna tuakzah leng punbeh theilai ding a gintak a om hin gen hi. Iran's Red Crescent thupuangtu Mostafa Mortazavi in a gendan in, Rel tailai nihte a kiphuttuah khit phet un meikuang thupitak om ngal hin gen a, meiphelh gari tamtak in thiltunna mun delh in meikuang phelhmit sawm in kisa lel uh chi hi.  Tabriz Governor in ahihleh tua rel nihte a kiphuttuah hun un a sung ah mi 400 vel tuang uh hin gen a,  mi 400 te lak ah mi 48 tuni tan in a omna uh theihlouh in omlai chi hi. Iran ah ahihleh Rel hektute'n zuihding a Dan kibawl a zuih ginat louh ziak un, rel accident tam thei mahmah a, March 2015 leh March 2016 kikal sung vuak in leng Iran gamsung a Rel tuahsia ah mi 16,000 val in, sihna tuak uhi. 

 

Bulgaria leh Turkey gamgi zul a galtaite koihkhawmna munpi Harmanli Reception Centre ah vun natna chikhat a hii nasatak a leeng ahihdan thehzak ahihnung a, Bulgaria solkal in tua galtaite polam kantheilou ding a gakna a bawl deihlouh ziak a galtai tamtak in kiphinna a pat ziak un, Bulgaria solkal thangpai in, tua kiphinna a tel refugee te lak ah mi 10,000 vel Bulgaria gamsung a om thei nawnlou ding in hawlkhiak sawm hi. Bulgaria Prime Minister in a gendan in, tulel a Bulgaria gamsung a galtaite ahihleh a tamzaw Afghanistan mi hi uh a, Harmanli reception centre ah tulel in galtai 30,000 vel om ding ua gintak himahleh zanzek a local media khenkhat in tua refugee camp a vun natna lauhhuai mahmah hiipi leng ahihdan apuankhiak ziak un, tua refugee camp a omte mun dang a phak ding uh phalsak hilou chi hi. Himahleh hiai thupiak deihlou a galtai tamtak in kiphinna a neih ziak un, Police in kiphinna neite lak ah mi 465 man in, tu in Bulgaria gamsung muanna leh bitna tanpha hihse theiding a theih ahihziak un, Bulgaria solkal in kiphinna neite lak ah mi 10,000 vel a gamsung ua om thei nawnlou ding a hawlkhiak sawm hin gen hi.

 

South Sudan gamsung a helpawl kibawlkhe thak leh South Sudan solkal sepaihte kal a kikaptuahna in venlam sang a siatlam a nawt semsem toh kiton in, tua vuaina ziak a nek leh taak haksatna thupitak om ziak in buaina mun a omkha minautang tamtak in mun bitzaw zuan in kihemkhia uh chihthu om hi. Buaina ahihleh Uganda in a tawsawn Lord's Resistance Army leh Janjaweed helpawl kigawmte toh solkal sepaihte kikaptuahna hi a, zan sintawpni apan tuni sung vuak in leng milip 70,000 val in mun bitzaw zuan uh chin MSF thusuak in gen hi. Galtaite lak ah milip 10,000 veldingte United Nations n munpi khaT a bawlna mun uah kisekhawm uh a.,  South Sudan solkal in buaina kipatna ziak Muslim veteran politician Ali Timi Fartak in a tawsawn ziak hidan in gen mahle uhy, tua helpawlte tawsawntu a ngoh a om Fartak in nialna bawl hi. Buaina in venlam nawt thei pahlou diung dinmun a om toh kiton in UN World Food Programme in tukum sung a South sudan a teeng milip 3.3 million te nekding piak ahihkei leh kialpi thuak ding uh hin gen uhi,. South Sudan buaina kipat nung tuni tan in, milip lakh 1 Kenya, Sudan, Democratic Republic of Congo leh Uganda ah galtai uh a, July kha beitan in galtai phazah milip Lakh 1 leh siing 5 phazou ding hin UN in gen hi.

Read 1061 times
Login to post comments