You are here: HomeNewsFeature NewsAngels Vision News | November 28, 2016

Angels Vision News | November 28, 2016

Written by  Angels Vision Published infeature News Tuesday, 29 November 2016 12:02

THUTHANG LAKTOMTE

@@ Suangdoh Sub-Division in a huapkhak kho 16 te'n Rally nei in DC/CCpur kiang memorandum pia

@@ Gamsung pumpi ah opposition party tuamtuam in kiphinna nei.... Left Party in bandh a bawl opposition party dang te'n support lou

@@ Cuba makai Fidel Castro sunna Cuba gamsung ah ni 9 sung zat hiding

 

 

TUALSUNG THUTHANG

 

Singngat Assembly Constitutecy  huamsung a Suangdoh Sub-Division bawlkhiak thak tawh kisai in a huamkhak khua hausa bangzah hiamte'n enthak dingin government kiang ah phutna in tuni'n rally pai ua, DC/CCpur Lunminthang Haokip, IAS kiang ah memorandum pia ua, DC/CCpur in tuni mahmah a revenue department ah thonsuk ding ahihdan theisak hi. Suangdoh Sub-Division bawlkhiakna ding in Government in apaisa November 23, 2016 in Gazzette order suahkhia in, huai ah khua 27 leh machete (hamlet) 10 huapsak in om a, Suangdoh Sub-Division in a huapkhak khua khenkhat geographical area et in mipite dawnzangkhai naksang in haksatna tun zaw ding dinmun in om hi. Gazzette Order dungzui in 24-Singngat DCC huamsung a om kho 4 - Pakmual, Hangsum, Suangphuh leh Behiang banah 23- Muallum DCC huamsung ah kho 3 - Buhsau, Zabellei, Molbungjang leh 11- Lungthul DCC huamsung a om kho 8 - Mongken, Maukot, Mualzin, Tuimajang, P. Suahzahau, Tonglon, Vokbual (L), Vokbual (M) omkha a, geographical area etin Suangdoh Sub-Division sang a Singngat Sub-Division toh a kinaih zawk banuah office thil saina dia Singngat khua kantan a Suangdoh khua a ava sai uh amaute a ding in thil haksapi suak hi. Hiai toh kisai in kho hausa 16 te'n memorandum ah suai kai vek ua, Suangdoh Sub-Division bawlkhiak a om pen kipahpih mahle uh sub-division khen dan ah lungtun huai a saklouh thu uh taklang in, hiai toh kisai Government in en thak ding in ngetna bawl uhi. Tuni a kho 16 te'n rally a neihna uh UZO GHQ in makaih in, Muallum MDC Grace Zamnu leh Singngat MDC Hausuanthang te'n leng kithuahpih uhi.

 

 

District Hospital, CCpur saina in tuni'n OPD Conference Hall ah Lamka Damdawi Inn a sem doctor-te leh PHC leh CHC tuamtuam a Medical Officer Incharge-te a ding in Training on Rational Use of Blood om hi. Tuni a training hun ah Lamka Damdawi Inn a sem Medical officer leh Specialist Doctor-te kihel ua, zingchiang in PHC leh CHC tuamtuam a Medical Officer Incharge te a ding in neih hinawn ding hi. Training ahihleh sunma dak 11:00 in kipan a, Dr. J. Son Goukham, Medical Supdt leh dr. Kimngaihching, CMO/CCpur te'n Opening Speech gen in, Dr. Paulunmang Vaiphei, Sr. Medical Officer in Voluntary Blood Donation a poimoh dan toh kisai sinsak in, Dr. L. Dorendra Singh, IHBT Specialist, Thoubal District Hospital in "Rational Use of Blood" chih thupi zang a sinsakna a neih banah Dr. Ksh. Vijayanta in "Adverse effects of Blood Transfusion" chih leh "Irregular antibody screen for pregnant women and multiple blood transfused patients" chih thupi zang in sinsak hi. Sunnung lam in Dr. Kh. Memtombi, IHBT Specialist, JNIMS in "Massive Blood transfusion in bleeding patients" chih thupi zang in sinsakna nawn a, zingchiang in hiaio thupite mah zang in CHC leh PHC tuamtuam a Medical Officer Incharge-te lak ah sinsakna pe nawn ding uh hi'n thutut kingah hi.

 

Kum nawn Manipur Legislative Assembly Election neihna ding toh kisai a Systematic Voters Education & Electoral Participation (SVEEP) Campaign 2nd Phase pailel ah Persons with Disabilities (PwD) Icon ding in T. Sianmuanthang, President, CCpur District Disable Union (CDDU) guanthak in om a, tuni'n District Election Officer Lunminthang Haokip, IAS DC/CCpur in ama office chamber ah appointment letter pekhia hi. Thutut kingah dan in, kum nawn election om ding ah, vualbanlou te'n leng a vote manphatak uh a khiak theihna ding un Election Commission of India in pan nasatak a la in, Polling Station teng ah ramp leh brail koih suak vek dia theihsakna a bawl a, PwD Icon dia guanthak a om in SVEEP Campaign ah kihel in, vualbanloute dikna leh tanvou omte gen in, gam bawlhoihna dia vualbanlou te'n leng dinmun poimoh tak nei uh ahih dante tangkoupih ding hi'n thutut kingah hi. 

 

Tuni sunnung dak 3:00 in LATSEA Executive-te leh Lamka khopi sung a dawr bawl tuamtuam Marwari Society leh Bihari Society a palai te'n tulel a stock dinmun leh van man khanna toh kisai banah Sum note thak zat ziak a buaina tuamtuamte Saulim Restaurant, Nehru Marg ah genkhawm uhi. Hiai hun ah Dawr bawl tuamtuam te'n a haksatnate uh gen in, Economic Blockade leh sum note thak kizat ziak in nidang bang in supply pai theilou in dawr bawl te'n haksatna nasatak tuak uh ahih dan gen ua, Economic blockade ziak in Aizawl tawn in Silchar ah lak ngai hi'n gen ua, tua ziak a van man khanglou theilou ahih dan gen uhi. Anntang leh chini ahihleh stock om zek lai in rate ngeina bang a zuak theihlai hi'n gen ua, sathau, allu, phulun leh a dangdangte kise pahpah ahihna ah stock tamtak koih khol theih hilou hi'n gen ua, mun dang a om te'n sum note luite a laklouh ziak banuah bank ah sum poimoh zah draw khiak theihlouh ziak a van leng deih bang a la theilou uh hi'n gen uhi. Tua ziak in Tobacco product a bik in talab pen Rs. 7 a zuak hiding a, anntang leh chini chihlou a dangte a rate ngeina a kizuak thei nawnlou ahihdan gen uhi.

 

Ministry of Labour & Employment, Government of India thupiak dungzui leh Lead District Manager leh Bank Manager te'n thupukna a lak bang un zingchiang zinglam dak 10:00 apan in CCpur District sung a om bank branch tuamtuam te'n special camp nei in, khopi sung mun tuamtuam ah temporary counter hong in bank account nei nailoute account honsak ding uhi. Thusuak dungzui in SBI/CCpur Branch te Zoar Veng, Bungmual leh Renfkai Venglai ah tu ding ua, SBI/Tuibuang Branch te Khopi Veng, Tuibuang ah tu ding uhi. Tuaban ah, SBI/Loktak HEPA te Loktak Bazar ah, SBI/Pearsonmun te Pearsonmun ah, UBI/CCPur Branch te Kangvai Bazar ah, UCO Bank te Rayburn College kong ah, Vijaya Bank te L. Phainom khua ah tu ding uhi. Canara bank te Chiengkonpang Bazar ah, Central Bank of India te Singngat ah, Manipur Rural Bank te Gouchinkhup Veng ah, Manipur State Co-operative Bank Ltd. te Hill Town ah, HDFC Bank te Salem Veng ah, ICICI Bank te Chinkham Modern High School, Zomi Colony ah a tut ding banuah AXIS Bank te CCpur Bus Station ah tu ding ua, CCpur District sung a om mipi kuapeuh bank account nei nailou te'n hiai munte ah account va hong thei ding uh hi'n thutut kingah hi.

 

Manipur State Power Distribution Corporation Ltd. (MSPDCL) in hongtung ding November 30, 2016 chiang a AB Cable a khung ding ziak in IB Feeder in meivak a piak khakna teng ah shutdown bawl ding uh hi'n thusuah bawl uhi. Thusuak in a taklat dan in, IB Feeder meivak mulou dingte ahihleh Tuibuang, Bijang, Doordarshan, AIR, Munsif Court, DM Veng, B. Vengnom, Bijang, Sielmat, Zomi Colony, Zellang Veng, Headquarters Veng, District Hospital, Hiangtam Lamka area, Chiengkonpang, CCpur College area, Salem Veng leh Central Lamka area hiding a, zingkal dak 7:00 apan sun dak 12:00 sung shutdown bawl ahih ding banah nasep zohhak leh zoh baih dan dungzui in hun bikhiak kibawl pen kheng lamdang hiding hi'n taklang hi.

 

All Churachandpur District diesel Auto Owners Association (ACDDAOA) apan theihsakna kisuah kimu dan in, apaisa November 26, 2016 nitak a Auto driver Jeptha Famhoite (22) s/o Lalremrout of Saikot in numeimei naupang nih a taimang pih sawmna thu ah ACDDAOA in mohpaihna sangpen pia uh a, huchi bang numei naupang tung a gamtat hoihlou zangtu Auto driver tung ah thuneitute'n a kituahpih gawtna khauhtak la ding in leng ngetna nei uhi. Huaiban ah, mipi kuapeuh in association in line tuamtuam a taite kiang ah Association number belhvek uh ahihman in, kuapeuh number belh louhnate a tuanglou ding in theisak ua, Association number belh nailou te'n leng a kinlam a saifel ding in theihsakna bawl uhi.

 

Dr. Ambedkar stadium, New Delhi a NE Tamchon Memorial Football Tournament a 10veina pailel ah Siamsinpawlpi FC in quarter final match ah Hornbill FC 1-0 a zoulou in keta uhi. Hiai match ahihleh tuni sunnung dak 2:00 a om hi a, SSPP FC in hih hoih mahleh vualzohna goal khum zoulou in maban kalsuan thei nawnlou in om maimah uhi. Hiai toh kisai in SSPP FC in SSPP FC a dia a sun a zaan chih omlou a, sum-le-paai, tha-le-zung tamtak seng a, munchih mual chih a om mimal hiin pawl tuamtuam panlak kha tute tengteng tungah kipahthu puang ua, hiai tan honpi a hon makaih i biak Pathian hing leh siangthou Thupina leh Pahtawina tengteng pia uhi.

 

Tuni sunma dak 11:30 in Singngat leh Tangpijol ah DI 207 gari (MN02A 7711) apan nupi khat kia in, kintak in damdawi in zotpih himahleh damdawi inn tung manlou in si hi. Sihna tuak ahihleh Mrs. Mangzaching (36) w/o Thangsuanlam of Bualkot, Singngat Sub-Division hi a, a taklam pang lu naktak a liam in a bil ah sisan pawt a, a taai leh kawng lak ah leng liamna ma muh theih ding om hi. Thutut kingah dan in, Mrs. Mangzaching ahihleh a tate 3, Singngat St. Joseph School a kai ompih hi a, tuni'n a khua uh phak sawm in, Singngat toh Likhai kikal a tui supply a taituah DI 207 ah tuang a, zukham khat in in gari driver pa hektuh in, ut dandan in taipih a, Singngat khua apan lamkawi 3na vel ah Mrs. Mangzaching kia a, kintak in Singngat PHC tut himahleh a liamna a nasat deuh ziak in Lamka Damdawi Inn a etkol ding in paipih himahleh Muallum khua phakma in si hi. Mrs. Mangzaching luang ahihleh tuni sunnung dak 2:40 vel in Lamka Damdawi Inn tut hi a, nitaklam dak 4:00 vel in a tuanna gari mah un khua uh Bualkot zotpih hi a, inndongta vai ah kihouna neih hiding hi'n kigen hi. Gari neitu ahihleh Tualkhen of Likhai hi a, Robert s/o Paukhanlal of Singngat in a hek himahleh Mangboi of Tangpizol in a hektuh nung a hiai bang tuahsiatna tuak uh hi'n kigen a, gari ahihleh Tuivai Lui a tui la in Singngat khua ah supply zel hi'n kigen hi. Tuahsiat hunlai in gari front seat ah gari neitu tel in mi 3 tuang ua, a nung ah Mrs. Mangzaching tel in mi 3 vel mah kiluai ua, gari hektu in zu a kham mahmah ziak in Mrs. Mangzaching kiak lam leng theilou in, gari neitu a brake a totsak nung a gari khawlsak hipan hi'n gari a tuangkha te'n gen uhi.

 

Zan November 27, 2016 (Pathianni) sunnung dak 2:30 in Simte Youth Organization (SYO) GHQ makaih in Simte Inn, Simveng ah Simte nam sunga Officer te'n kithuah khomna nei in nam khantouhna dia panlak ding dan tel in thu tuamtuam gen uhi. Hun zatna Dr. Rev. Liankhanlal in thumna in hongkhia a, Goukhomang Simte, ZEO/CCpur in programme zat dingdan pulak in, Pathian vualzawlna ziak in Simte Nam sung a simtham leh mite theihphak ding Officer kiomta ahihna ah ki-meltheih tuah a kipahthu genkhom utna ziaka hiai hunzat a om ahihdan gen a, Officer tuamtuam paikhawm te'n mellahna nei in nam khantouhna dia panlak theih ding dan toh kisai houlim in, maban a kalsuan ding dan tel in thu tuamtuam genkhawm uhi. Programme zoh in SYO GHQ in a tuam in Hmar Youth Association (HYA) GHQ toh hun saulou zang in, tui kia om hun chiang a tha leh zung tamtak seng a pan ana la HYA member-te kipahpihna hun zang in SYO member-te pantheihna omsun chi'n Simte nam sung a mi phatuamngai mimal tuamtuam te'n sum a thoh khawmte uh zang a aleikhiak uh Tyre Bladder 12 SYQ GHQ President L. Dongchinthang in HYA GHQ President Laldawnlien Varte khut ah pekhia a, June, 2016 kha lak a tuikia a si, aluang lakhetu Mr. Zarzosang (39) s/o B. Keithieng of Saikawt kiangah kipah latsakna in Simte Puanlaisan khat silhsak hi. Thutut kingah dan in, hiai Tyre Bladder leina ding in T. Goukhomang, L. Dongchinthang, N. Chinkhansiam, Th. Ginzamang, Th. Soiminthang, Th. Jamchinthang, B. Khupkhochinthang, Mrs. Jouneikim, Ms. Paungaihching, Paul Siam Simte leh Th. Thangkhanlian te'n Rs. 1000/- thoh ua, zan a hun zatna a nekkhawmna teng T. Goukhomang, Adviser SYO GHQ in seng sak vek hi.

 

 

 

GAMSUNG THUTHANG

 

India gamsung a sum note sihsakna toh kisai a mipi tamtak in haksatna a tuahte uh genkhawm ding a PM Narendra Modi in a nuai a khawnbawl upa Minister tuamtuam te kimuhpihna a neih toh kiton in, tuni in opposition party tuamtuam makaihna in currency ban deihlouhna in India gamsung pumpi ah kiphinna neih in om hi.  tuni a opposition party tuamtuam a diak in Left party makaihna a kiphinna neih ahihhun ah Tamil Nadu a opposition party DMK pawl leng kihel uh a, himahleh Congress, Trinamool Congress leh Aam Aadmi Party in tuni a kiphinna toh kisai in, Left party in gamsung pumpi bandh hiding chih a puan uh deihlou in manna thupitak tungding cih ziak in, tua bandh bawl a om support lou uhi. Uttar Pradesh politician Mayawati in leng a party Bahujan Samajwadi Party (BSP) in tua Bandh bawl a om support lou uh hin gen mahleh sum note sihsakna bel naktak a mohpaih uh hin gen a, BJP in kum 3 paisa sung a Bank tuamtuam a sum bangzah deposit uh hiam chih a puankhiak ding uh ahi chi hi. Phualpi solkal in tuabang a kiphinna toh kisai in, opposition party te'n black money zonsuah sawmna toh kisai in mipite thangpaihsak ding a tup uh himahleh a thiltup uh kilehbulh in, mipite'b thudik gum uh hin gen ua, Bandh puang tu Left party hatna mun West Bengal ah tuzing apan Bandh puan himahleh Bandh in hindan ngeina nawngkai sak zoulou in, Schools, offices leh thil bawlkhiakna munpite a ngeina bang in kihong uh a, himahleh Kerala a left party CPM hatna ah bel bandh khauh mahmah hi.  Bihar ah ahihleh sum note sihsakna toh kisai in Chief Minister Nitish Kumar in NDA solkal gupna a piak ziak in, Bandh omlam theih hilou aParliament innpi tutkhawmna toh kisai in opposition party in innpi nihte ah kuamah a lutsak louh ziak un, innpi tutkhawmna naktak in nawngkai sak hi.

 

United Naga Council (UNC), All Naga Students' Association Manipur (ANSAM) leh Naga Women Union (NWU) in PM modi kiang tungding memorandum khat piaklutna nei in huai ah tulel a sadar hills leh Jiribam area teng District piching a puankhiak ding tungtang banah, UNC President Gaidon Kamei leh information secretary SK Stephen mat a omna uh toh kisai in kintak a phualpi solkal kigolh ding in ngetna nei uhi. tuabang a Naga pawlpi thum kigawmte'n PM kiang tungding memorandum a khiak uh toh kiton in, United Naga Council thupiak dungzui in, tuni sunnung dak 2 in, Chandel, ukhrul, senapati leh Tamenglong distict ah 'tribe hohos', frontal organisations, student leh women organisations, church leaders, village authorities leh Naga mipite kithuah in deputy Commissioner kiang ah Memorandum khat chiat pelut in, huai ah kintak a UNC makai Police Commando te'n a matte uh khahkhe ding in ngetna nei uhi.  UNC in kallui kiginni apan a makai uh mat a omte khahkhiak a om ding uh deihna a state solkal kiang ah hunchiam apiak uh dakkal 48 sung tuni nitaklam dak 4 in bei a, himahleh hiai thu kaihkhawm ahihtan in UNC in kiphinna bangchi bang patsawm uh hiam chih theih hinailou hi.  Huailou in UNC, ANSAM leh Naga Women Union in PM kiang tungding Joint memorandum a piaklutna ua a taklat dan un, Manipur state solkal in kum bangzah hiam paita a state solkal leh phualpi solkal tel a Nagate tenna bial a District kichi eukhiak hi theilou ding a chia kilemna 4 vei a bawlkhit nung ua, Naga mipite dikna leh tanvou nelhsiah a  Sadar Hills leh Jiribam district piching a bawlsawm uh hin gen a, tuabang a Nam paitak a vaihawm leh khentuam nei a vaihawmtu state solkal thupukna deihlouhna ziak a, dakkal 48 sung bandh bawl a omahihdan leh Total bandh khitnung a, hunchiam omlou Economic blockade leh Nagate tenna bial a Trans asian Railways leh National Project tuamtuam omte Ban puan a om hin PM modi theisak uh a, kum bangzah hiam paita apan state solkal leh Naga te'n simlei vai thu a kikan tuahna tamveitak neikhin uh ahihman in, Manipur state solkal leh Naga mite'n kihouna a neih uh poimoh lou hin taklang uhi.  November 15 in tua buaina hihveng sawm in UNC in kithalawp tak in joint secretary (NE) of the Ministry of Home Affairs (MHA) nuai ah kihouna neiding chi mahle uh state solkal kihel lou in, buaina hihven sawm naksang in tukha November 25 in UNC president Gaidon Kamei leh Stephen mat theihna ding warrant omlou pi in man uh chi uhi. Tuabang a warrant omloupi a UNC president leh Information Secretary mat ahih phet in, UNC, ANSAM, NWU, Naga Peoples' Movement for Human Rights (NPMHR-South Sector), regional frontal organisations, Naga Political Leaders Forum, Manipur (NPLFM), activists leh Naga sung a makai tuamtuam in November 26 in Katomai village, Senapati district ah joint meeting nei in, huai ah a makai uh mat a omte dakkal 48 sung a khahkhiak ding in phutna nei uh chin PM modi hilh uh a, tua hunchiam beima a khahkhiak ahihkeileh Naga mipite kiphinna bangbang Manipur solkal in sialpi vuahthuak a a thuak mai ngaiding chi hi.

 

Zan Pathianni zing baihtak a Punjab state sung a Nabha Central Jail a galvan tawi pawlkhat Police Uniform silh te'n buluh a, helpawl apan makai khat tel in mi 5 a suahtak sak nung un, kihemmang thei mahle uh,   tua Jail taangte suahtak theihna ding a panpihna sum petu khat Uttar Pradesh ah tuni in mat in om hi. Nabha central Jail apan suakta mi 5  te lak ah Khalistan Liberation Force makai, terrorist Harminder Singh Mintoo leng tel hin kigen hi. Police thusuak in a gendan in, Nabha Prison buluhtute'n ahihleh Car nih zang uh a, Nabha suangkulh a tun phet un tua suangkulh vengtute temta zang in khoih kipan uh a, a sung a lut phet un, a galvan puakte uh zang in thautang 100 vei val a kapna uah Police nih in liamna tuak uh chi hi. Tuabang a Nabha Jail a khum a om helpawl te suakta uh ahihdan theihphet in India gamsung pumpi ah tua Jail apan suaktate zonna neih in om ngal a, Nabha Jail apan km 25 velding a gamla ah Police team khat in khawldia thu a piak uh ngaihsak louh ziak in Car tailai khat thau a a kapna uah nupi khat si in, midang khat liam uhi. Police in thiltung toh kisai naktak a a suizui nung un, Uttar Pradesh state sung a Shamli apan Parminder mankhia in, amah apan rifle 3 muhkhiak in om a, amah kipuanna apan Police in Jail apan suakta te Nepal lut hiding a muangmoh in gamgi zul teng venbitna nasatak in khauhsak uh a, naktak a sui ahihnung in, Police in tuni in Delhi khopi sung ah Khalistan Liberation Force makai, terrorist Harminder Singh Mintoo mankhe thei uhi. tuabang a Jail apan suakta te ziak in Jail Superintendant leh midang khat a sepna uapan tawpsak in om uhi.  kum 49 a upa Harminder Singh Mintooahihleh thubuai 10 val neisa hi a,  Dera Sacha Sauda chief Gurmeet Ram Rahim thahna toh kisai a muanmoh pipen ahihban ah Police in 2014 kum a Delhi khopi a IGI airport a a mat uh hin kigen hi. tu in amah mat himahleh Jail apan suakta midang  Terrorist Kashmir Singh Galwadi, Vicky Gondar, Gurpreet Sekhon, Neeta Deol leh Amandeep nasatak a zonna neih hilel hi.

 

 

 

GAMDANG THUTHANG

 

Kidoupi nihna omkhitnung a US leh Russia in cold war thupitak a neihlai ua, Communist vaihawmna gum a kalsuan banah CIA in tamveitak thahding a a zon nung ua leng a mat theihlouh uh Cuba gamsung vaihawmtu Fidel Castro a sih ziak in tuni apan Cuba gamsung pumpi ah Fidel Castro sunna ni 9 sung zatna kipan hi. Fidel Castro sih ziak in, Cuba khopi Havana kongzingte ah dahna leh lungkhamna in pumtuam mahleh US gamsung a Florida state a Miami khopi a Little Havana ah bel Fidel Castro sih kipahpih a lawm pawl hunkhop om uhi. Cuba gamsung pumpi ah Castro sunna hun ni 9 sung zatding chihthu om toh kiton in, Cuba ah zuzuak khamna om in, Cuba puanlap a kimkhat tan a khaikang ahihban ah muhnop suahna leh Concert chihte cancel in om vek uhi. Castro ahihleh a sihhun in kum 90 in upa a, a sihna ziak puankhiak in omlou hi. Milip million 11 val tenna Cuba gamsung a Newspaper tuamtuam in leng a newspaper issue te uh rong vom vuak in print uh a, official Communist Party daily Granma in nidang in rong San ngen zang in a newspaper uh print mahle uh Castro sunna in rong vom ngen zang uh a, Juventud Rebelde (Rebel Youth) in leng a paper te uh a dum (blue) ngen a print uh himahleh Castro sunna ziak mah in black in print uhi. Castro luang ahihleh haltum hiding a, a kihalna vuite December 4 chiang a State funeral neih ahihma teng Cuba gamsung mun tuamtuam puaktuah hiding hi. Gamdang makaite'n zahna a piak theihna ding un zingchiang Sepnawnni hun honsak hi ua, huai ah Diplomats leh gamdang a kipan official tuamtuam te'n Revolution Square ah zahna peding uhi. 

 

Pakistan in a gamsung a helpawl tuamtuam apan leh gamdang apan venbitna toh kisai a chouna nasatak a maituah ziak in, Pakistan solkal in sepaih heutu lianpen Chief of Army staff khek hin kigen hi. Khekkhiak a om chief of Army staff ahihleh General Raheel Sharif hi a, aman a mohpuakna zoulou chih ziak a khek a om ahihban ah, amah dinmun leen ding in, General Qamar Javed Bajwa guan in om hi. Hiai Chief Of Army staff mohpuakna tu in kipekhe chet naikei mahle uh General Raheel Sharif in zingchiang November 29 in Chief of army staff hihna koihkhe ta ding hin thusuak in gen hi. India in zalenna a muh kum 1947 in Pakistan kichi India apan piangkhia a, nidang in sepaih heutu himhim a mohpuakna uh khek kual in om ngeikei mahleh tutung a Chief of Army staff khek a omna in tamtak gen neiban hin kigen hi. Pakistan Dan bupi nuai ah gamsung vaihawmna tengteng Prime minister in a letding chih himahleh Army in gamsung muanna leh bitna, spy agency ISI kichite,  [Pakistan humbitna leh Foreign Politics ah bangkim thuneihna nei uh a, himahleh tutung a Chief Of army Staff khek a om phutna in bangtum hihiam chih theih hilou hi. Chief of Army staff thakding in General Qamar Javed Bajwa min genkhiak ahih theihna ding in, PM Nawaz Sharif kia hilou in, tulel a Pakistan nuclear programme enkaitu Lieutenant-General Zubair Hayat, Army chief of general staff; Lieutenant-General Ishfaq Nadeem, II Corps, Multan Commander leh  Lieutenant-General Javed Iqbal Ramday, Bahawalpur Corps Commander in lemsakpihna pia uh hin kigen hi.

 

Iran gamsung a om North Central province a Semnan kichihna mun ah rel tailai nih kiphutuah kha in huai ah a tawmpen in mi 44 in sihna tuak uhi. Iran solkal thusuak in a gendan in, Rel kiphuttuahna mun ahihleh Hemnan sung a Haft-khan station kiang hi a, passenger pua Rel tailai nih thakhat thu a a kiphutkhak nung un, tu in mi 44 si in, midang 100 val liam uh a, sihna tuakzah leng punbeh theilai ding a gintak a om hin gen hi. Iran's Red Crescent thupuangtu Mostafa Mortazavi in a gendan in, Rel tailai nihte a kiphuttuah khit phet un meikuang thupitak om ngal hin gen a, meiphelh gari tamtak in thiltunna mun delh in meikuang phelhmit sawm in kisa lel uh chi hi.  Tabriz Governor in ahihleh tua rel nihte a kiphuttuah hun un a sung ah mi 400 vel tuang uh hin gen a,  mi 400 te lak ah mi 48 tuni tan in a omna uh theihlouh in omlai chi hi. Iran ah ahihleh Rel hektute'n zuihding a Dan kibawl a zuih ginat louh ziak un, rel accident tam thei mahmah a, March 2015 leh March 2016 kikal sung vuak in leng Iran gamsung a Rel tuahsia ah mi 16,000 val in, sihna tuak uhi.

Read 1091 times
Login to post comments