You are here: HomeNewsFeature NewsAngels Vision News | December 02, 2016

Angels Vision News | December 02, 2016

Written by  Published infeature News Saturday, 03 December 2016 10:27

THUTHANG LAKTOMTE

@@ SBI ah Rs. 500 leh Rs. 2000 note Rs. 20 crores hong tung... Tunitaklam apan ATM teng kihongta in mipite dawn zangkhai mahmah

@@ Reliance jio in offer a bawl uh kumnawn March 2017 tan a din extend bawl.... Jio zangtu Million 52 val pha

@@ Colombia lenna a thautui beiziak a tuahsia ahihdan theihkhiak in om

 

 

 

TUALSUNG THUTHANG

 

SBI/CCpur branch Currency Chest a ding sum Rs. 20 Crores tuni'n Imphal apan hongtung a, SBI in linked bank teng kiang ah a hawmkhiak banah ATM teng ah leng thunlut in, tunitaklam apan in ATM teng leng kihong vekta a, hiai in mipite thadawn mahmah hi'n kigen hi. Tuni a sum hong tungte lak ah Rs. 500 note bangzah hiam hong tel mahleh a tamzaw Rs. 2000 note hi a, ATM-te update ahih nailouh ziak in ATM tungtawn in Rs. 500 note lakkhiak theih hi nailou ding hi'n thutut kingah hi. India  Prime Minister Narendra Modi makaih NDA govt. in gamsung ah nekgukna leh sumlem phiatsiang ding tupna in Nov. 8, 2016 zankim apan gam adia sum note sangpen Rs 1,000 leh Rs 500 note a sihsak ziak in gamsung mipi a zongleh hausa te'n haksatna naktak tuahloh ua, RBI in Rs 2000 leh Rs 500 note thak abawl gamsung ah hawmzak himahleh tunitan in mipi lak ah kidaih taktak nailou a, mipi'n ni bangzah hiam haksatna tuaklai dingin kilang hi. CCpur Dist ah SBI leh UBI telin bank branch tuantuam 12 val omlak ah SBI leh UBI ah mi tamthei mahmah a, SBI/CCpur ngial ah niteng in bank ah kichiang a 100 sim om gige in, khenkhat zankim dak 12:00 vel apan bank kihong ding ngak pawl leng omta hi'n kigen hi. Sum kidaihlouh ziak in ATM booth tuamtuam-te ah sum koihlut ding omlou a, tuni toh sim in ni 7 val bang khak ahih nung in tunitaklam apan hong hinawn mahleh Rs. 2,000/- note kia koih hi a, ATM Booth-te re-calibrate/upgrade ahih masiah Rs. 500/- note koihtheih hinalou ding a, hiai toh kisai bawl ding in technician-te sap hilel uh ahih dan a kisaipih thuneitu te'n gen ua, Customer khat in Debit card tungtawn in ATM ah ni 1 in Rs. 2,000/- tan kia lakhe thei a, bank ah leng nipikal 1 in Rs. 24,000/- tan lakkhiak thei ding uhi. Tuabangkal ah,  khawpi/bazar Rs 100 leh Rs 50 note vang mahmah in, sum note lui (Rs 1,000 leh 500) zatkhiak leng haksa hiaihiai a, Rs. 2,000 note omzekta mahleh sumnen kidaihlouh ziakin mipi'n haksatna tuak veve uhi. ADC/CCpur Chairman makaih Executive Members, traders leh pharmacist te'n joint meeting aneih hun ua local adjustment bawldia thukim mahle uh a zuilou tamtak leng om hi'n thu kiza hi. Imphal- CCpur passenger service a diak in Winger leh Bus te'n sum note tawh kisai in haksatna liantak tuak uh chihthu kiza a, counter ah passenger-te apan Rs 1,000 & 500 note luite lanuam mahle uh garipu (driver)  te'n thau thuna in zangthei nawnlou ua, counter ah leng sum luite lathei nawnlou uh chihthu kiza hi.

 

 

Evangelical Baptist Convention (EBC) in hongtung ding December 8 apan December 11, 2016 sung in Gospel Centenary Hall, New Lamka ah "Diktatna a kilamthakna" chih thupi zang in Kumsim Khawmpi a 68veina nei ding uhi. Khawmpi hunsung in Rev. Dr. Paige Patterson, President, Southwestern Baptist Theological Seminary, Texas, USA leh Dr. Solomon Rongpi, General Secretary, Council of Baptist Churches in North East India te'n thugenna hun zang ding ua, Rev. Kumam Suresh  Singh, Asia Co-ordinator of Partners in Discipleship International in Bible Study neihna makaih  ding hi. Khawmpi ahihleh Upa M. Ginzalian, Khawmpi Chairman in December 8, 2016 nitak in hongkhe ding a, December 9 sun hun in Vaihawmna om in, huai ah kho tuamtuam te'n agenda a puaklutte uh genkhawmna om ding a, Budget leh Yearplan toh kisai leng genkhawmna om ding hi. December 11, 2016 sunnung dak 1:00 in Ordination kikhop om ding a, huai ah Officiating Minister in Rev. S. Vungminthang, General Secretary pang in, Director of Ministries in kichiamsakna nei ding a,  Khawmpi Chairman in Certificate piakkhiakna nei ding hi. EBC Kumsim Khawmpi a 68veina ahihleh December 11 nitak in Upa Lalthanghlun Guite, Khawmpi Vice Chairman in khak ding hi.

 

BJP 58-CCpur Mandal in tuni zinglam dak 10:30 in Simte Inn, Sim Veng ah BJP Booth Level Conference leh Mass Enrolment nei uhi. Hiai hun zatna ahihleh Th. Chaoba Singh, Convenor, Election Management leh 58-CCpur AC a BJP Intending Candidate Paukhansuan Khuptong tel in Party level a mi poimoh teng in uap ua, mun tuamtuam apan mipi tamtak paikhawm in, mi a 100 a sum te'n BJP a ding in a min uh khumlut uhi. Hun zatna ahihleh H. Khaisei, Spokesperson, BJP CCPur District in makaih in K. Vungzalian, President, BJP CCpur District in vaidawnna thu gen a, mi tuamtuam apan thugen ngaihkhiakna om hi. Th. Chaoba, Convenor, Election Management in a thugenna ah, Manipur in tui, lampi leh nek-le-tak lam a haksatna kum 15 sung vengveng a tuah uh pal galkaina ding in ni 60 sung kia in samta ahih dan gen in, Manipur a dia khopi 2na Lamka khopi pen planning hoihtak bawl a Model Town suahsakna dia puahthak ut huai a sakthu gen hi. Manipur in kum 15 sung Manipur ah vai a hawm sung in project lian taktak a bawlte zat theih khat leng omlou a, tuni tan in Congress Government ah thil kiningching chih himhim om nailou ahihna ah hiai bang gentheihna apan suahtakna ding in mipi'n thih hih theihna liantak nei i hi chi'n gen a, mipi'n golhgukna tellou a sepna ngah leh government hoihtak poimoh ahih dan gen hi. 58-CCpur AC a BJP Ticket a dinsawm Paukhansuan Khuptong in gam leh leitang a dia hinna ana pia Martyr 9-te leh liam-le-bai a omte zahna sang pen pia in, amaute lungtup sepsuah utna ziak a hiai bang a kal suankhia ahih dan gen a, i gam humbitlouh a om pen a bitna ding in pauna ding mun a pau a, dinna ding mun a ding dia mipi a dia pan ding ahih dan gen hi. Mipi kuapeuh in ka kalsuan ngeilouhna a kalsuan ka hi chih hon theihpih unla, sungkuan vai ah leng hichibang thil sai ding hilou ka hi uh, himahleh i gam in hichibang innkuante poimohta ahihna ah tu maimai thei nawnlou a hong kisasuah ka hihna ah kuapeuh in na thumna uah hon thei gige un chi'n mipi paikhawmte kiang ah ngetna bawl hi.

 

Chin Baptist Association (CBA) Lanva Local Church in hongtung December 21, 2016 in CBA Lanva Biakinn ah kum 50 chinna Golden Jubilee lopna nei ding uhi. Golden Jubilee lopna programme ahihleh hunbi 3 a kikhen in hunbi masa sunma dak 11:00 in kipan ding a, huai ah Rev. Dr. JM Ngul Khan Pau, Senior Consultant, DAI in Golden Jubilee suang hongkhia in, Pathian kiang ah laankhe ding a, teltuam mi 50 te'n Jubilee dak tum ding uhi. Sun dak 12:00 in Hunbi 2na zat hiding a, huai ah Rev. Dr. Sut Khan Thang, Chairman, LCC in Golden Jubilee Souvenir hongkhia in Pastor Palet Thuomngell, Lamka Khawk Sia makaih in member ana mualliamsate suunna hun zat hiding a, Lanva CBWS te'n Jubilee Drama lahna nei ding ua, mipi paikhawm te'n Jubilee annkuang um ding uhi. Hunbi 3na pen nitak dak 5:00 in om ding a, mipi lasak khawmna om in, Pastor DS Pau Swante, Moreh Pawlpi Sia in Jubilee hun khak ding hi. Kikhop hunsung teng ah Rev. Dr. JM Ngul Khan Pau in Jubilee Message gen ding a, CBYF leh CBWS-te makaih in December 20, 2016 in kipolhlimna hun zat hiding a, item tuamtuam ah kidemna om ding hi'n thutut kingah hi.

 

Bungmual Veteran Football Association (BVFA) saina in hongtung ding December 11, 2016 apan December 20, 2016 sung in Lalpuithluii Foundation School, Bungmual ah school naupangte a ding in Winter Meet cum Football Talent-Search Tournament om ding hi. Hiai tournament ahihleh naupang football kimawlna lam a siamna hoih taktak neite zonsuahna ding tupna ahih banah naupang Kg 50 sang a gikzawloute a ding bik a sai hiding hi'n kigen hi. Lamka leh a sehvel a om naupang lunglutna nei te'n thuchian kimzaw leh application form Siam's Xerox leh Mawii's Dawr, JC Park, Bungmual ah ngah theih ding a, application form la khempeuh in December 10, 2016 tan in entry fee Rs. 500 pia in tua kitaklang munte ah piaklut ngai ding hi. Champion Team in kipahman in Rs. 5,000 sang in, Runner's Up in Rs. 2,000 a sang ding banah Semi-Final a vuallel team te'n Rs. 1,000 tuak dang in Man of the Tournament kiang ah kipahman in Rs. 1,000 piak hiding hi'n leng thutut kingah hi.

 

Presbyterian Biakinn, IB Road ah Tuithaphai Presbytery Vaihawmna Khawmpi a 69veina zan nitak in kipan a, tuni'n Pastor Bial tuamtuam apan palai paikhawm te'n agenda tuamtuam puaklut a omte genkhawm in, December 4, 2016 in zousiang ding uhi. Vaihawmna Khawmpi ahihleh zan nitak in Upa Vanlalhriata in hongkhia in, nitak teng in biakna kikhop om ding a, hiai hunte ah Upa PH Lalrinthang, Upa Lalthankhuma leh Upa Lalramhluna te'n thugenna hun zang ding ua, Sun hun teng ahihleh Vaihawmna hun a zat hiding hi'n kigen hi. Thutut kingah dan in, tulel in Tuithaphai Presbytery nuai ah Pastor Bial 7 - Lamka Presbytery, Kawnpui Presbytery, Saikawt Presbytery, Imphal Presbytery, Raengzeng Presbytery, Koirengei Presbytery leh Leimaram Presbytery om in, vaihawmna hun ah pastor bial 7 apan palai 200 val paikhawm in, agenda tuamtuam puaklut a omte tuni apan in genkhawmna kipan a, tuni'n palai paikhawm te'n 2016-17 sung a budget dia kiguang Rs. 2.95 crores val pomkip ua, zingchiang in vaihawmna sutzop hinawn ding hi. December 4, 2016 (Pathianni) zinglam dak 10:00 in Ordination Service om ding a, huai a Ordination ngah thak mi 6-te Rev. Lalthantluanga, Moderator in Ordination pe ding a, sunnung dak 1:00 in Moderator makaih in Sacrament om ding hi.

 

 

 

GAMSUNG THUTHANG

 

India gamsung a Fourth Generation 4G data a thawn a zangsaktu omsun Reliance Jio in tukum September apan India gamsung pumpi a customer te a ding a internet free a piak nung un, Jio company in Customer te khualna leh Happy new Year offer dan in, kumnawn March 31, 2017 tan in data a thawn in pelai ding ua, voice call leh Jio application te a thawn in zangsak laiding uhi. Hiai thu ahihleh tuni a jio Company chairman in a puankhiak a, tukum December tan in jio zangsate offer beiding himahleh a hun suan a om hi a, hiai thu toh kisai a Mukesh Ambani in a gendan in, December 4, 2016 apan Jio user thak peuhmah in kumnawn March 31 tan data, voice call leh sms chihte a thawn a a zat theih ding ban uah, a zanglel te'n leng SIM card thak lei ngailou in, tua offer thak kipia enjoy theiding uh chi hi. Reliance Jio Happy New Year Offer puankhiak hun a Mukesh Ambani in a genzel dan in,  Jio zangtu peuhmah in ni khat in FUP limit 1GB neiding uh a, tua limit kheng a a zat uh leh a speed awl ding hin gen a, tu in Jio zangtute'n welcome offer a zatna uah jio zangtu 80 percent in nikhat in 1GB val zangbei uh hin gen hi.  Tukum September apan Reliance Jio honkhiak leh zat ahihnung in, company in SIM card deihtu tamtak SIM card la ut a kivual om gige ahihdan thei uh a, khenkhat in a speed hatlou lua hidan a complaint bawl uh hin Reliance thusuak in gen hi. Hiai thu toh kisai a, Mukesh Ambani in a gendan in, Data speed ze olna pen a zangtu 52 million val om ziak hi a, tower khenkhat ziak ahihdan chetna hunkhop om mahleh Tower ziak a data speed ze-olna ziak 8 percent lel tung hin gen hi.  Hiai thu toh kisai a Company dang khenkhat in telecom Regulatory Authority of India (TRAI) ah hekna bawl mahle uh, Reliance in a customer te khualna a offer piak hunsung a sum seensak ding utlou uh hin gen uhi. Mukesh Ambani in Reliance Jio toh kisai in soiselna khenkhat om mahleh customer tamtak apan feedback leng hunkhop mu uh hin gen ua, Aadhaar tungtawn a KYC activation bawlsak a omna ah kipahpih uh ahihdan gen uh chi hi. Jio in ahihleh nikhat in customer thak lakh 6 nei gige a, a tangpi dan apan et in Broadband zangtute sang in, Jio zangtute'n a leh 25 in data zang tamzaw uh chin Ambani in gen hi.  India gamsung ah Jio SIM card muhtheihna outlets lakh 2 val om a, India gamsung a ATM omna mun sang in neuchik in tawmzaw hi. Tuabang a Jio in Happy New Year offer a bawl ua leh kumnawn March 2017 tan in Reliance Jio SIM card muhtheihna mun outlets lakh 4 val India ah om zouding a gintak in om hi.  Reliance Jio patkhiak ahihnung in, India kia hilou in khovel pumpi ah technology a khang hatpen hihna tang a, kha 3 sung in, Facebook, Whatsapp sang in khang hatzaw hin kigen hi. Jio zat ziak a free call zangtu khenkhat in Dan toh kituak lou kampau a neih ziak un, TRAI leh solkal in jio zangtu Crore 900 valte voice call block sak hin Ambani in gen a, solkal in tuabang panlakna a neihna tung ah phathuai a sakthu leng gen hi.  Jio simcard a thak a lei sese louh in leng, mahni number omsa mah zang in Mobile Number portability kichi MNP leng hih theih a, Airtel zangtu in a number kheklou in Jio ah portability bawlthei chi hi.

 

Manipur state sung lutna Highway nihte a United Naga Council in hunchiam omlou Economic blockade a bawl uh, kha khat a chin toh kiton in, Manipur state sung ah a diak in Imphal khopi sung a niteng poimoh thilte haksatna thupitak om nung in, Manipur High Court in state solkal kiang a thagum zang a kikawm tuahna lamlian te bawl hoih ding a thu a piak dungzui in, tuzing baihtak in venbitna khauhtak nuai ah Mao gate a gari koltang tamtakte Imphal khopi zuan in escort toh taisak in om uhi. UNC in economic blockade a bawl un ahihleh  Imphal-Jiribam National Highway-37 leh National Highway 2 imphal Dimapur lamlian khaktan a, Imphal apan Jiribam kawmtuahna lamlian ah van paw gari tamzaw taisak himahle uh Mao gate a koltang gari tamtak Imphal zuan a a tai ngamlouh ziak un, November 1 pan koltang uhi. Tuabang a niteng poimoh thilte puaklutna ding a Manipur highcourt apan Chief Justice Rakesh Ranjan Prasad, Justice N Kotiswar leh Justice Kh Nobin Singh in state solkal thuneihna sangpen a piak uh toh kiton in, zan nitak in Mao gate a koltang vanpua gari tamtakte vengbit ding in, state solkal in Additional DGP 3, DIG 4, SDPO 7, SP 4, battalion commandant 17, Police personnel 1000, CRPF compant 11, Para Military company 12, BSF company 3 leh Police commando 200 banah Doctor 4 sawlkhia uh a, a maute'n tuzing phalvak in Maogate a gari koltang 400 val Imphal khopi sung hon lutpih uh hin kigen hi.  Tu in Jiribam, zotna NH 37 a lei poimoh khenkhat blockade gumtute'n hihse ding a kisa uh hidan a gen ahih ziak in, security te'n venbitna peding in Manipur High Court in theisak a, National Highway nihte ah venbitna om theihna ding in CRPF post 60 vel koihding in Manipur state solkal in phualpi solkal ah ngetna nei mahleh Union Home Ministry in dawnna pe nailou uhi.

 

Bay of Bengal tuipi tung a pingpei Cyclone Nada kichi om ziak in, tua cyclone in a diak in Tamil Nadu leh Puducherry nawk kha ding dan a gen himahleh awlawl a hatlouh lam a nawt ziak in, thil thupi lua suse ding in patauhna om nawnlou hi. Cyclone Nada in hatlouh lam nawt hidan a gen himahleh mun tamtak ah hutkhiakna nasem pawl NDRF team hunkhop kigingsa a koih in om thouthou ua, Cuddalore, Puducherry leh Nagapattinam ah vuah tamtak zu mahleh Chennai khopi ah bel vuah tam lolou hin gen uhi. Tuabang a Cyclone Nada ziak a thiltung deihhuai lou om khakding lauhna in, National Disaster Response Force team khat Karaikal, Cuddalore tung in huai ah Cyclone om hun a kibukna mun dia kibawlte ah minautangte pilutna nasep sem uhi. Cuddalore District Collector TP Rajesh in a gendan in, Cyclone om hun a thiltung maituahding a kisakkholhna kipanta hin gen a, nekding leh tuisiang dawnding tamtak koihkholh a om ban ah, Cyclone ziak a meivak siatna omphut hun ah zatding in electric lamp post 3000 vel mansa a koih in om chi hi. Cyclone ziak a tui kihawt om ding lauhna in Navy in longpi nih Shakti leh Satpura kigingsa in koih ua, tuinuai lutsiam divers, doctor, rubber boat, helicopter leh relief van tuamtuam leng kigingsa a koih in om chi uhi.  Cyclone Nada hat nawnlou dia gen himahleh tuni in Tamil Nadu tuipi zul neh a om Chennai, Nagapattinam leh Puducherry a Cuddalore mun a school omte khak in om hi.

 

Nithum a kizom a Delhi khopi sung a meizun sahluat ziaka kikawmtuahna a buaina ding in, tunin leng meizun sahluat ziak in, Delhi khopi sung a Indira Gandhi International Airport ah lenna lengkhe ding leh bohding 60 val a hun zekai sak in om hi. Tuzing dak 9 tan in, Delhi ah Domestic flight 6 Airport a a boh theihlouh ziak un, mundang ah bohsak hi ua, kho muhtheihna leng metre 50 tan kan a ki muhtheih louh ziak in, leitual leh huihkhua tungtawn a kikawm tuahna teng buai mahmah hi. Delhi ah kho votdan temperature 12 degree Celsius tung a, himahleh sun dak 11:30 vel apan meipi hong then deuh ziak in, ngeina bang in lenna tamtak Airport ah bohthei in, lengkhe thei nawn uhi. Central Pollution Control Board (CPCB) in Air Quality Index a suahkhiakna uah, huih omlouh ziak a khopi sung a huihsiang lou tamtak omte kiam thei nai tuanlou in, 410 tan tungtou a, ultrafine pollutants ahihleh PM 2.5 leh PM 10 tung in, safe limit tunglam ah 182 leh 343 micrograms per cubic metre tung tuaktuak hin gen uhi.

 

 

 

GAMDANG THUTHANG

 

Tukal seppatni nitak a Brazil apan kipan khia passenger pua lenna khat in a sung a Brazil apan Chapecoencse football team apan player hunkhop leh mi tamtak pua a Colombia zuan a lenglai a tunna mun ding a tundek kuan a a tuahsiatna toh kisai in, lenna sung a kikoih black box a kipan thil omdan sui ahihnung in, lenna kia toh kisai suizui pAwlte'n thautui a beiziak a kia ahihdan musuah uhi. Investigator te'n a gendan un, tua Colombia lenna kia ahihleh a thautui a beiphet a, a sung a electric toh kisai teng a mitvek nung a tuahsia hin gen ua, Pilot in lenna a tuahsiat dek kuan a Airport thuneitute a houpihna nanung pen kikhumlut apan theihtheih a om hin gen uhi. Tua lenna sung ah passenger 71 leh crew member 12 tuang uh a, himahleh lenna kia ah mi 6 suakta uh a, lenna kia a suaktate lak ah Brazil club Chapecoencse football team goalkeeper Jackson Follmann a khelak liam mahleh damlam nawtta hin Doctor te'n gen uh a, himahleh Chapecoencse football team Defender Helio Neto ahihleh a luguh a khang banah, a tuap lam buaina a neih ziak in ICU ah etkol in omlel hi. Mi suaktate lak a telkha defender mah Alan Ruschelhad in a nunguh a tah khak ziak in, damsiang nailou a,  lenna sung a technician Erwin Tumiri ahihleh lenna kiak hun a om dingdan sinsak a omte hoihtak a a zuih ziak in, bangmah chilou in suakta hi. Erwin in a suahtak dan toh kisai thuthak saite mai a a gendan in, lenna kedek ahihdan theihphet in passenger tamtak a tutna uapan dingtou in kikou zak uh a, himahleh aman lenna sung a tutna nuai ah kibu in, a khe tegel kikal a a bag koih hin gen a, himahleh a suaktakna toh kisai lamdang tak hin gen hi. Brazil solkal in lenna tuahsia a football player hunkhop leh Journalist bangzah hiam a mansuah ziak in, amaute ni 3 sung suun hiding chin puang uh a,  Chapecoencse football team apan Colombia zuante ahihleh Atletico Nacional Club toh Medellin khopi a South American Cup Final kimawldia kuan hi uh a, thakhat thu a lenna tuahsia a player tamtak a sih ziak un, Chapecoencse football team in a kimawlpih ding uh Atletico Nacional Club in sihna tuakte sunna leh thuakpihna in tua South American Cup Final kimawlna omlou ding himahleh khatna hihna Chapecoencse football team lasak ding in a saitute kiang ah ngetna bawl uhi. 

 

Cuba gamsung a zalenna sualtu minthang mahmah banah, Cold War hunlai a US thuguk saipawl in CIA in tamveitak thah sawm a a zon nung ua leng suakta Fidel Castro a sihnung in, a kihalna vuute Cuba gamsung km 800 ah puaktuah in om lel hi. Castro kihalna vuu ahihleh Cuba capital Havana a kipan koihkhiak sawm a omna mun Santiago tan puaktung hi ding a, Pathianni chiang in koihkhiak hiding hi. Cuba gamsung pumpi ah Castro sunna hun ni 9 sung zatding chia thupuan pen tu Pathianni in beiding a, huaihun toh kituak in a kihalna vuu te leng koihkhiak hiding hi. Fidel Castro sunna neih ahihsung teng Cuba ah zuzuak khamna om in, Cuba puanlap a kimkhat tan a khaikang ahihban ah muhnop suahna leh Concert chihte cancel in om vek uhi. Castro ahihleh a sihhun in kum 90 in upa a, a sihna ziak puankhiak in omlou hi. Sunna om sungteng Milip million 11 val tenna Cuba gamsung a Newspaper tuamtuam in leng a newspaper issue te uh rong vom vuak in print uh a, official Communist Party daily Granma in nidang in rong San ngen zang in a newspaper uh print mahle uh Castro sunna in rong vom ngen zang uh a, Juventud Rebelde (Rebel Youth) in leng a paper te uh a dum (blue) ngen a print uh himahleh Castro sunna ziak mah in black in print uhi. Castro hunlai a US leh Cuba kal kisiatna pipen ahihleh 1959 kum a Fidel Castro makaih a helna pat a om a socialist state puankhiak ahihnung in, 1960 kum in Cuba a om America in sumsinna mun tamtak a neihte Cuba in thakhat thu a suhsak a a thuneihkum ziak in gam nihte kal ah kingeihlouhna kipan in, 1961 kum in US in Cuba vaihawmtu Fidel Castro paihkhiak sawm in mi khenkhat fuihsia in helna pan mahleh lohsam a, a kumnawn 1962 in Soviet Union in Cuba a nuclear galvan pawthei missile khenkhat a koihlut ziak in, US apan douna tuakphut thei ding dinmun ah om ngei hi. Tuabang a gamnih kal a kingeihlouhna thupitak om nung 2009 kum in, US President Barrack Obama in Cuba toh kizopna bawlhoih thak sawm in, Cuba makai khenkhat US gamsung a zin theilou dia travel ban a puankhum khenkhatte khahkol in huai apan awlawl in gamnih kal bawl hoih in om thei hi.

 

West Africa gambuppi sung a om Gambia ah President kitelna zan a neih ahih toh kiton in, tulel a President hihna lenlel Yahya Jammeh in telching a om nawn ding ahihdan kimuang tak in gen hi. Gambia President Yahya Jammeh ahihleh 1994 apan tuni tan Gambia President dinmun lentou hi a, tutung a Presidential election ah opposition lam te'n kiphinna a neih sawm ziak un, telching a om nawn ngeingei Gambia gamsung ah Dan thak bawl hiding a, huai ah peaceful protest nasan phal hi nawnlou ding hin gen hi. Zan Ningani in ahihleh Gambia gamsung a kitelna ah milip 8,80,000 valte'n polling station tuamtuam 1400 val ah President thak ding telna nei in, vote khia uh a,  European Union leh West African regional bloc ECOWAS in Gambia election ah Observer sawl kei mahle uh, African Union in bel observer hunkhop sawl hin kigen hi.  Yahya Jammeh ahihleh 1994 kum in Coup tungtawn in President hihna len a, mi khat in President dinmun kum hiai zah a letding chih Dan kibawlsa phiat mang nung in, 1996, 2001, 2006 leh 2011 in telching in om tou den hi. Tutung a kitelna ah leng diklou tak a vote gukna om hin gen ua, sepaih thahatna zang a chin sawm nawn hidan in ngohna om mahleh buaina thupilua omlou in election zohsiang in om thei hi.

 

US President ding a Donald Trump telching a om nung a, Clinton gumpawl te'n US gamsung a khopi tuamtuam a kiphinna nasatak a neih hun uah, US puanlap National flag hal a om thu ah, President thakding a telching a om Trump in US flag haltute suangkulh a khum hiding chi hi. US flag halna toh kisai a, Donald Trump in agendan in, President dinmun a let nailouh ziak in, thuneihna nei naikei mahleh, President tutphah a luah hunhun chiang in, US flag haltute kum khat sung suangkulh a khumding hin gen a, suangkulh a khum a omloute leng US gammi hihna a neihte uh lakkhiak sak hiding chi hi.  US flag hal kichi US gamsung a phal hi ngeingei lou ding a, tua flag zahtak lou a thilhih tute jail a khum hiam ahihkeileh US citizenship a neih uh lakkhiak sak hiding chi hi.

Read 939 times
Login to post comments