You are here: HomeNewsFeature NewsAngels Vision News | December 03, 2016

Angels Vision News | December 03, 2016

Written by  Published infeature News Saturday, 03 December 2016 21:08

THUTHANG LAKTOMTE

@@ International Day of Persons with Disabilities thupitak a zat in om

@@ Economic blockade thu ah kigolh ding in Naga pawlpi te'n kiren Rijiju ngetna bawl

@@ Indonesia khopi Jakarta Governor paihkhiak ding deihna in kiphinna paitou lai

 

 

 

TUALSUNG THUTHANG

 

District Social Welfare Department makaih in tuni'n Synod Hall, IB Road ah International Day of Persons with Disabilities zatna om hi. Hiai hun zatna ahihleh DSWO/CCpur in Centre for Community Initiative, CCpur District Legal services Authority, CCpur District Disable Union, JVS-LF/FFC Mercy Home, ZEO/CCPur, Nehru Yuva Kendra leh Parent Association toh kithuah a asai uh hi a, DC/CCpur Lunminthang Haokip, IAS in Chief Guest hihna toh uap in, Functional President in SP/CCPur Rakesh Balwal, IPS pang a, A. Umarani Devi, DSWO/CCPur, T. Goukhomang, ZEO/CCpur leh H. Doungel, Youth Co-ordinator, NYK/CCpur te'n Chief Host hihna toh hiai hun zatna uap ua, Lamka khopi sung leh a sehvel a om vualbanlou mi 150 val banah nu-le-pa tamtak hiai hun zatna ah kihel uhi. Programme ahihleh sunma dak 11:00 in kipan a, mi poimoh chian a om te'n candle lighting nei in hun zatna hongkhia ua, T. Sianmuanthang, President, CDDU in vaidawnna thu gen in, International Day of Persons with Disabilities kizat pat dan pulak hi. Aman a gendan in, United Nations in 1976 kum in General Assembly ah 1981 pen International Year of Disabled persons a puang in, 1983 apan 1992 sung pen Decade of Disabled Person a puang in hiai hunsung in vualbanloute dopsang ding dan leh etkol ding dan toh kisai naktak in buaipih ua, December 3, 1992 kum apan in International Day of Disabled Person chi a minvuah in kum teng in zat hi a, 2007 kum apan International Day of Persons with Disabilities chi a amin khek a om hi'n gen a, hiai in a tuppen ahihleh vualbanloute dinmun leh haksatna kuapeuh in a theihpih ua, a dikna uleh a tanvoute uh deidanna om hetlou a angah theihna ding uleh kong bangkim ah hinkhua zalentak a azat theihna ding uh tupna a kumteng a neih a om ahih dan gen in, tukum thupi ding in "Achieving 17 goals for the future we want" chih zat a om ahih dan gen hi. A. Umarani Devi, DSWO/CCpur in Social Welfare tungtawn a vualbanloute a dia scheme tuamtuam omte pulak in, Social Welfare nuai ah vualbanlou kum 80 tunglamte a ding in Indira Gandhi National Disable Pension Shceme om a, tulel in CCpur District ah hiai scheme hamphatpih mi 219 om hi'n gen a, vualbanlou Class I apan Postgraduate leh Doctorate Degree zialte a ding in Scholarship to Disable Student kichi leng a om banah vualbanlou laisiam sepna neiloute a ding in Unemployment Allowance to Persons with Disabilities kichi scheme om a, hiai scheme nuai ah vualbanlou Class X pass leh a tunglamte kiang ah piak hi a, vualbanloute panpihna ding in Financial Assistance to Disable Person kichi leng om a, vualbanlou zi leh pasal neite kiang ah Marriage Incentive award Rs. 30,000 leng piak hi a, tukum in hiai scheme tuamtuam apply mi 103 vel om a, application teng leng khak khiak vek hita hi'n gen hi. H. Doungel, Youth Co-ordinator, NYK/CCPur in piansualna kichi kikhel theilou, vangsiatna hiam ahihkei leh tuahsiatna ziak a thil tung theih ahihman in chiamnuih bawl maimai ding hilou ahih dan gen in, kuapeuh in niam et leh pampaih mailou a, amau a thil hih theihna omte muhkhiak ahih theihna dia i tosawn zawl ding uh ahi chi'n gen hi. T. Goukhomang, ZEO/CCPur in piansualna kichi Pathian in a thupina latsakna dia a bawl ahih dungzui in, vualbanlou kemkha nu-le-pa te'n inn ah mawk khum bichilhlou a, amau a thil hih theihna tuam a neihte uh i zonkhiak pen Pathian thil tup ahi chi'n gen a, hiai thu pen tuni a paikhawm kuapeuh in thei a, midang kiang ah puangzaktu a pang thei chiat dia panla ding in mipite kiang ah ngetna bawl hi. Functional President a pang SP/CCPur Rakesh Balwal, IPS in a thugenna ah, vuanbanlou te'n amau ah thil hih theihna thupitak nei mahle uh amau a kizonkhiak theilou uh ahihna ah mi kuapeuh vuanbanloute a dia muantak i hi ua, vuanbanloute pom a zottheih dia i om ding uh ahi chi'n gen a, vualbanloute a dia shceme tuamtuam tamtak om mahleh a sepsuahna lam ah naktak a i kithuahpih uh ngai a, Civil police lam in leng theih tawp suah a panla ding uh ahih dan gen hi. Chief Guest a pang DC/CCpur Lunminthang Haokip, IAS in vualbanloute amau ut mawng a hiai bang a om uh hilou ahih dan gen in, Pathian in a thupina lahkhiakna dia a bawl hizaw ahihman in, taksa lam ah kibatna omtheikei mahleh mipi kuapeuh in mi dangte toh kibang ahih dan lungput i neih uh hunta hi'n gen hi. Election Commission of India in leng vualbanloute ngai poimoh mahmah in, kum nawn election ding ah leng a tuam liauliau in guideline bawl a, vualbanlou vote khe ding khempeuh kichiang ngailou dia dan a bawl banah haksatna a tuahlouhna ding un dan leh dun tamtak bawl hi'n gen a, tuni a programme a tel teng kiang ah Travelling allowance a piak vek banah sen-le-pan om teng leng sengsak vek hi. Programme hunsung in DC/CCpur in vualbanloute a dia Youth Icon dia guan a om T. Sianmuanthang, President, CDDU kiang ah Certificate piakkhianna nei in, Pauzagin Tonsing, Director, CCI in vualbanloute a dia signature campaign a neihna uh toh kithuah Memorandum Prime Minister Narendra Modi a ding DC/CCpur tungtawn in pekhia a, Election Youth Icon-te apan lasak ngaihkhiakna a om banah The Malsawm Initiative a kai naupangte tel in mi tuamtuam te'n special item lahna nei uhi.

 

 

Manipur State Power Distribution Corporation Ltd. (MSPDCL), Churachandpur Division in zingchiang (December 4, 2016) in Tedim Road dung leh Hmar Veng area ah AB Cable khung in, Higt Tension khuamte a kheng ding ziak un zingkal dak 7:00 apan nitaklam dak 4:00 sung Singnngat 11kV feeder Shutdown bawl ding ua, tua ziak in Singngat Feeder teng in zingchiang in meivak mulou ding ua, nasep zobaih leh zohak dungzui in shutdown hun sung kikheng thei hi'n gen uhi. Singngat feeder in mei a piak na veng/khua/transformer te ahihleh Tuithapi, Peace Ground , Laizon Veng, Zion Veng, Kamdou Veng, Hmar Veng, Circuit House, Zouveng, New Zouveng, Hiangzou, Zoumunnuam, Police Station, Zenhang Lamka PCI Colony, Peace Lane, Nehru Marg, Apollo Veng, Beaulahlane, Khumujamba, Bible Hill, Rengkai, Neihsial Veng, Muolvaiphei to Daizang (along Sugnu road) hi a, Gari tai vel tawm deuh ding leh nasep lamzang zawk ding ngimna a Pathianni a shutdown lak a om ahih man in mipi/consumer kuapeuh in theisiam ding in ngetna bawl uhi. Tuaban ah, MSPDCL in Khengjang apan Thanlon tan mei piakna 132 kV line a khung ding ziak in zingchiang zingkal dak 6:00 apan nitaklam dak 5:00 kikal sung emergency shutdown la ding ua, Khengjang Feeder (Khomawi/Bethel apan mal lampang) teng in meivak mulou ding uh hi'n leng thutut kingah hi.

 

Grace Bible College (GBC) in hongtungding December 7, 2016 in EBC Gospel Centenary Hall, Hebron Veng, New Lamka ah Commencement Service a 37veina nei ding uhi. Thutut kingah dan in, tukum GBC Commencement service hun ah, Bachelor of Theology (B.Th) ah mi 20, Master of Divinity (M.Div) ah mi 23, Diploma in Theology (D.Th) ah mi 10 leh Ministerial Training Course (MTC) ah mi 60 te graduate khe ding ua, amaute Rev. Dr. G. Ginsianthang, Principal, GBC in degree pia in Rev. S. Vungminthang, General Secretary, EBC in thumsak ding hi. Huai ban ah Dr. Paige Patterson, President, Southwestern Baptist Theological Seminary, Fort Worth, Texas, USA in Pathian thutak gen ding a, Paukhankhup, Dean of Student leh Elder T. Khaithang, Chairman, Board of Governors (BOG)te' makaih in graduate-te thilpiak piakna om ding hi.

 

Manipur University nuai a BA leh B.Sc. 1st leh 5th semester sinlel te'n tulai in exam nei lel ua, CCpur District ah Lamka College leh CCpur Govt. College a kai student te'n amau college chiat ah exam pia in, tuni sunnung lam in BA 1st Semester te'n History subject exam in December 9, 2016 in exam teng zousiang ding uhi. Thutut kingah dan in, BA/B.Sc. 1st leh 5th Semester ahihleh apaisa November 23, 2016 a kipan hi a, CCpur Govt. College ah BA/B.Sc. 5th Semester ah a kigawm in candidate 921 om in, theory teng December 1, 2016 in zousiang ua, practical exam ahihleh routine suahkhiak hinailou hi'n thutut kingah hi. BA/B.Sc. 1st Semester ah candidate 1432 om in, tuni sunnung lam in History subject exam ua, December 5, 2016 in Botany & Statistic subject exam nawn in, December 6 in Geography leh December 7, 2016 in Zoology subject exam ding ua, theory teng ahihleh December 8, 2016 in zousiang ding uhi.

 

 

 

GAMSUNG THUTHANG

 

United Naga Council in Manipur state sung lutna Highway nihte a Economic Blockade a bawl ziak a Manipur state solkal in UNC President Gaidon Kamei leh UNC information Secretary Stephen Lamkang a mat uh toh kisai in, Delhi khopi sung a teeng Naga mipite'n awlmoh mahmah in, thil omdan Union Minister of State for Home Kiren Rijiju kiang ah thilomdan etkai pih ding in ngetna nei uh chihthu kiza hi. Delhi a Naga mipite kipawl khawmna, Naga student Union in pawlpi khat adinkhiak thak uh Committee for Joint Naga Civil Societies Delhi (CJNCSD) kichi in statement a suahkiakna uah, Naga mipite dikna leh tanvou uh nelhsiah a Naga mipite'n a pu apa khang ua paidan a neihte uh zungkalh sawm a UNC President leh Information secretary mat a om na naktak a mohpaih uh hin puang ua, UNC kichi Manipur a Naga te tengteng khkaikhawmtu ahihman in, a makai nihte uh mat a omna in Naga mipite bangmah lou a koihna hin leng taklang uhi. Tua state ment in a taklat zelna ah, UNC in kiphinna pan a economic blockade a bawl uh Naga te'n a pu apa khang ua a luahna gamte uh humbit sawmna ziak hin gen a, Naga te tenna gam ah District piching bawlkhiak hi theilou ding chia state solkal leh Phualpi solkal tanpha toh Memorandum of Understanding 4 vei neihkhit a om ta hidan a gen in, state solkal in hiai thu Politics toh kisai a genveng naksang a UNC makai nihte man in namkal buaina piangsak theiding a mi tauhtuah uh hin leng gen hi.  Naga Students' Union, Delhi (NSUD) huaihotna nuai a November 28 a Manipur a Nagate dinmun awlmohna ziak a Nagate tungtang tangkoupih ding a Delhi a phuhkhiak a om Committee for Joint Naga Civil Societies, Delhi (CJNCSD) in Naga Forum Delhi (NFD), Naga Peoples Movement for Human Rights, Delhi Sector (NPMHR), Naga Lawyers' Guild, Delhi (NLGD), Naga Students' Union Delhi (NSUD), Forum for Understanding the Naga-India Conflict & Human Rights (FUNICH), Naga Scholars' Association (NSA) leh Naga People's Union for Civil Liberties (NPUCL) khaikhawm hin tua statement in gen a, Manipur buaina in venlam sang a siatlam nawt sem ding dinmun a om ziak in, Committee for Joint Naga Civil Societies, Delhi in November 29 in Kiren Rijiju, Minister of State (MoS), Ministry of Home Affairs (MHA) kiang ah kigolh ding in ngetna ana nei hin leng gen hi. Tua Kiren Rijiju kiang a Memorandum piaklut a om ah, tulel a Manipur Police Custody a koih a om UNC makai nihte a kin thei bangpen a khahkhiak ding leh, Naga te tenna bial mel hem sak sawm a panlakna te kintak a tawpsak ding banah, India leh Naga te'n Framework Agreement a signed uah Nagate tenna bial teng khumlut ding a ngetna tuang hin kigen hi. Hiai toh kiton in, Manipur buaina toh kisai a phualpi solkal a kigolh a, UNC makai mat a omte khahkhiak a om masiah Committee for Joint Naga Civil Societies, Delhi in kiphinna Delhi ah neitou dending uh hin taklang uhi. Committee for Joint Naga Civil Societies, Delhi in a taklat zelna uah, Manipur state solkal in Manipur state sung a Nam tuamtuam teeng khawmte ai-oh zoulou hin ngohna bawl ua, kilemna hoihtak nam khat leh khat kal a omsak ding chih hinapi in, Manipur state solkal in nam khat leh khat kal a kimelmakna piang sak ding a nasem uh hin gen hi. Huailou in, Naga Hoho President Chuba Ozukam leh a team te'n zan zek in, Committee for Joint Naga Civil Societies, Delhi makaite kimuhpih in thil omdan etkhiakna a neih ban uah, kintak a Naga-India Framework Agreement sepsuah na ding a phualpi solkal nohna va nei uh hin leng thutut kingah hi.

 

Nithum a kizom a Delhi khopi sung a meizun sahluat ziaka kikawmtuahna a buaina ding in, tunin leng meizun sahluat ziak in, Delhi khopi sung a Indira Gandhi International Airport ah lenna lengkhe ding leh bohding 60 val a hun zekai sak in om hi. Tuzing dak 9 tan in, Delhi ah Domestic flight 6 Airport a a boh theihlouh ziak un, mundang ah bohsak hi ua, kho muhtheihna leng metre 50 tan kan a ki muhtheih louh ziak in, leitual leh huihkhua tungtawn a kikawm tuahna teng buai mahmah hi. Delhi ah kho votdan temperature 12 degree Celsius tung a, himahleh sun dak 11:30 vel apan meipi hong then deuh ziak in, ngeina bang in lenna tamtak Airport ah bohthei in, lengkhe thei nawn uhi. Central Pollution Control Board (CPCB) in Air Quality Index a suahkhiakna uah, huih omlouh ziak a khopi sung a huihsiang lou tamtak omte kiam thei nai tuanlou in, 410 tan tungtou a, ultrafine pollutants ahihleh PM 2.5 leh PM 10 tung in, safe limit tunglam ah 182 leh 343 micrograms per cubic metre tung tuaktuak hin gen uhi.

 

Tukum July kha a Pakistan tawsawn helpawl tuamtuam te lak a khat Hizbul mujahideen makai burhan wani kaplup ahih ziak a Jammu and Kashmir state sung pumpi buaizakna a tutloh nung in, Burhan Wani kaplup a om ma ni in Burhan Wani leh Lashkar E Taiba makai kihou uh ahihdan audio clip muhsuah in om hi. Hiai audio clip khahkhe masa pen ahihleh India gamsung a News channel minthang mahmah te lak a khat CNN-News 18 hi a, tua Audio clip ah Hizbul Mujahideen commander Burhan Wani in Lashkar-e-Taiba chief Hafiz Saeed phone tungtawn a kihoupih in, Hafiz Saeed vualzawlna a nget banah, India hihbuaina ding a LeT toh Hizbul Majahideen pangkhawm ding a ngen hin kigen hi.  Hiai audio clip ahihleh India thuguk saipawl te'n helpawl makai nihte kihouna ana intercept uh hi a, tua kihouna ah Burhan wani in LeT apan India sukbuaina ding in, thauvui thautang, banah sum leh pai a huhna peding a leng ngen hin kigen hi. Tua helpawl makai nihte kihouna apat kiza dan in, LeT makai Saeed in Burhan wani kiang ah, dinmun haksatak in om le uh leng lungke lou a pangding in theisak a, a poimoh uh omleh thuzak ding a leng theisak hin kigen hi. Burhan wani ahihleh kum 22 a upa hi a, Kashmir phaizang a Pakistan tawsawn helpawl a tel dia mi tamtak kaikhawmtu hi a, tukum July a Jammu and Kashmir a Indian Army te'n a kaplup uh hin kigen hi.

 

Telangana state sung a Mahbubnagar district ah dakbawm hawmtu Postmaster khat tel in mi 3 in Maoist helpawl te sum note luite sum note thak a khek a sawm ziak un, Police in man uhi. Police thusuak in a gendan in, September kha in Gaja Engineering Private Limited a deputy Project Manager Trinadha Rao kiang a Maoist helpawl te'n vauna bawl in, sum a piak ding uh ahi chin theisak ua, a nung sawtlou November 12 in Chhattisgarh a bheemavaram khota ah dangka Lakh 1.30 peding in theisak uhi. Himahleh phualpi solkal in sum note 500 leh 1000 hon sihsak phut ziak un, trinadha Rao in a sum te sum note thak a khek manlou hin gen uhi. Rao leh a lawmte mi khat in Maoist te sum demand peding a  Bheemavaram khota a tun phet un, Maoist helpawl a tel mi thum mai kituamsa AK 47 tawi te'n a sum puakte uh la utlou in, 2000 note thak a puakte uh kia la uh a, Maoist te'n tua minihte kiang ah Bag nih a kituun dangka Lakh 12 pia in, sum note thakte a khekding in thupia uhi.  Maoist te thupiak bang in, Rao leh a lawmpa'n Manthangode khota a Post Master Satyanarayana Charythuzak uh a, himahleh tua Post master in kha 3 sung a tua sumte khek ding ahihdan leh a sum khek man a 30 percent a tan ding hin gen a, a nung in 15 percent ding in kihoulem uh chi uhi. Postmaster Chary in tua sum note luite ahihleh Old age pension sum, mi bangloute panpihna sum leh Job Card sum hawmkhiak dia post office a paite toh khektuah sawm hin Police in gen ua, himahleh Police te pilvanna ziak in, Postmaster Chary leh midang 3 matkhiak a om in, amaute apan dangka Lakh 12 leh mobile phone 3 muhkhiak in om hi.

 

 

 

GAMDANG THUTHANG

 

Indonesia Capital Jakarta ah sahkhua khat gensiatna blasphemy toh kisai a mohna nei hidan a kigen Jakarta Governor a kitawp ding deihna in November khabul apan mipi tamtak in kiphinna a neih uh paitou zel in, tuni tan  kiphinna neih in omlai hi. Tua kiphinna neih ahihlai in Jakarta Police te'n mipi 10,000 val kiphinna neite hawldalh sawm a mipi lam ah tear gas leh water canon a kap ziak un mikhat in sihna tuak hi. Kiphinna nei mipite'n ahihleh Jakarta a Christian governor in Muslim te sahkho laibu Quran gensia hin ngoh uh a, khailup ding ahi chi uhi. Jarkata  Governor Basuki Tjahaja Purnama ahihleh Christian hi a, aman Quran laibu gensia hin mipite'n ngoh uh a, kumnawn February a Jakarta Governor dinmun lending kitelna ah Quran a kigelhte zang a amah gumlou pawlte khen hin ngoh uhi. kiphinna nasatak a pat a om toh kiton in, kiphinna neite'n Police tamtak barricade bawl dia kisate thawl hawm khawng a deeng uh hin Police thusuak in gen a,  buaina in venlam nawtlou a sousang sem a nawt toh kiton in, Indonesia solkal in Police officer 18,000 sawllut be hi thil omdan enkaisak lel hin kigen hi.  Purnama ahihleh November 2014 kum in Jakarta governor ding a guan hi a, huaikum mah a Widodo in Indonesia President dinmun lending a telching a om ziak a, Governor dinmun letsak a om hi a, mipi telching bel hilou hin kigen hi.

 

Iraq gamsung a khopi minthang mahmah Mosul khopi kituhna paizel ah Iraq sepaihte leh Kurdish thautawi pawl kithuah te'n ISIL te panmun tamtak laksak a mailam a nawt zel nung un, Mosul khopi kiang ah Yazidi mite a lompi a a kivuina mun uh nih muhkhiak in om hi. Hankhuk nih muhkhiak a omte pholhsuah ahihnung in, Iraq gamsung a teeng Yazidi apan mi 18 kivuina hankhuk nih muhkhiak in om hi. Hiai hankhuk muhkhiak a omna mun ahihleh Shababit junction hi a, hankhuk pholhsuah ahihhun ah guhvuak leh identity card muhsuah a omte apan Yazidi mi ISIL in a pimangte uh ahihdan theihkhiak in om uhi.  Hiai hankhuk muhkhiak ahih tuung in, mi 18 velding kivuina hidan a gen himahleh tua sang a leng tamzaw thei hin gen ua, 2014 kum a Sinjar tangdung ISIL in a thuneihkhum nung ua, huai apan galtaite ISIL in a matkhakte uh a thahna mun uh hiding in gintak thu kigen hi.

 

US President ding a Donald Trump telching a om nung a, Clinton gumpawl te'n US gamsung a khopi tuamtuam a kiphinna nasatak a neih hun uah, US puanlap National flag hal a om thu ah, President thakding a telching a om Trump in US flag haltute suangkulh a khum hiding chi hi. US flag halna toh kisai a, Donald Trump in agendan in, President dinmun a let nailouh ziak in, thuneihna nei naikei mahleh, President tutphah a luah hunhun chiang in, US flag haltute kum khat sung suangkulh a khumding hin gen a, suangkulh a khum a omloute leng US gammi hihna a neihte uh lakkhiak sak hiding chi hi.  US flag hal kichi US gamsung a phal hi ngeingei lou ding a, tua flag zahtak lou a thilhih tute jail a khum hiam ahihkeileh US citizenship a neih uh lakkhiak sak hiding chi hi.

 

United Kingdom gamsung a Football kimawlna huangsung a Football club tmtak sung ah numei naupang tamtak hih thanghuai a om uh ahihdan report suahkhiak in om hi. UK police thusuak in a gendan in, kum 10 paita sung in Football club tuamtuam Football kimawl dia lut numei naupang tamtak khoih thanghuai in om uh a, numei naupang 350 val in Police ah report bawl uh chi hi. National Police Chiefs' Council (NPCC) in report a suahkhiakna uah, numei naupang football club a lut mi 350 vel in Police kiang ah a thiltuahte uh tun uh a, hoihtak in a vek in suizui khit hinaikei mahleh khenkhat te kum tamtak paikhit nung a thiltung leng om hin gen hi. Kum 3 paita sung a National Society for the Prevention of Cruelty to Children (NSPCC) in tuabang a football kimawlna a bawlsiat leh hih thanghuai a omte'n a thuzak theihna ding uh phone line koih ahihnung in, call 800 val dong uh hin gen ua, hiai thiltung bawlhoih na ding in Police in naktak in panlakna neilel uhi. 

Read 1242 times Last modified on Saturday, 03 December 2016 21:12
Login to post comments