You are here: HomeNewsFeature NewsAngels Vision News | December 05, 2016

Angels Vision News | December 05, 2016

Written by  Angels' Vision Published infeature News Monday, 05 December 2016 20:59

THUTHANG LAKTOMTE

@@ DC/CCpur in North East India a dia a masapen Skill Development training centre hongkhia

@@ UCM in dakkal 72 sung a economic khawlsak ahihkeileh kiphinna panding in vauna bawl

@@ South Sudan buaina ziak in kialpi piang theiding in patauhna kipan

 

 

 

TUALSUNG THUTHANG

 

North East India a dia amasa pen ding in tuni sunma dak 9:30 in Mualveng, Hiangtam Lamka ah North East India Skill Development Foundation (NEISDF) Office leh Training Centre ding hongkhiakna om hi.  Hiai hun zatna DC/CCpur Lunminthang Haokip, IAS in chief guest hihna toh uap in Office leh Training Centre hongkhia a, Rev. Kh. Khaizakham in Pathian kiang ah latkhiakna nei in, Soiminlian Lengen, MCS, CEO ADC/CCpur leh Hiangtam Lamka Hausa Thangkhosuanmung Guite, EM/ADCC te'n special guests hihna toh a uap ban uah, CCpur district sung a student organization tuamtuam a makaite hiai hun zatna ah kihel uhi. Lianzalal Vaiphei, President, NEISDF in vaidawnna thu gen in, North East India Skill Development Foundation (NEISDF) toh kisai pulak a, NEISDF ahihleh Non-government social service organization khat ahih dan gen in, 2015 kum a kiphutkhia hi a, gamsung toh kituak a nekmuhna lam ah khangtouhna om theihna ding tuppi pen a nei in, North East India lak ah rural entrepreneurship leh employability skills development training organization hoihpen suah sak ding a tuppen hi a, huai ding a tuailaite lak ah amau lunglutna leh hih theihna toh kituak a course tuamtuam 130 hiai training centre ah a thawn a zilsak ding uh ahihdan gen hi. 2020 chiang in Khovel in nasemtu ding million 40 poimoh ding a, hiai taksapna subuching thei ding India leh China kia hi a, China sang a India in semtu ding tamzaw a neih theihna ding tupna a Ministry of Skill Development etkaina nuai a hiai training centre honkhiak a om ahih dan gen hi. DC/CCpur Lunminthang Haokip, IAS in enterpreuship omlou a gamsung ah khantouhna taktak om theilou ahihman in tuailai te'n skill development lam i hah bawl uh poimoh mahmah ahih dan gen a, hiai centre tungtawn a mi tamtak in lohchinna hon ngah theihna dia kuapeuh in panla chiat ding in hasuan hi. CCpur district ah tuailai om maimai a tam luat ziak a siatna tam ahi chi'n gen a, i gam ah puahthak ding thil tamtak om ahihna ah skill development lam hah bawl leng miteng etlah leh India a dia kisaktheihpih district suak thei ahi chi'n gen hi. Soiminlian Lenggen, MCS in I district in industry chi tuamtuam pan thei le I gamsung a tuailai tampi in phattuam pih ding ua, district leng tua sang a khangtou zaw ding ahihdan gen a, NDA Government in Make in India kichi policy hon patkhiak pen i lap kei leh i khantouhna ding uh om nawnlou ding ahih dan gen hi. North East India Skill Development Foundation (NEISDF) in Course patna ding in Computer Hardware training pe masapen ding a, tulel in mi 63 in register bawl in, batch nih morning leh evening shift a khen in, hongtung ding December 8, 2016 in Class pan ding uhi.

 

 

Manipur State Power Distribution Corporation Ltd. (MSPDCL) in khopi sung mun tuamtuam a AB Cable a khung uh paitou zel in, mun tamtak zoh hita mahleh mun khenkhat zoh sianglouh a om lai ziak in December 6, 2016 in Power Shutdown la nawn ding uhi. Shutdown lakna mun dingte ahihleh 33 kV New Lamka Feeder, 33 kV Thingkeu Feeder leh 11 kV IB Feeder hiding a, khua/veng leh transformer a huamkhak dingte ahihleh New Lamka leh Singngat Power House in mei a piakna khua teng banah Tuibuang, Bijang, Doordarshan, AIR, Munsif Court, DM Veng, B. Vengnom, Bijang, Sielmat, Zomi Colony, Zellang Veng, District Headquarter, District Hospital, Community Hall, Chiengkon, CCPur College, Microwave Tower, 7 Assam Rifles, Salem Veng, Central Lamka leh Thingkeu, Thanlon, Pherzawl leh Sinzawl in mei a piakna khua teng hiding hi. Shutdown ahihleh zingkal dak 6:00 apan nitaklam dak 5:00 sung hiding a, nasep zoh baih leh zoh hak dungzui in shutdown hun sung kikheng thei hi'n gen uhi

 

CCpur District Police Constable apan Head Constable a kaisangte belh piakna (Capping Ceremony) tuni sunnung dak 1:30 in SP/CCpur Office, Tuibuang ah SP/CCpur Rakesh Balwal, IPS makaih in om hi. Hiai hun ah SP/CCPur banah Addl. SP/CCpur leh SDPO Thanlon leh CCpur-te a kihel banuah OC leh rank Officer teng in hiai hun zatna uap ua, SP/CCpur in kaisangte kipahpih mahmah ahih dan gen in, nidang sang a mohpuakna kibehlap zo ding ahihman in kuapeuh in mahni mohpuakna suk buchin sawm a panla chiat ding in hasuan hi. Thutut kingah dan in, CCpur Police apan tutung a Constable apan Head Constable (Havildar) a kaisan teng a vek un mi 69 pha ua, order ahihleh December 1, 2016 a suak hi a, pension ding kuan a kaisang leng hunkhop a om banuah a tamzawte kum 10 service nung a hiai bang hamphatna ngahte hi uhi. Head Constable (Havildar) a kaisang te'n pay scale 5200-20200 leh grade pay Rs. 2000 sang ding uh hi'n leng thutut kingah hi.

 

Mizo Zirlai Pawl (MZP) General Headquarters saina a hongtung ding December 6 apan December 8, 2016 sung a Champhai District sung a om Zokhawthar khua a Zo Fest om ding toh kisai in CCpur District sung a Student Body tuamtuam te'n chialna a muh dungzui un tuzingkal in Lamka nusia in Zokhawthar khua zuan in zinkhia uhi. Zo Fest zang ding zinkhia student body tuamtuamte ahihleh KSO/CCpur, HSA JHQ CCpur, TKSU GHQ, Zillai, ZSP, KZP, TCSA leh ZSF apan heutute banah Custume Parade a tel dingte leh Kuki Cultural Troupe te'n leng zui ua, zinkhe teng a vek un mi 80 val pha in, Tata Sumo 8 zang in zinkhia ua, MZP Manipur in makaih hi. Heutu tuamtuam zinkhete ahihleh YMA Hall, Hmuia Veng ah kingak khawm in, huai ah Kuki Inpi CCPur, Hmar Inpui leh Mizo Peoples Convention a makai te'n kithuahpih in Joseph Lalrothang, President, Hmar Inpui in flag-off a, CV Duhawma, President, MPC Manipur in amaute a ding in thumsak hi. Zo Fest ahihleh December 6, 2016 zinglam dak 10:00 in kipan ding a, Mizoram Chief Minister Lal Thanhawla in hongkhia in, CCpur District apan student body tuamtuam a makai va kihel te'n thugenna hun ava zat ding banuah Custume Parade ah leng va kihel ding ua, Kuki Cultural Troupe te'n nam laam lahna leng va nei ding uh hi'n thutut kingah hi.

 

Evangelical Baptist Convention Worker Pesnioners' Association (EBCWPA) in hongtung ding December 6, 2016 sunma dak 11:00 apan in EBC Lamka south Division Meeting Hall ah Annual General Body Meeting a 23veina nei ding uhi. Hiai hun zatna ahihleh Upa T. Ginkhopao, MEC in Chief Host hihna toh uap in Rev. S. Ginjam, President in hun zatna makaih ding a, Annual Report ngaihkhiakna a om ding banah rev. N. Chinsuankham, MEC makaih in 2015-16 sung a member anan mualliam mi 5-te suunna hun zat hiding a, Rev. V. Songkhothang, MEC in member thakte mellahna nei ding hi. Programme hunsung in Audit Report velna leh pomna om in, Executive Committee Memder ding mi 9 telna om in, thu poimoh tuamtuam omte kikupkhawmna om ding a, Rev. K. Thuamvung, Rev. T. Ngulkam, Rev. G. Hawlkhai leh N. Kamkhangin te'n sharing nei ding uhi. Thutut kingah dan in, tulel in Evangelical Baptist Convention Worker Penioners' Association ah member 60 val om hi.

 

Siamsinpawlpi GHQ in zan sunnung dak 2:00 in SSPP Complex, Siloam Veng, Bungmual ah 10th Tamchon Football Tournament  SSPP FC a dia kalsuan player-te vaidawnn nei uhi. Hiai hun ah SSPP GHQ a makaite banah Standing Committee leh YPA GHQ apan makai hunkhop paikhawm in, Pausuanlian, Joint Secy (HRD) SSPP GHQ in hun zatna makaih a, Lianzapau Samte, President, SSPP GHQ in vaidawnna thu gen in, SSPP min a kihel theihna dia tha-le-zung leh sum-le-pai a kithuahpihte pawlpi leh mimal tuamtuamte banah SSPP FC Core Committee, player leh fans te tung ah kipahthu gen in SSPP Player-te tung ah kipah etsakna in Siamsin ngawng bat khat chiat ok-sak hi. Thutu kingah dan in 10th Tamchon Memorial Football Tournament ahihleh Dr. Ambedkar Stadium, New Delhi a neih a om hi a, SSPP FC te ahihleh apaisa November 19, 2016 a kipan hi a, SSPP FC te Pool B ah Nirvana Rhino, Chandel FC leh Exodus FC toh omkhawm in, match masapen ah Chandel FC 4-0 in zoukhia ua, match 2na ah Exodus FC 4-1 a azoh banuah match nanungpen ah Nirvana Rhino 3-1 in zoukhia ua, point 9 toh group champion hihna la in quarter lut ua, quarter final ah Hornbill FC 1-0 in zoulou uhi. Zan a vaidawnna programme zatna hun ah Ricky Vanlallawm, Chairman, SSPP Standing Committee leh Lianmuanthang Valte, Secretary, YPA GHQ te'n hasotna thu gen ua, vuallelhna pen lungkiatna dia zang mailou a, kibawl thakna dia zat a kumnawn a dia maban a kalsang tawina dia zat zawk ding ahih dan gen ua, champion hihna tan va lak pen leng lohchinna bukim hilou in, i tunna chiangchiang a lungkimtak a i om theih pen leng lochinna khat ahih dan gen uhi. Programme hunsung in Benjamin Vualnam, Secretary, SSPP Platinium Jubilee Celebration in kum nawn January 13, 2017 chiang a Platinium Jubilee lopna ding toh kisai pulak in, Lian Benson, Executive Secretary, EELC in Player te a ding in thumsakna nei hi.

 

Mualkoi a om Covenant School in tuni'n Annual School Sports tuni'n pan in, sunma dak 11:30 in MYC Ground, Mualkoi ah Opening Ceremony thupitak nei uhi. Hiai hun zatna ahihleh bialtu MDC T. Khaikhomang, Chairman, Finance Committee, ADC/CCpur in Chief Guest hihna toh uap in, Guest of Honour in Rev. G. Suanzalian, Co-ordinator (Institution), PCI (R) pang a, Rev. M. Khamlianmang, Chairman, School Managing Board in Chief Host hihna toh uap uhi. Hun zatna ahihleh Miss Niangboi in makaih in, Sir Mung, Headmaster in vaidawnna thu gen a, Chief Guest in India Flag kaipalh in student leh staff te'n National Anthem sa ua, Annual School Sports 2016 hongkhia in thugenna hun zang hi. Aman a thugenna ah, education (siamsinna) kichi laisimna kia hilou in, sports (kimawlna) leng education khat ahihdan kuapeuh in phawk thak deih huai a sakthu gen a, kimawlna tungtawn in mimal kithununna (discipline) leh kimuan ngamna (self confidence) hon tun ahihman in kuapeuh in ngaipoimoh mahmah a, School ah Co-Curriculum Activity a tam chiang in naupang te'n nuamsa in school kai kal ngaklah thei mahmah ua, huai in naupangte siamsinna khangsak ahih man in kuapeuh in uangbawl thei leng hoih mahmah ding ahih dan gen a, annual sports hunsung a zat ding volleyball net leh football 2 pia hi. Chief Host a pang Rev. M. Khamlianmang, Chairman, School Managing Board in House tuamtuam apan teltuam student te'n Sports Torch hon tawite uh hal in, student-te ground sung ah taikual in, mipite lak ah lahkhiakna nei ua, Guest of Honour a pang Rev. G. Suanzalian, Co-ordinator (institution) in hasotna thu gen hi. Programme hunsung in teltuam student te'n Welcome song sa in, student tuamtuam te'n special item lahna nei ua, Paite Cultural Troupe leh Vaiphei cultural Troupe te'n nam laam lahna nei in, Chief Guest in March Past contingent-te apan salute la hi.

 

 

 

GAMSUNG THUTHANG

 

United Naga Council in Manipur state sung lutna Highway nihte a Economic blockade a bawl un, Manipur state sung ah niteng poimoh thilte taksapna leh vanman nasatak a a kansak ziak in, United Committee Manipur (UCM) in Pathianni in UNC theihsakna bawl in, huai ah dakkal 72 sung a, Economic blockade a bawl uh a lakkhiak keileh kiphinna khauhtak pat hiding chi uhi. UCM Lamphel, office a thuthaksaite a kimuhpih hun uah, Johnson Elangbam president UCM in a gendan in, blockade ziak in, state sung a teeng Nam tengteng banah, Sahkhua nasan nasatak a sukha hin gen a, singtanggam a teengte leh phaizang a teengte nasatak a sukha ahihman in, solkal kiang ah stakeholder teng kithukim a buaina hihveng poimoh hin taklang hi. UCM President in a genzelna ah dakkal 72 sung a, UNC in economic blockade a bawl uh lakhe ding in ngen a, tua ngetna UNC in a limsak keileh, UCM in mipi toh pangkhaw m a kiphinna neiding hin vau toh thuah hi.  UCM President Johnson Elangbam in tulel a UNC President Gaidon Kamei leh UNC Information Secretary Sankhui Stephen mat ahihziak a lungkim lou a Delhi khopi a kiphinna nei Committee for Joint Civil Societies, Delhi (CJCSD) kiang ah leng 'Delhi campaign' a bawl uh kintak a tawpsan ding in ngen a, Manipur min melhem sak ahihman in, kiphinna khawlsan ding in ngen a, Manipur state solkal in leng buaina sukveng naksang a kingohtuahna bawl a kimawlna a hiai blockade a zat uh tawpsan ding in ngetna nei hi. huailou in, tuzing dak 8:30 in Manipur Police commando leh IRB kithuah te'n Imphal khopi apan Jiribam zotna Highway 37 tawn in, oil tankers, LPG bullet tankers leh anntang pua FCI trucks, kigawm truck 300 vel venibitna toh Jiribam tutpih sawm in kipankhia uh a,  Jiribam a tun nung un, Blockade ziak a koltang gari tamtak te Imphal hon lutpih nawn ding uh hin kigen hi. Kallui a Noney mun a vanpua gari tamtak Oil Tankers, LPG bullet Tanker leh van paw gari 30 vel blockade gumtute'n a suksiat bang ua, tutung a buaina om nawnlouhna ding in, Tamenglong District pumpi ah District Magistrate in CrPC 144 puang a, buaina omkhak ding lauhna in, Imphal apan Jiribam kawmtuahna lamlian ah security tamtak koih in om uhi. Tulel a Manipur state sung a thautui enkaitu Indian Oil Corporation in thautui puaklut dan a taklatna uah,  IOC nuai ah tanker gari 558 omlel a, himahleh tuate lak ah tanker 250 vel thautui puaklutnadia zat a omlel in, tanker gari dang 308 te tunung in zat hipan ding chi uhi. 

 

Uttar Pradesh state sung a Moradabad mun a mipi kikhop khawmna khat a PM narendra Modi in a thugenna ah sum note sihsakna toh kisai a buaina omlelte a ven chiang in, nekgukna, zawnna leh black money chihte beiding ahi chi hi. PM Modi in a thugenna ah mizawngte a ding a kibawl Jan Dhan account zang a mihausa tamtak in sum deposit a bawl uh solkal in haihlou hin gen a, tua Jan Dhan account a black money hunkhop deposit a omte a vek a suikhiak hiding chi hi. November 8 apan sum note sihsakna om nung in, mihausa tamtak nidang a mizawngte simmoh taktak te nasan dinmun kikim vek in, Bank kong ah sawt pipi a kivual uh ngai a, tulel in minautang tamtak in haksatna tuak mahle uh, tuate ni 50 sung a awl a hongveng ding ahi chi hi. Nidang in thautui leh anntang leiding in mi tamtak line in kivual kha ngei uh a, himahleh Black money zonsuahna ding a demonetisation pat a om nung in, mi tamtak in sum poimoh dan thei ta uh a, tua ziak mah in nekgukna kichi a hoihlouh dan mipite theihsiam sak hiding chi hi. Nidang a vaihawmtu Party tuamtuam te'n vai a hawm hun uah, amau mimal leh a kinaihpih deuhte uh a ding in vaihawm uh a, mizawngte ngaihsak ngeilou uh chi hi. Tuabang hun sawttak om khak ziak in, nekgukna India gamsung ah zalen mahmah a, tua nekgukna kichi hawlkhiak ngaiding hihiam ahihkeileh amah leh amah a beiding chih mipite'n a suangtuah ding uh ahi chi hi.  India gamsung ah PM modi nasepte ziak in minsiatna tamtak tuak a, himahleh tuchiang in gamsung nekangtu nekguk hatte a min uh tamtak taklat theihding in omta a, amah mimal hamphatna ding zong hilou ahihman in, mipi deihdan lou sepkhak a neihleh ka bag kala ding a, ka dinmun ka taisan ding chi hi.  Gamsung pumpi a zawnna hihbeina ding in, state liante ah pat masak ngai a, tuading in, Uttar Pradesh, Bihar, Maharashtra, West Bengal ah zawnna hihbeina ding in nasep pat hiding chi hi.

 

India gamsung a numei politician te lak a thunei mahmah banah politician minthang mahmah Tamil Nadu chief Minister in a tuaplam buaina khenkhat a neih ziak a, Chennai khopi a Apollo hospital a etkol ahihnung in tua a natna pen damsiang mahleh, heart attack a neih ziak in, Apollo hospital mah ah etkol ding a puaklut in om nawn hi. Apollo Hospital thusuak in a gendan in, J Jayalalithaa ahihleh Pathianni nitaklam a heart attack natna chikhat Cardiac arrest ziak a Apollo hospital a puaklut hi a, damsiang lam nawt naikei mahleh ICU a etkol a omlel hin gen uhi. Tuabang a Apollo hospital a puaklut ahih toh kiton in, cardiologists, pulmonologist leh critical care specialists hunkhop in minute khat leng khawllou in enkol den uh a, a lungtang in a sepding bangtak a sep theihna ding in, extracorporeal membrane heart assist device khat a khuak ah thuahsak in om chi uhi. Jayalalithaa damlouh phutna ziak in, Tamil Nadu Governor C Vidyasagar Rao leng Maharashtra a zinkhia himahleh,  Union Home Minister Rajnath Singh in Pathianni nitaklam a thil omdan a hilh ziak in, Tamil Nadu zuan in lengkik a, Tamil Nadu a tunphet in damdawi inn ah Jayalalithaa vehna nein gal hin kigen hi. Jayalalithaa gumtu tamtak in Apollo hospital kong a Jayalalithaa damsiang pahna ding a thumna a neih ziak un, mipi tamtak paikhawmte kal ah buaina om khak ding lauhna in Police tamtak koih in om ua,  thuthak saite nasan Damdawi inn sung a lutsak ahihlouh ban uah, Damdawi inn a etkol a omsa damlou khenkhat kemtute kiang ah pass piak himahle uh pass card tawilou peuhmah Damdawi inn sung ah lutsak hilou uhi.

 

Phualpi solkal in 500 note leh 1000 note a sihsakna toh kisai in, sum note sihsak a om nung khatkhat phial a chin toh kiton in, December khabul ah mi tamtak in a khaloh uh lakkhiak sawm in Bank kong ah line sautak in kivual panta uhi. Khaloh sang a Bank account tungtawn a loh deposit a omte a ding in Bank tungtawn mah in lakkhiak ngai mahleh, kiloh tawm tamtak bank account neilou a pumdim ziak un, sum note sihsakna toh kisai in haksatna thupitak tuak uhi. Tuabang a kilohtawm leh a diak a gamdang a hong kipan India a sum hong lohte'n Bank account a neihlouh ziak ua haksatna a tuah ziak un, India gamsung a state tampi omte lak ah Rajasthan state solkal in ngai poimoh mahmah in, gamdang apan kiloh dia hongkuate khualna in zero balance in Bank account honsak kipan uhi. Rajasthan state solkal in migrant labourers te khualna ziak a zero balance account honsak zan apan Jaipur khopi sung a mun tuamtuam 376 val a a patnung un, nasem a kilohtawm 7000 val in account hongthak uh hin Rajasthan state solkal thusuak in gen a, zero balance a account honsak ziak in Factory a nasemtu tamtak in hamphat pih uh hin leng kigen hi.  India gamsung ah ahihleh tulel in milip billion val om mahleh Bank account neitu million 300 lel phazou hin kigen hi.

 

 

 

GAMDANG THUTHANG

 

South Sudan gamsung a helpawl kibawlkhe thak leh South Sudan solkal sepaihte kal a kikaptuahna in venlam sang a siatlam a nawt semsem toh kiton in, tua vuaina ziak a nek leh taak haksatna thupitak om ziak in buaina mun a omkha minautang tamtak in mun bitzaw zuan in kihemkhia uh chihthu om hi. Buaina ahihleh Uganda in a tawsawn Lord's Resistance Army leh Janjaweed helpawl kigawmte toh solkal sepaihte kikaptuahna hi a, zan sintawpni apan tuni sung vuak in leng milip 70,000 val in mun bitzaw zuan uh chin MSF thusuak in gen hi. Galtaite lak ah milip 10,000 veldingte United Nations n munpi khaT a bawlna mun uah kisekhawm uh a.,  South Sudan solkal in buaina kipatna ziak Muslim veteran politician Ali Timi Fartak in a tawsawn ziak hidan in gen mahle uhy, tua helpawlte tawsawntu a ngoh a om Fartak in nialna bawl hi. Buaina in venlam nawt thei pahlou diung dinmun a om toh kiton in UN World Food Programme in tukum sung a South sudan a teeng milip 3.3 million te nekding piak ahihkei leh kialpi thuak ding uh hin gen uhi,. South Sudan buaina kipat nung tuni tan in, milip lakh 1 Kenya, Sudan, Democratic Republic of Congo leh Uganda ah galtai uh a, July kha beitan in galtai phazah milip Lakh 1 leh siing 5 phazou ding hin UN in gen hi.

 

Italy Prime Minister in Itlay gamsung kivaipuakna Constitution bawllem thak a sawm thu ah, Pathiani in vote lakna neih in om a, himahleh vote khiak ahihhun ah voter tamzaw te'n tua constitutional reform ding a deihlouh ziak un, vuallel hi. Tuabang a constitutional reform ding tungtang a vote lakna neih ahih hun a Italian PM Renzi in vuallelhna a tuah ziak in, thuthak saite mai ah PM hihna apan kitawp ahihdan leng puankhiakna nei hi.  Italy Prime Minister Matteo Renzi in kitawp ahihdan a puankhiak nung in, tulel a Italy vaihawm tute'n thil hihtheih bangmah nei nawnlou uh hin gen aItaly vaihawm tute a ding a thil zahlak huaitak ahi chi hi. PM Renzi in Italy PM hihna apan kitawp ahihdan a puankhiak nung in, tu Seppatni in President Sergio Mattarella kimuhpihna nei in, huai ah kitawpna lai pelut mahleh pomsak a om leh omlouh theih hilou hi.

 

California state sung a Oakland mun a thillui koihkhawmna munpi ware house khat ah kallui kiginni apan meikuang thupitak om nung in, tu in meikuang phelhmit hita mahleh tua meikang ah sihna tuakzah 30 phatou hi. California Fire department in a gendan in, meikuang ahihleh mi tamtak in kiginni a tua meikuang omna kiang a kipolhlimna thupitak a neihlai ua kipan hi a, meikuang nasatak om nung in, mi 30 si in, tamtak muhlouh in omlai uhi. Meikuang toh kisai suitute'n a gendan un, meikuang omna mun Warehouse ah pawt khiak theihna kongkhak nih kia om a, smoke detector leng kithuah lou hin gen uhi. Sihna tuakte ahihleh kum 20 leh 30 kikal ngen hi uh a, inn sawng nihna tung kichim a, innsawng nuainung tan a kideen sukna ziak a tuabang a sihna tuak tam uh hidin gintak thu kigen a, tu in hutkhiakna nasem pawlte'n building tung kichim in kuateng vukkhum kha hiam chih zonna neilel uhi.

 

Palestinian mite tenna mun Gaza apan Egypt gamsung kawmtuah na leinuai khuakvang tunnel khat a kichip ziak in, hutkhiakna nasem pawlte'n tua tunnel kichim ah mi 3 luang mukhia in, midang 4 mukhe zou nailou uhi. Thusuak in a gendan in, tua tunnel ahihleh a sung a tui tamtak a lutkhak ziak a kichim hin gen ua, tua tunnel sung a mi 7 velding a omlai un, thakhat in kichim guih a, tua tunnel kichim in mi 3 delhlum in, midang 4 omna theih hilou hi. tukum bul apan Palestinian mite tenna bial ah tunnel kichim kichi kithang mahmah a, Egypt solkal in leng a gamsung a phalna neilou guklut a tam theihluat ziak un, Egypt gamsung lut theihna tunnel te ah tui niin tamtak khahlut sek hin kigen hi. 2014 kum a Egyptian President Abdel-Fattah el-Sisi in Egypt gamsung guklut theihna tunnel tamtak a hihsiat ma in, Egypt gamsung lut theihna tunnel 1800 val om zouding hidan a gen hi a, Palestinian apan lut theihna tunnel tamzawte ah nekding anntang, damdawi, cigarettes, diesel, silh leh ten banah Car bawlsa lep nailouh hunkhop Palestinian ah tua tunnel te zang in Egypt apan puaklut in om gige hi.

Read 1092 times
Login to post comments