You are here: HomeNewsFeature NewsAngels Vision News | December 08, 2016

Angels Vision News | December 08, 2016

Written by  Published infeature News Thursday, 08 December 2016 22:19

THUTHANG LAKTOMTE

@@ Mr. Panna Lal Das, General Manager, Network - II in Lamka hong pha in Digital banking Campaign hongkhia

@@ NSCN (IM) makai Anthony Ningkhan Simray in Ukhrul pha..... Naga te'n Flag leh constitution tuam neiding

@@ Pakistan lenna tuahsia ah mi 47 a suakta omlou in si

 

 

 

TUALSUNG THUTHANG

 

Mr. Panna Lal Das, State Bank of India (SBI) General Manager, Network - II in tuni sunnung dak 2:30 in Lamka hong pha in, Dorcas Hall Mini Auditorium ah vaidawnna leh Digital Banking Campaign hongkhiakna neih in om hi. Hiai hun zatna ahihleh SBI/CCpur Main Branch te'n inntekna la in, Thangchinkhup Guite, Asst. General Manager, DDM/NABARD leh Evangelical Baptist Convention (EBC) a heutu lian teng a kihel banuah, YPA GHQ makaite leh Rayburn College Vice Principal tel in Commerce student te'n hiai hun zatna uap uhi. Hiai hun ah Pauneihthang Valte, Chief Manager, SBI/CCPur Branch in vaidawnna thu gen in, programme a kihelte mellahna nei a, District Administration sik a kihel Thienlaljoy Gangte, MCS AC to DC in CCPur District in sum lam a haksatna tuamtuam a tuahte uh pulak in, mipite khual a hiai buaina pen a kinlam sukveng sak ding in ngetna bawl hi. Programme hunsung in, Rev. S. Vung Minthang, General Secretary, in Mr. Panna Lal Das, General Manager vaidawnna in puamdum silhsak in, Lianmuanthang Valte, General Secretary, YPA GHQ leh T. Lianchinpau, Vice Principal, Rayburn College te'n thugenna hun zang ua, CCpur District sung a teng mipi a tamzawte omna New Lamka huamsung ah Bank Branch khat koih hoih a sakthu uh gen ua, programme zoh in General Manager makaih in Gospel Centenary hall kiim lak ah Bank Branch koihna mun ding enkhia ua, General Manager in thil omdan gelh thoh a pelut dia theisak in, hiai mun a bank branch a om theihlouhna ding omlou ahi chi'n zasak hi. Thangchinkhup Guite, AGM, DDM/NABARD in a thugenna ah, Reserve Bank of India in Government in kum teng in tulel a i sum zatte uh bawlna ding in Rs. 32 Million val beizou ahihman in, India Government in hiai pen suk kiam a khantouhna dia zat ding chih thupi a aneih ziak in tu in Cashless Transaction om theihna dia panla lel hi'n gen a, tulel in India ah Cashless Transaction zang 2 percent kia om ahih dan gen hi. Mr. Panna Lal Das, General Manager, Network II in hiai hun ah Cashless Banking toh kisai pulak in, sum note bawlna dia in sum tamtak a bei banah deforestation nasatak om ziak a India Government in November 8, 2016 a Demonetization hon patkhiak ahih dan leh Digital India sepsuahna khat ahih dan gen a, sum a tamthei lam piakkhiak ut mahleh state government in tulel in by-road a sum puak a phallouh ziak a Manipur ah sum note taksapna nasatak om ahihdan gen a, maban ah hong hoih touh zel a lamet thu gen hi. Hiai toh kisai in SBI in apps hoihtak khat SBI Buddy kichi bawlkhia in, hiai apps zang in sum note ngai seselou a deih teng lei theih ahih banah sum leng kipiak tuahna dia zat theih hi'n gen a, kuapeuh in hiai pen a phatuam theipen a zat sawm ding in hasuan hi.

 

 

New Lamka Youth Club (NLYC) te saina in tu december khasung in PT Sports Complex ah New Lamka Meet 2016 om ding hi. Hiai New lamka Meet ahihleh New Lamka huamsung a om Football club leh kimawlmite a ding kia a sai hiding a, huai a tel ut lunglutna nei te'n entry form la in, December 14, 2016 tan in, form piaklut theih ding hi. Entry form ahihleh Muani Panshop, opposite PT Sports complex khominthang; Boinu dawr Vengnuam; Zion store Zion Veng; Mawi Dawr, Kanan veng Auto Parking; Kimboi Panshop, Hebron Veng; Duangkuai store, Dorcas veng; Electric fee collection store, New lamka (G); Rody store, Simveng junction leh 164 stationary, Lailam veng ah muhtheih ding a, entry fee ahihleh Rs. 500 leh security deposit Rs. 200 hiding a, December 15, 2016 in NLYC Office ah Manager's Meeting leh Pool drawn na om ding hi. New Lamka Meet a winner team in kipahman in, Rs. 10,000 sang in Runner's Up in Rs. 7000 sang ding uhi. Hiai tournament ahihleh phamsa Haulalmuan alias Funny innkuante'n a sponsored uh hi a, New Lamka huamsung a om football kimawlmite leh club tuamtuamte dopsangna ding tupna a sai ahihman in, New Lamka huamsung a omloute hiai tournament ah telsak hilou ding uh hi'n thutut kingah hi.

 

CMO/CCpur saina in tuni'n CMO Conference Hall ah Immunization toh kisai in Review Meeting om hi. Hiai meeting ah DFWO/DIO CCpur, VCCM-te banah Saikot PHC, Sagang PHC, Singngat PHC, Behiang PHC leh Parbung CHC a Medical Officer Incharge-te banah District Vaccine store Manager leh Cold Chain Handler teng kimtak in kihel uhi. Thutut kingah dan in, naupangte kapna dia kizang damdawi tuamtuamte a temperature diktak a kep ahih theihna ding leh India gamsung pumpi a stock omzah leh naupangte kap a om zah theihtheih ahihna ding in Centre Government in Electronic Vaccine Intelligence Network (eVIN) kichi pankhia in, Manipur ah tu September kha in zat pat hi a, United Nations Development Programme (UNDP) leh Govt. of Manipur kithuah in hoihtak in etkai a, tulel in CCpur District ah Cold Chain Point 8 om a, guideline dungzui in immunization bawl ding te'n Cold Chain Point apan damdawi lakhia in, naupang a kap zoh chiang un a ni mah in lakkhiakna mun mah uah koih kik nawn ding ua, mesasage tungtawn in naupang a kap zah uh a khak ngal ding uh chih ahi hi. Tuni a review meeting neihna hun ah, Dr. Kimngaihching Simte, CMO/CCpur in vaidawnna thu gen in, Dr. VC Pau Tonsing, DFWO/DIO CCpur leh Mrs. Zenngaihlun, District Programme Manager te'n thupi tuamtuam zang in sinsak uhi.

 

Agape Missions Co-operative Credit Society (AMCOS) Ltd. in hongtung ding December 13, 2016 (Sepnawnni) chiang in Upa H. Jelshyam Chapel, GBC Campus ah Annual Conference 2016 nei ding uhi. AMCOS Ltd. ahihleh apaisa 2005 kum a kiphutkhia hi a, tulel in Share Holder 189 omlel hi'n kigen a, Annual Conference zatna hun ah Share Holder teng kimtak a telchiat ding in Chairman, AMCOS LTd in ngetna leh theihsakna bawl hi. Programme ahihleh zinglam dak 10:30 in kipan ding a, T. Paukhansiam, Chairman, BOD in vaidawnna thu gen in, CEM/AMCOS Ltd. in Annual report pe ding a, share holder-te toh thu poimoh tuamtuam omte genkhawmna leng om ding hi'n thutut kingah hi.

 

CCpur District Sports Academy in Free Grass root Football coaching sai sawm a hun bangtan hiam paita apan pan a laknung un, tu in tua free grass root Football coaching panding a kisa in, zingchiang November 9, 2016 in PT Sports complex ah sunnung dak 1 in honkhiakna neiding uhi. Hiai hun ah Chief Guest in K Paukhansuan, Intending Candidate 58-CCpur AC pang ding a, S Siampu Secretary, CCpur District Sports Academy in vaidawnna thugen in, Rammawi Hmar, Active Member, CCpur District Sports Academy in thugenna neiding a, Pastor T Liankholal in Naupangte thumsakna nei in, Chief guest apan thugenna hun omding hi.

 

Mizo Zaimi Inzawmkhawm (MZI) Manipur Sub-Headquarters te'n tuni'n Pu albert Kawlni Compound, SA Road ah Thal Favang Kut zatna nei uhi. Hiai hun zatna ahihleh Pu Darsangluaia, Adviser in Kut Pa hihna toh uap in, Mizo Zirlai Pawl, Young Mizo Association leh Mizo Peoples Convention a makaite teng in a uap banuah Hmar Artiste Association, Zogam Artiste Association leh Kuki Artiste Progressive Union apan member hunkhop hiai hun zatna ahi kihel uhi. Programme ahihleh sun dak 12:00 in kipan a, Rev. JF lalropuia in thumna in hun zatna hongkhia in, Upa Thangtinliana, President, MZI, Manipur in vaidawnna thu gen a, Mizo nam sung a lasa siam tuamtuam te'n hiai hun ah lasakna nei uhi. Kut Pa a pang Darsangluaia in a thugenna ah, mi tamzaw te'n Thal Favang Kut kichi ahihleh nidang a pi-le-pu te'n buh khamkhop ding a ngah khit nung ua hun awl zatna dia hichibang hun ana zat uh ahihman in Zosuante a ding in ni poimoh mahmah suak a, hichibang hun poimoh a thei kuamah a om nawnlouh nung a MZI in hiai bagn programme hon sai uh pahtak huai a sakthu gen in, maban ah tua sang a lianzaw a sai a lunggulh thu gen hi.

 

58-CCpur Assembly Constituency a Intending Candidate Paukhansuan Khuptong in tuni'n a tenna inn Chingkangpa Aveneu, Nehru Marg ah tuni tan pan a lakna toh kisai report piakna leh worker-te toh singpi dawnkhawmna nei uhi. Hiai hun ah mun tuamtuam apan amah deihsaktu leh ngainatu tamtak paikhawm ua, BJP CCpur District a heutu poimoh teng kihel in, programme sun dak 12:00 in kipan hi. Programme hunsung in ngainatu leh deihsaktu tuamtuamte apan hasotna thu ngaihkhiakna om in, intending candidate Paukhansuan Khuptong in thugenna hun zang a, aman a sungkuante banah a pianpih nu-le-pa leh sanggamte mipi mai ah mellahna nei in, tutung election a tuh sawnna ziak nouneltak in pulak a, CCpur Assembly Constituency sung 80 percent vel siksuakta in, tu in phak khak nailouh mun tawmchik lel omta ahih dan gen a, gintak phak khel a lohching kisa ahih dan gen hi. Aman Gam leh leitang a dia hinna ana pia Martyr 9-te leh liam-le-bai a omte zahna sang pen pia in, amaute lungtup sepsuah utna ziak a hiai bang a kal suankhia ahih dan gen a, i gam humbitlouh a om pen a bitna ding a kalsuan dia hong kisa khia ahih dan a gen banah pauna ding mun a pau a, dinna ding mun a ding dia mipi a dia pan ding ahih dan gen hi. Mipi kuapeuh in ka kalsuan ngeilouhna a kalsuan ka hi chih hon theihpih unla, sungkuan vai ah leng hichibang thil sai ding hilou ka hi uh, himahleh i gam in hichibang innkuante poimohta ahihna ah tu maimai thei nawnlou a hong kisasuah ka hihna ah kuapeuh in na thumna uah hon thei gige un chi'n mipi paikhawmte kiang ah ngetna bawl hi. (Paukhansuan thugen tomkim news zoh phet in hong suak ding hi)

 

 

 

GAMSUNG THUTHANG

 

North East bial a helpawlte Nu Mother of all terrorism in North east chih a om NSCN (IM) makai lian mahmah Lt Gen Anthony Ningkhan Shimray in kum 5 sung Tihar Jail a a hinkhua a zatnung in, tukum August a Bail khiak a om nung a dia a pianna khua a phak masakna pending in, tukal Nilaini in Manipur state sung a Ukhrul khua phakna nei in, huai ah mipi tamtak in ana vaidawn uhi. Hiai hun a Lt Gen Anthony Ningkhan Shimray in a gendan in , India in political thil a Naga te a thuneihkhumna apan Naga te zalen pahta ding uh hin gen a, kum 70 sung vingveng Naga te'n Nagate tenna bial teng gawmkhawmna ding a struggle a neih uh vaiveng pahta ding hin gen hi. Lt Gen Anthony Ningkhan Shimray in Ukhrul a phak hun ah Tangkhul Naga ai-oh in Tangkhul Naga Long (TNL) in Tangkhul Naga Long Ground ah kikhoppihna nei uh a, huai hun ah Lt Gen Anthony Ningkhan Shimray in Naga te buaina hihvengna ding in Nagate Unique History pansan a om in, kumlui a Framework Agreement suai kaih a om pen 16 point programme omsa leh Shillong Accord chihte sang a hoihzaw dia kibawl ahi chi hi. Tua framework agreement tungtawn in, Naga nam te kibulphuh thak ding a, NSCN (IM) in khangthu hoihtak khat a bawlkhiak ding banah, framework agreement tungtawn mah in Nagate tuh a tuam liuliau ahihna bang ua etkol in omlel uh chi hi. Framework Agreement pichin hi naikei mahleh Naga te'n a kivaihawmna ding un Flag tuam leh Constitution tuam neiding uh a, Regional Autonomous Territorial Council chih pansan in a tuam a kivaihawmna nei in, Naga te tenna bial teng gawmkhawmna ding in Naga te tenna in koiteng huam kha hihiam chih enkai ding in Joint Commission dinkhiak hiding chi hi. Singtangmi Tribal communities dangte leng Pan Naga Hoho/Parliament nuai a a khosak ut uleh chiklai peuh in welcome hi gige ua, himahleh Naga te'n a singtangmi pih uh zaat dangte dikna leh tanvou nelhsiah sak ngeilou ding uh chi hi. Naga mipite'n tawlnga lou a gupna a piak ziak ua, Tihar Jail apan khahkhiak a om thei hin Lt Gen Anthony Ningkhan Shimray in gen a, India gamsung a Political Leader tuamtuam, bureaucrats banah India leh Naga kihouna a Ai-ohtu RN Ravi in leng amah kimuhpihna nei in, huai ah mat a omna toh kisai in hihkhial mahmah uh ahihdan gen in, Political mistake ahi chi uh chin gen hi. India makai te'n Indo-Naga peace talk sepsuah ahihna ding in Lt Gen Anthony Ningkhan Shimray poimohna thei uh a, tuamah bang in, North East ah Indo-Naga thubuai hihveng hileh North East a helna kichi vengding hin Lt Gen Anthony Ningkhan Shimray in gen hi. Tulel a India solkal in Act East Policy a paipih na un Naga leh India kal ah kizopna thuk zawsem tun hin leng gen a, NSCN (IM) kibulphuhna Nagalim For Christ ahih bang in, Nagate Pathian mai a kipumpiak poimoh hin gen hi.

 

 

 

GAMDANG THUTHANG

 

Pakistan gamsung a Khyber-Pakhtunkhwa province ah Nilaini nitaklam in passenger pua lenna khat a tuahsiat ziak in, a sung a tuang passenger leh Crew member kigawm 47 teng a vek ua suakta omlou in sivek uhi. Pakistan solkal thusuak in a gendan in, nilaini nitaklam a tuahsia tuak lenna Pakistan International Airlines' (PIA) PK 661 ahihleh Chitral khopi apan Islamabad khopi zuan a lenglai hi a, Khyber-Pakhtunkhwa province sung a Havelian tungzawn a a lenglai a tuabang a tuahsiatna tuak hin gen uhi. Tuahsia tuak lenna ATR-42 aircraft ahihleh tukum October in maintenance hoihtak a bawlthak in om a, hoihtak a etkhiak ahihnung in,  "A-check" certification ngah in, dakkal 500 val lengkhin nawn man hin leng gen uhi.  Lenna kia toh kisai in, sepaih 500 val banah, Doctor leh paramedics tamtak in lenna kiakna mun kidelh huan in, lenna kia a sihna tuakte luang zonna neilel uh a, hiai thu kaihkhawm ahihtan in, mi 40 luang muhkhiak in omta hi. Lenna sung ah kuakua tuang uh hiam chih a vek a puankhiak theih hi naikei mahleh Pakistan gamsung a lasasiam banah thugentu minthang Junaid Jamshed leh a zi leng tua lenna kia a tuangkha uh hin gen uh a, Austria mi nih leh china a kipan pasal khat leng lenna tuahsiatna a tel hin Airline thusuak in gen hi. 

Read 981 times
Login to post comments