You are here: HomeNewsFeature NewsAngels Vision News | December 12, 2016

Angels Vision News | December 12, 2016

Written by  Published infeature News Wednesday, 14 December 2016 10:53

THUTHANG LAKTOMTE

 

@@ Upa T. Phungzathang Inndongtate makaih in (L) Pi Chhungi Tonsing han siansuahna leh puahthakna hun zat in om... Mun tuamtuam apan ittu leh deisaktu tamtak kihel

@@ Cyclone Vardah omding ziak in Tamil Nadu ah school tamzaw kikhak.... Army hunkhop kigingsa a koih in om

@@ Cairo a Christian biakinn ah bomb puak ah mi 25 si

 

 

 

TUALSUNG THUTHANG


Tuni sunma dak 11:00 in Salem House, Hebron Veng, New Lamka ah Upa T. Phungzathang Inndongtate makaih in (L) Pi Chhungi Tonsing Han siansuahna leh puahphatna programme neih in om hi. Hiai hun ah inntekpa Upa T. Phungzathang hong kihel theikei mahleh a tapa Khanthang Tonsing leh a tanu Miss Lulun banah a zi Mrs Sangi Tonsing te'n uap thei ua, mun tuamtuam apan tanau-laina leh ngainatu a sang a sim paikhawm in, buaina bangmah omlou in programme lohchingtak in zat in om hi. Hun zatna ahihleh Upa LT Juan Tonsing in makaih a, mipi paikhawm te'n (L) Pi Chhungi Tonsing suunna in minute 1 sung dai dide in hun zang ua, Pastor H. Jamkhanpau, Local Pastor EBCC Hebron in (L) Pi Chhungi Tonsing han siansuah in a sungkuante a ding in thumsakna nei hi. Thutut kingah dan in, August 31, 2015 a singtangmite gam leh leitang laksuh tupna a Bill 3 pass a aom ziak in mipi thangpai te'n MLA leh Minister-te tenna inn teng hal in, vangsiathuaitak in (L) Pi Chhungi Tonsing han leng suksiat in ana om a, ittu leh deihsaktu banah sungkhat lai te'n tuzingkal baihtak apan a hanmun ah social work nei in, a kiim leh kiang hahsiang in sunma dak 11:00 in siansuahna programme zat in om hi. Programme hunsung in mi tuamtuam in thugenna hun zang in, Upa LT Juan Tonsing in Inntekpa Upa T. Phungzathang thugen/laithon mipi paikhawmte mai ah simkhiatna nei hi. Upa T. Phungzathang in a laithon ah hiai bang a hun hoih leh hun manpha ittu leh deihsaktute toh zangkhawm thei dia a om lai ziak in Pathian min phat in, kipahthu gen hi. Manipur Assembly in August 31, 2015 ni a Bill a pass pen  Assembly ah Discussion hun hon a hihlouh banah namphu sim a thil kibawl ahihman in mimal kimawk ngohtuamna ding omlou a saklouh thu taklang a, Constitution Expert te'n leng India Constitution toh kikalh ahihna ah Government in chikmah chiang in a pass kei ding uh ana chihsa uh ahih dungzui in India President kiang ah khaksuk in om a, Bill masapen President in a nawlkhin nung in, Bill 2-te Ministry ah pelut mahleh Ministry in  gentak salou a akoihdapsa uh ahih dan taklang hi. Hiai Bill 3-te ziak a sihna tuakte aman a zi (L) Pi Chungi Tonsing a it bang ua it ding uh ahihna ah thuakpih mahmah ahih dan taklang kawm in, a sungkuan te'n Ex-Gratia Rs. 10 lakhs leh a a hansuang bawlna ding un Rs. 1 lakhs banah a sungkuan naipen kiang ah government kaam a ngah theihna ding un Cabinet ah 2vei a puaklut nung in pomsak hi a, himahleh tunitan kuaman a laklouh pen uh poi sa mahmah a, amau term hong bei leh hiai bang hamphatna pen sukbei hiding ahihman in hiai bill 3-te ziak a site ak-sih a sih khak ding uh lauhuai a sakthu leng taklang hi. A poi mahmah ahihleh i gam ah zuau phuahtawm, bulbal neilou thu leng in zelsuak a, thutak in mun tang nawnlou in thutak sng a zuau thu gingta zaw a om man in vangsiathuai a sakthu taklang in, nam dang te'n a hun a phat thei in nam heutu leh elected member-te toh nna semkhawm diamdiam ua, a lohchin chiang un en huai thei mahmah ua, tu in va-uk bang in hon len mangsan vekta ua, ei leh e ii kidou lai leh bangmah kisuaklou ding ahi chi'n taklang hi. Ittu leh deihsaktute ziak a nam a dia nna sem thei a aom kipak petmah in maban ah leng government in thupukna a lakte sepzom touh ding tamtak omlai ahihna ah mipite deihsakna ziak a semzom thei dia a om a gintak thu taklang in, hanmun hahsiangna hun a uap tengteng tung ah kipahthu gen hi. Hiai hun ah inntekte sik-le-tang in Khanthang Tonsing in thugenna hun zang in, hiai bang a gamtangte phuba laksawmlou ahih dan gen in, amau leh Pathian kal a koihta uh ahih dan gen a, maban ah kuapeuh in i it i ngaihte Pathian min a i vui liamna munte uh zahtak sak ding in ngetna bawl hi.

 

 

Nehru Marg a om The Pathway School in tuni sunma dak 11:00 in Synod Hall, IB Road ah Annual School Concert 2016 thupitak in nei uhi. Hiai hun zatna ahihleh Langkhanpau Guite, Chairman, ADC/CCpur in Chief Guest hihna toh uap in, Guest of Honour in T. Goukhomang, ZEO/CCpur pang a, Lienhmingthang Simte, Proprietor, Kim Joe Gas in Chief Host hihna toh uap in, student leh staff-te banah nu-le-pa tamtak paikhawm in hun nuamtak zang uhi. Hun zatna ahihleh Rev. Fimthansang Infimate in thumna in hun hong in, Ma'am Rita Vanlalchhanhimi, Headmistress in vaidawnna thu gen a, school hong piankhiak dan leh school toh kisai nouneltak in nu-le-pa leh mi poimoh chial a omte mai ah pulak hi. The Path Way School in School Year Book a bawl Chief Guest in hongkhia in thugenna hun zang a, aman a thugenna ah, Bible a kigelh bang in naupang te'n nu-le-pate thu man pen Pathian thupiak ahih banah hiai kan a thil hoih omlou a, lei a damsawtna ahih dan gen a, teacher-te leng mihing bawl dia kisak ahihna ah kuhkaltak aleh taimatak a nna hon semtouh uh a deih thu gen hi. Thutut kingah dan in, The Pathway School in kum teng in Category 3 a khen in Student of the Year telkhia in kipahman pe zel ua, tukum in Pre Primary ah Abigail Mawineisiem, KG A in Student of the Year hihna la in, Lower Primary ah Rachael Zolienkim, Class II in a lak banah Upper Primary ah Esther Ramdinthar, Class V in Student of the Year la a, Guest of Honour a pang T. Goukhomang, ZEO/CCPur in pekhia in thugenna hun zang hi. Tuaban ah, Chief Host apang Lienhmingthang Simte, Proprietor, Kim Joe Gas in House Champion hihna ngah Blue House-te kiang ah trophy piakkhiakna nei in thugenna hun zang hi. Programme hunsung inPre-Primary, Lower Primary leh Upper Primary te'n item tuamtuam lahna nei uhi.

 

Manipur Government in kuamah khutdotlou a Simte te omna Thanlon Sub-Division pen Pherzawl District a koihlut a aomna toh kisai in tuni'n Simte Inn, Simveng ah Simte Tribe Council makaih in Simte nam in emergency meeting nei uhi. Hiai hun ah Simte nam sung a makaite teng kimtak a kihel in, Simte Tribe Council President B. Dongzalian Simte in hun zatna makaih a, mi tuamtuam in ngaihdan genkhawm in, maban kalsuan ding dan toh kisai kikum khawm uhi. Thutut kingah dan in, Manipur Government in stake holder-te kuamah theisak lou in District omsa teng 2 suah in District 7 bawlkhia a, hiai toh kisai in tuni tan a lungkim a omlou uhi.

 

Apaisa December 10, 2016 ni a Dimapur Town Hall a Zorth East Idol ah CCPur District apan Miss Jenny Zawnkhanhoih @ Jenny Thomte D/o Themlhai of Vengnuam, New Lamka in 1st Runners-up hihna la a, SSPP JHQ Lamka in Jenny Thomte lohchinna kipahpih mahmah in, kipahpihna thusuah bawl uhi. SSPP JHQ Lamka in Jenny Thomte kalsuanna etton tham sa in pawlpi leh mimal ana panpih kha teng tung a kipahthu gen in, maban ah a hong lohchin touh zel a deihsak thu uh taklang uhi.

 

Vincent Hekte Hmar in a bawl "Hrietthiem Zai" kichi music video album tuni sunnung dak 2:30 in JJ Memorial Hall, Rengkai Road ah hongkhiak in om a, zingchiang apan in a deih khempeuhte lei theih ding in zuakkhiak hiding hi. Hiai hun zatna ahihleh Hmar Artiste Association in inntekna la in, Paukhansuan Khuptong, 58-CCPur AC Intending Candidate in Chief Guest hihna toh uap in, mun tuamtuam apan deihsaktu leh ngainatu tamtak paikhawm uhi. Hun zatna ahihleh Roland Lalhmasuon in makaih in Lalvullien, President, HAA in vaidawnna thu gen a, James Songrolal Songate in album toh kisai pulak in Chief Guest in thugenna hun zang in "Hrietthien Zai" kichi album hongkhia a, PC Lalrawngbawl in Pathian kiang ah laankhia hi. Hiai album ah Vai la tel in la 7 om in, Full HD a kibawl hi a, album a la om teng Francis Lallawmum, Zoramthang Hrangate leh Kaia Paruolte te'n a phuah uh hi a, Doh Doh Records, Mwanlal Music Production leh So So Records zang a recording kibawl ahih banah Jeffery D. Tusing, Duduk Zote, Michael Chawnghau leh Jacky Khawmbung te'n nouneltak a videogramphy leh editing a bawl uh hi'n kigen hi. Chief Guest in a thugenna ah, HAA in hiai bang a platform hoihtak a piakna tung uah kipahthu gen in, Paite pau zang mahleh nam teng ai-oh a palai dia kisak sawm ahih dan gen in, lungtup mualsuahna dia kuapeuh in kithuahpihna pe ding in ngetna bawl a, album bawl te'n leng a zuakkhiakna ding ngaihtuah kawm a, a hoih thei bang pen a pan la a hasuan banah mi'n tha leh zung leh sum leh pai tamtak seng a haksatak a hon bawlkhiak uh kuapeuh in zahtak sak a, mawk copy thangsaklou a maban a hong lohchin touh zelna dia a disc leisak siausiau ding in ngetna bawl hi.

 

Bungmual Veteran Football Association (BVFA) saina in tuni'n Lalpuithluii Foundation School ground, Bungmual ah Under 50 Kg 9-men Football Tournament kipan a, mun tuamtuam apan team 17 kihel in Deccember 29, 2016 in zousiang ding uhi. Tuni sunma dak 11:30 in Opening Ceremony om a, Paukhansuan Khuptong, Social Worker in Chief Guest hihna toh uap in, M. Chinkhansong in vaidawnna thu gen a, S. Jamzathang, Adviser, BVFA apan thugen ngaihkhiakna om hi. Thutut kingah dan in, hiai tournament ah Lamka leh a sehvel apan team 17 kihel in Pool 4 in kikhen ua, tuni'n match 2 om in, masapen ah AFT leh Lamkanuai FC kimawl in AFT in 5-0 in vualzohna ngah ua, match 2na ah UUFC leh SSFC kimawl in UUF in 10-0 in vualzohna ngah hi. Group match teng December 21 in zohsiang hiding a, December 29, 2016 in final kimawlna leh closing ceremony om ding hi.

 

 

 

GAMSUNG THUTHANG

 

Huihpi leh vuahpi kithuah Cyclone Vardah kichi in Tamil Nadu state sung mallam pang leh Andhra Pradesh simlam pang nawk theiding dinmun a om nung in, tua huihpi leh vuahpi kithuah in minautang tenna mun lak nawkding a a kisak ziak in, Navy tel in Armed forces tamtak kiging sa in omlel uhi. Cyclone Vardah ahihleh tulel in Chennai khopi suahlam pang Km 330 a gamla ah omlel a, dakkal khat a Km 80 leh 100 kikal tungzou ding a hat a a nun ziak in, Tamil Nadu state solkal in tuni apan thuthak om masiah Chennai, Kancheepuram, Tiruvallur, leh Villupuram district sung mun khenkhat ah school leh college suty puang uh a, Cyclone ziak in Chennai khopi ah vuah tamtak zu in, Pulicat ah leng vuahtui nasatak a kia hin gen uhi. Cyclone Vardah ziak a siatna nasatak a tun khakding lauhna in, tuipi tung a ngaman mite kiang ah dakkal 48 sung tuipi tung a kuamah taikhe lou ding in theihsak hi ua,  Tamil Nadu Chief Minister Chief Minister O Panneerselvam in a state sung a State Disaster Management Authority toh panlak dingdan kikuppihna nei in, National Disaster Response Force leh armed force hunkhop thiltung om leh hutkhiakna nasem ding in mansa a koih in om uhi. Navy in leng thiltung deihhuailou om hun ah zat theihding in tuinuai lutsiam, Doctor, rubber boat, helicopter leh huhna van tuamtuam anntang, puanbuk, silh leh teen, damdawi leh blanket tel in mi 5000 vel zat theihding longpi ah koihkhawm in, hawmkhiak pah theihding a mansa in koih uhi.  Andhra Pradesh Chief Minister N Chandrababu Naidu leng tuni apan gulf gam tuamtuam vehdia zinding chih himahleh a khualzin sawmna tawpkik thak a, huihpi in electric post a mutpuk khak leh chi in, mun tuamtuam ah electric post leh cement tamtak zat theih ngal ding in Andhra Pradesh state sung ah koih in om hi.

 

Mumbai khopi nawl a om Aarey Colony kichihna mun ah helicopter lian lolou khat a tuahsiat ziak in, mi 1 si in, midang 3 in liamna tuak uhi. Police thusuak in a gendan in, tua helicopter ahihleh Pathianni sun a Mumbai khopi nawl a Goregaon kichihna mun a Aarey colony tungzawn a lenglai tuahsia hi a, helicopter a tuahsiat phet in a sung a tuang mi 4 tuangte lak ah mi 1 a mun ah si in, midang 3 helicopter kuangzak ziak a nasatak a a kat ziak in, tuahsiatna mun apan gamla lou a om Seven Hills hospital ah etkol in om uhi. Tuahsia tuak helicopter ahihleh Robinson R44 Astro chopper kichi hi a, Aman Aviation in a etkol uh ahihban ah Pathianni a sunhun chimthawina zangte zat hin gen uhi. Tua lenna bangziak a tuahsia hihiam chih puankhiak hikei mahleh, laktheih ding om nawnlou phial a kangsia hin gen uhi.

 

Income Tax officials leh Delhi Police kithuah te'n kallui a Delhi khopi sung a Axis Bank branch khat a luh hun ua, Fake account zangtu 44 a matkhiak nung un, tu in South delhi a om Greater Kailash-I a law firm khat a luh na uah, inn sung ah dangka Crore 13 mukhia in, huai lak ah sum note thakte Crore 2.5 phazou chi uhi. Police thusuak in a gendan in,  tua law Form buluh a om hun ahihleh Pathianni nitak dak 10:30 hi a, tua law firm a buluh hun un innsung a Almirah leh Suitcase dung ah a sumtang in dangka Crore 13.56 muhkhiak in om chi hi. Tua Law firm apan muhkhiak a omdangka crore 13.56 lak ah sum note thak tamtak leng tel in, sum note thak teng Crore 2.5 pha in, a dangteng sum note luingen hi uhi. Police leh income tax department in tua law firm a luh hun un, building sung a room omte tamzaw kikalh vek a, tua mun enkoltu caretaker chihlouh kuamah muhding omlou hin gen uhi. Tua Law Firm neitu ahihleh Rohit Tandon hi a, IT department kha nih paita in Rohit Tandon tenna inn ana buluh kha ngei uh a, huai hun in leng muhna kichian omlou dangka Crore 19 vel Bank a fixed deposit a koih a om ahihdan musuah uhi. 

 

 

 

 

GAMDANG THUTHANG

 

Egypt capital Cairo khopi sung a Christian biakinn khat ah bomb hattak a puahzak ziak in, a tawmpen in mi 25 in sihna tuak uhi. Thusuak in a gendan in, bomb puahzakna mun ahihleh Cairo khopi sung a St Mark biakinn hi a, bomb a puahzak phet in tua mun a Pathian bia a omlai nupi leh naupang tamtak tel in mi 25 si in, midang hunkhop in liamna tuak uh chi hi. St Mark's Cathedral a bomb puahna mun ahihleh numeite Pathian biakna mun St Peter's church sung hi a, tua bomb puahzak na toh kisai in, Muslim leh Christian tamtak in lungkim louhthu puang in Cairo khopi sung ah kiphinna pan ngal uhi. , Bomb puahzak ziak a lungkimlou a kiphinna neite'n President Abdel Fattah el-Sisi leh Egypt Inetrior Minister Magdy Abdel Ghaffar kitawp ding in phutna nei uh a, venbitna ginatak piak a omlouh ziak ua, bomb puak hidan a ngoh in a kitawp ding uh ngiat uhi. Thiltung toh kisai in kuamah in amau khutnung hidan in puangkei mahle uh, ISIL gumtu khenkhat in Social Media ah lopna nei uh hin kigen hi.  Egypt gamsung a Coptic Christians te' ahihleh tulel in Egypt milip 90 million omlak ah 10 percent vel luah uh hin kigen hi.

 

Nigeria gamsung a khopi poimoh mahmah Uyo khopi ah Christian tamtak in biakinn sung a Pathian biakna a neihlai un, thakhat in tua biakinn tung kichim in, huai ah mi 60 val in sihna tuak uhi. Thiltunna mun ahihleh Nigeria gamsung a Uyo kichihna mun a, evangelical Reigners Bible Ministry te biak inn hi a, Local Bishop khat ordained nah un zat ahihlaitak a tua biakinn tung kichim hin gen ua, tu in mi 60 in sihna tuak uh ahihdan chet in omta a, himahleh sihna tuakzah punbeh thei gige hin gen uhi. Thiltun hun in ahihleh biakinn sung ah mi 1000 val om ding ua gintak hi a, thiltun hun in a sung ah  Governor Udom Emmanuel leng om mahleh vangphat huaitak in tua biakinn tung kichim in delhkhum khalou hin gen a, President Muhammadu Buhari in thiltung poi a sakthu gen in, biakinn kibawl lai a bangchi da a bawl a om hiam chih suizui hiding chi hi. September 2014 in leng Televangelist min thang mahmah TB Joshua biakinn Lagos a om a kichip ziak in, huai ah South Africa mi 84 tel in mi 115 in sihna ana tuak ngeita uhi.

 

Italy solkal in Refugee te tungtang etthak hidia a sawm tungtang banah zan zek a Italy Constitution khek thakna ding deih a PM Matteo Renzi in Parliament a a luikhiak a paisuak zohlouhnung a, a kitawp toh kiton in, Italy President in Italy PM thak ding in Paolo Gentilo guang hi. Constitution bawlthak ding deihna a referendum lakna neih ahihhun ah a paisuak zohlouh ziak a Italy PM Matteo Renzi in kitawpna a piak nung in, Italy in PM neilou in ni tamlou sung om mahleh, Italy President panlakna ziak in, Prime Minister thakding in tulel a Italy Foreign Minister hihna lenlel kum 62 a upa Paolo Gentiloni guan in om hi. PM thakdia guan a om Gentiloni in a tutna a luah toh kiton in, Italy in gamdang te toh kisaikhakna a neihte banah gamsung a galtaite dinmun etkai hiding chin thupuan bawl a, himahleh bangchi bang a panlak sawm hiam chihbel genlou hi.

Read 951 times
Login to post comments