You are here: HomeNewsGeneralAngels Vision News | March 16, 2017

Angels Vision News | March 16, 2017

Written by  Angels Vision Published inGeneral Thursday, 16 March 2017 18:59

Board of Secondary Education Manipur (BSEM) nuai a Class X sinlel te’n zingchiang in High School Leaving Certificate (HSLC) Exam pan ding ua, CCpur District ah CCPur District Private Centre Committee etkaina nuai ah exam neih hiding a, Exam Centre 2 zat ahih ding banah CCpur District apan Candidate 2,906 leh External Candidate 28 te’n exam pe ding uhi. Thutut kingah dan in, tutung HSLC Exam ah Main Centre ding in Ebenezer Academy zat hinawn ding a, Sub-Centre ding in Don Bosco Hr. Sec. School zat ahih ding banah invigilator 110 in CCPur District Private Centre Committee makaih in exam neihna hoihtak in enkai ding uhi.

Examination Main Centre Ebenezer Academy Block A ah Roll No. 17,302 apan 17,993-te tu ding ua, B-Block ah Roll No. 17,994 apan 18,518-te tu ding ua, Main Centre ah Candidate 1,217 te’n exam pe ding uhi. Sub-Centre Don Bosco Hr. Sec. School A-Block ah Roll No. 18,519 apan 19,118 te tu in, B-Block ah Roll No. 19,119 apan 19,546 kikalte tu ding ua, C-Block ah Roll No. 19,547 apan 20,208 te banah External Candidate Roll No. 101 apan 128 te tu ding ua, Sub-Centre ah Candidate 1,691 te’n exam pe ding uhi. Nikum a bang in tukum in leng Bar Code Answer Sheet zat hinawn ding a, nikum a sang in tukum in strict zaw ding a, answer sheet fill-up khialte answer sheet dang piak hilou ding uhi. Tuaban ah, hundang bangloutak in tukum in student organization hi’n organization khat peuhpeuh in exam centre a veh uh phalsak hilou ding a, exam centre veh nuam te’n DC/CCPur ah phalna kichian a lak masak uh ngai ding hi’n kigen hi. Exan Centre-te Police te’n hoihtak a vengbit in, Candidate-te exam centre pua ah hoihtak in check masak hiding ua, exam hall sung ah electronic vanzat himhim tawilut phal hilou ding hi. Exam ahihleh zinglam dak 9:00 geih in kipan ding a, candidate te’n English subject exam ding ua, HSLC Exam ahihleh April 4, 2017 in zohsiang hiding hi’n kigen hi.


XXXXXXXX


Malaria department nuai a Multipurpose Worker (MPW) contract basis nikum a regularised a om te’n tuni’n Dr. Kimngaihching, CMO/CCPur makaih in GNM Training School Hall ah a khatveina ding in Consultative Meeting nei in, maban a nna septouh ding dan toh kisai kikum uhi. Thutut kingah dan in, nikum kum tawp in Malaria Department nuai a Multipurpose Worker (MPW) Contract Basis a sem mi 32 regularised in om ua, amau te’n leng joining report peta in nasep leng panta ua, maban nasep ding dan toh kisai a theih tuak tuamtuam omte hoihtak a sepsuah ahih theihna ding tupna a CMO/CCPur makaih a tuni a consultative meeting neih a om hi’n kigen hi. Hiai hun ah MPW dia lakthak a om mi 32-te lak ah mi 15 kihel in, midangte ahihleh Yaosang ziak in kihel theilou ua, Thangthianmuan, DVB Consultant in nasep ding dan toh kisai pulak in Dr. Kimngaihching, CMO/CCPur in hasotna thu gen hi. Aman hiai nna sepna ding in ginomna leh chihtakna poimoh petmah ahih dan gen in, Multipurpose Worker-te nasep pen Blood Slide kia hilou in Sub-Centre a function theihna dia mohpuakna liantak nei uh ahih dan gen a, tu in thoukang hong om panpanta ahihna ah kuapeuh mahni sepna mun chiat a om a, nna a tam thei lam sep sawm a panla ding in hasuan hi.


XXXXXXXX


District AIDS Prevention & Control Unit (DAPCU) in February kha report suahkhai in, February kha sungin CCpur District sung ah HIV Positive 10 muhkhiak a om ahih dan taklang hi. Report in a taklat dungzui in, tu February kha in mi nautang (General client) HIV test 663 omlak Positive 10 mukhia ua, amaute lak ah mi 9 in ART Centre ah registration bawl ua, ART damdawi nepan ngal uh hi’n taklang hi.Female Sex Worker 149 leh Injecting Drug User 131 HIV test bawl ua, HIV Positive bel muhkhiak omlou a, Nau paai (ANC) HIV test 618 omlak ah Positive khat mukhia ua, himahleh ART Centre ah Registration bawl nailou hi’n taklang hi. Tuaban ah, tu February kha sungin in HIV vei naunei omlouh banah naungek (infant) piangsa mi 6-te HIV test bawl mahle uh positive omlou hi’n leng taklang uhi Cumulative Report kimu dan in, tulel in ART Centre a PLHIV Registration bawl mi 3,584 om in, ART damdawi ne mi 1,533 omlel a, follow-up theihlouh mi 169 om hi’n report in taklang a, khamtheih hih zongsang OST Centre a registration bawl mi 1,086 a om banah OST damdawi ne mi 1,074 om a, tuni tan in OST damdawi tungtawn a khamtheih sal apan suakta mi 114 omlel hi’n leng report in taklang hi.


XXXXXXXX


Mrs. Vung Mary, DCM makaih in tuni’n Town Area sung a om ASHA Worker te’n Monthly Review Meeting nei uhi. Hiai hun ah Town Area a om ASHA Worker mi 64-te kimtak a kihel in, ASHA Worker te’n kha paita sung a sep leh bawl tuamtuam a neihte uh toh kisai in report pia ua, maban a septouh ding thil tuamtuam omte leng hoihtak a sepsuah ahih theihna dia panlak ding dan toh kisai nouneltak in kikum khawm uhi. Maban ah leng Fund omkei mahleh hichibang review meeting neih touh zel hiding in gen uhi.


XXXXXXXX


All Tribal Women Union (ATWU) makaih numei pawl te’n District Hospital Morgue kong a Tribal Martyr-te luang tutpih a niteng a thumkhawmna a neih uh paitou zel in, tuni apan in gam leh leitang a ding banah tulel a Police in a mat mi 27 te’n damtak a jail a pawtsan theihna ding un ann ngawl thumna pan uhi. Ann ngawl thumna ahihleh zingkal dak 7:00 a pan in, sun dak 12:00 tan nei ua, tuni in leng mun tuamtuam apan mi tamtak paikhawm in, gam leh leitang a ding in Pathian buan in thumkhawmna nei uhi. ATWU makaih numei pawl te’n apaisa February 8, 2016 apan District Hospital Morgue a sulphate luang tutpih a thumkhawmna a neih uh tuni tan in tatsatlou in paizomtou zel lai a, niteng in mun tuamtuam apan mipi 70 leh 100 kikal paikhawm zou gige in, lasak khawmna a neih banuah slogan tuamtuam sam in, Manipur singtangmi te’n a tuam a vaihawmna a kineih theihna ding uleh gam leh leitang a dia hinna ana pia salpha te’n a dik a vaihawmna a ngah theihna ding un Pathian buan in thumkhawmna nei gige uhi. Ann ngawl thumna ahihleh zingchiang in leng sutzop touh hilai ding hi’n gen uhi.


XXXXXXXX 

YPA General Headquarter in thupuan a bawl toh kisai in KNO nuai a om Zomi Revolutionary Front (ZRF) in Roger Zomi, Information & Publication min zang in hilhchetna bawl hi. Hilhchetna thusuah kimu in a taklat dan in, P. Songlianlal in Bethel Veng, New Lamka ah meeting a neihna hun ah Mr. Chinminthang leng va tel a, Mr. Chinminthang in “Pa Lal 2012 Election a leng nang a dia hah pan a ana pang ka hi, tu tung leng nang chih chih a din kana tai/kipei ding” va chi a, huchi ahih leh chi in Pu P. Songlianlal lawinu’n thautui man ding in Rs. 500 pia a, a zing ni mah in Chinminthang in P. Songlianlal kiangah Rs. 2000 va la nawn hi’n taklang hi. Mr. Chinminthang leh a lawinu Mrs. Ngaineihpar in P. Songlianlal kiang kia hilou in Candidate dangte kiang ah leng sum ngen a vial tai tai a hi chih leh ama chih na a kipei/tailou a hi uh chih theih khiak ahih nung a Chinminthang in sum a lak teng leh kik dia theisak ahih dan taklang a, P. Songlianlal in Chinminthang vau hilou in aman a khemziak a hehtha suak a sum lak teng leh kik dia a chih mah hi’n taklang a, Chinminthang in leng P. Songlianlal kiang ah a sum lak lehkik khinta hi. YPA in thutak kanchian masalou a pia hihchi bang mi dukdak lou Chinminthang thugen thutak a ngai a P. Songlianlal tung a mohpaihna thupuan a bawl pen ZRF/KNO in theisiam theilou a, poi leng sa hi. YPA in khentuam nei hiam ? Election toh kisai a pimang, inn suksiat, inn hal, inn buhluh, gari hal, gari suksiat bang chidan a YPA in mohpaih tuam / mohpaih louh tuam neithei hiam chih ZRF/KNO in dotna bawl a, YPA in mohpaihna thupuan a bawl a zuk kik kei leh ZRF/KNO in thupuan bawltute tong ah a kituak bang bang action la ding hi’n taklang hi. 11th Manipur Legislative Assembly Election toh kisai a FREE and FAIR Election om theihna dia panla Organisation tuam tuam, saptuam leh vengchih lehkhochih a panla te teng tung ah ZRF/KNO in kipak thu puang in maban election chiang a le hichibang mah a pan honla ton zeI dingin ngetna in ngetna bawl hi. Election zoh nung a thil gilou hihte tengteng ZRF/KNO in mohpaih in, Lamzang khua a mi 3 pimang a soisate, Lamzang khua a numei naupang va sulau a pikhiate, Lamzang hausapa Pu S. Suankhogin Ngaihte in va phelsiatsa a, a bike va hal siatsakte, NPP Candidate Pu t. Phungzathang inn va buluh a compound sung a bike/active va suksiatsakte banah Hebron Veng, New Lamka a Pu S. Suankhogin Ngaihte inn va halte ZRF/KNO in mohpaihna sangpen a mohpaih in, hiai bang mulkimna bei a gamtatnate kuaman hih nawnIou dingin leng ZRF/KNO in theisakna leh ngetna a bawl hi. Election ziak a kitot, kisel leh kivauna te ZRF/KNO in leng a deih kei a tunung chiang a leng mimal hi’n Organisation hita Ieh Election toh kisai hichi bang thilchiin hoihlou Ieng ching nonlou a top san ding in theisakna leh ngetna bawl hi.


XXXXXXXX

Read 820 times
Login to post comments